អ្នកអាចសក្តិសមចំពោះព្រះវិហារបរិសុទ្ធ

ដោយអែលឌើរ ឃ្វីនធិន អិល ឃុក

ក្នុងកូរ៉ុមនៃពួកសាវកដប់ពីរនាក់

ដកស្រង់ចេញពីសុន្ទរកថាសន្និសីទទូទៅខែ មេសា ឆ្នាំ ២០១៦ ។

វាជាបំណងប្រាថ្នាដ៏ធំរបស់យើងថា សមាជិកសាសនាចក្រនឹងរស់នៅដោយសក្តិសមតាមប័ណ្ណចូលព្រះវិហារបរិសុទ្ធ ។ សូមកុំយល់ថា ព្រះវិហារបរិសុទ្ធគឺជាគោលដៅមួយដែលនៅដាច់ឆ្ងាយ និងមិនអាចសម្រេចបានឡើយ ។ សូមពិភាក្សាជាមួយប៊ីស្សពរបស់អ្នក សមាជិកភាគច្រើនអាចសម្រេចបានតាមកិច្ចតម្រូវសុចរិតទាំងអស់នៅក្នុងរយៈពេលមួយដ៏ខ្លី ប្រសិនបើពួកគេប្តេជ្ញាចិត្តឲ្យមានគុណសម្បត្តិ និងប្រែចិត្តទាំងស្រុងពីអំពើរំលងនានា ។ ការណ៍នេះរួមមានការមានឆន្ទៈអភ័យទោសដល់ខ្លួនឯង ហើយពុំផ្តោតលើភាពឥតគ្រប់លក្ខណ៍ ឬអំពើបាបរបស់ខ្លួន ថាជាគុណវិបត្តិរារាំងយើងពីការចូលរួមក្នុងព្រះវិហារបរិសុទ្ធដ៏ពិសិដ្ឋនោះឡើយ ។

ដង្វាយធួនរបស់ព្រះអង្គសង្គ្រោះបានធ្វើឡើងសម្រាប់កូនចៅទាំងអស់របស់ព្រះ ។ ពលិកម្មដ៏ប្រោសលោះរបស់ទ្រង់បំពេញនូវតម្រូវការនៃសេចក្តីយុត្តិធម៌សម្រាប់អស់អ្នកដែលប្រែចិត្តពិតប្រាកដ ។ ព្រះគម្ពីរពិពណ៌នាការណ៍នេះក្នុងរបៀបមួយដ៏អស្ចារ្យបំផុត ៖

« ទោះបើអំពើបាបរបស់អ្នករាល់គ្នាខ្មៅកខ្វក់យ៉ាងណាក្តីក៏វាប្រែសដូចសំឡីវិញដែរ » ( អេសាយ ១:១៨ ) ។

ហើយយើងជាព្រះអម្ចាស់មិនចាំពី [ អំពើបាបទាំងនោះ ] ទៀតទេ » ( យេរេមា ៣១:៣៤ ) ។

យើងសូមបញ្ជាក់ដល់បងប្អូនថា ការរស់នៅតាមគោលការណ៍សុចរិតនឹងនាំមកនូវសុភមង្គល ការបំពេញការសន្យា និងភាពសុខសាន្តដល់បងប្អូន និង គ្រួសារបងប្អូន ។ សមាជិកទាំងចាស់ទាំងក្មេងធ្វើការបញ្ជាក់នូវភាពសក្តិសមរបស់ខ្លួនឯង នៅពេលពួកគេឆ្លើយសំណួរសម្ភាសប័ណ្ណចូលព្រះវិហារបរិសុទ្ធ ។ កិច្ចតម្រូវចាំបាច់នេះគឺ ដើម្បីបង្កើនទីបន្ទាល់របស់យើងអំពីព្រះជាព្រះវរបិតា ព្រះរាជបុត្រាទ្រង់គឺព្រះយេស៊ូវគ្រីស្ទ និងការស្តារឡើងវិញនៃដំណឹងល្អរបស់ទ្រង់ និងបទពិសោធន៍នៃការបម្រើរបស់ព្រះវិញ្ញាណបរិសុទ្ធ ។

ចូរដឹងថា ពួកយើងមានបំណងចិត្តខ្លាំងប៉ុណ្ណាដើម្បីឲ្យបុគ្គលម្នាក់ៗអាចធ្វើការផ្លាស់ប្តូរដ៏ចាំបាច់ដើម្បីមានគុណសម្បត្តិសម្រាប់ព្រះវិហារបរិសុទ្ធ ។ សូមគិតដោយស្មោះពីចិត្តថា តើបងប្អូនកំពុងឈានដល់ចំណុចណាហើយ សូមស្វែងរកការណែនាំពីព្រះវិញ្ញាណ ហើយពិភាក្សាជាមួយប៊ីស្សពរបស់បងប្អូនអំពីការរៀបចំខ្លួនទៅព្រះវិហារបរិសុទ្ធ ។ ប្រធាន ថូម៉ាស អេស ម៉នសុន ( ១៩២៧–២០១៨ ) បានមានប្រសាសន៍ថា « គ្មានគោលដៅណាមួយរបស់អ្នកសំខាន់ជាងការខិតខំឲ្យមានភាពសក្តិសម ដើម្បីទៅព្រះវិហារបរិសុទ្ធឡើយ » ។^១

ខ្ញុំសូមអធិស្ឋានថា យើងម្នាក់ៗនឹងគោរពព្រះអង្គសង្គ្រោះ ហើយធ្វើការផ្លាស់ប្តូរចាំបាច់នានាដើម្បីឃើញថា បងប្អូននៅក្នុងព្រះវិហារបរិសុទ្ធដ៏ពិសិដ្ឋរបស់ទ្រង់ ។ នៅពេលធ្វើដូច្នោះ យើងអាចសម្រេចបាននូវគោលបំណងដ៏បរិសុទ្ធរបស់ទ្រង់ ហើយរៀបចំខ្លួន និង គ្រួសាររបស់យើងសម្រាប់ពរជ័យទាំងអស់ដែលព្រះអម្ចាស់ និងសាសនាចក្ររបស់ទ្រង់អាចផ្តល់ឲ្យនៅក្នុងជីវិតនេះ និងភាពអស់កល្បជានិច្ច ។

កើតនៅ ឡូហ្គិន រដ្ឋ យូថាហ៍ នៅថ្ងៃទី ៨ ខែ កញ្ញា ឆ្នាំ ១៩៤០ ។
បានលេងទាំងកីឡា បាល់ឱបនិងកីឡាវាយកូនបាល់ក្នុងការប្រកួតយកពានរង្វាន់រដ្ឋនៅក្នុងវិទ្យាល័យ ។
ពីឆ្នាំ ១៩៦០ ដល់ ១៩៦២ លោកបានបម្រើនៅក្នុង បេសកកម្មចក្រភពអង់គ្លេស ហើយអែលឌែល ជែហ្វ្រី អ័រ ហូឡិន គឺជាដៃគូម្នាក់របស់លោក ។
បានរៀបអាពាហ៍ពិពាហ៍ជាមួយនឹង ម៉ារី ហ្គាតឌី នៅក្នុងព្រះវិហារបរិសុទ្ធ លូហ្គែន យូថាហ៍ នៅថ្ងៃទី ៣០ ខែ វិច្ឆិកា ឆ្នាំ ១៩៦២
បានគាំទ្រជាសមាជិកក្នុង កូរ៉ុមនៃពួកសាវកដប់ពីរនាក់ នៅថ្ងៃទី ៦ ខែ តុលា ឆ្នាំ ២០០៧
មាន កូន ៣ នាក់ និង ចៅ ១១ នាក់