ការជួបប្រទះនឹងសាសនាចក្រដោយចៃដន្យ
ដានីយ៉ែល អ័រ ថមសុន រដ្ឋកាលីហ្វ័រញ៉ា ស.រ.អា.
រចនារូបភាពដោយ អេលែន ហ្គានស៍
ថ្ងៃមួយ អំឡុងពេលកំពុងរកមើលកន្លែងរត់ហាត់ប្រាណ នោះខ្ញុំបានសម្រេចចិត្តសាកល្បងរត់នៅចំណតរថយន្តរបស់ព្រះវិហារនៅក្នុងភូមិរបស់ខ្ញុំ ។ ខ្ញុំចូលចិត្តវា ដោយសារវាមានពន្លឺភ្លើង និងមានចាក់បេតុង ។ ខ្ញុំរកឃើញថា ការរត់ជុំវិញអគារនោះពី ១០ ទៅ ១៥ ដងស្មើនឹងការរត់ចម្ងាយ ៤.៨ គីឡូម៉ែត្រនៃការហាត់ប្រាណរបស់ខ្ញុំ ។
ការរត់របស់ខ្ញុំនៅចំណតនោះបានបន្តជាទៀងទាត់អស់រយៈពេលបីឆ្នាំ ។ ពីពេលមួយទៅពេលមួយទៀត ខ្ញុំបានឃើញមនុស្សនៅចំណតនោះ ដោយសារជួនកាលខ្ញុំរត់នៅអំឡុងពេលការប្រជុំព្រះវិហារ និងសកម្មភាពដទៃទៀត ។
ជាច្រើនលើកច្រើនគ្រា ខ្ញុំមានការបំផុសគំនិតថា ខ្ញុំត្រូវនិយាយជាមួយនរណាម្នាក់អំពីសាសនាចក្រ ប៉ុន្តែខ្ញុំពុំដឹងថាត្រូវធ្វើដូចម្តេចឡើយ ។ នៅតាមផ្លូវពេលខ្ញុំត្រឡប់មកពីធ្វើការវិញនាល្ងាចមួយ ខ្ញុំបានសម្រេចចិត្តឈប់ ហើយសម្លឹងរកមើល ក្រែងខ្ញុំអាចរកឃើញនរណាម្នាក់នៅទីនោះ ។ នៅពេលខ្ញុំបានដើរទៅក្នុងអគារសាសនាចក្រ ខ្ញុំបានជួបពួកអ្នកផ្សព្វផ្សាយសាសនា នៅពេលពួកគេបានបញ្ចប់ការសម្ភាសន៍ជាមួយប្រធានបេសកកម្មរបស់ពួកគេ ។ ខ្ញុំបានណែនាំខ្លួនខ្ញុំ ហើយបានអង្គុយនៅលើកៅអីត្រង់ច្រកដើរនោះ ។ នោះជាកន្លែងដែលពួកគេបានបង្រៀនខ្ញុំជាលើកដំបូងអំពីមេរៀននៃដំណឹងល្អ ។
អស់រយៈពេលពីរសប្តាហ៍ជាងបន្ទាប់មក ខ្ញុំបានបន្តជួបនឹងពួកអ្នកផ្សព្វផ្សាយសាសនា ។ នៅពេលខ្ញុំបានចូលរួមពិធីសាក្រាម៉ង់ សមាជិកនៅវួដនោះបានបង្ហាញសេចក្តីស្រឡាញ់ ការទទួលយក ការស្វាគមន៍ និងការលើកទឹកចិត្តដល់ខ្ញុំ ។ នៅពេលខ្ញុំបានគិតអំពីអ្វីដែលខ្ញុំកំពុងរៀន នោះខ្ញុំបានដឹងថា ការចង់ដឹងចង់យល់របស់ខ្ញុំអំពីសាសនាចក្របានអភិវឌ្ឍទៅរកតម្រូវការឲ្យខ្ញុំសម្រេចចិត្តទទួលបុណ្យជ្រមុជទឹក ។ ខ្ញុំបានទទួលអារម្មណ៍ថា ខ្ញុំត្រូវបានបំផុសគំនិតដោយព្រះវិញ្ញាណឲ្យធ្វើនូវអ្វីដែលព្រះវរបិតាសួគ៌សព្វព្រះទ័យឲ្យខ្ញុំធ្វើ ប៉ុន្តែខ្ញុំបានបន្តពុះពារជាមួយនឹងការសម្រេចចិត្តនោះ ។ ទីបំផុតខ្ញុំបានជ្រមុជទឹកនៅខែ វិច្ឆិកា ឆ្នាំ ២០០១ នៅអាយុ ៣៦ ឆ្នាំ ។
ការសម្រេចចិត្តរបស់ខ្ញុំដើម្បីរត់នៅក្នុងចំណតរបស់ព្រះវិហារនោះហាក់ដូចជាគ្រាមួយមិនគួរឲ្យអស្ចារ្យឡើយ ។ ប៉ុន្តែវាបាននាំខ្ញុំទៅកាន់ពរជ័យដ៏មហិមារបស់ខ្ញុំ ៖ គឺសមាជិកភាពនៅក្នុងសាសនាចក្រ, ការជួបនឹងភរិយាដ៏អស្ចារ្យរបស់ខ្ញុំគឺ ជេននីហ្វើរ ហើយបានផ្សារភ្ជាប់នឹងគាត់សម្រាប់ពេលនេះ និងអស់កល្បជានិច្ចនៅក្នុងព្រះវិហារបរិសុទ្ធ សាន់ឌីអាហ្គូ កាលីហ្វូញ៉ា ។
ដូច្នេះប្រសិនបើដោយចៃដន្យអ្នកបានឃើញនរណាម្នាក់ហាត់ប្រាណនៅក្នុងចំណតនៃសាលាប្រជុំរបស់អ្នក សូមណែនាំខ្លួនរបស់អ្នកឲ្យគាត់ស្គាល់ ! អ្នកពុំដឹងឡើយ — ថាមិនយូរមិនឆាប់ គាត់អាចក្លាយជាសមាជិកថ្មីនៅក្នុងវួដរបស់អ្នក !