Ngaahi Peesi Fakalotofonuá

Ko e Mālohi ʻo e Fakaleleí

Alice Fifita

ʻOku akoʻi kitautolu ʻi he Palaimelí ʻo kau ki he ʻofa ʻoku maʻu ʻe he Tamai Hēvaní ki Heʻene fānaú. ʻOku tau ako naʻá Ne tuku mai Hono ʻAlo pē taha ne fakatupú ke pekia maʻatautolu, ka tau toe moʻui. Naʻe ʻikai ke u teitei ʻilo ʻa hono lahi e mahuʻinga ʻo e ʻilo ko ʻení kae ʻoua kuó u aʻusia e tuʻunga māʻulalo tahá.

ʻI he ʻaho ko ia hili e Sāpate Faʻē ʻi he 2016, naʻá ku ʻilo ai ne u feitama. Ko e tokolahi ʻo e niʻihi ʻoku teuteu hoko ko ha faʻē foʻoú ʻoku nau fiefia, ka naʻe ʻikai ke u pehē au. Naʻe ʻikai ke u mali mo e tamai ʻeku tamá. Naʻá ku faihala ʻi he ʻilo pau ki he Tamai Hēvaní pea ko ʻeni ʻe ʻomi ha kiʻi laumālie taʻehalaia ki he tūkungá ni. Naʻá ku feinga mo hoku kaumeʻá ke lelei e meʻa kotoa, ka ʻi ha ngaahi māhina siʻi pē ʻo ʻeku feitamá, naʻá ne liʻaki ai au.

Naʻe hoko ʻa e meʻá ni ke u mamahi ai. Ne u aʻusia e tuʻunga māʻulalo taha ʻi heʻeku moʻuí pea naʻe ʻikai ke u fakapapauʻi ʻa e meʻa ke u faí. Naʻá ku fefaʻuhi mo e ngaahi ongo ko ia ʻoku ʻikai haʻaku mahuʻingá koeʻuhí ko e founga fakamamahi ne fakangata ʻaki ʻe hoku kaumeʻá ʻema feohí. ʻI heʻeku fakakaukauloto atu ki he mātuʻa tāutahá, ne u tūʻulutui ai ʻo tangi ki he Tamai Hēvaní mo kolea ha fakamolemole ki heʻeku ngaahi angahalá. Neongo ʻeku loto-hohaʻa ki he kahaʻú mo ʻeku ongoʻi halaia ʻi he fakatupu houhau ki he ʻOtuá, ka naʻe malava ke u maʻu ha ongo fakaʻofoʻofa ʻo e houngaʻia ʻi he faingamālie ko ia ke u hoko ko ha faʻē ʻi he moʻui koʻení.

Ko e meʻa faingataʻa taha kuó u fouá ko e hala ko ia ʻo e fakatomalá. Naʻe mafasia hoku lotó ʻi heʻeku ngaahi angahala ne teʻeki fakamolemoleʻí. Naʻá ku lotua he faingamālie kotoa pē ne u maʻú, ha fakamolemole ʻi heʻeku fakatupu houhau ki he Tamai Hēvaní. Naʻá ku lotua e mālohi ke fakamolemoleʻi hoku kaumeʻa kuo ma ʻosí mo hono kaumeʻa lolotongá. Naʻá ku lotua ha mālohi ke u lavaʻi lelei ʻa ʻeku feitamá. Naʻá ku lotua ha kiʻi pēpē moʻui lelei he ʻikai uesia ʻi heʻeku ngaahi kovi mo e palopalema fakatāutahá.

Neongo naʻe hul u ʻeku mamahí, ka naʻe tupu ʻi heʻeku aʻusia e tuʻunga māʻulalo tahá ke u lotu ʻo lahi ange ʻi ha toe taimi kimuʻa ʻi heʻeku moʻuí. Naʻe hoko hono kamata e laine fetuʻutaki ko ia mo e ʻOtuá ko e meʻalelei taha ia ne hoko mai kiate aú, koeʻuhí ne faifai peá u loto fakatōkilalo feʻunga ke fakafanongo ki he meʻa naʻá Ne feinga ke fakahā mai ʻi ha ngaahi taʻu lahi. Ne u ʻilo ai naʻá Ne ʻofa ʻiate au. Ne u ʻilo ai ʻEne ʻaloʻofá mo e angalelei taʻefakangatangatá. Ne u ʻilo ai ʻoku feʻunga ʻEne ʻofá mo e ʻaloʻofá ke fakamaʻa ʻeku ngaahi angahalá pea ko Hono ʻofefine au pea ʻokú Ne fie maʻu ʻa e lelei tahá maʻaku. Naʻe ʻomi ʻe he ʻilo koʻení ʻa e lototoʻa ne u fie maʻú, ke vete ai ʻeku ngaahi angahalá ki heʻeku pīsopé. Naʻá ku ʻiloʻi he ʻikai fakamoʻui kakato au kae ʻoua leva kuó u fakatomala kakato, pea he ʻikai ke u lava ʻo hoko ko e faʻē naʻe fie maʻu heʻeku tama teʻeki fanauʻi maí, kae ʻoua leva kuo fakamoʻui kakato au.

Naʻá ku fokotuʻu ʻeku ngaahi taumuʻá:

1. Talanoa ki heʻeku pīsope fekauʻaki mo hoku tūkunga lolotongá.

2. Toe maʻu ʻeku lekomeni temipalé, pea

3. Moʻui taau ki he lekomeni ko iá he toenga ʻo ʻeku moʻuí.

He ʻikai te u lavaʻi ia ka ne taʻeʻoua e tokoni ʻeku Fakamoʻuí. Ko Ia pē naʻe mahino moʻoni ki ai e meʻa naʻá ku fouá; ʻoku matuʻaki faingataʻa e faʻahinga tūkungá ni pea fonu ʻi he ngaahi ongo fakaeloto kehekehé, loto-hohaʻá, mo e manavasiʻí. Neongo pe ko e hā e tūkunga māʻulalo taha pea mo e puputuʻu naʻá ku ongoʻí, ka naʻá ku ʻiloʻi ʻe lava fou ʻi he Fakalelei ʻa Sīsū Kalaisí, ke mahino kiate Ia hoku tūkungá ʻo lahi ange ʻi ha toe taha ʻi he māmaní.

Naʻe faingofua ange e ngaahi ʻaho ʻe niʻihi, pea ko e lahi tahá ne faingataʻa. Ko e ngaahi ʻaho faingataʻa ko iá ne u fakakaukauloto ai ki he Palōfita ko Siosefa Sāmitá mo hono uaifi ko ʻEmá ʻi he ngaahi ʻahiʻahi mo e ngaahi mamahi lahi ne na kātekina ke fakafoki mai ʻa e ongoongolelei ʻo Sīsū Kalaisí ki he mamaní. Naʻá ku manatu leva ki he fakalea ʻo e taha ʻo e ngaahi hiva palaimeli ne u manako aí;

Fakahā fēfē ʻe he Tamaí ki māmaní,

E hala ke foua?

ʻOmi e ʻAló ke fononga mo e faʻahinga ʻo e tangatá,

ʻI māmani, ke lava ke tau ʻilo . . .

Ko e hā Hono finangaló,

Mo e lau e folofolá?

Ko e tuí, ʻamanakí, moʻui hangē ko Hono ʻAló,

Tokoniʻi e niʻihi kehé ʻi honau ʻalunga,

Ko e hā hono finangaló?

MOʻUI HANGĒ KO HONO ʻALO!

Naʻá ku faingataʻaʻia lolotonga ʻeku māhina fā ki he fitu ʻi heʻeku feitamá. Naʻá ku tangi ki heʻeku Tamai Hēvaní ke maʻu ha ivi ke u hoko atu. Naʻá ku faʻa ongoʻi fakaʻofaʻia ʻiate au, peá u manatu ai ki he faingataʻaʻia ʻa Kalaisi ʻi Ketisemaní, ʻi hono fua e angahala ʻa e faʻahinga kotoa ʻo e tangatá. Ko ʻeni kuó u fakaʻofaʻia pē ʻiate au mo e meʻa naʻá ku fouá, ka naʻe hulu ange e mamahi ʻa hotau Fakamoʻuí pea ʻikai ha lāunga. Naʻá Ne talangofua maʻu pē ki he finangalo ʻo e Tamaí pea ʻofa mo fakamolemoleʻi ʻa e taha kotoa tautautefito kiate kinautolu ne nau tutuki Ia ki he kolosí. Kapau naʻe lava ʻe Kalaisi ʻo kātaki, ta te u lava foki mo ia kae fakafou ʻiate Ia.

Ne u ongoʻi mateuteu ʻi he taimi ne fanauʻi mai ai ʻeku tama fefiné. Te u houngaʻia maʻu pē ʻi he faingamālie hono ua ʻoku ʻomi ʻe he Fakalelei ʻa Sīsū Kalaisí. Ka ne ʻikai ʻa ʻEne feilaulau fakaleleí, he ʻikai te u aʻusia e tuʻunga ʻoku ou ʻi ai he ʻaho ní. Naʻe hokohoko atu ke u kole ha fakahinohino, tautautefito ki hono ohi hake ʻeku tama fefiné ʻi he ongoongoleleí.

ʻOku ʻi ai ʻeku fakamoʻoni mālohi ki he moʻoni ko ia ʻa e Fakalelei ʻa Sīsū Kalaisí. ʻOku ou ʻiloʻi naʻe pekia hoku Fakamoʻuí ʻi he kolosí peá Ne toe tuʻu hili e ʻaho ʻe tolu kae lava ke moʻui e faʻahinga ʻo e tangatá. Kapau te tau tui kiate Ia, fakatomala, papitaiso ki Hono Siasí, ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui ní, maʻu ʻa e meʻafoaki ʻo e Laumalie Māʻoniʻoní pea kātaki ki he ngataʻangá, te tau lava ʻo foki kiate Ia.