Ko e Ngāue Tokoni ‘i he Founga ‘a e Fakamo‘uí

Newsroom

ʻI he konga ʻo ʻena ʻaʻahi ki Tonga ʻi Nōvema 2018, naʻe ʻaʻahi ai ʻa Sisitā Bonnie H. Cordon Palesiteni Lahi ʻo e Kau Finemuí ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui ní pea mo Sisitā Joy D. Jones, Palesiteni Lahi ʻo e Palaimelí, ki ha feituʻu ʻoku lolotonga fakaʻaongaʻi ai e mīsini fahi papa ʻa e Siasí ʻoku lava ʻo toho holo. ʻOkú na ʻaʻahi mai ki he Pasifiki Sauté mo hona husepānití, ko Derek Cordon pea mo Robert Jones.

Naʻe tokangaʻi kinautolu ʻe ʻEletā K. Brett Nattress mei he Kau Palesitenisī Fakaʻēlia ʻo e Pasifikí pea mo ha taki fakalotofonua, ko ʻEletā ʻAisake Tukuafu, ko ha Fitungofulu Fakaʻēlia.

Ko e fakaʻaongaʻi e mīsini fahi papá ʻi ha ngaahi feituʻu kehekehe. ʻOku ʻave e ʻulu ʻakau ne holo pe maumauʻi ʻe he Saikolone ko Kitá ʻi Fēpueli 2018, ki he fahiʻanga papá, ʻa ia ʻoku ngāue ʻaki ai ʻe he kau mēmipa ʻo e Siasí e mīsiní ke maʻu e nāunau ko ia ʻoku fakaʻaongaʻi ke langa ʻaki e ngaahi ʻapí, ke tāpuekina e moʻui ʻa e kakai Tongá.

Naʻe mahuʻinga kia Sisitā Cordon pea mo Sisitā Jones ʻa e ngāué ni pea houngaʻia ʻi he ngāue tokoni ʻofa faketangata ʻa e kakai tokolahi ke langa ha ʻapi maʻá e ngaahi fāmili faingataʻaʻiá. Naʻá na ʻaʻahi ki ha feituʻu ʻoku fai ai ha ngāue langa pea mamata tonu ʻi he ngāué.

ʻOku faitāpuekina ʻe he ngāue fakaetauhi ʻi he founga ʻa e ʻEikí, ʻa e moʻui ʻa ha tokolahi: ko kinautolu ne maʻu honau ʻapí; kakai fakalotofonua ʻoku fakalakalaka ʻenau pōtoʻi ngāué; kau faifekau matuʻotuʻa ʻoku nau vēkeveke ʻi he ngāue tokoní; pea mo e kau mēmipa ʻo e Siasí ʻoku ngāue fakataha ʻi honau koló ke hiki hake mo fakamaʻamaʻa e kavenga honau fāmilí, kaungāmeʻá mo e kaungāʻapí.