Te Nakoa ae te Kabanea ni Kakannato

Iroun Joy D. Jones

Beretitenti ni Kabuta n te Moanrinan

Ngkai ngaira ainen te onimaki, ti kona karekei reirein koaua man ana taneiai te Burabeti Iotebwa are e anga te nonoori ibukin karekan oin ara kaotioti.

I kakaitau ni katurua au marooro n te bong aei iaon tabeia aine ae teimatoa ni Kaokan Bwai. E mataata bwa n rongorongon aonaba aine a taua te nne ae onoti inanon ana babaire Tamara are i Karawa. E reirei Beretitenti Nelson, “E na kangaanga ataakin te korakora are … irouia aine bwa iai tabeia aine … tiaki tii n aia utu ma n ana Ekaretia naba te Uea, bwa buuaine, tiina, ao tiibuaine, n tabeia ae taari aine ao ai tiina, n tabeia ae taan reirei ao taan kairiiri; ao riki tabeia bwa taan kaota te banna ni katooto ae tamaroa ao taan kamanoa te euangkerio ao te Ekaretia.”¹

N te bootaki n aine ngkoa i Nauvoo, 178 te ririki n nako, te Burabeti Iotebwa Timiti e reireiniia aine bwa a na “maiu nakon [tibwangaia] .”² Bannaia e reireiniira ni boong aikai. A bootiia n ira bwanaan te burabeti ao a maiu ma te onimaki ae kakaonimaki inanon Iesu Kristo ngkai a ibuobuoki ni kawenea aan te kateitei are ti tei iaona ngkai. Aine, ai ara tai ngkai. Iai katabeara mai eta mairoun te Uea, ao ara mwakuri ae kakaonimaki, man onoti a kakaawaki.

E kabwarabwara Beretitenti Spencer W. Kimball: “Te riki bwa te aine ae raoiroi n am kabanea ni bong iaon te aonnaba aei, imwaain manga okin ara Tia Kamaiu, bon te nakoa ae rangi ni kakannato. Korakoran te aine ae raoiroi ao aia konabwai ni boong aikai a kona n tebwina taboroia nakon are n taai n rau.”³

E a tia naba Beretitenti Nelson ni bubuti: “ I bubutia mwaaneu n [te] Ekaretia … bwa a na waaki ni mwakuri! Taua ami tabo ae eti ao ae kainnanoaki ni mweengami, n ami kaawa, ao n abanuean te Atua—ae riaon riki ae kam a tia ni kakaraoia mai imwaina.”⁴

N te tai ae tibwa nako, E reke au tai, n reitaki ma ataein te Moanrinan, ni kaitibo ma Beretitenti Russell M. Nelson ni katootongan mwengan te utu ae te Smith i Palmyra, New York. Ongora ngkai ara burabeti e reireiniia ataei bwa tera ae a kona ni waaki ni mwakuria.

Titita Jones: “I kan ataia ngkana iai ami titiraki are kam kan titirakina te Burabeti ae Nelson. Kam tekateka irarikin te burabeti. Iai te bwai ae ko kaman tangiria ni titirakina te burabeti? Eng, Pearl.”

Pearl: “E kangaanga te maiu ni burabeti? Ngkoe, ko bon, rang tabetabe?”

Beretitenti Nelson: “Eang e bon kangaanga. Bwaai ni kabane ake a irekereke ma te riki n ai aron te Tia Kamaiu e bon kangaanga. N aron te katoto, ngke te Atua e tangiria n anga Tuua ake Tebwina nakon Mote, Ia te tabo are e tuanga Mote bwa e nako iai? I eta iaon te maunga, i tabukin te Maunga ae Tinai. Ngaia are Mote e riai n tamwarake nako taubukin te maunga bwa e aonga ni karekei Tuua ake Tebwina. Ngkai, Tamara are i Karawa, e kona ni kangai, ‘Mote ko waaki mai ikai, ao Ngai N na waaki mai ikai, ao I a kaitibo ma ngkoe n te nuukanikawai.’ E aki, te uea e tatangira te mwakuri, ibukina bwa te mwakuri e uoti kaniwanga are e bon aki kona n reke n te anga riki teuana. N aron te katoto, ko a tia n reirei te biano?”

Ataei: “Eng.”

Pearl: “I reirei te Waioriin.”

Beretitenti Nelson: “Ao ko kakataneiai?”

Ataei: “Eng.”

Beretitenti Nelson: “Tera ae riki ngkana ko aki kataneiai?”

Pearl: “Ko mwaninga.”

Beretitenti Nelson: “Eng, ko aki rikirake, ke ko rikirake? Ngaia are te kaeka bon eang, Pearl. E tangira te mwakuri, te mwakuri korakora, te kamatebwai ae bati, ao akea tokina. E tamaroa anne! E tamaroa, ibukina bwa ti reitinako n rikirake. N te maiu naba are na roko ti karekea te rikirake.”

Ana kaeka Beretitenti Nelson nakoia ataei aika kakaawaki e kanakoa nakoira ngaira n tatabemaniira. Te Uea e taatangira te mwakuri, ao te mwakuri e uoti kaniwanga. Ti teimatoa ni kataneiai. Ti teimatoa n rikirake ngkana ti kabanea ara kona n iriira te Uea.⁵ E aki kantaninga te kororaoi ngkai. Ti teimatoa n tamwarakea ara Maunga are Tinai. N taai ake ngkoa, mwanangara e bon kainnanoa te mwakuri, te mwakuri korakora, ao te kamatebwai, ma ara motinnano nakon te rikirake e bon uoti kaniwanga aika akea tokiia.⁶

Tera riki ae ti reiakinna mairoun te Burabeti Iotebwa Timiti ao te Moan Kaotioti iaon taekan te mwakuri, mwakuri korakora, ao te kamatebwai? Te Moan Kaotioti n anganira te kairi n tabera aika onoti, man kakaawaki. Ngkai ngaira ainen te onimaki, ti kona ni karekei reirein taian koaua man ana taneiai te Burabeti Iotebwa are e anga te nonoori ibukin karekan oin ara kaotioti. Te katooto:

• Ti mwakuri iaan kangaanga.

• Ti rairaki nakon koroboki aika tabu ni karekea te wanawana ni mwakuri.

• Ti kaota ara onimaki ao ti kakoauaa te Atua.

• Ti kabanea korakorara ni butia te Atua bwa e na buokiira ni kaitaraa korakoran te tia kakaitara.

• Ti tabekarake bwanaan nanora nakon te Atua.

• Ti katurua ara taratara iaon Ootana ni kairii ara rinerine ni maiura ao ti kabebeteaki n te tai are ti rairaki iai nako Ina.

• Ti nooria bwa E kinaira n tatabemaniira n arara ao ni katabeara n tatabemaniira bwa ti na kakoroa nanona.⁷

N reita anne, Iotebwa Timiti e kaota te atatai bwa iai ara konabwai mai eta ao kakaawakira ae akea tokina. Ibukin reitakira ma Tamara are i Karawa, I kakoauaa bwa E kantanigaira bwa ti na karekea te kaotioti mai Irouna.

Te Uea e kaeta Emma Smith bwa e na “karekea te Tamnei ae Raoiroi,” n reiakina ae mwaiti, “katikui bwain nako te aonaba, … ukoukori bwaina aika raoiroi riki,” ao “kawakin [ana] berita aika tabu” ma te Atua.⁸ Te reirei e kakaawaki nakon te rikirake, riki ngkai teimatoan raonakira iroun te Tamnei ae Raoiroi e reireiniira te bwai ae kainnanoaki iroura bwa ti na katikui—ae nanonaki bwaai ake a na katabetabeira ke n tinea rikirakera.

E taku Beretitenti Russell M. Nelson: “I bubuti nakoimi bwa kam na kakorakorai ami konabwai n tamnei ni karekea te kaotioti.”⁹ Ana taeka ara burabeti a teimatoa irou ngkae I iangoia aine ao aia kona n waaki ni mwakuri. E bubuti nakoira, are e kaotia bwa e moanibwai. E reireiniira arora ni kamaiua tamneira n te aonaba ae kaonaki n te bure man karekean ao mwakurian taian kaotioti.¹⁰ Ngkai karaoa aei, karinean ao maiuakinan ana tua nako te Atua, ti anganaki te berita, n aron Emma Smith, “banuean te raoiroi.”¹¹ Te Burabeti Iotebwa e reirei kakaawakin ataakina bwa te kawai are ti toua n te maiu aei e kariaiakaki iroun te Atua. N akea te atatai anne, ti “na rikirake ni kua n [ara] iango ao n tong.”¹²

N te maungatabu aei, ti na ongoraei koaua ake a na kaungaira ni bitaki nakon te tamaroa, ao ni kaitiakii maiura. Rinanon te kaotioti ae onoti, ti na totokoa te aroraki are aranna tabeman bwa “rawawatan te maungtabu ni kabuta”—ngkae ti motinnano bwa ti na karaoi bwaai ni kabane ngkai. Aine a mwaiti tabeia aika a kakaokoro, ma e aki kona ni karaoi ni kabane, ao e aki riai bwa a na karinii ni kabane n teuana te tai. Te Tamnei e na buokiira n ataia bwa tera tabera aika ti na moanibwai n te bong aei.¹³

Ana tangira ae korakora te Uea rinanon te Tamnei ae Raoiroi e buokiira n ata Ana moanibwai ibukin rikirakera. Karaoan nanon oin am kaotioti e kairiko nakon oin rikirakem.¹⁴ Ti kakauongo ao ti mwakuriia.¹⁵ E taku Iesu, “Bubutia te Tama n arau, n te onimaki ni kakoaua bwa ko na karekea, ao ko na karekea te Tamnei ae Raoiroi, are e na kaotii bwaai ni kabane ake a riai.”¹⁶ Tabera ae reitinako bon te teimatoa ni karekei kaotioti.

Ngkae ti karekea te rabakau ae raka riki ni karaoan anne, ti kona ni karekea te korakora riki n taben temanna ma temanna n ibuobuoki ao ni katiaa te mwakuri ni kamaiu ao ni karietataki—ma te koaua ni “katikui bwaai nako n te aonaba aei, ao n ukorii bwaai aika tamaroa.”¹⁷ Ti a kona ngkanne n oomwaka riki ni kaungaia ara roro n rikirake ni karaoa naba anne.

Tariu ao mwaaneu, ti bane ni ukora mwaakan te Atua inanon maiura.¹⁸ Iai te okoro ae tamaroa imarenaia aine ao mwaane inanon kakoroan nanon ana mwakuri te Atua ngkai. Ti karekea mwaakan te nakoanibonga rinanon berita aika tabu, ake a moan karaoaki n te ran ni bwabetito ao te kabane inanon oon tembora aika tabu.¹⁹ E reireiniira Beretitenti Nelson, “Ni kabane aine ao mwaane ake a karaoi berita ma te Atua ao ni kawakin berita akanne, ao ake a mwakuri ma te kororaoi n otenanti n te nakoanibonga, iai aia kona ni karekea mwaakan te Atua.”²⁰

Au karinrin ae onoti n te bong aei bwa I aki kaman nooria, mai mwaina bwa inanon maiu, ae iai irou te kona rinanon te berita, ni kareka mwaakan te nakoanibonga.²¹ Aine, I tataro bwa ti na kinaa ao ni kawakina raoi mwaakan te nakoanibonga ngkae ti “nim ma [ara] berita,”²² ao ni butimwaei koauan koroboki aika tabu, ao kawakini aia taeka ara burabeti aika maiu.

Ti a katanoata ma te aki nanokokoraki ara kakaonimaki nakon Tamara are i Karawa ao ara Tia Kamaiu, “ma te onimaki ae matoatoa irouna, n onimakina teuare e tau, are iai korakorana ni kamaiu, ma te aki nanokokoraki.”²³ Ti na kimwareirei n reitinakoa te mwananga aei nakon ara konabwai are mai ieta n te maiu n tamnei ao ni buokiia naake i rarikira ni karaoa naba anne rinanon te waaki ni kairiiri, te tangira, te ibuobuoki, ao te nanoanga.

Unimwaane James E. Talmage e kauringiira ma te aamarau, “Te tiambion ae korakora n te aonaba ibukiia aine ao te riki n aine bon Iesu te Kristo.”²⁴ Ni kabanean taraan tabeia aine ae teimatoa inanon Kaokan Bwaai ao ibukira ngaira ni kabane, tera te tabe are te kabanea ni kakaawaki? I kakoaua bwa bon te ongora Irouna,²⁵ Iriirana,²⁶ Onimakinana,²⁷ ao te riki bwa reitan Ana tangira.²⁸ I ataia E maiu.²⁹ N aran Iesu Kristo ae tabu, amen.

Bwaai aika a na taraaki

1. Russell M. Nelson, “Te Bubuti nakoia Mwaaneu,” Riaona, Nobembwa. 2015, 95–96.

2. Joseph Smith, in “Nauvoo Relief Society Minute Book,” 38, josephsmithpapers.org.

3. Aia Reirei Burabetin te Ekaretia: Spencer W. Kimball (2006), 217.

4. Russell M. Nelson, “Te Bubuti nakoia Mwaaneu,” 97.

5. Taraa Reirei ao Berita aika Tabu 58:26–28.

6. Taraa Reirei ao Berita aika Tabu 6:33.

7. Taraa Iotebwa Timiti—Rongorongo 1:11–17.

8. Reirei ao Berita aika Tabu 25:8, 10, 13.

9. Russell M. Nelson, “Te Kaotioti ibukin te Ekaretia, Te Kaotioti ibukin Maiura,” Riaona, Meei 2018, 96.

10. Taraa 2 Nibwaai 9:39.

11. Reirei ao Berita aika Tabu 25:15.

12. Lectures on Faith (1985), 38.

13. Taraa Reirei ao Berita aika Tabu 42:61.

14. E taku Beretitenti Henry B. Eyring:

    “Ngkai, ngkana ngkoe ao Ngai ti tekateka (tera ngke e kona), ike ko namakina te inaomata n titiraki tera nako are ko kan titiraki, I kona n iangoia bwa ko taekini taeka aikai: ‘Eng, te Tari Eyring, I a tia n namakini tabeua bwaai ake ko kabwarabwarai. E a tia te Tamnei ae Raoiroi n riinga nanou ao au iango n te tai teuana ma teuana. Ma N na kainnanoia bwa I aonga n aki konaaki ke ni mwamwanaaki. E kona n reke anne? E kona n reke anne, ao, ngkana e kona, tera ae n na karaoia ni karekea te kakabwaia anne?’

    “Eng, ti a waaki ma am moan titiraki. Eng, e bon kona n reke. N te tai are I kainnanoa iai karauan nanou—ao I kainnanoia naba n te tai teuana ma teuana—I uringiia uoman taari. Nibwaai ao Riaai, ao ana toro te Uea ake tabeman are a beku ma ngaiia, ngke a kaitarai kakaewenako aika a korakora. A beku inanon te aonaba ae tabe n rikirake buakakana. A na kaitaraa ma kewe aika korakora. Ngaia are I waaki ma te ninikoria—ao ko kona naba ngkoe—man taeka inanon teuana te kibu aei n Ereman. Te karaunano e kuneaki inanon te rongorongo are e riki inanon teuana te ririki ae bwanin e kuri n ae iroun te tia korokaraki e bon aki kakuba. Kakauongo:

    “‘Ao n te kaitibwi ma ruaiwa n ririki ao e a korakora te mangaongao. Ma e a koro bukina bwa Nibwaai ma Riaai, ao tariia aika a mwaiti ake a atai kanoan raoi taian reirei, bwa a tia ni karekei taian kaotioti ni katoa bong, ngaia are a bon kabwarabwara nakoia, n te aro are a bon katoka te mangaongao n te ririki naba anne.’ [Ereman 11:23]

    A tia ni karekei ‘taian kaotioti ni katoa bong.’ Ngaia are, ibukim ao ibukiu, anne e kaeka am moan titiraki. Eng, e kona n reke ana reitaki te Tamnei ae Raoiroi n ae tau ni karekei taian kaotioti ni katoa bong. E na bon aki bebete. Ma e kona. Tera are e kainnanoia e na bon kakaokoro iroun temanna ma temanna ibukina bwa ti waaki ma are ti mena inanona ngkai n ara taneiai aika onoti n te maiu aei.” (“Gifts of the Spirit for Hard Times” [Brigham Young University fireside, Sept. 10, 2006], 3–4, speeches.byu.edu).

15. Taraa 2 Nibwaai 2:16.

16. Reirei ao Berita aika Tabu 18:18.

17. Reirei ao Berita aika Tabu 25:10.

18. Taraa Reirei ao Berita aika Tabu 121:26, 33, 41, 45–46.

19. Taraa Reirei ao Berita aika Tabu 84:19–21.

20. Russell M. Nelson, “Kaubwai n Tamnei,” Riaona, Nobembwa 2019, 77.

21. Taraa Russell M. Nelson, “Kaubwai n Tamnei,” 76–79; Dallin H. Oaks, “Kiingin ao Ana kariaia te Nakoanibonga,” Riaona, Meei 2014, 49–52; Henry B. Eyring, “Aine ao Reiakinan te Euangkerio n te Mweenga,” Riaona, Nobembwa 2018, 58–60.

22. Reirei ao Berita aika Tabu 25:13.

23. 2 Nibwaai 31:19.

24. James E. Talmage, Jesus the Christ, 3rd ed. (1916), 475.

25. Taraa Iotebwa Timiti—Rongorongo 1:17.

26. Taraa Mataio 4:19–20.

27. Taraa Taeka n Rabakau 3:5–6; Reirei ao Berita aika Tabu 11:12.

28. Taraa Ioane 13:34; Moronaai 7:47.

29. Taraa 2 Nibwaai 33:6; Reirei ao Berita aika Tabu 76:22.