Tataro n Onimaki
Ngkai ti tataro ma te onimaki, ti riki bwa mwakoron ana mwakuri te Uea ae kakawaki ngkai E katauraoa te aonaaba ibukin te Kauaoki.
Ana tataro Unimwaane Maynes ni moan te moan tetere n te maungatabu ni kabuta aei e a tia ni kaekaaki. E a tia n roko nakoira te kairi mai eta rinanon taian reongorongo aika tamaroa ao katangitang aika tangiraoi. Ana berita Beretitenti Russell M. Nelson bwa te maungatabu aei e na ururingaki e a kaman tia ni moanaki bwa e na kakoroaki bukina.
E a tia Beretitenti Nelson ni kotea te ririki aei bwa “tain te uabubua n ririki ni kauringa te ka 200 n ririki ni kaotin te Atua te Tama ao Natina ae Tangiraki, Iesu Kristo, nakon Iotebwa Timiti n te mii.” E kaoira Beretitenti Nelson bwa ti na karaoi ara babaire e onoti ni katauraoira ibukin te maungatabu ae kakawaki aei, are kauringakina e taku bwa e na “riki bwa te tai ni bitaki ae kakawaki n rongorongon te Ekaretia, ao tabem e kakawaki.”1
N ai arou, tao ko ongo ana rongorongo ao ko titirakiniko bon iroum, “te kawai ra ae kakawaki tabeu?” Tao ko wareware ao n tataroakinii taekan Kaokan Bwaai. Tao, e bati riki nakon are mai imwaina, ko wareki rongorongo n taai tabeua aikanne ngke te Atua te Tama e kabwarabwara Natina ae Tangiraki. Tao kam wareki taai ngke e taetae te Tia Kamaiu nakoia natin Tamara are i Karawa. I ataia bwa I karaoi bwaai aikanne ao a mwaiti riki.
I kunei koroboki n au wareware aika irekereke nakon a na nakoanibonga te Atua ao kaukan boong aikai. I nanoriano ngke I ataia bwa au katauraoi nakon te maungatabu aei bon te tai ae kakawaki n rongorongou. I namakina te bitaki i nanou. I namakina te kakaitau ae boou. I namakina ae kaonaki nanou ma te kimwareirei ni kaoaku nakon te bukamaru ni Kaokanbwaai ae waaki nako.
I iangoia bwa aia namakin tabeman, man te katauraoi ae karaoaki raoi, a raka kakukureina, raka raoiroina, ao a nanomatoa riki ni beku n te mwakuri ae kainnanoia te Uea.
Waaki aika ririeta ake ti karinei bon bwaai aika kaman taekinaki ni boong aika kaitira, are te Uea e katauraoa iai Ana Ekaretia ao Ana aomata, naake a uouota Arana, bwa a na Butimwaeia. Bwa mwakoron ara katauraoi ibukin Okina, E na buokira te Uea inanon kakaewenakoara n tamnei ao taai aika akea aekakiia n rongorongon te aonaaba aei.
N Tebetembwa 1840, the Burabeti Iotebwa Timiti ao ana kauntira n te Moan Beretitentii a kanakoa te rongorongo aio: “Ana mwakuri te Uea ni boong aika kaitira, te bwai ae kakawaki ao ni kuri ni kaangaanga iroun te aomata bwa e na ota iai. E kaangaanga kabwarabwaraan kakukureina ni kabonganakin taeka, ao akea te bwai ae kona ni korakora riki nakon kakukureina. Bon te botoniango are e a tia ni kairiia ao ni kakorakorai nanoia burabeti ao mwaane aika raoiroi man karikan te aonaaba rikaaki nakon rooro ake imwiina ni karokoa te tai aei; ao bon te mwioko n tararua ni kororaoin bongina, te tai are bwaai ni kabane ake inanon Krsto Iesu, tao i karawa ke iaon te aba, a na bane n ikotaki ni kabane Irouna, ao te tai are a na bane bwaai ni kaokaki, n aron are e taekinaki irouia burabeti ake a tabu ma ngke moan te aonaba; bukina bwa inanona a na kakoroaki bukin berita ake a tia ni karaoaki nakoia taama, ao kaotin te mwaaka are Moan te Rietaata e na korakora, mimitong, ao n rianako tamaroana.”
A reitia n taekinna: “Ti namakinna ae ti tangiria ni waaki nako ao ni katiteuanai korakorara ibukin karikirakean te Abanuea, ao katean te Nakoanibonga ni bwaninina ao mimitongina. Te mwakuri are e riai ni kakoroaki bukina ni boong aika kaitira bon te bwai ae moan te kakawaki, ao e na tangira kabonganakin te korakora, te rabakau, ao aia konabwai Aika Itiaki, bwa e aonga ni waaki nako ma te mimitong ao te karineaki n aron kabwarabwaraana iroun te burabeti [Taneira] [taraa Taniera 2:34–35, 44–45]; ai ngaia are e na kainnanoa aia kakaonimaki Aika Itiaki, ni kakoroi nanon mwakuri aika kakawaki ao n rietata.”2
E bati rongorongon bwaai are ti na karaoi ao tain karaoaia inanon waakinan Kaokan bwaai a tuai kaotaki. Ma te Moan Beretitentii riki n taai ake rimoa a ataa rababan ao nanon te mwakuri are e a tia te Uea ni kateia imwaira. Aika tabeua katooton bwaai are ti atai bwa a na riki:
Rinanoia Ana Aomata Aika Itiaki, te Uea e na anga te bwaintangira n Ana euangkerio “nakoia aaba, reeti, neewe, ao aomata ni kabaneia.”3 Bwaai n rabakau ao kakai a na teimatoa ni karaoa tabeia—n aroia n tatabemaniia “taan akawaia aomata”4 aika a ibuobuoki ma te mwaaka ao n te onimaki ae rikirake.
Ngaira aomata ti na riki n tii teuana riki ibuakon itabarara aika rikirake. Ti na ikotaki ni korakoraia n tamnei bwa aonga ara kurubu ao ara utu ni kakabwaiaaki n te euangkerio.
Riki n te aonaba ae aki kakoaua a na kinaa Ana Ekaretia Iesu Kristo ibukiia Aika Itiaki ni Boong aika Kaitira ao n ata mwaakan te Atua iaona. Ana reirei Iesu aika kakaonimaki ao n ninikoria a na katoka iaoia akean te maaku, te nanorinano, ao ni katoka iaoia aran Kristo ni maiuia ni katoabong.
Ti na kanga, ngkanne, ni kona ngaira n tatabemaniira n ira te mwakuri ae kakawaki ma ni rietatat aei? E a tia Beretitenti Nelson n reirei aron te rikirake n te mwaaka n tamnei. Ngkana ti iangoa te rairannano bwa te bwai ae kakukurei ibukin rikiraken ara onimaki bwa Iesu bon te Kristo, ngkana ti ataia ao ni kakoaua bwa Tamara are i Karawa e ongo ara tataro, n te tai are ti kekeiaki ni karinei ao ni maiuakin ana tua, ti rikirake ni mwakara ni karekei kaotioti aika reitinako. Te Tamnei ae Raoiroi e kona n riki bwa raom n tainako. Namakinan te bwarannano ao te buakaka.
Iotebwa Timiti bon te banna ni katooto n aron te rikirake n te mwaaka n tamnei. E kaotia bwa te tataro n onimaki bon te bwai ae kakawaki ni karekean a na kaotioti te Atua. E tataro ma te onimaki, ni kakoaua bwa te Atua te Tama e na kaekaa te tataro. E tataro ma te onimaki, ni kakoaua bwa bon tii rinanon Iesu kristo ae e kona ni kainaomataaki man te nanokawaki are e namakinna ibukin ana bure. Ao e tataro ma te onimaki, ni kakoaua ae e kainnanoia bwa e na kakaea Ana Ekaretia Iesu Kristo ae koaua ni karekea te kabwarabure anne.
Rinanon ana mwakuri ni burabeti, Iotebwa Timiti e kabongana te tataro n onimaki ni karekei kaotioti aika teimatoa. Ngkai ti kaitarai kakaewenako n te bong aei ao ake iaon kawaia, ti kainanoa naba ngaira karaoan te baeten anne. E taku Beretitenti Brigham Young, “I aki ataa te kawai riki teuana ibukiia Aika Itiaki ni Boong aika Kaitira nakon teimatoan te tataro nakon te Atua inanora ao n ara iango ni kairiia ao ni kaetiia ana aomata.”5
Taeka aikai man tataron te toa a riai ni kabwarabwara maiura ni katoabong: “Ururingnga n tainako.” “Ngaia” e nanonaki bwa Iesu Kristo. Taeka ake imwiina, “ao ni kawakin ana tua nako,” e kaotia bwa tera ae nanonaki ibukira n Ururingnga.6 Ngkana ti ururinga Iesu Kristo n tainako, ti kona n bubuti n te tataro ae maraara, “Tera ae E tangiria bwa n na karaoia?”
Te tataro anne, are tabekaki ma te onimaki iroun Iesu Kristo, e kairiiri n te kabanea ni bong. Ao e na riki bwa te kabanea ni kakawaki ni mwakuri ae ti riai ni karaoia ni kabwaranakoana ae teimatoa. I a tia ni kunea, n aron ae ko a tia ni karekea, katooto aika tamaroa n te tataro anne.
Te moan bon Iotebwa Timiti. E titiraki n aron ana onimaki te ataei ae uarereke tera ae e tangiria te Uea bwa e na karaoia. Ana kaeka e bita rongorongon te aonaaba.
Irou, te reirei ae kakawaki e roko man ana kaeka Iotebwa nakon ana kauntaba Tatan ngke e katorobubua Iotebwa n tataro.
I ataia man te taneiai bwa Tatan ao ana toro a kataia n anai nanora bwa ti riai n aki tataro. Ngke e kabonganai mwaakana ni kabane Iotebwa Timiti n tataro nakon te Atua bwa e na kainaomata man te mwaaka are e kataia ni kabaea, ana tataro ibukin kainaomatakina e kaekaaki ni kaotin Tamara are i Karawa ma Iesu Kristo.
Ana mwakuri Tatan n totokoa moan rokon te Kaotioti e rangi ni korakora bukina bwa ana tataro Iotebwa e bon rangi ni kakawaki. Ngkoe ao Ngai e na uarereke riki ara mwakuri ae ti na karaoia n reitinakoan te Kaotioti. E ngae n anne ana kairiribai Kaokan bwaai e na kataia ni katokiira man te tataro. Te katooto n ana onimaki ao korakoran nanon Iotebwa e kona ni kakorakoraira n ara waaki. Aio teuana mai ibuakon bukina aika mwaiti ngkai I karina te kakaitau nakon Tamara are i Karawa ibukin te Burabeti Iotebwa Iotebwa.
Enoti n ana Boki Moomon bon te banna ni katooto ibukin au tataro n te onimaki ngke I kataia ni karaoa tabeu ni Kaokan bwaai aika reitinako. Bwa tera tabem ae ko na karaoia, ko kona n anaia bwa am tia reirei.
N aron Iotebwa, Enoti e tataro ma te onimaki. E kabwarabwara are rinanona n te kawai aei:
“Ao e baki tamneiu; ao I katorobubua imatan te Tia Karikai, ao I wewete nakoina inanon te tataro ma nanou ma tamneiu ni kabane; ao e bwanin au bong ni wewete nakoina; eng, ao ngke e a bong ao I kabaibati riki bwanaau ni wewete ao e roota karawa.
“Ao e roko te bwanaa nakoiu ni kangai: Enoti, a na kabwaraaki am bure, ao kona kakabwaiaki.
“Ao Ngai, ae Enoti, I ataia bwa e aki kona ni kewe te Atua; mangaia ae a mauna namakinan te bure mairou.
“Ao I taku nakon te Uea, e kanga ni karaoaki aio?
“Ao E taku nakoiu: E kona ni karaoaki ibukin korakoran am onimaki iroun Kristo, ae ko tuai n ongo taekana ke n nooria. Ao a na mwaiti ririki aika a na roko i mwaain ae e kaoti n rabwata nakon te aonaba; mangaia ae toua nako kawaim, e kamaiuko am onimaki.”7
Te reirei are e a tia ni kakabwaiaai bon inanon taeka aikai: “E kona ni karaoaki ibukin korakoran am onimaki iroun Kristo, ae ko tuai n ongo taekana ke n nooria.”
Iai ana onimaki Iotebwa iroun Kristo n nakon te buakonikai ao n tataro naba ibukin kainaomatakina man mwaakan Tatan. E tuai n noora te Tama ao Natina, ma e tataro n te onimaki ma korakoran nanona.
Ana atatai Enoti e a tia n reireinai te reirei ae moan te kakawaki naba anne. N te tai are I tataro ma te onimaki, iai te Tia Kamaiu ae te tia tei ibuku iroun te Tama ao I kona n namakinna bwa a roko i karawa au tataro. A roko kaeka. Kakabwaia a reke. Iai te rau ao te kimwareirei eng inanon taai ni kaangaanga.
I uringnga ngke, te kabanea ni boou ngai irouia kaain te Kooram n Abotoro n te Tengaun ma Uoman, I katorobubua n tataro ma Unimwaane David B. Haight. Ana ririki n te tai anne e kuri titebo ma au ririki n te tai aei, ma kakaewenako ake I rinanoi n rorou aei. I uringa bwanaana ngke e tataro. I aki kaurei matau n taraia, ma irou e taraa n ae kanga e moangare. E taetae ma Tamara are i Karawa ma te kimwareirei ni bwanaana.
I kona n ongo n au iango kukureina ngke e taekina, “N aran Iesu Kristo.” E taraa n ae kanga Unimwaane Haight e namakinna te Tia Kamaiu ni boutoka n te tai anne te rongorongo are e a tia n tataro nakon te Tama. Ao I bon koaua e na karekeaki ma te moangare.
Ara konabwai ni karaoa ara mwakuri ae kakaawaki nakon tamaroan teimatoan Kaokan Bwaai e na rikirake ngkai ti rikirake n ara onimaki iroun Iesu Kristo bwa ara Tia Kamaiu ao Tamara are i Karawa bwa Tamara. Ngkai ti tataro ma te onimaki, ti riki bwa mwakoron ana mwakuri te Uea ae kakawaki ngkai E katauraoa te aonaaba ibukin te Kauaoki. I tataro bwa ti na bane ni kona ni karekea te kimwareirei ni karaoan te mwakuri are E kaoira bwa ti na karaoia.
I ataia bwa e maiu Iesu Kristo. Aio Ana Ekaretia ao aba n ueana iaon te aba. Iotebwa Timiti bon te burabeti ibukin Kaokanibwaai. Beretitenti Russell M. Nelson bon ana burabeti te Uea n te aonaaba n te bong aei. E taui kiingin te nakoanibonga ni kabane n Ana Ekaretia Iesu Kristo ibukiia Aika Itiaki ni Boong Aika Kaitira. N aran Iesu Kristo, amen.