Te Nakoanibonga ae te Merekitereka ao Kiing
N te Ekaretia te kariaia n te nakoanibonga e kamwakuraki iaona ana kaetieti te tia kairiiri n te nakoanibonga are iai irouna kiingin te nakoanibonga.
I a tia n rineia bwa N na taetae iaon ana nakoanibonga te Atua, te maroro ae taekinaki irouia teniman taan taetae aika a reireiniira bwa e kangaa te nakoanibonga ni kakabwaiai maiuia aine, ataeinnaine, ao ataeinimwaane.
Te nakoanibonga bon te mwaaka ao te kariaiakaki mai ieta are e na kabonganaki ibukin ana mwakuri te Atua ibukin kabwaiaia Natina ni kabane. Nakoanibonga bon tiaki naake a atia ni katabuaki nakon aobitin te nakoanibonga ke naake a kamwakura te kariaia anne. Mwaane ake a taua te nakoanibonga bon tiaki te nakoanibonga. Ngkai ti na aki taraia mwaane ake a tia ni katabuaki bwa te nakoanibonga, a riai riki n atongaki bwa taan taua te nakoanibonga.
Mwakan te nakoanibonga iai n te Ekaretia ao inanon te utu. Ma mwakan te nakoanibonga ao te kariaiakaki n te nakoanibonga a kaokoro mwakuria inanon te Ekaretia nakon ae karaoaki n te utu. Ni kabane aikai a kaineti nakon reirei ake e a tia ni karaoi te Uea. Te kantaninga ibukin ana baire te Atua bwa e na kairiia Natina nakon te maiu are akea tokina. Utu n te maiu aei a kakawaki nakon te baire anne. E kateaki te Ekaretia bwa e na katauraoa te reirei, te kariaiakaki, ao otenanti aika a na kanakoraoa te reitaki n te utu nakon te maiu are akea tokina. Ngaia are, bairean te utu ao Ana Ekaretia Iesu Kristo a boutokaia bon irouia. Kakabwaia n te nakoanibonga—n aron bwaninin te euangkerio ao otenanti n aron te bwabetito, kamatoa ao karekean ana bwaintituaraoi te Tamnei ae Raoiroi, te entaumente n te tembora, ao te mare are akea tokina—a tauraoi nakoia mwaane ao aine naba.1
Te nakoanibonga ae ti taetae iaona ikai bon te Nakoanibonga ae te Merekitereka, are kaokaki ni moan Kaokan te euangkerio. A katabuaki Iotebwa Timiti ao Oliver Cowdery iroun Betero, Iakobo, Ioane, ake a katanoataia “bwa iai irouia kiingin te abanuea, ao te mwioko n tararua ni kororaoin bongina” (Reirei ao Berita aika Tabu 128:20). Mataniwi n Abotoro aika a karekea te kariaiakaki anne bon mairoun te Tia Kamaiu. Kariaia riki ake tabeua ke aobiti n te nakoanibonga bon taian reita nakon te Nakoanibonga ae te Merekitereka (taraa Reirei ao Berita aika Tabu 107:5), bukina bwa “e taua te kariaiakaki n te beretitentii, ao iai mwakana ao te kariaiakaki i aon nakoa ni kabane n te ekaretia n rooro ni kabane n te aonaba” (Reirei ao Berita aika Tabu 107:8).
N te Ekaretia te kariaia n te nakoanibonga are iaona, te Nakoanibonga ae te Merekitereka, ao are iaana ke te Nakoanibonga ae te Aaron e kamwakuraki iaan ana kaetieti te tia kairiiri n te nakoanibonga, n aron te bitiobi ke te beretitenti, are iai irouna kiingin te nakoanibonga. N ata aron mwakurin te kariaia n te nakoanibonga n te Ekaretia, ti riai n atai reirei ni kingin te nakoanibonga.
Kingin te Nakoanibonga ae te Merekitereka n te abanuea a kaokaki iroun Betero, Iakobo, Ioane, ma anne e aki kabanea kaokan kiing n te nakoanibonga. Tabeua kiingin te nakoanibonga a roko imwiina. Imwiin katabuan te moan n tembora n boong aikai i Kirtland, Ohio, teniman burabeti—Mote, Eriati, ao Eria—a kaoki “kiingin te mwioko n tararua aei,” n raonaki ma kiing ake a irekereke ma ikotakin Iteraera ao ana mwakuri ana tembora te Uea (taraa Reirei ao Berita aika Tabu 110), n aron are te kabwarabwara Beretitenti Eyring.
Te katooto ae tataneiai te aba iai ni mwakurin kiing bon man karaoan otenanti n te nakoanibonga. Te otenanti bon te mwakuri ae mimitong ni kakoauai karaoan berita aika tabu ao berita n taian kakabwaia. N te Ekaretia otenanti ni kabane a bane ni karaoaki iaan ana kariaia te tia kairiiri n te nakoanibonga are iai irouna kiing ibukin te otenanti anne.
E karaoaki n tainako te otenanti irouia aomata ake a tia ni katabuaki nakon te aobiti n te nakoanibonga ni karaoia iaan ana kaetieti temanna ae iai irouna kiing n te nakoanibonga. Te katooto, ake iai irouia aobitin te Nakoanibonga ae te Aaron aika kakaokoro a tararua n te otenanti n te nakoanibonga iaan ana kiing ao ana kaetieti te bitiobi, ae iai irouna kingin te Nakoanibonga ae te Aaron. Te reirei ae aekan aei e kaineti nakon otenanti n te nakoanibonga are a tararua iai aine inanon te tembora. E ngae ngke aine aki taua te aobiti n te nakoanibonga, a karaoi otenanti n te tembora aika tabu iaan ana kariaia te beretitenti n te tembora, are iai irouna kiing ibukin otenanti n te tembora.
Teuana riki te katooto n te kariaia n te nakoanibonga iaan ana kaetieti temanna ae iai irouna kiing bon reiakinaia mwaane ao aine ake a weteaki bwa ana reirei te euangkerio, inanon kiraati ni mweengaia ke n te tabo ni mitinare. Katooto riki ake tabeua bon naake a taui mwakuri ni kairiiri inanon te uoote ao ni kamwakura te kariaia n te nakoanibonga n aia kairiiri ibukin aia wewete ao iaan kaokoroan ao ana kaetieti te tia kairiiri n te nakoanibonga ake a tau kiing n te uoote ke n te titeiki. Aio aron kamwakuran ao reken te kukurei n te kariaia ao te mwaka n te nakoanibonga n Ana Ekaretia Iesu Kristo ibukiia Aika Itiaki ni Boong aika Kaitira.2
E kamwakuraki naba te Nakoanibonga ao kakabwaia mai iai e ataaki n aia utu Aika Itiaki ni Boong aika Kaitira. N te utu I nanonna ae te mwane ae iai te nakoanibonga irouna ao te aine are a tia ni mare ao aia ataei. I karina naba te kaokoro man te reitaki ae kororaoi n aron are e riki man te mate ke te raure.
Te reirei are te kariaia n te nakoanibonga e kona ni karaoaki ti man ana kairi temanna are iai irouna king ibukin te mwakuri anne e kakawaki n te Ekaretia, ma e aki kabonganaki inanon te utu. Te katooto, te karo e tararua ao e kabongana te nakoanibonga inanon ana utu man te kariaiakaki n te nakoanibonga are irouna. E aki kainnanoia bwa e na karekea te kaetieti ke kariaia iroun temanna are iai irouna kiingin te nakoanibonga bwa e aonga ni karaoi tabena n ana utu aika kakaokoro. E raonaki aikai ma te marooro ma kaain ana utu, karaoan bootaki n utu, anga kakabwaia n te nakoanibonga nakon buna ao natina, ke n anga kakabwaia ni kamaiu nakoia kaain te utu ke tabeman riki.3 Taan kairiiri n te Ekaretia a reireiniia kaain te utu ma aki kaira kamwakuran te nakoanibonga inanon te utu.
Te reirei naba anne e kabonganaki ngkana akea te karo ao te tina ngaia te tia kairiiri n te utu. E tararua ni mweengana ao e ibuobuoki ni uota te mwaaka ao kakabwaia n te nakoanibonga nakon mweengana rinanon ana entaumente ao kabaeakina n te tembora. Ngkai e aki kariaiakaki neienne bwa e na anga kakabwaia n te nakoanibonga are e kona ni kanakoaki ti iroun te aomata are e taui tabeua aobiti n te nakoanibonga, e kona neienne ni karaoi mwakuri ni kairiiri n te utu ake tabeua. Ni karaoakina, e kamwakura naba te mwaaka n te nakoanibonga ibukin kabwaiaia ataei ake e tararuaia n nakoana bwa te tia kairiiri inanon te utu.4
Ngkana kaaro ana kabonganai aia nakoanibonga n oin aia utu, e na karaka riki ana mition te Ekaretia ni mwaitin bwaai nako ake a na kona ni karaoi. Kaaro ake iai irouia te Nakoanibonga ae te Merekitereka a riai ni kamwakura te kariaia are irouia “man te anainano, man te taotaonaki n nano, man te atataiaomata ao te nimamannei, ao man te tangira ae aki kewe” (Reirei ao Berita aika Tabu 121:41). Te kainibaire ae rietata anne ibukin kabonganaan te kariaia n te nakoanibonga ni kabane e rangin ni kakaawaki n te utu. Ake iai irouia te nakoanibonga a riai naba ni kawakin tuua bwa aonga ni karekea te mwaaka n te nakoanibonga n anga kakabwaia nakoia kain aia utu. A riai ni karikirakea te reitaki n tangira n aia utu bwa aonga kain aia utu n tuangiia ibukin kakabwaia. Ao kaaro a riai ni kaungai kakabwaia n te nakoanibonga aika a mwaiti riki n te utu.5
N tain botakin maungatabu aikai, ngkai ti ukoukora te katantan ae mataata man tabeaiangara n te maiu aei ma butin te aoraki ae korakora, ti a tia n reireinaki koaua aika a korakora ae akea tokiia. I kaungaira ngaira n tatabemaniira bwa ti na mata “teuana” ni karekei koaua aika akea tokiia aikai bwa e aonga rabwatara “ni kaonrakeaki n te ota.” (3 Nibwaai 13:22).
N Ana marooro nakoia aika mwaiti are e koreaki inanon te Baibara ao n Ana Boki Moomon, e reirei te Tia Kamaiu bwa ane e karekea te atatai n tamnei (e na onrake n te ota) ke akea te atatai n tamnei (e na onrake n te roo). Ngaira, naba, ti bane n tangiria ni kaonaki n te ota, ao e reireinira ara Tia Kamaiu bwa ti na kanga ni karaoia. Ti riai ni kakauongo nakon rongorongo n taekan koaua aika akea tokiia. E kabongana te katooto ni matara, rinanona are ti ana iai te ota nakon rabwatara. Ngkana matara e “mata teuana”—n taekana teuana ngkana ti kabanea ara iango iaon karekean te ota ao te atatai—E kabwarabwara, “e na onrake rabwatami n te ota” (Mataio 6:22; 3 Nibwaai 13:22). Ma ngkana e na “buakaka matara”—bwa ngkana ti ukeukera te buakaka ao n anaia nakon rabwatara—E kauringiira, “ao e na onrake rabwatami n te roo” (te kibu 23 N taekana riki teuana, te ota ke te roo inanon rabwatara e nakon arora n taratara—ke ni karekei— koaua aika akea tokiia aika ti reireinaki iai.
Ti riai n ira ana kakao te Tia Kamaiu n ukeuke ao n titiraki ibukin atakin koaua ae akea tokina. E berita bwa Tamara are i Karawa e tauraoi n reireiniia aomata ni kabane koaua aika a ukoukori (taraa 3 Nibwaai14:8). Ngkana ti tangira aei ao ti na mata teuana ni karekea, ana berita te Tia Kamaiu are koauan akea tokina “e na kaukaki” nakoira (taraa 3 Nibwaai 14:7–8).
Ni kaitaraana, e ingainga nanon Tatan ni kamangaoa ara iango ke ni kairiira nako iaon bwaai aika kakawaki n aron “kawai ni kamwakuran a na nakoanibonga te Atua. E kauring te Tia Kamaiu irouia “burabeti ni kewe, ake a nakoim n aia kunnikai tiibu, ma bon taian kameanti inanoia” (3 Nibwaai 14:15). E anganiira te kataaki ni buokiira n rinea te koaua mai ibuakon reirei aika kakaokoro ae na kona ni kamangaoira: “Kam na kinaaia man uaaia,” E reirei (3 Nibwaaii 14:16). “Te kai ae raoiroi e bon aki kona ni karika uaana ae buakaka, ao te kai ae buakaka e bon aki [kona] ni karika uaana ae raoiroi” (kibu 18). Ngaia ae, ti riai n taraa mwiina—“uaia”—n reirei ake a reiakinaki ao te aomata are e reireiniia. Anne te kaeka ae moan te tamaroa nakon kakaitara aika mwaiti aika ti ongo ni kaitara te Ekaretia ao ana reirei ao ana tua ao ana kairiiri. Ira te kataaki ae reirei te Tia Kamaiu. Taraa te ua—mwiina.
Ngkana ti iangoa uaan te euangkerio ao ana Ekaretia Iesu Kristo are e kaokaki, ti kimwareirei bwa e kanga te Ekaretia, inanon maiuia membwa, n rikirake man te tabo n taromauri i buakon maunga Maeao nakon te tabo ae angiia ana membwa aika 16 te mirion a maeka n aaba irarikin te United States. Ma te rikirake anne, ti a tia n namakin rikirake ni korakoran te Ekaretia ni buokiia membwa. Ti ibuobuoki ni kawakin tuua, ni kakoroa nanon tabera n tataekina te euangkerio, ao ni katei tembora ni kabutaa te aonaaba.
Ti kairkaki iroun te burabeti, Beretitenti Russell M. Nelson, are e a tia te Uea ni kabongana ana kairiiri ni kakoroa nanon te mwakuri ae ti a tia n namakinna inanon ana tai ni kairiiri ae raka iaon uoua te ririki. Ngkai ti kakabwaiaki n ongora mairoun Beretitenti Nelson, are e na reireiniira arora ni kakorakora riki ara mwakuri inanon Ana Ekaretia Iesu Kristo ae kaokaki inanon taai ni kaangaanga aikai.
I kakoaua koauan bwaai aikai ao n raoniko n te tataro ibukin ara burabeti are ti nang ongora irouna imwiina, n aran Iesu Kristo, amen.