Unimwaane Matthew S. Holland

Mataniwi ni Kabuta n te Itingaun

Unimwaane Matthew S. Holland e aki iruwa irouia Mataniwi ni Kabuta ke n te maungatabu ni kabuta.

Angiina Aika Itiaki a kinaa ae ngaia natin Unimwaane Jeffrey R. Holland te mwaane man te Kooram n Abotoro n te Tengaun ma Uoman. Tabeman a uringnga bwa 17-ana ririki ngke e taetae n Eberi 1983 n tain ana tetere te nakoanibonga n te maungatabu ni kabuta.

“E a tia n riki bwa te kakabwaia ae moan te kakukurei, inanon maiu ni kabane, n tarataraa aron maiuia tinau ao tamau, te bwai are a tia ni motinnanoia ni karaoia, ao baike a tia n tuangaki bwa a na karaoi” e taku Unimwaane Holland, are n te tai aei e tararua North Carolina Raleigh Mition.

“Ma, ni kaineti ma taratara aika onoti, e mwaiti ae ti ataia n te wewete aei n iangoia bwa e tau ara katauraoi ibukina,” e taku. “N te tekeraoi, ti reiakinaki naba bwa te Uea e a bon tia ni katauiia n aia konabwai naake E weteia, ao ti uota te onimaki ae korakora ao te mweengaraoi inanon anne.”

Unimwaane Holland e uringnga bwa te taetae n te maungatabu ni kabuta e bon kanakonano. Katauraoan te rongorongo n te kabanea n tai e roko “teutana i mwin teutana, te reirei teuana i mwin teuana;” (2 Nibwaai 28:30) e riki bwa “te moantaai, n atonga te kakabwai n ataia bwa ngkana ko butimwaai mwioko mairoun te Uea, E na buokiko ao n anganiko iango ao namakinan bwaai ake ko riai n tibwauai.”

Matthew Scott Holland e bungiaki n Tuun 7, 1966, i Provo, Utah, USA, te nati te mwaane irouia Jeffrey R. ao Patricia Holland. E mareaki ma Paige Bateman ni Meei 20, 1996, i St. George Utah Tembora. Boni kaaro ae aman natiia.

Uaiakinan ana reirei Unimwaane Holland e raonaki ma teniua ana tikuri n te political science—te baetura n te arts mai Brigham Young Iuniwetiri n 1991 ao te mwaatita n te arts ao te taokita ibukin rabakau, ni kauoua mai Duke Iuniwetiri, n 1997 ao 2001, n onoti.

Inanon mwakurina n riki bwa te tia ibuobuoki ni burobeetia n te political science i BYU (2001–2009), e aranaki bwa te beretitenti i Utah Valley Iuniwetiri n 2009, ni beku ni karokoa e weteaki n 2018 n riki bwa te beretitenti n te mition.

E a tia ni beku bwa te bitiobi, kauntira ae rietaata, kauntira n te bitiobiriki, te aetuwaitia ibukin te Bootaki n Ataeinimwaane n te uoote, te tia kairiiri ibukin te mition n te uoote, te tia reirei n te Reirei n Tabati, ao te mitinare ae bwanin ana tai i Scotland Edinburgh Mition.