Unimwaane Kelly R. Johnson

Mataniwi ni Kabuta n te Itingaun

Unimwaane Kelly R. Johnson e uringa raoi te bong are e weteaki iai ngke e riki bwa te bitiobi ngke 31 ana ririki. N te bong naba anne n ana tai n tutuo e rootaki n te aoraki ae Bell’s palsy—te bwai ae riki n aki mwakurin te mwatireti n iteran ubuna are te iterana e a karika te boo ke te mamaara.

Bon te tai ae rangi ni kangaanga, tiaki ibukin mweengabuakana ao mamaana are e riki man te aro anne ma ibukin naba tibwangana aika boou aika rangi ni mwaiti. Ma te tai ane e kangaanga anne e a riki bwa ai te kakabwaia.

“N akea ataakina bwa tera ae nang riki n te aro ane e teimaan anne, I karikirakea au nanoanga ibukiia aomata ake a mena irarikiu ni karokoa tokin maiu,” e taku. “I reiakinaki raoi bwa aomata a rinanon baika a kangaanga ao ni kananokawaki ake aki kona ni kaitarai are e a roota aia konabwai, namakin, ao onimakinaia.”

Inanon te tai, e aki angaraoi te beku n ana Ekaretia te Uea. Ma n aron ae ngkai ana reirei te Tia Kamaiu “a kitan naba aia karaun” (Mataio 4:20) ao a Iria, “baikara nako bwaai ake ti tuangaki bwa ti na karaoi, ti tauraoi ni karaoia,” e taku Unimwaane Johnson.

E aki kakaawaki bwa te tabo raa are e weteia ke ana utu, a nako ma nanoia ae tauraoi, aia iango, n taratara ni kunea te tamaroa n aki tabe ma aia kangaanga.

Kelly Ray Johnson e bungiaki Pleasant View, Utah, n Tianuare 16, 1963, irouia Harold Raymond Johnson Jr. ao Helen Cragaun Johnson. E ikawairake i Ogden, Utah, ao ni mareaki ma Teressa Lynn Bartrum i Salt Lake City Tembora ni Maati 27, 1986. Iai natiia aika niiman.

Unimwaane Johnson e bane ana reirei mai Weber State Iuniwetiri n 1987 ma ana baetura tiaeanti tikurii n tauan mwiin te mwane ao n reke ana mwaatita tikurii n tararuan bitineti mai Brigham Young Iuniwetiri n 1989. E a tia ni beku bwa te tia kawakin mwane ibukin KPMG International Cooperative ao n angiin te tai ae nako e riki bwa te tia kawakin mwane n ibuokanbwai ma Norman, Townsend, ao Johnson.

Unimwaane Johnson, are e mwakuri bwa te Itingain n te Aono n te tai are e weteaki n nakoana, e a tia ni beku bwa te beretitenti i Thailand Bangkok Mition, te tabo are e karaoa iai ana mwakuri ni mitinare ae bwanin taina, ao n riki bwa te beretitenti n te titeiki, te kauntira n te beretitentii n te titeiki, kauntira ae rietaata, te beretitenti n te kooram n unimwaane, te tia kairiiri n te mition ibukin te uoote, ao te tia reirei ibukin katauraoaia mitinare n te titeiki.