Unimwaane Jeremy R. Jaggi

Mataniwi ni Kabuta n te Itingaun

Ngke tebwitabun ana ririki Unimwaane Jeremy R. Jaggi, mwaanena ae itiua ana ririki, ae Kristen, e reke irouna te maninaoraki are e a karika rootakin kaburorona. A taku taokita bwa e na aki kona ni maiu.

Te kairake ae Jeremy e katorobubua n tataro irarikin ana kainiwene ni mweengaia ana utu i Salt Lake City, Utah, USA, ao ni bubutia te Atua ni kan ataia bukin tera ngkai e na mate inanon ataeina. Mwaanena, e ngae n anne, e bon kakabwaiaki man te nakoanibonga ao e maiu.

Aio bon te bwai are e karekea te bitaki ibukin Jeremy ae 17-ana-ririki n “rairananona ao n irii ana tua te Atua,” are e a kairia n rangi n taua ma nanona ni warekan ana Boki Moomon n te moan tai. Imwiina ao e beku bwa te mitinare ae bwanin-ana tai i Ohio Cleveland Mition.

E na bae ni manga okira arona Jeremy ni katorobubua n tataro ma nanona ae bwanin n ririki ake imwiina ngkai kainnabana, ae Amy, are e a moan-tai bungina iroun natiia ae aia kateniman. “N te tai anne, I namakina te rau—te rau are e tii kona ni kabwarabwaraaki ngkai I ramwaneaki ni bain Tamara are i Karawa n tangira ma aabuuen te Tamnei ae Raoiroi,” e taku.

Te rau anne e uotia rinanon te tai ae uarereke n te tai are e maiu iai natiia are e a tibwa bungiaki ao namwakaina n nanokawaki n rimwiaki ma manga bwakan riki temanna natiia. “Ti kataaki ni bwaai nako n ara kawai,” e taku, “ma teimatoa ni ‘kabatiai ara kimwareirei’ [Iakobo 1:2] bwa te Tia Kamaiu e a tia ni katauraoa te kawai ibukira ni karekea te rau ao te kukurei.”

Jeremy Robert Jaggi e bungiaki i Salt Lake City, Utah, USA, ni Maati 23, 1973, irouia Robert Stanley Jaggi ao Judy Anne Roos. E mareaki ma Amy Anne Stewart i Salt Lake Tembora n Tuun 12, 1995. Boni kaaro ae niiman natiia.

Unimwaane Jaggi e karekea ana baetura tikurii n te tiaeanti ni katein tiaeanti ao kuakua man te Iuniwetiri i Utah ma ana mwaatita tikurii ni kakoroi moti n tararuan bitineti man te Pepperdine Iuniwetiri. Bon te mataniwi ni kateimatoan rikiraken kabobwai ni bwain te bitineti ibukin Alkermes ao te manatia ni komeeti n tararuan te kabooaba ibukin ana Karinmwane HCA n te tai are e weteaki ngke e karaoa nakoana.

Unimwaane Jaggi e a tia ni beku bwa te Itingaun n Aono, te beretitenti ibukin Utah Ogden Mition, tia ibuobuoki n tia koroboki ni kakoroi moti ibukin te titeiki, bitiiobi, beretitenti n te kooram n unimwaane, tia reirei n te tieminari, te kauntira n te beretitentii ibukin te Bootaki n Ataeinimwaane n te uoote, te tia reirei ibukin aron katauraoan te mitinare n te titeiki, ao te tia kairiiri n te uoote ibukin te mition.