Taai aika Ururingaki n te Maungatabu
N aron are e berita Beretitenti Russell M. Nelson, te maungatabu aei e aki kona ni mwanuokinaki n anga aika mwaiti.1 Aikai tabeua taai aika ururingaki n te maungatabu.
Kanikina ae Boou
Beretitenti Nelson e katanoata te kanikina ae boou ibukin te Ekaretia (taraa iteraniba 73). Te kainikina e kairaki inanona aran te Ekaretia inanon te reketangkoro, n tei ibukin atibun te maninganinga. N te kanikina anne ao e tei tamnein Kristo iaan te kateitei, ni kauringiira ibukin te Tia Kamaiu ao Ruanmatena ae akea kaaina.
Te Kauabuaua ni Kauring ni Katanoata
E warekia Beretitenti Nelson “Kaokan ana Euangkerio Iesu Kristo ae Bwanin: Te Kauabubua ni Kauring ni Katanoata nakon te Aonaaba,” are e kaoia aomata n taabo nako n reiakinna bwa ana euangkerio Iesu Kristo are e taekinaki n te Nu Tetemanti e mena ngkai iaon te aba n te bong aei. Te rairairi ae kariaiakaki e kona ni kuneaki inanon te moaniba ibukin te rongorongo aei inanon 12 taetae. Membwa ake a teimatoa ni kakantaninga te raitaeka ae kariaiakaki a kona ni kakaei raitaeka ake a kaman rairaki ibukin te katanoata n ana marooro Beretitenti Nelson (taraa iteraniba 91).
Bootaki n Taromauri
Te “bootaki n taromauri” e karaoaki ni Moaningabongin te Tabati bwa mwakoron bukamaruan ana kauabubua ni kauring te Ekaretia ibukin te Moan Kaotioti. N tain te bootaki ae tabu aei, Beretitenti Nelson e kairiia Aika Itiaki bwa a na Takaruaa Hosanna, te kabwarabwara ni katiteuanaaki n nebonebo ae kabonganaki n taai aika onoti n aron katabuan te tembora (iteraniba 92).
Te Kauoua n Aki Mamatam ni Kabuta te Aonaaba
Ibukin te kauoua n tai inanon ruaiua te bong, Beretitenti Nelson e kaoa te aonaaba bwa a na aki mamatam ao n tataro “bwa te aoraki ae butinako ngkai e na tararuaki raoi, a na kawakinaki taan tararua, e na kakorakoraaki kaubwain te aba, ao te maiu e na okira arona are e taneiai te aba iai” (iteraniba 74). Te kauoua n aki mamatam n te aonaaba e karaoaki n te Good Friday, Eberi 10, 2020.
Tembora aika Boou
Beretitenti Nelson e katanoatai baaire ibukin katean waniua tembora aika boou ni kabuta te aonaaba (taraa iteraniba 115). Iai ngkai 167 Tembora aika mwakuri ni kabuta te aonaaba.
Taan Taetae aika Kairake
Te tetere n tairikin te Kaonobong e karaoaki man aia marooro uoman ataei aika tebwitabun aia ririki, aika Laudy Ruth Kaouk ao Enzo Serge Petelo, are e taekinna bwa e kanga te nakoanibonga ni kakabwaiaia kairake (iteraniba 56 ao 58). E riaon ngkai 20 te ririki n te tai ae a kairaki iai taan taetae aika kairake n te maungatabu ni kabuta.
Te Katangitang ae Mwaakaroiroi
Kuna ni katangtang ibukin te maungatabu a kaman raweaki mai imwaaina. Aika Itiaki ni katobibia te aonaaba a kaina te maungatabu n anenea “Ti Karabwako te Atua ibukin am Burabeti” ma taian kuaea i Ghana, New Zealand, Mexico City, South Korea, Germany, ao Brazil (taraa iteraniba 2).