Otanna ao Areruia—Iesu Kristo ae Maiu: Te Kabanea ni Kakaawaki ni Kaokan Bwai ao te Itita
Ni bongin Otanna ao Areruia, anenea areruia—ibukina bwa E na tautaeka n aki toki!
Nakoia tariu ao mwaaneu ni kabuta te aonaaba: ma otanna ao areruia, ti bukamarua Iesu Kristo ae maiu n tain Kaokan Bwai ae reitinako ao te Itita. Ma te tangira ae kororaoi, ara Tia Kamaiu e karaui nanora: “Kam na karekea te rau mai Rou. Ami bwai i aon te aba te rawawata: ma kam na kabebetei nanomi; I a tia ni kataea ana kai te aba”1
Tabeua te ririki n nako, Ngai ao Titita Gong ti kaitiboaki ma te utu ae kakateke, natiia te ataeinnaine ae mamama Ivy e kaotinakoa nnen ana waioriin. E kaotinakoa te waioriin, e kamatoaa ao e kanimwa te rootin iaona. Ngkanne e karaurau ni karina te waioriin inanon nnena, e anga ana karine, ao e tekateka. E a tibwa reireinna, e tibwauai baike e atai n te waioriin. Ngkai, ririki imwina, Ivy e katanga te waioriin n ae tangiraoi.
N te tai aei n te maiu ae mamate, ai aron ngaira Ivy ao ana waioriin. Ti waaki man te moan. Inanon te kataneiai ao te botumwaaka, ti rikirake ao ti kakatamaroaira. Inanon waakin te tai, te inaomata n rinerine ao waakin te maiu ae mamate a buokiira n riki n ai aron ara Tia Kamaiu ngkai ti mwakuri ma ngaia inanon Ana ne ni kurebe2 ao n ira kawain Ana berita.
Rekenibong, n ikotaki ma te kauabubua n ririki aei, e kaotii aron kaokakin bwai.3 Inanon bukamaruan Kaokan Bwai ae reitinako n ana euangkerio Iesu Kristo, ti katauraoi naba ibukin te Itita. Ni kauoua aikai, ti kimwareirei ni manga okin Iesu Kristo. E maiu—tiaki tii ngkekei, ma ngkai naba; tiaki ibukiia tabeman, ma ibukiia aomata ni kabane. E a tia n roko ao e teimatoa n roko nakoia akana a uruaki nanoia, tuatuangia taenikai te kanakoaki, mataki te manga noraba, ma n tua ririkin akoan te aba.4 Anne ngaira n tatabemaniira. Ana berita ni kabooira e kaineti, nakon arora ngkoa, arora ngkai, ke ara tabeaianga ibukin taai aika a na roko.
Ningabong bon Tabatin te Baani. N te katei, banni bon te kanikina ae tabu are e kaota te kimwareirei inanon ara Uea, ngke e Rinin Kristo n Tokanikai i Ierutarem, ike “e bati aomata … aika uouoti mwaangan te aroka te baam, ao a nako ni kaitibo ma ngaia”5 (Kona bae ni kan ata te korobanna ae oioi iroun Harry Anderson are e tine n ana aobiti Beretitenti Russell M. Nelson, bon i akuun ana taiboraj.) Inanon te boki ae te Kaotioti, naake a neboa te Atua ao te Tibutetei a karaoia ma “ninira aika mainaina, ao bani bam inanon baia.”6 N raonaki ma “niniira n te raoiroi, ao “baunuean te mimitong” banni e mwaneweaki naba n te tataro ni katabu ibukin te Kirtland Tembora.7
Ao eang, kakaawakin Tabatin Baani e raka riki nakon aomata aika uanao ake a kamaura Iesu ma banni. N Tabatin Toan te Baani, Ma te tokanikai Iesu e rinnako i Ierutarem n aaro are aomata aika kakaonimaki a ataia bwa kakoroan nanon te taetae ni burabeti. N aron are e a kaman taetae ni burabetiia Takaria8 ao te Tia Areru, ara uea e rinnako i Ierutarem iaon baona te aati ngke te koraki ae uanao a tatakaruaea.“Otanna n te kabanea mai ieta.”9 Otanna nanona “kamaiua te aba ngkai.”10 Ngkanne, ngkai, ti kukurei, “E na kakabwaiaaki ane e roko n aran te Uea.”11
N te wiiki are imwiin Tabatin te Banni bon Tabatin te Itita. Beretitenti Russell M. Nelson e reirei bwa Iesu Kristo “e roko bwa e na kabwara te tarau are tiaki ana tarau, ibukina bwa iai ara tarau ae ti aki kona ni kabwaraa”12 Eang, rinanon Ana Mwakuri ni Kamaiu Kristo, ni kabane natin te Atua “a kona ni kamaiuaki, man te ongeaba nakon taian tua, ao ana otenanti te Euangkerio.”13 N te Itita, ti anenea areruia. Ae nanonaki n Areruia bon “ko na neboa Te Uea ae Iehova.”14 Kooratin Areruia n Handel’s Messiah bon te katanoata n te Itita ae bati tangirana bwa Ngaia bon “Aia King king, aia Uea ueaa”15
Bwaai aika riki ake a tabu imarenan Tabatin te Bani ao Tabatin te Itita bon karakinan otanna ao areruia. Otanna bon ara bubuti bwa e na kamaiu te Atua. Areruia e kaota ara nebonebo ao ara kakaitau nakon te Uea ibukin te kamaiuaki are anga te kantaninga ao te karietataaki. N otanna ao areruia ti kinaa Iesu Kristo ae maiu bwa ngaia oin te Itita ao kaokan bwai ni boong aika kaitira.
Kaokan Bwai ni boong aika kaitira e moa man te —kaotin raoi te Atua te Tama ao Natina, Iesu Kristo, nakon te kairake ni burabeti are Iotebwa Timiti. E taku te Burabeti Iotebwa, “Kam kona n taraa karawa inanon nimaua te miniti, e na bati riki ae ko ataia man warekan bwaai ake a tia ni koreaki iaon te botoniango anne.”16 Ibukina bwa e manga kaukaki karawa, ti ataia ao ti “kakoauaa te Atua, te Tama ae Akea Tokina, ao Natina, Iesu Kristo, ao te Tamnei ae Raoiroi”17—te Atu n Atua ae tabu.
N Tabatin te Itita, Eberi 3, 1836, inanon moan ririkin Kaokan Bwai, Iesu Kristo ae maiu e kaoti ngke e katabuaki te Kirtland Tembora. Naake a nooria a kakoaua Irouna ni kakaokoro aika reitaki imarenan te ai ao te ran: “Matana ai aron uran te ai; iran atuuna e mainaina n aekan te tinoo; ubuna e oota riki nakon ootan taai; ao bwanaana ai aron butin te ran ae korakora, bon bwanaan Iehova.”18
N te tai anne, e katanoata ara Tia Kamaiu “Ngai te Moan ao te Kabanea; Ngai are e maiu, Ngai are e tiringaki; Ngai te tia tei ibukimi nakon te Tama.”19 Aei naba, kakaokoro aika reitaki—te moan, ao te kabanea, ae maiu ao ae tiringaki. Ngaia bon Areba ao Omeka, te moan ao te kabane,20 te tia karika ara onimaki ao te tia kakoroa.21
Imwiin kaotin Iesu Kristo, a roko naba Mote, Eriat i, ao Eria. Man te kaetieti ae tabu, burabeti aika a korakora aikai a kaoki kiingin ao ana kariaia te nakoanibonga. Ngaia are, “kiingin te mwioko n tararua aei a mena”22 i nanon Ana Ekaretia ae Kaokaki ni kakabwaiaia ni kabane natin te Atua.
Rokon Eria n te Kirtland Tembora bon kakoroan naba nanon ana taetae ni burabeti Maraki n te O Tetemanti bwa Eria e na oki “mwain rokon ana bong are e kakannato ma ni kakamaku te Uea.”23 Ni karaoan anne, kaotin Eria e titebo ana tai n riki, e ngae ngke e aki manennanti, ma aia tai Iutaia n Te Riao are bon te katei ni kariaa okin Eria ma te karinerine.
E mwaiti utun Iutaia aika kakaonimaki are a katauraoa ana bwai n amwarake Eria iaon aia taibora n tain Te Riao. E mwaiti ae kaona raoi te mwangko ni kaoiia man butimwaeia. Ao tabeman, inanon te baka n amawarake are bon kakaraoaki n tain Te Riao, a kanakoa te ataei nakon te mataroa, are n tabetai e kaukaki teutana, n nooria ngkana iai Eria n tataninga i tinaniku ibukin kaoana bwa e na rinnako.24
Ni kakoroan nanon te taetae ni burabeti ao bwa mwakoron kaokakin bwai ni kabane are e beritanaki,25 E roko Eria n aron are e beritanaki, n te Itita ao ni moan waakin Te Riao . E uota te mwaaka ni kabaebae ni kabaeia utu i aon te aba ao i karawa. N aron are e reirei Moronaai nakon te Burabeti Iotebwa, Eria e “na unikia i nanoia naati berita are a tia ni karaoaki nakoia taama, ao a na rairi nanoia naati nakon tamaia. Ngkana akea anne,” E reitia Moronaai, “te aonaba ae bwanin e na urubekebekeaki n tain rokon [te Uea].”26 Tamnein Eria, kakoauaan te Tamnei ae Raoiroi, e uotiira nakoia ara utu—ake ngkoa, ngkai, ao n taai aika a na roko—n ara riki, rongorongora, ao ara mwakuri n te tembora.
Ti a uringa naba bwa tera ae e kanikinaea te Toa are Teriao. Te Toa are Te Riao e kauringa kainaomatakiia tibun Iteraera man 400 te ririki inanon te tautoronaki. Ana boki Te Otinako e kaota aron rokon te kainaomataaki aei man kaiia aika biraoki, uuti, naango, mateia maan ake n te tawana, kaboa, tibu ni buri, te aiti ae bati ni kamamate ao te ai, taake ake rokati, ao ro tongitong. Te kabanea ni kai e anaa maiuia karimoa n te aba, ma e aki riki aei ni mwengaia te bata are Iteraera—ngkana auti akanne a oreaki etaia n raraan te tiibu ataei te karimoa ae itiaki iaon etan te mataroa.27
Te anera are te tia kamamate e na riaon auti ake a mwaakenaki n te kanikina are raraan te tibu te ataei.28 Riaoaia anne, ke te riao, e tei ibukin Iesu Kristo ngke n tokin te tai e tokanikai iaon te mate. Eang, raraan ni kamaiu ana tibutetei te Atua e angan ara Tia Kawakin Tibu ae Raoiroi te mwaaka ni bootia Ana aomata n taabo nako n aaro nako n uotiia nakon te Ekaretia n iteran te rabuna aika uoua.
N ae onoti, Ana Boki Moomon e kabwarabwara “mwaakan ao mangautin Kristo”29—te kabanea ni kakaawaki n te Itita—n aron uoua kaokan bwai.
Te moan, kanoan te mangauti bon kaokakin rabwatara nakon “aroia ni kororaoi”;Baai ma wae ma toma nako,” “ao bon akea naba te iranatu teuana ae e na bua.”30 Te berita aei e anga te kantaninga nakoia ake e a tia ni bua baaia ma waeia, ake a tia ni bua aia konabwai n taratara, ni kakauongo, n nakonako, ke iango ake a bua man aoraki aika korakora, aorakin te iango, ke aki toamaun rabwataia tabeua. E kuneira. E kamarurungiira.
N te aro n tamnei, te kauoua ni berita n te Itita ao ana Mwakuri ni Kamaiu ara Uea bwa “bwaai ni kabane a na manga kaokaki nakon aroia raoi.”31 Kaokakin bwai n te aro n tamnei e kaota ara mwakuri ao nanora. N aron te berena iaon te ran,32 e kaoka “ane e tamaroa,” “raoiroi,” “momotiraoi,” ao “nanoanga.”33 E maroaka te burabeti Aramwa e kabonganaa te taeka ae kaokaki 22 te tai34 ngke e kaumakiira bwa ti na “babaire ma te motiraoi, motikitaeka n ae raoiroi, man reitanako karaoan ae raoiroi.”35
Ibukina bwa “te Atua ibon irouna e kamaiu man buren te aonaaba,”36 ana Mwakuri ni Kamaiu te Uea e kona ni kaoki tiaki tii ake ngkoa, ma are e kona n reke. Ibukina bwa E atai marakira, karawawatakira, aorakira, kariiriara n aekaia nako,37 E kona, ma te nanoanga, ni buokiira ni kaineti ma mamaarara.38 Ibukina bwa te Atua bon “te Atua, ae kororaoi man etieti, ao te Atua ae nanoanga naba,” te babaire n nanoanga, “e na rau te nano n tangiran te motiraoi.”39 Ti raira nanora ao ti karaoa ara kabanea ni kona. E katobibira n aki toki “ni baina n tangira”40
N te bong aei ti bukamarua kaokan bwai ao te mangauti. Ma ngkami, I kimwareirei inanon ao Kaokan Bwai ae reitinako ni bwaninin ana euangkerio Iesu Kristo. Ni moan waakinana uabubua te ririki n nako n te tiburing aei, te oota ao te kaotioti e reitinako n roko rinanon ana burabeti ae maiu te Uea ao Ana Ekaretia are e ingoanaki n Arana—Ana Ekaretia Iesu Kristo ibukiia Aika Itiaki ni Boong aika Kaitira—ao rinanon te kaotioti ibon iroum ao te kairiiri man ana bwai n tituaraoi ae koro arona te Tamnei ae Raoiroi.
Nakoimi, I kaota au koaua iroun te Atua, Tamara ae Akea Tokina, ao Natina ae tangiraki, Iesu Kristo ae Maiu. Mwaane iaon te aba a tauria n te kaibangaki ni kammarakia ao imwiina e a mangauti. Ma bon tii Iesu Kristo ae Maiu n arona ae kororaoi ni mangautina e teimatoa n iai mwaake inanon Baina, ao i rarikina. Bon tii Ngaia ae kona ni kangai, “I a tia ni koroi arami inanon baiu.41 Bon tii Ngaia ae kona n taekina aei: “Boni ngai are i tabekaki rake. Ngai Iesu are e tauraki. Ngai Natin te Atua.”42
N aron Ivy ae uarereke ao ana waeoriin, ngaira naba n aro tabeua ti bon tibwa waaki. Ni koauana, “e tuai n nori te mata, ao e tuai n ongo te taninga, ao a tuai n rin inanon te aomata, boni baika E katauraoi te Atua i bukiia ake a tangiria.”43 N taai aikai, ti kona n nora raoiroin te Atua ae bati ao ara konabwai ae tabu ni bwa ana tangira te Atua e na rikirake iroura ngkae ti ukoukoria ao ti ibuobuoki imarenara. Ni kawai ao taabo aika boou, ti kona ni karaoia ao n riki nako iai, te tua iaon te tua, te akoi teuana iaon teuana, n tatabeman ao ni bootaki.
Nakoia taari ao mwaane n taabo nako, ngkai I kaitibo man bootaki n reirei, ami onimaki ao raoiroimi e kaonai ma te namakin ni kukurei ni maiuakinan te euangkerio ao te kakaitau. Ami koaua ao ami waaki n te euangkerio e kakorakora au koaua ao au waaki n te euangkerio. Ami tabeaianga ao kimwareireimi, ami tangira ibukin ana aomata te Atua ao ara mronron irouia Aomata aika Itiaki, ao ami atatai man taian taneiai ni koaua ao oota aika kaokaki e kakorakora bwaninin au euangkerio ae kaokaki, ao Iesu Kristo ae maiu bon te kabanea ni kakaawaki. Ti bane n onimaki bwa, “rinanon te nang ao otantaai, te Uea, tiiku irou”44 Ma te nano teuana ti ataia bwa, ibukin uotara ao tabeaiangara, ti kona ni wareki ara bwai aika bati.45 N aron bwaai n te bong koraki ao bwaai aika uarereke man bebete, ti kona n nori bwaai aika korakora ni koro bukiia inanon maiura.46
“Ao e na koro bukina bwa a na ikotaki naake a raoiroi mai buakoia botanaomata ni kabane, ao n nako nakon Tion, n anenea kunan te kimwareirei ae akea tokina.”47 Ni bongin Otanna ao Areruia, anenea areruia—ibukina bwa E na tautaeka n aki toki! Takaruaea Otanna, nakon te Atua ao te Tiibutetei! N aran Iesu Kristo ae rietata man tabu, amen.