Unimwaane Adeyinka A. Ojediran

Mataniwi ni Kabuta n te Itingaun

Eberi 2020 maungatabu ni kabuta bon “te wiikente ae aki kona ni mwanuokinaki” ibukin Unimwaane Adeyinka A. Ojediran.

E rairaki nakon te Ekaretia ao ni kamatoaaki bwa te Mataniwi ni Kabuta n te Itingaun—te moan aomata mai Nigeria ao Ae Itiaki i Aberika Maeao. E a korakora riki ana kakaitau ao kukureina e rikirake ngke Beretitenti Russell M. Nelson e katanoata bwa ana kateniua n tembora Nigeria e na kateaki i Benin City.

“Akea au kantaninga n anne,” e taku Unimwaane Ojediran, e moangare. “N ongora n ana taeka ara burabeti ae taku bwa e nang manga tei riki teuana te tembora i Nigeria, e bon rangi ni kakukurei. Irou, bon kamatoana bwa ana mwakuri te Uea e birimwaaka butina. Ngaira ni kabane a rangi ni mwaiti bwaai aika ti na karaoi ni katauraoiia natin te Atua ibukin Kauaokin Natina.”

E bungiaki i Ibadan, Nigeria, n Eberi 5, 1967, irouia Amos Adeniyi ao Caroline Anike Ojediran, Adeyinka Ayodeji Ojediran e reke ana batura tikurii iaon te aroka n te Iuniwetiri i Ilorin n 1991 imwaain reken ana mwaatita tikurii ibukin tararuan bitineti man Ladoke Akintola Iuniwetiri ibukin Rabakau aika Boou. E reke nakoana n taekan te mwane ao tararuan bitineti n riki bwa te tia kawakina taekan te mwane ae bubuutaki. E mwakuri bwa te manatia ibukin bitineti ao taekan te mwane ibukin Shell Nigeria imwaain weteana n riki bwa te Mataniwi ni Kabuta.

Teniua te ririki imwiin bwabetitoana, e kaitibo ma Olufunmilayo Omolola Akinbebije n tain te bobotaki. N tokin te tai ao ngaaia uoman a momoana aia marooro ni kareke tangira, ma aia mwakuri ni kaawa aika kakaokoro nanona “ti bon tii rereitaki n te tareboon.”

N tokin te tai ao taanga aikai a mareaki n 1998 ao ni kabaeaki i Johannesburg South Africa Tembora n Nobembwa 14, 2002. Te taanga ae Ojediran iai temanna natiia te aine.

Unimwaane Ojediran e kakaitau ibukin nakoa nako n te Ekaretia ake e a tia ni karekei man te tai are a kaaina iai te Ekaretia n 1990 ngke 23 ana ririki. Mwioko nako inanon te ekaretia a tia ni buoka aron rikirakena ao n anganna naba tibwanga aika tabu ni buokiia tabeman n rikirake inanon weteaia ao n aia beku.

Unimwaane Ojediran, e beku bwa te Itingaun te Aono n ana tai ni weteaki, e a tia naba ni beku bwa te kauntira n te beretitentii n te mition, beretitenti n te titeiki, kauntira n te beretitentii n te titeiki, bitiobi, kauntira n te bitiobiriki, ao te beretitenti n te mwaanga.