Waaki Nako inanon te Onimaki
I kakabwaiai ngkami ma te rau ao n rikiraken ami onimaki iroun te Uea.
Tariu ao mwaneu aika kam tangiraki, ngkai ti a roko ni banen te maungatabu ae ururingaki aei, ti kaota ara kakaitau nakon te Uea. Te katangitang a rangi n tangiraoi, ao taian marooro a rangi ni kaunganano.
N tain te maungatabu aei, ti a tia n rinanon baika mwaiti aika kakawaki. N tain bukamaruan te ka 200 n ririki aei, ti a tia ni kaota te katanoata nakon te aonaaba n taekina koauan raoi Kaokan ana euangkerio Iesu Kristo ni bwanina.
Ti kauringa Kaokan te euangkerio n Takaruaea Otanna.
Ti kaota te kanikina ae boou ni kanikinaea ara onimaki iroun te Uea Iesu Kristo ao ibukin kinaakin baika a nooraki n ana rongorongo ao ana bwai te Ekaretia.
Ti a tia ni kataua teuan te bong n te aonaaba n aki mamatam ao n tataro, bwa e na kauarerekeaki butin te aoraki ae rota te aonaaba, a na kawakinaki taan tararua, e na kakorakoraaki kaubwain te aba, ao te maiu e na manga okira arona. Te aki mamatam aei e na karaoaki n te Kanimabong ae Raoiroi, Eberi 10. Ao e na riki bwa te Kanimabong ae rianako tamaroana!
N te Tabati ae n roko bon Tabatin te Itita, ike ti na manga kauringa Ana Mwakuri ni Kamaiu ao Mangautin ara Uea Iesu Kristo. Ibukin Ana Mwakuri ni Kamaiu, Ana bwaintangira ae te mangauti e na reke nakoia ni kabane ake a tia ni maiu. Ao ana bwaintangira ae te maiu ae akea tokina e na reke irouia ni kabane ake a tau man aia kakaonimaki nakon otenanti ao berita ake a karaoi n Ana tembora aika tabu.
Bwaai nikabane aika ringa te nano n te maungatabu aeii n Eberi 2020—ao te wiiki ae tabu are ti a waakinna ngkai—e kona ni kauarerekeaki man uoua taeka aika tabu: “Ongo Irouna.”1 Ti tataro bwa kabotoan ami iango iaon Tamara are i Karawa, are e atong taeka akanne, ao iaon Natina ae Tatangiraki, Iesu Kristo, ana kaona am iango mai ibuakon bwaai ake a taekinaki. Ti tataro bwa ko na motinnanoia raoi n ongo, n ongora nakon, ao ni karaoa nanon ana taeka te Tia Kamaiu.2 I berita anne e na kakerikaaka te maaku ao te onimaki e na rikirake imwiina.
Kam rabwa ibukin nanomi ni karaoi mweengami bwa taabo ni katantan ni koaua ibukin ami onimaki, are e kona ni maeka iai Tamnein te Uea. Ara karikiram ibukin kamatebwaian te euangkerio, Nakomai, Iriirai, e na reitinako ni kakabwaiai maiumi. Ami mwakuri ae teimatoa n te waaki aei—ao inanon naba taai ake kam namakinna bwa akea te nakoraoi ae reke—e na bitii maiumi, ami utu, ao te aonaaba. Ti na kakorakoraaki ngkai ti riki bwa ana reirei te Uea aika kakaonimaki riki, n tei ao ni kaota ara namakin Ibukina, n taabo ake ti mena iai.
Ngkai, ti a marooroakina taekan taian tembora. Iai ngkai 168 ara tembora aika a tia ni katabuaki ni kabuta te aonaaba. Tabeua aika a tabe ni baireaki ao ni iangoaki kateaia. Ngke a katanoataaki babaire ibukin katean te tembora ae boou, e riki bwa mwakoron ara rongorongo ae tabu.
E taraa ni kamiimi katanoataan tembora aika boou ngkai a bane ni kainaki tembora inanon te tai ae uarereke.
N ae riaon tebubua te ririki n nako, Beretitenti Wilford Woodruff e a kaman noori baika a na riki inanon ara bong, n aron are e koreaki n ana tataro ni katabu ibukin te Salt Lake, are e anga n 1893. Tabeman mai buakomi kam a tia n noora taekan te tataro ae kamiimi aei iaon bwai n reitaki n te intanete.
Ongora te onon ni bubuti aei mai iroun ana burabeti te Uea “Ngkana Am aomata a aki reke aia tai n rin inanon te auti ae tabu aei … ao a aki karauaki ao ni mena inanon te kabuanibwai, ni katobibiaki n taian kangaanga … ao n rairi mataia nakon Am auti ae tabu aei ao ni bubutiko kainaomatakiia, ibukin buokaia, ni karababa mwaakam ibukiia, ti bubutiko, n taraa naano man Am tabo ni maeka inanon te nanonaga … ao n ongo tangiia. Ke ngkana natiia Am aomata, n ririki aika a na roko, a karaureaki nako, rinanon aekaki ni waaki nako, man te tabo aei, … ao ana tang Nakoim man korakoran karawawatakiia ao nanokawakiia bwa kona buokiia ao ni kainaomataia, ti nanorinano n onnon Nakoim n … ongo tangiia, ao n anganiia kakabwaia ake a bubuti ibukina.”3
Tariu ao mwaaneu, inanon ara tai ni karawawataki ngkai a kainaki taian tembora, kam kona ni kabonganai mwaakan ami berita ao te entaumente man te tembora ngkai kam karinei ami berita. Taiaoka kabongana te tai aei ngkai a kainaki tembora n reitinako ni maiu inanon te maiu ae tau nakon te tembora ke n tau nakon te tembora.
Marooroakina taekan te tembora ma am utu ao raoraom. Ibukina ngkai Iesu Kristo bon boton bwaai ni kabane ni baike ti karaoi inanon te tembora, ngkai kam kabatiaa riki iangoan te tembora kam na kabatiaa riki Iangoakina. Kamatebwai ao tataro n reiakina riki taekan te mwaaka ao te rabakau are ko a tia ni bwaintangiraaki iai—ke ma are ko na bwaintangiraaki .
Ngkai ti kukurei ni katanoata te babaire ibukin katean waniua tembora aika boou n taabo aikai: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; and Shanghai, People’s Republic of China.
Nikabane taboo aika waniua aikai, taan rabakau n te kateitei a na mwakuri ma aobitia n te tabo bwa e aonga te tembora n tau nakon te tabo ao n riki bwa te bwai ae e tamaroa nakon te kaomuniti.
Te babaire ibukin te tembora i Dubai e roko man te kaeka nakon aia kakao ae mangori, are e butimwaeaki ma te kukurei.
Iango ao waaki ibukin te babaire ibukin Shangai e bon rangi ni kakawaki. N ae riaon uabui te ririki, membwa-ake a kororaoi n te People Republic of China a tia n nanakon te Hong Kong China Tembora. Ma n Turai 2019 te tembora anne e a tia ni kainaki ibukin baireakin manga onobwaiakina ae maan are e kainanoaki.
I Shanghai, teuana te autinibotaki ae tamaroa e na riki bwa te tabo ibukiia membwa i Tiaina n reitanako ni karaoan te otenanti n te tembora—n te People’s Republic of China—ibon ibukiia ao aia bakatibu.4
N aaba ni kabane, te Ekaretia aio e reireiniia ana membwa ni karinea, ongotaeka, ao ni boutoka te tautaeka.5 Ti reirei kakawakin te utu, n riki bwa kaaro aika raraoi ao kaain te aba aika moan te tamaroa. Ibukina bwa ti karinea te tua ao taian kaetieti n te People’s Republic of China te Ekaretia e aki kanakoia mitinare nako iai , ao ti aki naba karaoia ngkai.
Ake tiaki kain te aba ao Itiaina ana reitinako ni kaokoro ni bootaki. Tein ataakin te Ekaretia n te tua ikekei e teimatoa n aki bitaki. N te moan waaki ni kabonganaan te kateitei, te rin nako iai bon tii man kabaean am tai. Te Shanghai Tembora bon tiaki te tabo irouia irua ake a roko man abaa ake tabeua.
Tembora aika waniua aikai a na kakabwaiai maiuia aomata aika mwaiti n iteran te rabauna ake uoua. Taian tembora bon bwaai aika rangi ni kakannato ni Kaokan ana euangkerio Iesu Kristo ae bwanin. Inanon raoiroin ao ana akoi te Atua, E uoti kakabwaia man te tembora ni kaania riki nakoia natina n taabo nako.
Ngkai e reitinako Kaokan Bwai, I ataia bwa te Atua e na reitinako ni kaoti bwaai aika mwaiti aika korakora man kakaawaki aika a kaineti ma Ueana ikai iaon te aba.6 Te abanuea anne bon Ana Ekaretia Iesu Kristo ibukiia Aika Itiaki ni Boong aika Kaitira.
Tariu ao mwaaneu, I kaota au tangira ibukimi. Inanon taai ni karawawata ao ni kananououa aikai, ao ni kamwakura te kariaiakaki are I anganaki, I tangiria ni katokaa iaomi te kakabwaia n abotoro.
I kakabwaiai ngkami ma te rau ao rikiraken ami onimaki iroun te Uea.7
I kakabwaiai ngkami bwa kam na rairi nanomi ao n riki n ai Arona n te bong teuana ma teuana.8
I kakabwaiai ngkami bwa kam na ataia bwa te Burabeti Iotebwa Timiti bon te burabeti ni Kaokan ana euangkerio Iesu Kristo ae bwanin.
Ngkana iai ae aoraki ibuakomi ke ami utu aika tangiraki, I katuka au kakabwaia ni kamarurung, ngkana e booraoi ma ana kantaninga te Uea.
I kakabwaiai ngkami, n reitia riki ma kaotan au tangira nakoimi n tatabemani ngkami, n aran Iesu Kristo, amen.