Mweenga aika Tamaroa
Te Tia Kamaiu bon te intinia, te tia kateitei ao te tia katamaroa nanon te auti ae bane arona. Ana karikirake bon kakororaoan ao kakukureian tamneira n ae akea tokina.
N te tai ae e aki maan ao e teke matau n te raubaba ae bubura are a kakatekeaki iai aia katanoata bitineti. E katanatoai bwain nanon te auti ao te kambwana ae kakatamaroai nanon taian auti. E taekinna n ae bebete, “Beku ibukiia Mweenga aika Rianako Tamaroaia i Salt Lake City.”
Te rongorongo anne e anai nano—tera “te mweenga ae rianako tamaroana”? I kunea bwa I a tabe n iangoa te titiraki anne, riki ni kaeineti ma natiu ma kainnabau, ae Kathy, ake iroura ao natiia ake a kaikawaiia ni boong aikai. N aroia kaaro n taabo nako, ti raraoma ao n tataro ibukiia ara utu. Ti bon teimatoa ni karaoa anne. Ti rangi n tangira ae te kabanea n tamaroa ibukiia. A na kanga ngaiia ao natiia ni maeka ni mweenga aika rianako tamaroaia? I a tia n iangoi mweengaia kaain te Ekaretia are Ngai ao Kathy e reke tibwangara ni kawari. Ti a tia ni kaoaki nakon mweenga i Korea ao Kenya, i Biribin ao i Peru, i Laos ao Latvia. N na tibwauai aua nonoori ibukin mweenga aika tamaroa.
Te moan, n ana taratara te Uea, katean mweenga aika rianako tamaroaia bon karikirakean kateia aomata ake a maeka ni mweenga akanne. Mweenga aikai a aki katamaroaaki n te kawai ae kakawaki man teimatoa man bwain nanona ke mwaitin kaubwaia ke kinaakia aomata ake a bwaibwai iai. Aron tein te mweenga ae tamaroa bon maiuakinan ana reirei Kristo irouia naake n te mweenga. Ae kakaawaki riki bon aron tein maiuia kaain te mweenga, tiaki aron tein aia auti.
Katein Kristo aikai a karekeaki inanon “waakin te tai”1 man rinean te rikirake iaon kawain te berita. Katein Kristo a katamaroai maiuia naake a kabanea aia kona ni waaki inanon te raoiroi. A kaoni mweenga ma ootan te euangkerio, tao te burooa e karaoaki man te bokaboka ke te maebora. E ngae ngke bon tii ngkoe man am auti ae ko ira te kaetieti n “ukorii bwaai aikai,2 ko kona n ibuobuoki nakon katamaroaan mweengam.
Ti iriira ana reirei te Uea ni “[barongaira]; katauraoi bwaai nako ake a kainnanoaki, ao ni katea te auti” man bairean, katauraoan, ao katean maiura n tamnei, tiaki ara auti ke abara. Ngkae ti karaoi ana kawai te Tia Kamaiu ni berita ma te taotaonannano, a riki mweengara bwa “te auti ae mimitong, te auti ae baireaki raoi, [ao] ana auti te Atua.”3
Te kauoua, naake a maeka ni mweenga aika tamaroa a karekea aia tai ni kamatebwaia koroboki aika tabu ao aia taeka burabeti aika maiu ni katoa bong. Beretitenti Russell M. Nelson e a tia ni kaoira bwa ti na “bita aron” ao ni “bita tein” mweengara rinanon kamatebwaian te euangkerio.4 Ana kakao e kaotia bwa mweenga aika tamaroa bon nnen te mwakuri ae aamarau, ma ni kakaawaki n te rikirake ae onoti ao kakorakoraan mamaarara. Te rairannano n te bong koraki bon te bwai ni mwakuri are e anganira te kona n akoi riki, n tangira riki, ao n oota riki. Kamatebwaian koroboki aika tabu a kaaniira ma te Tia Kamaiu, are ana tangira ae akoi ao korakorana e buokiira inanon rikirakera.
Te Baibara, Ana Boki Moomon, ao Bwaeao ae Bati Boona a taekiniia utu, ngaia are e aki kakuba bwa booki aika tabu akanne bon aeniboki aika akea kabotauaia ibukin katean mweenga aika rianako tamaroaia. A karakina aia tataro kaaro, kangaanga man te kariiri, ana tokanikai te raoiroi, te kakatai n te rongo ao te mari, kakamakun te buaka ao kaniwanga n te rau. N ae okioki koroboki aika tabu a kaotia nakoira bwa a kanga n tokanikai utu rinanon maiuakinan te raoiroi ao a kanga ni bwaka man ukoukoran kawai ake tabeua.
Te kateniua, mweenga aika tamaroa a ira tamnein te kateitei are e karaoia te Uea ibukin Mweengana ae tamaroa, are te tembora. Katean te tembora e moanaki ma kawai aika bebete—kaitiakan te aba ao kabooraoan te tabo. Moan mwakuri akanne ni katauraoa te tabo e kona ni kabotauaki ma kawakinan tuua aika bebete. Tuua bon aan te kateitei are e kateaki iaona te riki bwa ana reirei Iesu. Te riki bwa ana reirei Iesu ae teimatoa e kairiira bwa ti na matoa, nene, ao n aki mwaing,5 n aron kamatoaan te tembora aika taian biti. Te rabwata ae matoa aei e kariaia te Uea bwa e na kanakoa Tamneina ni bitii nanora.6 Karekean te bitaki n nano ae korakora kanga kabatiaan riki te katamaroa nako nanon te tembora.
Ngkae ti reitinako n te onimaki, te Uea e bitiira teutana imwin teutana. Ti karekea te bungiaki n te tamnei ao ti waaki ni kaotaa Kateina n tangira ae tamaroa.7 Ngkai ti a riki n ai Arona riki, ti na namakina te mwengaraoi n Ana auti, ao E na namakina te mwengaraoi ni mwengara.
Ti kona ni kateimatoa ana reitaki mwengara ae kaan nakon Mwengana man te tau nakon ao kabonganan te rekomente nakon te tembora n te tai ae mwaiti n aron are ti kona. Ni karaon aei, tabun ana auti te Uea e wene inanon ara auti naba.
Te Salt Lake Tembora ae tamaroa e tei n uakaan. E kateaki irouia bwaeoniia man bwaai ni mwakuri n rimoa, ao bwain te tembora bon man te tabo anne, ao te mwakuri korakora ae abwabwaki, te tembora e kateaki man 1853 nakon 1893. Te kabanea n tamaroa are kaain te Ekaretia a anga n te mwakuri n intinia, korean tamnein te auti, ao katamaroan nanon te auti are e riki mai iai te kateitei ae rianako tamaroana are kinaaki irouia mirion n aomata.
E kaania 130 te ririki ae e bunginako man katabuan te tembora aei. N aron are e mwaneweia Unimwaane Gary E. Stevenson ngkoananoa, waaki n intinia ake a kabonganaaki ni katea te tembora a tia n oneaki mwiia ni kainibaire aika boou, man mano riki. Aki karaoan te katamaroa nakon te mwakuri n intinia n te tembora ao te onobwai nakon kabwakan te kateitei e na kamatebuaka aia onimaki bwaeoniia, ake a karaoa aia kabanea ni kona ao imwiina a anga te mwioko n tararuaan te tembora nakon te roro are imwiina.
Te Ekaretia e a waakina ana karikirake inanon te aua n ririki ni katamaroaa aron tein ao matoan te kateitei ni kaitarai mwaeiei.8 Aan te kateitei, burooa, ao rabwatana a na kamatoaaki. Te rabakau n intinia are mai ieta are tauraoi ngkai e na karokoa te tembora nakon aron kateitei aika bwainaki ngkai. Ti na aki kona n noori bitaki nakon tein te kateitei aei, ma bitaki akanne bon iai ao a kakaawaki. N te mwakuri aei, katamaroa i nanon te tembora aika kankan a na kawakinaki.
Ti riai n ira te katooto are ti anganaki man te onobwai nakon te Salt Lake Tembora, ao ni karekea ara tai n taraa te mwakuri n intinia n oin maiura n tamnei n taraia raoi bwa e irii kanibaire aika boou. Taraan maiura rimarenantai, n reitaki ma butiian te Uea, “Tera riki ae N na karaoia?”9 e kona ni buokiira ni katei mweenga aika tamaroa.
Te kaaua, mweenga aika tamaroa bon tabo ni kamanomano man angibuakan te maiu aei. E a tia ni berita te Uea bwa naake a kawakin ana tua te Atua a “kakabwaiaaki iaon te aba.”10 Ana kakabwaia te Atua bon te korakora ni waaki nako n aki rootaki ni kangaangan te maiu aei.
Inanon 2002 I reiakina te reirei ae kakaawaki ibukin taian kangaanga. Ngke I mena i Asunción, Paraguay, I kaitibo ma beretitenti n titeiki n te kaawa. N tai anne, e rootaki Paraguay n bwakan kaubwaina, ao e mwaiti kaain te Ekaretia ake a rootaki ao a aikoa kona ni karekei kainnanoia. I tuai manga roko i Aberika Maiaki imwiin au mwakuri ni mitinare ao I tuai n roko mai mwaina i Paraguay. I a tia ni beku n te Beretitentii n te Aono anne inanon ti tabeua te wiiki. Maakinan au aki konabwai n anga te kairi nakoia beretitenti n titeiki akanne, I tuangiia bwa a na tuangai bwa baike a nakoraoi i nanon aia titeiki. Te moan beretitenti n te titeiki e tuangai baike a nakoraoi. Teuare imwiina e mwanewei bwaai aika nakoraoi ao tabeua kangaanga. N te tai are ti a roko iroun te kabanea n titeki beretitenti, e tii taekinii kangaanga aika matoatoa teuana imwin teuana. Ngke beretitenti n titeiki a kabwarabwara buburan te kangaanga, e rikirake raraomau, tabeaiangau, ao e kuri kangaanga, ataakin te bwai ae n na taekinna.
“Unimwaane Clayton, titirakiniia te titiraki aei: ‘Beretitenti, mairouia membwa n ami titeiki ake a kakabwaka te kabwianibwai ae bwanin, ake a kakabwaka te angabwai n aki mamatam ae akoi, ake a kakaonimaki n nakoaia n te Ekaretia, ake a kakaraoa raoi aia kakawari nakoia utu ake tabeia11 ni katoa namwakaina, ake a kakaraoa te bootaki n utu, ake a kakamatebwaia koroboki aika tabu, ake a kakaraoa te tataro n utu n te bong koraki, iraman irouia ae iai ana kangaanga ae a aki konaa n tobwaia ibon irouia ao ni kainnanoa te Ekaretia bwa e na rinnako ao n tobwai aia kangaanga ibukiia?’”
N ira te wirikiriki are I karekea, I titirakiniia beretitenti n titeiki te titiraki anne.
A taraai ma te miimi n aki kakarongoa ao imwina a kaeka, “Pues, ninguno,” are nanonaki n “Eng, bon akea.” Imwiina a tuangai bwa akea mairouia membwa ake a kakaraoi bwaai akanne ae iai ana kangaanga ae e aki kona tobwaia ibon irouna. Bukin tera? Ibukina a maeka n mweenga aika rianako tamaroaia. Maiuia ni kakaonimaki e angania te korakora, te taratara, ao te buoka mai karawa are a kainnanoia inanon kangaangan te mwane n oin abaia.
Aio e aki nanonaki bwa aomata aika raoiroi a na aki aoraki, aki rinanon aki kabwianibwai, aki kaitarai ruutin te bitineti, ke ni kaitarai kangaangan te maiu aika mwaiti. Te maiu ae mamate uotana kakaewenako n taainako, ma n te tai teuana nakon teuana I a tia n nooria bwa naake a kakorakora n ongeaba n taian tua a kakabwaiaaki ni karekea kawaia ni waaki nako ma te rau ao te kantaninga. Kakabwaia akanne a kona n reke nakoia aomata ni kabane.12
E katanoata Tawita, “Ngkana E aki katea te maneaba Iehova, ao e matebuaka aia makuri tani kateia.”13 N te tabo are kam maeka iai, tera nako tein ami auti, ao aekara ami utu, kam kona ni katea te mweenga ae tamaroa ibukin ami utu. Ana euangkerio Iesu Kristo ae kaokaki e anganira te kainibaire ibukin te mweenga anne. Te Tia Kamaiu bon te intinia, te ti kateitei ao te tia katamaroa nanon te auti ae bane arona. Ana karikirake bon kakororaoan ao kakukureian tamneira n ae akea tokina. Man Ana ibuobuoki ae tangira, tamneimi a kona n riki nakon are E tangiria ao kam kona n riki nakon tamaroami are rietata—n tauraoi ni katea ao ni maeka n te mweenga ae tamaroa.
I kakoaua ma te kakaitau bwa Atuara ao Tamara e maiu. Natina, te Uea Iesu Kristo, bon te Tia Kamaiu ao te Tia Kabooia aomata ni kabane. A kororaoi aia tangira ibukira. Ana Ekaretia Iesu Kristo ibukiia Aika Itiaki ni Boong aika Kaitira bon abanuean te Uea iaon te aba. Burabeti ao abotoro aika maiu a kairia ni boong aikai. Ana Boki Moomon e koaua. Ana euangkerio Iesu Kristo ae kaokaki bon te kainibaire ae kororaoi ibukin katean mweenga aika tamaroa. N aran Iesu Kristo, amen.