Bwa a Na Noori
Taraia ao tataro ibukin am tai ni kaota am ota bwa e na otanako bwa aonga tabeman n nora te kawai nakon Iesu Kristo.
Tariu ao mwaneu, nanora a tia ni kakabwaiaki ao ni kabouaki iroun te Tamnei are ti a tia n namakinna n te maungatabu aei.
Uabubua te ririki n nako, te boua ae te ota e toka ietan te ataeinimwaane i buakonikai. N te ota anne, Iotebwa Timiti e noora te Atua te Tama ao Natina, Iesu Kristo. Otaia a kanakoi tamnei aika rotongitong are e rabuna te aonaaba ao ni kotea te kawai nakon Iotebwa Timiti—ao ibukira ni kabane. Ibukin te ota ae kaoti n te bong anne, ti kona ni karekea bwaninin kakabwaia aika tauraoi rinanon ana Mwakuri ni kamaiu ara Tia Kamaiu, Iesu Kristo.
Ibukin Kaokan Ana euangkerio, ti kona ni kaonaki ma otan ara Tia Kamaiu. E ngae n anne, te ota anne e aki katauaki ibukim ao ngai n tingaira. E a tia Iesu Kristo ni weteira bwa “kaotai ami taura i mataia te botanaomata aio, bwa a na noori ami mwakuri aika a raraoi ma ni karaoiroa Tamami are i karawa iai.”1 I a tangira te kibuntaeka “bwa a na noori.” Bon te kakao ae tangira ma ni kakaawaki mairoun te Uea ni bwaina riki te nano ni kan buokiia tabeman n taraa te kawai are e kairiko nakon Kristo.
Ngke 10 au ririki, au utu a karinerine n buoka Unimwaane L. Tom Perry man te Kooram n te Tengaun ma Uoman ngke iai tabena n au kaawa.
N tokin te bong anne, ara utu ao Perry ti tekateka n ara tabo n amwarake ni kukurei n ana kabuki tinau ae kangkang ae te apple pie, ni karakiniia Aika Itiaki ni kabuta te aonaaba. I rang ni kukurei.
E moanna n rang n rimwi ngke e weteai tinau nakon te umwanikuka ao n titiraki te titiraki ae beebete: “Bonnie, ko kamwarakeia mooa?”
Iai ana namakin ae aki kukurei; I tuai. N aki tangiria ni kitana ana Abotoro te Uea, I taku bwa a kona moa n aki mamatam mooa ni karokoa te ingabong.
E kaeka tinau ma te kaeka ae matoatoa “tiaki.” N te tai naba anne, Unimwaane Perry e rin inanon te umwanikuka ma bwanaana ae takarua, ao e titiraki, “Iai temanna ae riai ni kamwarakeia mooa? E kona natiu te mwaane ao Ngai n raoni ngkami?”
O, ai kakukureira kamwarakeaia mooa! I birinako n anaa ara tooti ae bubura ni babobo. Ma te kukurei, I kaira te kawai, n rangata te kawai ae barongaaki nakon aia tabo n amwarake mooa. Ma te taura te tooto tiotio ni baiu, ti rinanon nnen te koon n nakon ana tabo te wiita.
N rokora n kawain te ran iaon tano ae kabonganaki ibukin tebokan aroka ae rinanon te kawai, I kiba iaona n akea au kangaanga ao anne bukina bwa I a tia ni kakaraoia n tairiki aika mwaiti mai imwaina. Bon akea au atatai nakon ana kekeiaki Unimwaane Perry ni mwakuri n te kawai ae roo, ao n aki ataaki. Mwaingingin au taura n aki akaaka aikoa kona n nora te kararanga. N akean te ota n tiku are e kona n taraia, e ruo rikaaki nako nanon te ran ma bwanana ni kakubanako. E nako nanou, ao I rairaki n nora raoraou ae boou bwa e kanakoa rangana ae mwaimwai man te kararanga ao ni kanakoa te ran man ana kau.
Ma rotoroton ana kau, Unimwaane Perry e buokai ni kamwarakeia mooa. Ngke ti a bane, e bubutiai ma te tangira, “Bonnie, I kainnanoia n noora raoi ni kaota te kawai. I kainnanoa te ota ni kaota te tabo are n na nakonako iai.”
I tabe ni kaota au taura ma tiaki n te aro are e na buoka iai Unimwaane Perry. Ngkai, n atakina ae e kainnanoa au ota ni kamanoa n toua te kawai, I katuka te taura iaon ana kaintamwarake ao ti a kona n okiri mwengara ma te mwengaraoi.
Tariu ao mwaneu aika kam tangiraki, I a tia inanon ririki n iangoa te reirei ae I reiakinna mairoun Unimwaane Perry. Ana kakao te Uea ni kaotai ara taura n ae otamwaaka tiaki tii ibukin kanakoan te ota ao ni kakorakora riki otan te aonaba. Bon ibukin kaotamwakaan te taura anne bwa aonga tabeman n nora te kawai nakon Kristo. Bon ikotakiia Iteraera n iteran te rabuna mai ikai—buokakiia tabeman n noora te mwaneka are imwiina ni wakinako ni karaoi ao ni kawakin berita ma te Atua.2
Te Tia Kamaiu e kakoaua, “Nooria Ngai te oota; I a tia ni katea te banna ni katooto ibukimi.”3 Ti a taraa teuana Ana katooto.
Te aine n te mwanibwa bon te Itamaria ae aki ata Iesu Kristo ao e katinanikuaki n ana kaawa. Iesu e kaitibo ma neienne ao e moanna ana maroro ma ngaia. E taetae nakoina iaon te ran. E tuangnga bwa e na kakorakora te ota ngke E kaotia bwa Ngaia bon te “ran ae maiu.”4
Ma te nanoanga Kristo e kinaa ao e atai kainnanona. E kaitibo ma te aine n te tabo are e mena iai ao e waaki ni maroroakina te bwai are e rang ataaki ao e taneiai te aba iai. Ngke arona bwa E katoka te maroro n te tai anne, e na tia n riki bwa te marooro ae nakoraoi. Ma e na bon aki nakon te kaawa n taekinna, “Mai, nora …: tao te Kristo Ngaia?”5 N te tai ae waekoa, n tain te marooro, e kunea Iesu Kristo, ao n aki tarai tai aika a nako, e riki bwa te banna ni katooto nakoia tabeman n riki bwa te tia uouota te ota, ni kaotai kawaia tabeman bwa ana noria.6
Ngkai ti a taraia uoman aomata ake a ira ana katooto te Tia Kamaiu n tibwa te ota. N te tai ae aki maan n nako raoraou Kevin e tekateka irarikin mataniwin teuana te bitineti n tain te katairiki. E raraoma bwa tera ae e na marorooakinna inanon uoua te aoa. Imwiin te namakin, e titiraki Kevin, “Tuangai rongorongoia am utu. A Roko Ma Ia?”
Te mwaane e aki atai raoi taekan rikina, ngaia ae e buta ana tarebon Kevin, n taku, “Iai au app are e reitia aomata ma aia utu. Ti a noria bwa tera ae ti kona ni kunea.”
Imwiin te marooro ae abwabwaki, raoraou Kevin e titiraki, “Bukin tera te utu e rang ni kakaawaki nakon am ekaretia?”
Kevin e kaeka n ae beebete, “Ti kakoaua bwa ti na maeka imwin matera ,Ao ngkana ti kinaia ara bakatibu ao ni uoti araia nakon te tabo ae tabu ae te tembora, ti kona ni karaoi otenanti n te mare are e na ikotiia ara utu ni kabane riki imwiin te mare.”7
Kevin e moanna ma te bwai ae a bane n iai iroun raoraona ae boou neienne ke teuanne. Imwiina e kunea te kawai ni kakoaua otan ao ana tangira te Tia Kamaiu.
Te kauoua ni karaki bon iaon taekan Ella, te tia bwatiketibooro ae bwane arona. Ana banna ni katooto e moanaki ngke e weweteaki ngaia man ana mition inanona ana tai n reirei. E iangoia bwa e na kauka retana ibukin weteana imataia kain ana tiim n takakaro. Akea te bwai ae a ataia kain ana tiim n rongorongon Ana Ekaretia Iesu Kristo ao aki ata nanon Ella ae rang ni kan nako ni mitinare. E kaokioka ana tataro bwa e na ata kabwarabwaran ana mition n te aro are a na ota iai kain ana tiim. Ana kaeka?
“I karaoa te PowerPoint,” e taku Ella, “bukina bwa n na kona ni kabwarabwara te bwai ae I kamoamoa iai.” E tuangiia taekan aron te nako ni mitinare n teuana mai ibuakon 400-tabun te mition ao ni kona n reirei te taetae. E taekiniia mitinare aika e raka iaon te ngaa mwaitia aika a kaman tia ni mitinare. E motika ana marooro Ella ma tamnein te Tia Kamaiu ao te koaua ae uarereke: “Te bwatiketiboro bon te bwai teuana ae moan te kakaawaki ni maiu. I mwaing n nako n rinanon te aba ao ni kitaniia au utu ao au tia kairiri n te takakaro ma kain te tiim aei. Bwaai aika uoua a moan kakaawaki irou nakon te bwatiketibooro bon au onimaki ao au utu.”8
Ngkai, ngkana ko iango, “Aikai taura bunnimoa aika rang ni korakora, ma akea korakoran te tia taetae ni kaitara te ota,” uringnga ae te Tia Kamaiu e kakoaua bwa, “Ngai te ota are kam na taua i eta.”9 E kauringiira bwa E na uota te ota ngkana ti tuangiia tabeman bwa ana Nakoina.
Ngkoe ao Ngai iai otara ae tau n tibwauaia ngkai naba. Ti kona ni kaota te mwaneka are imwiina ni buoka temanna bwa e na nakon Iesu Kristo, ao te mwaneka are imwiina, ao are imwiina.
Titirakiniko, “Antai ae kainnanoa te ota ko kona ni kakaea te kawai ae a kainnanoia ma aki kona n noria?”
Raoraou aika kam tangiraki, bukin tera e rang ni kakaawaki kauran ara taura? E a tia te Uea n tuangiira bwa “a mwaiti iaon te aonaba … ae a tii kararoaaki man te koaua ibukina bwa aki ataia bwa a na kunea iaa.”10 Ti kona n ibuobuoki. Ti kona n oin nanora ni kaotanako otara bwa aonga ake tabeman n noria. Ti kona ni karababa te kakao.11 Ti kona ni buokiia aomata bwa ana nakon Kristo n nakonako ma naake a nakonako nakon te Tia Kamaiu, n aki tabe bwa e kanako nano ke e buakaka. Ti kona n ikotiia Iteraera.
I kakoaua bwa te Uea e na kakorakorai bwaai aika a uarereke. Te Tamnei ae raoiroi e na wirikiriki nakoira n ata te bwai ae ti na taekinna ao ni karaoia. Aeka ni kekeiaki aikanne e kona n tangiriira bwa ti na karaoa te bwai ae ti na mwengabuaka iai, ma ana akea ara raraoma bwa te Uea e na buoka otara ni kaotamwaaka nako.
I rang ni kakaitau ibukin a na taura te Tia Kamaiu, are e reitinako ni kaira te Ekaretia aei rinanon te kaotioti.
I kaoira ni kabane bwa ti na ira ana banna ni katooto Iesu Kristo ao n atai kainnanoia ake irarikira. Taraia ao tataro ibukin am tai ni kariaia am ota bwa e na otanako bwa aonga tabeman n nora te kawai nakon Iesu Kristo. E rang tamaroa Ana berita, “Ane irai ao e na bon aki nakonako n te ro, ma e na karekea te ota ni kamaiu.”12 I kakoaua bwa ara Tia Kamaiu, Iesu Kristo, bon te kawai, te koaua, te maiu, te ota, ao te tangira ibukin te aonaaba. N aran Iesu Kristo, amen.