E Kanga te Nakoanibonga ni Kakabwaiaia Kairake
Ti anganaki te tibwanga ni mwakuri n ibuobuoki n aroia anera, n taetaekina te euangkerio iaonaaba ni kabane, ao ni buokiia aomata nakon Kristo.
Tariu ao mwaaneu, I rangi ni kakaitau n taetae nakoimi n te tairiki ae rangi ni kakaongora aei ibukin te bwaintangira ae tabu ae te nakoanibonga ao te korakora ae kamiimi are e a tia ni kakabwaiaia kairake ni boong aikai. I tataro bwa n aki tabe ma taian kabwaka, te Tamnei e na buokai n reirei taekan te koaua.
Te Moan Beretitentii a tia ni kauringiia kaain te Nakoanibonga ae te Aaron bwa “kam maeka ni boong ni kakabwaia ma kakaewenako—te bong are e kaokaki iai te nakoanibonga. Kam karekea te kairiaiakaki ni buoka karaoan taian otenanti n te Nakoanibonga ae te Aaron. Ngkai kam tataromwaaka ao n tau ni kabongana te kariaiakaki anne, kam na kakabwaiai maiuia naake irarikimi.” 1 Ngkai ataeinimwaane n te Ekaretia, ti kauringaki naba bwa ngaira “natin te Atua [mwaane] aika tangiraki, ao iai Ana mwakuri [ibukira] ae ti na karaoia” 2 ao ti buoka Ana mwakuri “ni karekea te aki mamate ao te maiu ae akea tokina ibukin te aomata” (Mote 1:39).
Te nakoanibonga bon te kariaiakaki ni karaoi otenanti ao berita aika tabu ibukin ana euangkerio te Tia Kamaiu nakoia naake a tau ni karekei. Rinanon otenanti n te nakoanibonga ao berita aika tabu aikai a karokoi bwaninin kakabwaia man ana Mwakuri ni Kamaiu te Tia Kamaiu are e buokiira ni kakoroa bukin rikira ae mai iroun te Atua.
Iotebwa Timiti bon te ataeinimwaane are e weteaki iroun te Atua bwa e na kaoka ana euangkerio Iesu Kristo ao, ibukin anne, e anganaki te nakoanibonga are e kabongana ni kakabwaiaia aomata ni kabane. Reirei ao Berita aika Tabu 135 e taekin mwaitin kakabwaia ake e anga Iotebwa Timiti nakoia kairake ni boong aikai. Ti warekia: “Iotebwa Timiti … e a tia ni karaoa ae mwaiti riki, ma ti Iesu, ibukin kamaiuaia aomata n te aonaba aei, nakoia aomata nako ake a tia ni maeka iai. … E a tia ni kaotinakoa ana Boki Moomon …; e a tia ni karokoa bwaninin te euangkero ae akea tokina … nakon mwakoron te aonaba ake aua; e a tia ni kaotia kaotioti ao tuua ake bon kaoan te boki aei [ae] Reirei ao Berita aika Tabu …; e bobotia nga aika mwaiti Aomata aika Itiaki ni Boong aika Kaitira,… ao e katuka kiinaakina ao arana ae aki kona ni kamaunaki” (Reirei ao Berita aika Tabu 35:3).
Ni kanakoraoan riki ara beku n aron are e karaoia Iotebwa, ti riai ni kororaoi man tau ni kabongana mwaakan ana nakoanibonga te Uea. Inanon rairan ana Boki Moomon, Iotebwa ao Oliver Cowdery a tangiria ni bwabetitoaki, ma a tuai karekea te kariaiakaki ae tau. Ni Meei 15, 1829, a katorobubua n tataro ao a kawaraki iroun Ioane te Tia Bwabetitio, are e anganiia kiingin ao te kariaiakaki ibukin te Nakoanibonga ae te Aaron, ni kangai, “Iaomi raou ni mwakuri, n aran te Mesia I anga te Nakoanibonga ae te Aaron, are e taui kiingin aia mwakuri n ibuobuoki anera, ao te euangkerio n rairannano, ao ni bwabetito ni kateboaki i an te ran ibukin kamaunaan bure” (Reirei ao Berita aika Tabu 13).
Ti anganaki te tibwanga ni mwakuri n ibuobuoki n aroia anera, n taetaekina te euangkerio iaonaaba ni kabane, ao ni buokiia aomata nakon Kristo. Te mwakuri n ibuobuoki aei e bootiira ni beku ma Ioane te Tia Bwabetito, Moronaai, Iotebwa Timiti, Beretitenti Russell M. Nelson, ao tabeman ana toro te Uea aika a rangi n taningamarau.
Ara mwakuri n ibuobuoki inanon ao n Ana nakoanibonga e kairiia ni kabane naake a katabuia n iriira ao ni maiuakin ana anga reirei te Uea ma te eti, are I ataia i bon irou bwa e kona ni kaangaanga ngkai ti kaitarai kakaewenako ibukiia kairake. Ma ni katiteuanaaki ma ana toro te Uea aikai ni kakoroan nanon Ana mwakuri e na buokiira ni kakorakoraira n tokanikai iaon ana kariiri ao ana kamwamwane te tia kaaitara. Kam kona n riki bwa katooto aika tamaroa nakoia ni kabane ake a nanouoa ibon irouia. Tamaroami e na kai nooraki are aomata ni kabane ake kam iwawaaki ma ngaiia a na kakabwaiaki ngkai kam kaan ma ngaiia. E na taraa ni kaangaanga n tabetai ataakin rokoia naake ti beku ibukiia, ma I kakaitau n ataia bwa Ngai te membwa ae kakaonimaki n te kooram n nakoanibonga, are I kona iai ni mwakuri ni kaaniaki riki ma Kristo.
N raonaki ma raoraora ao ara utu, te Tamnei ae Raoiroi bon temanna raoraora ae kakaonimaki ao ti onimakinna. Ma n te aro are ti aonga ni kaoa Ana iraorao ae teimatoa, ti riai ni mena ni bwaai ao taabo are E mena iai. Aio e moanaki inanon mweengara ngkai ti mwakuri ni karaoia bwa te tabo ae tabu man karaoan te kamatebwai ni booki aika tabu ni katoa bong ao n tataro ma ara utu ao, ae kakawaki riki, ngkai ti kamatebwai booki aika tabu n onoti ao n tataro i bon iroura.
Ni moan te ririki aei, I anganaki te tibwanga ae kakukurei ma n nanorinano ni buoka mwaaneu ae uarereke, ae Oceane, n rikirake ni kawain te berita man butimwaean te kakao ni bwabetitoaki ao ni kakoroi nanon bwaai aika kantaningaaki n rin n te abanuea ae te tiretio. E taona ana bwabetito teuana namwakaina, ni karokoa are I a katabuaki bwa te ibonga, n anganai te tibwanga ni karaoa te otenanti ngkai mwaaneu ake tabeman iai naba tibwangaia ni mwakuri iaan mwiokoaia n te nakoanibonga ao n tei bwa taan kakoaua. Ngkai ti tei ni kaitaraa n te tabo ni bwabetito ao n tauraoi n ruo n te ran, I nooria bwa e kukurei, n aron naba kukureiu. Ao I namakina katiteuanaakiu ma ngaia, n nooria bwa e karaoa te baibare ae eti. Te tibwanga aio ni kamwakura te nakoanibonga e kainnanoa ae N na rangi n taratara raoi ao ni kakeaa te aoriori ni maiuakinan te euangkerio irou. N arou ni katauraoi, I nanako n te tembora ni katoa bong n te wiiki anne, ni boutokaaki iroun tinau, tibu te unaine, ao mwaaneu, ni karaoi bwabetito ibukiia maate.
Te taneiai aei e reiakinai n ae rangi ni mwaiti ibukin te nakoanibonga ao N na kanga ni kamwakuria ma te kororaoi. I ataia bwa kaain te nakoanibonga ni kabane a kona n namakina naba ae I namakinna bwa ngkana ti iriira ana katooto Nibwaai n “nako ao ni karaoia.” (taraa 1 Nibwaai 3:7). Ti aki kona n tekateka n aorioriira ao ni kantaningaia bwa e na kamanenaira te Uea ibukin Ana mwakuri. Ti riai n aki kakantanigaia naake a kainnanoi ara ibuobuoki n ukeuke ni kakaeira; bon ara beku ngaira aika kaain te nakoanibonga ni kaotia ao n tei bwa taan kakaoaua ibukin te Atua. Ngkana ti karaoi babaire ake a tuukira man rikirakera ae akea tokina, ti riai ni bitaki mangkai. Tatan e na kataa ana kabanea ni konaa ni kabaeira n arora n rabwata ni ukoukorii kakukurei aika bebete. Ma I ataia bwa ngkana arona bwa ti karaoa ara kekeiaki, ni kakaeia naake a na boutokaira, ao n rairi nanora ni katoa bong, a na iai mwiin kakabwaia aika kamiimi aika a na reke ao maiura a na bitaki n aki toki ngkana ti waaki nako iaon kawain te berita.
I ataia bwa aei ana Ekaretia Iesu Kristo, are ngaia ara Tia Kamaiu are e anga kiingin te nakoanibonga nakoia Ana Abotoro, are a kabongana ni kairiira, ai moarara riki inanon boong aika a kangaanga aikai, ao ni katauraoa te aonaaba ibukin Okina.
I kakoaua bwa Iotewa Timiti bon te Burabeti ibukin Kaokan Bwai ao Beretitenti Nelson bon ara burabeti ae maiu n te bong aei. I kaoira ngaira ni kabane bwa ti na kamatebwai maiuia kaain te nakoanibonga aika kakannato aikai ao n ukoria ni kanakoraoi arora ni katoa bong bwa ti aonga n tauraoi ni kaitibo ma Atuara. N aran Iesu Kristo, amen.