Pagtudlo sumala sa Pamaagi sa Manluluwas
Ang responsibilidad anaa sa matag usa kanato sa pagsunod sa ehemplo sa Ginoo ug pagtudlo sama Kaniya.
Talagsaon nga mga Magtutudlo
Pipila ka bulan ang milabay, ang usa ka kanhi kauban sa klase gikan sa akong lugar sa Overton, Nevada, misugyot nga mangolekta mi og regalo sa Pasko alang sa among minahal nga magtutudlo sa kindergarten, kinsa bag-ong nagsaulog sa iyang ika-98 nga adlawng natawhan. Gitudloan kami niya nga magmabination, sa kaimportante sa nindot nga pagtagpilaw, sa pagtagamtam sa kalami sa gatas ug sa graham crackers, ug sa paghigugmaay sa usag usa. Salamat, Sister Davis, sa pagkatalagsaong magtutudlo.
Aduna koy laing talagsaong magtutudlo samtang nag-eskwela sa Ricks College daghang tuig na ang nakalabay. Nag-andam ko nga moserbisyo og misyon ug naghunahuna nga makatabang nga motambong og klase sa pagpangandam sa misyonaryo. Unsay akong nasinati nakapausab sa akong kinabuhi.
Gikan sa unang adlaw sa klase nakaamgo ko nga ako diha sa atubangan sa usa ka hanas nga magtutudlo. Ang magtutudlo mao si Brother F. Melvin Hammond. Nasayod ko nga si Brother Hammond nagmahal sa Ginoo ug siya nagmahal kanako. Makita nako kini sa iyang nawong ug madungog kini sa iyang tingog. Kon magtudlo siya, ang Espiritu modan-ag sa akong hunahuna. Siya mitudlo og doktrina, apan midapit usab siya nako sa pagkat-on niini sa akong kaugalingon. Kana nga imbitasyon nakatabang nako nga klaro nga makakita sa akong responsibilidad sa pagkat-on sa doktrina sa Ginoo sa akong kaugalingon. Kana nga kasinatian nakapausab nako sa kahangtoran. Salamat, Brother Hammond, sa pagtudlo sumala sa pamaagi sa Manluluwas.
Kaigsoonan, ang tanan angay nga makabaton niini nga matang sa kasinatian sa pagkat-on diha sa panimalay ug sa simbahan.
Ang pasiuna sa Dali, Sunod Kanako naghatag og panlantaw kon unsay mahimo sa Kristohanong pagtudlo. “Ang katuyoan sa tanang pagkat-on ug pagtudlo sa ebanghelyo,” nag-ingon kini, “mao ang pagpalig-on sa atong pagkakabig ngadto kang Jesukristo ug pagtabang kanato nga mas mahisama Kaniya. … Ang matang sa pagkat-on sa ebanghelyo nga makapalig-on sa atong pagtuo ug modangat ngadto sa milagro sa pagkakabig dili mahitabo diha-diha dayon. Molapas pa kini [sa] klasrom ngadto sa kasingkasing sa indibidwal ug sa panimalay.”1
Ang mga kasulatan nagpakita nga ang pangalagad sa Manluluwas sa karaan nga Amerika dako kaayo og epekto ug malukpanon nga “ang tanan nga mga katawhan nakabig ngadto sa Ginoo, diha sa ibabaw sa tibuok yuta, mga Nephite ug mga Lamanite, ug walay mga panagbingkil ug mga panaglalis diha kanila, ug matag tawo mitagad nga makiangayon sa usag usa.”2
Sa unsa nga paagi nga ang atong pagtudlo adunay susama nga epekto niadtong atong gimahal? Unsaon nato sa pagtudlo nga mas sama sa Manluluwas ug motabang sa uban nga mahimong mas nakabig pag-ayo? Tugoti ko nga mohatag ninyo og pipila ka sugyot.
Sunda ang Manluluwas
Una ug labing importante, tun-i sa inyong kaugalingon ang tanan mahitungod sa Bantugang Magtutudlo Mismo. Giunsa Niya sa pagpakita og gugma alang sa uban? Unsay ilang gibati sa dihang Siya mitudlo? Unsa ang Iyang gitudlo? Unsa ang Iyang mga gipaabot niadtong Iyang gitudloan? Human ninyo masuhid ang mga pangutana nga sama niini, timbang-timbanga ug usba ang inyong pamaagi sa pagtudlo nga mahimong mas sama sa Iyaha.
Ang Simbahan naghatag og daghang mga kapanguhaan diha sa Gospel Library app ug sa ChurchofJesusChrist.org. Usa sa maong kapanguhaan giulohan og Pagtudlo sumala sa Pamaagi sa Manluluwas. Ako modapit kaninyo sa pagbasa ug pagtuon sa matag pulong niini. Kini nga mga baruganan motabang ninyo sa inyong mga paningkamot nga mahimong mas Kristohanon sa inyong pagtudlo.
Ipakita ang Gahom sa mga Pamilya
Ang akong sunod nga sugyot mahimong mahulagway uban sa usa ka kasinatian nga akong nasinati pipila ka bulan ang nakalabay sa dihang mibisita ko sa usa ka mahal nga higala. Madunggan nako ang iyang asawa sa luyo nga nakig-istorya og usa ka tawo, mao nga dali kong mibiya aron makabalik siya sa iyang pamilya.
Paglabay sa usa ka oras o kapin nakadawat ko niini nga mensahe sa text gikan sa iyang buotan nga asawa: “Brother Newman, salamat sa pag-anhi. Gipasulod unta ka namo, apan gusto ko nga mopaambit kanimo unsay among gibuhat. Sukad sa pandemya naghisgot kami sa Dali, Sunod Kanako uban sa among hamtong nga mga anak matag Dominggo pinaagi sa Zoom. Sa tinuod nakahimo kini og mga milagro. Sa akong pagtuo mao kini ang unang higayon nga ang among anak nga babaye nakabasa sa Basahon ni Mormon sa iyang kaugalingon. Karon mao ang kataposang leksyon sa Basahon ni Mormon ug hapit na mi mahuman sa dihang miabot ka. … Naghunahuna ko nga mainteresado ka sa pagpaminaw kon sa unsa nga paagi nga ang Dali, Sunod Kanako, ang Zoom, ug ang pandemya nakahatag og kahigayonan sa saktong panahon sa pag-usab og usa ka kasingkasing. … Nakapahunahuna kini nako kon unsa ka daghan ang gagmay nga mga milagro nga nahitabo atol niining dili maayong panahon.”
Para nako katumanan kini sa saad nga gihimo ni Presidente Russell M. Nelson niadtong Oktubre 2018. Miingon siya nga ang nakasentro sa panimalay, gisuportahan sa Simbahan nga pagkat-on sa ebanghelyo “adunay potensyal sa pagpakita sa kalig-on sa mga pamilya, samtang ang matag pamilya mosunod sa pagbuhat nga mahunahunaon ug mainampingon nga mousab sa ilang panimalay ngadto sa usa ka santuwaryo sa hugot nga pagtuo. Ako mosaad nga samtang makugihon kamo nga molihok aron sa pagbag-o sa inyong panimalay ngadto sa usa ka sentro sa pagkat-on sa ebanghelyo, sa hinayhinay ang inyong mga adlaw nga Igpapahulay mahimong ikahimuot. Ang inyong mga anak maghinam-hinam sa pagkat-on ug pagsunod sa mga panudlo sa Manluluwas. … Ang mga kausaban sa inyong pamilya dako ug magpadayon.”3 Pagkanindot nga saad!
Aron mahimong tinuod nga kausaban sa kinabuhi, ang pagkakabig ngadto ni Jesukristo kinahanglan maglakip sa atong tibuok kalag ug kusganong moimpluwensya sa matag bahin sa atong kinabuhi. Mao nga kinahanglan gayod nga nakatutok kini sa sentro sa atong mga kinabuhi—ang atong mga pamilya ug sa mga panimalay.
Hinumdomi Nga ang Pagkakabig Personal
Ang akong kataposang sugyot mao ang paghinumdom nga ang pagkakabig kinahanglang magagikan sa kinahiladman. Sumala sa gihulagway sa sambingay sa napulo ka birhen, dili kita makahatag ngadto sa laing tawo sa atong lana sa pagkakabig, bisan kon gusto man kita. Sama sa gitudlo ni Elder David A. Bednar: “Kining bililhong lana makuha usa ka tulo kada higayon … mapailubon ug makanunayon. Walay shortcut; walay kinalit nga pagpangandam nga posible.”4
Ang Dali, Sunod Kanako gibase niana nga kamatuoran. Itandi ni nako ngadto sa anghel kinsa mitabang ni Nephi nga makat-on mahitungod ni Jesukristo pinaagi sa pag-ingon, “Tan-awa!”5 Sama sa anghel, ang Dali, Sunod Kanako nagdapit kanato sa pagtan-aw diha sa mga kasulatan ug sa mga pulong sa moderno nga mga propeta aron sa pagpangita sa Manluluwas ug maminaw Kaniya. Sama ni Nephi, personal kitang tudloan sa Espiritu samtang magbasa ug mamalandong sa pulong sa Dios. Ang Dali, Sunod Kanako mao ang sinugdanan nga makatabang sa matag usa kanato sa pagtuon pag-ayo sa buhi nga mga tubig sa doktrina ni Kristo.
Ang responsibildad sa usa ka ginikanan susama sa daghang paagi. Ang kabataan makapanunod sa daghang butang gikan sa ilang mga ginikanan, apan ang pagpamatuod dili usa niini. Dili kita makahatag sa atong mga anak og pagpamatuod sama nga dili kita makapugos nga motubo ang liso. Apan makahatag kita og maalimahon nga kahimtang, nga adunay maayo nga yuta, walay mga sampinit nga “magtuok sa pulong.” Makapaningkamot kita sa paghimo og maayo nga mga kondisyon aron nga ang atong mga anak—ug ang uban nga atong gimahal—makakita og dapit alang sa binhi, “[maminaw] sa pulong, ug [makasabot] niini”6 ug makadiskobre alang sa ilang kaugalingon “nga ang binhi maayo.”7
Daghang tuig na ang milabay, ang akong anak nga lalaki nga si Jack ug ako adunay oportunidad sa pagdula sa Old Course sa St. Andrews sa Scotland, diin nagsugod ang dula sa golf. Talagsaon kaayo kadto! Sa akong pagbalik naningkamot ko pagsulti sa uban unsa ka importante ang kasinatian. Apan wala ko makahimo. Ang mga litrato, mga video, ug ang akong labing maayong mga paghulagway hingpit nga dili igo. Sa kataposan nakaamgo ko nga ang bugtong paagi alang sa usa ka tawo nga makahibalo sa kaanindot sa St. Andrews mao ang pagsinati niini—sa pagtan-aw sa lapad nga lugar, pagsimhot sa hangin, pagbati sa hangin sa ilang nawong, ug masayop og igo sa bola sa golf nga moadto kini sa balason nga mga lungag ug baga nga kakahoyan, nga nahimo sa hilabihan nga kamaayo.
Sama usab kini sa pulong sa Dios. Makatudlo kita niini, kita makasangyaw niini, kita makapasabot niini. Kita makahisgot niini, kita makahulagway niini, kita gani makapamatuod niini. Apan hangtod ang usa ka tawo mobati sa sagrado nga pulong sa Dios nga motuhop sa iyang kalag sama sa mga yamog gikan sa langit pinaagi sa gah[o]m sa Espiritu,8 sama kini sa pagtan-aw sa usa ka postcard o mga litrato sa pagbakasyon sa laing tawo. Kinahanglan kamo nga moadto sa inyong kaugalingon. Ang pagkakabig usa ka personal nga panaw—usa ka panaw sa pagpundok.
Ang tanan kinsa nagtudlo diha sa panimalay ug sa simbahan makatanyag sa uban sa oportunidad sa pagbaton sa ilang kaugalingong espirituhanong mga kasinatian. Pinaagi niini nga mga kasinatian, sila “masay[o]d sa kamatuoran sa tanan nga mga butang” sa ilang kaugalingon.9 Si Presidente Nelson mitudlo, “Kon aduna kamoy sinsero nga mga pangutana mahitungod sa ebanghelyo o sa Simbahan, samtang mopili kamo nga ipatigbabaw ang Dios labaw sa tanan, giyahan kamo nga makakita ug makasabot sa hingpit, mahangturon nga mga kamatuoran nga mogiya sa inyong kinabuhi ug motabang kaninyo nga magpabiling lig-on diha sa dalan sa pakigsaad.”10
Talagsaong Ipalambo ang Pagtudlo
Ako modapit sa mga lider ug sa mga magtutudlo sa matag organisasyon sa Simbahan sa pagtinambagay kauban sa mga ginikanan ug kabatan-onan aron talagsaong ipalambo ang pagtudlo sa matag lebel—diha sa mga stake, diha sa mga ward, ug diha sa mga panimalay. Makab-ot kini pinaagi sa pagtudlo sa doktrina ug pagdapit og panaghisgotan nga puno sa Espiritu mahitungod sa mga kamatuoran nga gitudlo sa Espiritu Santo kanato sa mahilom nga mga higayon sa atong personal nga pagtuon.
Minahal kong mga higala ni Kristo, ang matag usa kanato adunay responsibilidad sa pagsunod sa ehemplo sa Ginoo ug sa pagtudlo nga sama Kaniya. Ang Iyang paagi mao ang tinuod nga paagi! Samtang mosunod kita Kaniya “kon siya moab[o]t kita mahisama kaniya, kay kita makakita kaniya nga mao gihapon, nga kita mahimo nga makabaton niini nga pagla[o]m, aron mahimo kita nga putli ingon nga siya putli.”11 Sa ngalan Kaniya kinsa nabanhaw, ang atong Bantugang Magtutudlo Mismo, gani si Jesukristo, amen.