Kini Mao Ang Atong Panahon!
Gipadala kita sa Dios dinhi, karon, atol niining talagsaon nga panahon sa kasaysayan.
Niadtong 1978, nagbarog ko sa usa ka football field sa usa ka stadium nga napuno sa 65,000 ka fans. Sa atubangan nako mao ang pipila ka dagko kaayo nga kaatbang nga daw gusto nila kong putlan og ulo. Kadto ang akong unang dula isip usa ka tigsugod nga quarterback sa National Football League, ug gikadula namo ang kasamtangang kampeyon sa Super Bowl. Sa tinuod lang, nagduda ko kon maayo ba gayod ako nga maanaa diha sa field. Mipaluyo ko aron ilabay ang akong unang pasa, ug sa dihang gilabay nako ang bola, gidasmagan ko og kusog kaayo kay sa akong nasinati kaniadto. Nianang higayona, nga naghigda nga nailadman niadtong dagko kaayo nga mga atleta, naghunahuna ko kon unsay akong gibuhat didto. Ako adunay desisyon nga kinahanglang himoon. Tugotan ba nako ang akong mga pagduhaduha sa pagbuntog kanako, o mangita ba ako og kaisog ug kusog nga mobarog ug mopadayon?
Associated Press
Wala nako maamgohi niadtong higayona kon sa unsang paagi kini nga kasinatian moandam kanako alang sa umaabot nga mga oportunidad. Kinahanglan nakong makat-onan nga mahimo akong lig-on ug magmaisogon sa atubangan sa lisod nga mga sitwasyon.
Ang dula sa football tingali dili sama kaimportante sa mga hagit nga inyong atubangon. Sa kasagaran, walay stadium nga puno sa mga tawo nga nanan-aw. Apan ang inyong maisogon nga mga desisyon adunay mahangturon nga importansiya.
Tingali dili kita kanunayng mobati nga magmalamposon sa pagbuntog sa hagit. Apan ang atong Langitnong Amahan nakakita kanato isip walay kahadlok nga mga magtutukod sa Iyang gingharian. Mao kana ngano nga gipadala Niya kita dinhi atol sa labing importanting panahon sa kasaysayan sa kalibotan. Kini mao ang atong panahon!
Paminawa kon unsay giingon ni Presidente Russell M. Nelson sa wala madugay human nahimong Presidente sa Simbahan: “Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab. Makakita kita og milagr[o]song [mga] timailhan nga ang Dios Amahan ug ang Iyang Anak, si Jesukristo, magdumala [niini nga Simbahan] sa kahalangdon ug himaya” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96).
Labing gamhanan nga mga buhat? Milagrusong mga timailhan? Unsa kahay dagway niana? Unsa nga tahas ang atong himoon, ug unsaon nato nga makasabot sa unsay buhaton? Wala ko masayod sa tanang tubag, apan nasayod ako nga gikinahanglan kita sa Ginoo nga mahimong andam! Ang takos nga paggamit sa gahom sa pagkapari wala gayod nahimong hilabihan kaimportante kay sa karon.
Kita ba nagatuo sa propeta sa Dios? Ato bang makaplagan ug matuman ang atong kapalaran? Oo, mabuhat nato, ug oo, kinahanglan natong buhaton, tungod kay kini mao ang atong panahon!
Kon madungog nato ang mga istorya sa gamhanan nga mga sulugoon sa Dios kinsa nag-una kanato—sama ni Moises, Maria, Moroni, Alma, Esther, Joseph, ug daghan pa—sila ingon og labaw pa kay sa kasagaran nga mga tawo. Apan sila dili kaayo lahi kay sa kanato. Sila regular nga mga tawo kinsa miatubang og mga hagit. Sila misalig sa Ginoo. Sila mihimo sa husto nga mga pagpili sa importante nga mga higayon. Ug, inubanan sa hugot nga pagtuo kang Jesukristo, sila mihimo sa mga buhat nga gikinahanglan sa ilang panahon.
Goodsalt
Hunahunaa ang Daang Tugon nga bayani nga si Josue. Siya usa ka mahalaron nga sumusunod ni Moises, usa sa labing talagsaon nga mga lider sa kasaysayan. Human mibiya si Moises, panahon na ni Josue. Siya ang mangulo sa mga anak ni Israel padulong ngadto sa gisaad nga yuta. Unsaon man kini niya pagbuhat? Si Josue natawo ug nagdako sa pagkaulipon didto sa Ehipto. Wala siyay tamdanan nga basahon o mga video sa instruksyon aron sa pagtabang kaniya. Wala gani siyay smartphone! Apan aduna siya niini nga saad gikan sa Ginoo:
“Mag-uban ako kanimo ingon sa pag-uban ko kang Moises ug dili ko gayod ikaw pakyason o biyaan.
“Lig-ona ang imong kaugalingon ug pagmaisog” (Josue 1:5–6).
Sa dihang ako usa pa ka bag-o ug kulang sa kasinatian nga Seventy, nakadawat ko og dinalian nga tawag sa telepono gikan sa Buhatan sa Unang Kapangulohan, nga naghangyo kon mahimo bang irepresentar nako ang propeta sa pagbisita sa usa ka batan-ong lalaki nga anaa sa ospital—diha dayon. Ang ngalan sa batan-ong lalaki mao si Zach. Nangandam siya nga mahimong misyonaryo apan nadisgrasya ug nakaangkon og grabeng kadaot sa ulo.
Samtang nagdrayb ko padulong sa ospital, paspas kaayo kong naghunahuna kon unsay buhaton o isulti. Usa ka buluhaton alang sa propeta—tinuod ba kini? Unsa man ang akong atubangon? Unsaon man nako sa pagtabang kini nga batan-ong lalaki? Aduna ba akoy igong hugot nga pagtuo? Ang mainiton nga pag-ampo ug ang kahibalo nga ako naghupot sa awtoridad sa balaan nga pagkapari ang nahimo nakong mga pundasyon.
Sa dihang miabot ko, naghigda si Zach sa usa ka katre sa ospital. Usa ka attendant sa ospital ang andam nang modala kaniya sa operahanan aron maalibyohan sa mga doktor ang presyur sa iyang utok. Mitan-aw ko sa iyang naghilak nga mama ug sa usa ka nalisang nga batan-ong higala nga nagbarog sa duol, ug klaro nakong nahibaloan nga si Zach nagkinahanglan og panalangin sa pagkapari. Ang iyang higala bag-ohay lang nga nakadawat sa Melchizedek nga Pagkapari, busa gihangyo nako siya sa pagtabang kanako. Nabati nako ang gahom sa pagkapari samtang mapainubsanon namong gihatagan si Zach og panalangin. Dayon gidali siya og dala aron operahan, ug usa ka malinawon nga pagbati ang mikumpirmar nga ipahinabo sa Manluluwas ang mga butang sumala sa Iyang kaalam.
Ang medikal nga mga kawani mipahigayon og kataposang X-ray sa wala pa himoa ang unang paghiwa. Nadiskobrehan nila, sa ilang katingala, nga walay kinahanglanon nga operasyon.
Human sa daghang pag-therapy, nakakat-on si Zach sa paglakaw ug pagsulti og usab. Miserbisyo siya og malamposon nga misyon ug karon nag-amuma og matahom nga pamilya.
Siyempre, dili kanunay nga mao kana ang sangpotanan. Mihatag ko og ubang mga panalangin sa pagkapari nga adunay susama nga pagtuo, ug ang Ginoo wala mohatag og hingpit nga pagkaayo niini nga kinabuhi. Nagasalig kita sa Iyang mga katuyoan ug itugyan ang mga resulta diha Kaniya. Dili kita kanunayng makapili sa sangpotanan sa atong mga aksiyon, apan makapili kita nga mahimong andam nga molihok.
Tingali dili gayod kamo mahangyo sa Unang Kapangulohan sa pagrepresentar kanila sa usa ka makapahulga sa kinabuhi nga sitwasyon. Apan kitang tanan gitawag sa pagbuhat og mga butang nga makapausab sa kinabuhi isip mga representante sa Ginoo. Dili Siya mobiya kanato. Kini mao ang atong panahon!
Si Pedro, ang pangulo nga Apostol sa Manluluwas anaa sa usa ka barko diha sa dagat sa dihang nakita niya si Jesus nga naglakaw sa tubig. Gusto siya nga mokuyog Kaniya, ug ang Manluluwas miingon, “Dali ngari.” Sa maisogon ug milagroso nga paagi, si Pedro mibiya sa kasegurohan sa barko ug misugod sa paglakaw paingon sa Manluluwas. Apan sa dihang mitutok si Pedro sa kusog nga hangin, ang iyang pagtuo napaling. “Nahadlok siya ug misugod pagkaunlod. Busa misinggit siya, “Ginoo, luwasa ako. Dihadiha gikuptan siya ni Jesus ug gibira.” (Tan-awa sa Mateo 14:22–33.)
Kon ang mga kalisod moabot sa atong kinabuhi, asa man ang atong pagtutok? Hinumdomi, kanunay nga adunay usa ka kasaligan nga tinubdan sa kusog ug kaisog. Ang mga bukton ni Jesus gituyhad ngari kanato, sama nga kini gituyhad ngadto kang Pedro. Kon kita mokab-ot Kaniya, mahigugmaon Niya kitang luwason. Iyaha kita. Miingon siya “Ayaw kahadlok kay gilukat ko na ikaw; gipili ko ikaw ug ikaw akoa na” (Isaias 43:1). Siya mopatigbabaw labaw sa tanan sa inyong kinabuhi kon tugotan ninyo Siya. Ang pagpili inyo. (Tan-awa sa Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92–95.)
Sa kataposan sa iyang kinabuhi, nangamuyo si Josue sa iyang katawhan, “Pagpili karong adlawa kon kinsay alagaran ninyo; … apan alang kanako ug sa akong pamilya, mag-alagad kami sa Ginoo” (Josue 24:15). Tungod sa mga pagpili nga iyang gihimo aron sa pagserbisyo sa Ginoo, si Josue nahimong usa ka talagsaon nga lider sa iyang panahon. Akong minahal nga mga higala, kini mao ang atong panahon! Ug ang atong mga pagpili modeterminar sa atong kapalaran (tan-awa sa Thomas S. Monson, “Decisions Determine Destiny” [Brigham Young University fireside, Nob. 6, 2005], speeches.byu.edu).
Samtang nagserbisyo ako isip usa ka bishop, aduna kami panultihon sa among ward: Ang maayo nga mga pagpili magdala og mahangturong kalipay. Ang kabatan-onan molabay kanako diha sa pasilyo nga magsulti, “Bishop, naghimo ako og maayo nga mga pagpili!” Pangandoy kana sa usa ka bishop!
Unsay atong buot ipasabot sa “maayo nga mga pagpili”? Usa ka tawo kausa nangutana kang Jesus, “Unsa man ang labing dakong sugo sa balaod?” Siya mitubag:
“Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.
“Kini ang labing dako ug labing importanting sugo.
“Ang ikaduha nga labing importanting sugo sama sa una: Higugmaa ang imong isigkatawo sama sa imong kaugalingon” (Mateo 22:36–39).
Wala ko kahibalo kon unsay inyong hunahuna, apan kon mabasa nako kining duha ka labing importanting mga sugo, makamatikod ko og ikatulo, gipasabot nga sugo: ang paghigugma sa imong kaugalingon.
Nakahunahuna ba kamo sukad nga ang paghigugma sa inyong kaugalingon usa ka sugo? Tinuoray ba natong mahigugma ang Dios ug mahigugma ang Iyang mga anak kon wala nato higugmaa ang atong kaugalingon?
Usa ka maalamon nga lider bag-ohay lang mitambag sa usa ka lalaki nga naningkamot sa pagbuntog og katuigan sa makadaot nga mga pagpili. Naulaw ang lalaki, nga nagduhaduha nga siya takos ba sa gugma ni bisan kinsa.
Ang iyang lider miingon kaniya, “Ang Ginoo nakaila kanimo, nahigugma kanimo, ug nahimuot kanimo ug sa maisog nga mga lakang nga imong gihimo.” Apan midugang dayon siya, “Kinahanglan [nimo] nga madungog ang sugo sa paghigugma sa imong kaugalingon aron mabati nimo ang gugma sa [Dios] ug mahigugma sa uban.”
Sa dihang nadungog niini nga brother kana nga tambag, nakita niya ang kinabuhi sa bag-o nga perspektibo. Siya miingon sa wala madugay, “Gigahin nako ang akong tibuok kinabuhi sa pagpaningkamot nga makakaplag og kalinaw ug aron madawat. Nangita ako niadtong mga butanga sa sayop nga mga dapit. Diha lamang sa gugma sa Langitnong Amahan ug sa Manluluwas ako makakaplag og kahupayan. Nasayod ako nga gusto Nila nga higugmaon nako ang akong kaugalingon; kini mao lamang ang bugtong nga paagi nga mabati nako ang gugma Nila alang kanako.”
Gusto sa atong Langitnong Amahan nga higugmaon nato ang atong kaugalingon—dili aron mahimo kitang mapagarbohon o maghunahuna lamang sa kaugalingon, apan aron atong makita ang atong kaugalingon sama nga Siya nakakita kanato: kita ang Iyang pinalanggang mga anak. Kon kini nga kamatuoran motuhop gayod sa kahiladman sa atong kasingkasing, ang atong gugma alang sa Dios molambo. Kon lantawon nato ang atong kaugalingon nga adunay sinsero nga pagtahod, ang atong mga kasingkasing bukas sa pagtratar sa uban sa samang paagi usab. Kon mas makaila kita sa atong balaanong bili, mas masabtan nato kini nga balaanong kamatuoran: nga gipadala kita sa Dios dinhi, karon, atol niining talagsaon nga panahon sa kasaysayan, aron makabuhat kita sa posibleng kinadak-an nga maayo gamit ang mga talento ug mga gasa nga anaa kita. Kini mao ang atong panahon! (Tan-awa sa Russell M. Nelson, “Pagkahimo nga Tinuod nga mga Milenyal” [tibuok kalibotan nga debosyonal alang sa mga young adult, Ene. 10, 2016], broadcasts.ChurchofJesusChrist.org.)
Si Joseph Smith mitudlo nga ang matag propeta, sa matag panahon, “gila[o]man uban sa malipayon nga pagpaab[o]t sa adlaw diin kita magpuyo; … ilang giawit ug gisulat ug gipanagna kining atong panahon; … kita ang gikahimut-an nga mga katawhan nga gipili sa Dios aron sa pagdala sa Ulahing mga adlaw nga kahimayaan” (Mga Pagtulun-an sa mga Presidente sa Simbahan: Joseph Smith [2007], 221).
Samtang atubangon ninyo ang inyong mga hagit sa matag adlaw, hinumdomi kini nga pasalig nga gitanyag ni Elder Jeffrey R. Holland: “Daghan kaayo ang gisangon sa atong mga abaga, apan kini mahimong mahimayaon ug malamposon nga kasinatian. … Ang kadaogan niining kataposang sangka gideklarar na. Ang kadaogan nasulat na diha sa mga basahon … , ang mga kasulatan!” (“Be Not Afraid, Only Believe” [pakigpulong ngadto sa mga religious educator sa Church Educational System, Peb. 6, 2015], broadcasts.ChurchofJesusChrist.org).
Niining kataposan sa semana nga matahom nga Pasko sa Pagkabanhaw, tugoti ko nga mopadangat og imbitasyon nga mag-ampo kitang tanan nga makaila ug mohangop sa atong indibidwal nga mga tahas samtang mangandam kita sa mahimayaong adlaw nga ang Manluluwas moanhi pag-usab. Ang Ginoo naghigugma kanato labaw pa sa atong masabtan, ug tubagon Niya ang atong mga pag-ampo! Bisan kon anaa kita sa usa ka football field, sa usa ka lawak sa ospital, o sa bisan asa nga dapit, mahimo kitang importante nga bahin niining talagsaon nga mga panghitabo—tungod kay kini mao ang atong panahon! Sa ngalan ni Jesukristo, amen.