Hinumdomi ang Inyong Agianan Pauli sa Langitnong Panimalay

Ni Elder José A. Teixeira

Sa Kapangulohan sa Seventy

Aduna kita sa hingpit nga ehemplo ni Jesukristo aron sundon, ug ang panaw paingon sa atong mahangturong panimalay posible lamang tungod sa Iyang mga pagtulun-an, sa Iyang kinabuhi, ug sa Iyang maulaong sakripisyo.

Niadtong 1946, ang batan-ong maniniksik [researcher] nga si Arthur Hasler nagbaktas subay sa usa ka sapa sa bukid duol sa iyang panimalay sa pagkabata sa dihang siya adunay kasinatian nga misangpot sa usa ka importante nga pagdiskobre mahitungod kon sa unsang paagi ang mga isda makakaplag sa ilang agianan pauli ngadto sa ilang natawhan nga mga sapa.

Sa pagbaktas tungas sa bukid, samtang layo pa sa iyang paborito nga busay, kalit nga nakahinumdom si Hasler sa usa ka nakalimtan nga panumdoman. Miingon siya, “Samtang ang bugnaw nga huyuhoy, nga nagdala sa humot sa mga lumot ug buwak nga columbine, nga mitayhop sa batoon nga bakilid, ang mga detalye niini nga busay ug ang nahimutangan niini diha sa dapit sa bukid kalit nga mipakita sa akong hunahuna.”¹

Kini nga mga baho mipabalik sa iyang mga panumdoman sa pagkabata ug mipahinumdom kaniya sa panimalay.

Kon ang mga baho makapabalik niana nga mga panumdoman alang kaniya, siya mirason nga tingali ang mga baho makapahinumdom sa mga salmon nga, human sa katuigan nga anaa sa lawod, mobalik ngadto sa eksaktong sapa diin sila natawo aron mangitlog.

Base niini nga kasinatian, si Hasler, kuyog ang ubang mga maniniksik, mipadayon sa pagpakita nga ang mga salmon makahinumdom sa mismong mga baho nga motabang kanila og tultol sa liboan ka kilometro aron makakaplag sa ilang agianan pauli gikan sa dagat.

Kini nga asoy maoy nakaingon nga naghunahuna ko nga usa sa labing importante nga mga butang nga atong mabuhat niini nga kinabuhi mao ang pag-ila ug paghinumdom sa atong agianan pauli ngadto sa atong Langitnong Amahan ug matinud-anon ug malipayon nga molahutay sa tibuok nga panaw.

Naghunahuna ko og upat ka pahinumdom nga, kon makanunayong gamiton sa atong kinabuhi, makapukaw og balik sa mga pagbati sa atong langitnong panimalay.

Una, Mahimo Natong Hinumdoman Nga Kita Mga Anak sa Dios

Kita adunay diosnon nga kabilin. Ang pagkahibalo nga kita mga anak sa Dios ug nga gusto Niya nga kita makabalik sa Iyang presensiya mao ang usa sa unang mga lakang sa panaw pauli ngadto sa atong langitnong panimalay.

Pahinumdomi ang inyong kaugalingon niini nga kabilin. Paggahin og regular nga panahon sa pagpalig-on sa inyong espirituhanon nga immune system pinaagi sa paghinumdom sa mga panalangin nga inyong nadawat gikan sa Ginoo. Saligi ang mga giya nga gihatag kaninyo gikan Kaniya, kay sa modangop lamang sa kalibotan aron sa pagsukod sa inyong personal nga bili ug pagkaplag sa inyong agianan.

Bag-ohay lang gibisita nako ang usa ka minahal human siya naospital. Gisultian niya ako uban sa emosyon nga samtang naghigda siya sa katre sa ospital, ang iya ra gayong gitinguha mao ang usa ka tawo nga mokanta ngadto kaniya sa awit nga “Ako Anak sa Dios.” Kana lamang nga hunahuna, miingon siya, mihatag kaniya sa kalinaw nga iyang gikinahanglan niana nga panahon sa kasakit.

Ang pagkahibalo kon kinsa kamo makapausab sa unsay inyong bation ug unsay inyong buhaton.

Ang pagsabot kon kinsa gayod kamo mas makaandam kaninyo sa pag-ila ug paghinumdom sa inyong agianan pauli ngadto sa inyong langitnong panimalay ug mangandoy nga maanaa didto.

Ikaduha, Mahimo Natong Hinumdoman ang Pundasyon Nga Nanalipod Kanato

Ang kalig-on moabot kanato kon kita magpabilin nga matarong, matinuoron, ug matinud-anon ngadto sa Langitnong Amahan ug kang Jesukristo, bisan kon ang uban mibaliwala gayod sa mga kasugoan ug mga baroganan sa kaluwasan.²

Diha sa Basahon ni Mormon, si Helaman mitudlo sa iyang mga anak nga lalaki sa paghinumdom nga kinahanglan tukoron nila ang ilang mga pundasyon diha kang Jesukristo aron makabaton sa kalig-on sa pagbatok sa mga tintasyon sa kaaway. Ang mapintas nga mga hangin ug mga unos ni Satanas naghampak kanato, apan kini walay gahom sa pagbitad kanato kon ibutang nato ang atong pagsalig sa labing seguradong dapit—diha sa atong Manunubos.³

Nasayod ko gikan sa personal nga kasinatian nga kon mopili kita sa pagpaminaw sa Iyang tingog ug mosunod Kaniya, makadawat kita sa Iyang tabang. Makaangkon kita og mas lapad nga panglantaw sa atong mga kahimtang ug mas lawon nga pagsabot sa atong katuyoan sa kinabuhi. Mabati nato ang espirituhanon nga mga pagdasig nga mogiya kanato pauli sa atong langitnong panimalay.

Ikatulo, Mahimo Natong Hinumdoman ang Pagkamainampoon

Nagpuyo kita sa panahon nga sa usa ka tuplok o mando sa tingog [voice command], makasugod kita sa pagpangita og mga tubag sa hapit bisan unsang hilisgotan sa kadaghan sa datos nga gitipigan ug giorganisar sa usa ka lapad ug komplikado nga network sa mga kompyuter.

Sa laing bahin, aduna kitay yano nga imbitasyon nga magsugod sa pagtinguha og mga tubag gikan sa langit. “Pag-ampo sa kanunay, ug Ako mo[bubo] sa akong Espiritu diha kanimo.” Dayon ang Ginoo nagsaad, “Ug daghan ang imong panalangin—oo, gani labaw pa sa mga bahandi sa kalib[o]tan nga imong [m]aangkon.”⁴

Hingpit nga nakaila ang Dios sa matag usa kanato ug andam nga maminaw sa atong mga pag-ampo. Kon kita makahinumdom sa pag-ampo, makaplagan nato ang Iyang makaabag nga gugma, ug kon dugangan pa nato ang atong pag-ampo ngadto sa atong Amahan sa Langit sa ngalan ni Kristo, mas malakip nato ang Manluluwas sa atong kinabuhi ug mas mailhan nato ang agianan nga iyang giandam paingon sa atong langitnong panimalay.

Ikaupat, Mahimo Natong Hinumdoman ang Pagserbisyo sa Uban

Samtang maningkamot kita sa pagsunod ni Jesukristo pinaagi sa pagserbisyo ug pagpakita og kamabination ngadto sa uban, gihimo nato ang kalibotan nga mas maayo nga dapit.

Ang atong mga aksiyon makapanalangin gayod sa mga kinabuhi niadtong naglibot kanato ug ingon man sa atong kaugalingon nga mga kinabuhi. Ang mahigugmaon nga pagserbisyo makadugang og kahulogan ngadto sa mga kinabuhi sa tighatag ug sa tigdawat.

Ayaw ipakaubos ang potensiyal nga anaa kaninyo sa pag-impluwensiya sa uban alang sa maayo, sa pagserbisyo pinaagi sa inyong mga buhat ug pagserbisyo pinaagi sa inyong ehemplo.

Ang mahigugmaon nga pagserbisyo sa uban mogiya kanato subay sa agianan paingon ngadto sa atong langitnong panimalay—ang agianan sa pagkahimong sama sa atong Manluluwas.

Niadtong 1975, isip resulta sa sibil nga gubat, si Arnaldo ug Eugenia Teles Grilo ug ang ilang mga anak kinahanglan nga mobiya sa ilang panimalay ug sa tanan nga ilang hinagoan sulod sa mga dekada sa pagkugi. Niadto sa ilang lumad nga nasod sa Portugal, si Brother ug Sister Teles Grilo miatubang sa hagit sa pagsugod na usab sa sinugdanan. Apan paglabay sa katuigan, human mipasakop sa Ang Simbahan ni Jesukristo sa mga Santos sa Ulahing mga Adlaw, sila miingon, “Nawad-an kami sa tanan nga anaa kanamo, apan maayo kadto nga butang tungod kay kadto mipugos kanamo sa paghunahuna sa importansiya sa mahangturong mga panalangin.”⁵

Nawad-an sila sa ilang yutan-ong panimalay, apan nakaplagan nila ang agianan pauli ngadto sa ilang langitnong panimalay.

Bisan unsa ang inyong kinahanglang biyaan aron mahisubay sa agianan pauli ngadto sa inyong langitnong panimalay mahimo nga daw dili gayod sakripisyo sa umaabot nga adlaw.

Gidapit ko kamo nga mosinati sa kalipay sa paghinumdom nga kita mga anak sa Dios ug nga Siya mihigugma gayod sa kalibotan nga gipadala Niya ang Iyang Anak⁶ aron sa pagpakita kanato sa agianan. Gidapit ko kamo sa paghinumdom nga magmatinud-anon, sa pagpunting sa inyong kinabuhi ngadto sa Manluluwas ug sa pagtukod sa inyong pundasyon diha Kaniya. Hinumdomi nga magmainampoon diha sa inyong panaw ug sa pagserbisyo sa uban subay sa agianan.

Minahal nga kaigsoonan, niining Dominggo sa Pasko sa Pagkabanhaw, ako magpamatuod nga si Jesukristo mao ang Manunubos ug Manluluwas sa kalibotan. Siya mao ang makagiya kanato ngadto sa usa ka malipayon nga kinabuhi ug makagiya kanato sa atong panaw. Hinaot nga hinumdoman ug sundon nato Siya pauli. Sa ngalan ni Jesukristo, amen.