Welcome nga Mensahe
Welcome sa kinatibuk-ang komperensiya ug sa pribilihiyo nga makadungog sa tingog sa Ginoo.
Akong pinangga nga kaigsoonan ug mga higala sa tibuok kalibotan, motanyag ko sa akong personal nga paghangop dinhi niini nga kinatibuk-ang komperensiya. Kita nagpundok isip usa ka dako nga tibuok kalibotang pamilya nga nagtinguha sa pagsimba sa atong Ginoo ug Manluluwas, si Jesukristo. Salamat sa inyong pag-apil kanamo.
Kining miaging tuig nahimong usa ka talagsaon ug dili kasarangan. Walay pagduhaduha nga ang matag usa kanato nakakat-on og mga butang nga wala nato mahibaloi kaniadto. Pipila ka leksyon nga akong nahibaloan sa una nasulat sa akong kasingkasing sa bag-o ug mapahimangnoon nga mga paagi.
Sama pananglit, ako nahibalo nga may kasiguroan nga ang Ginoo naggiya sa mga kalihokan sa Iyang Simbahan. Siya miingon, “Ako mopakita [kaninyo] nga Ako makahimo sa pagbuhat sa akong kaugalingon nga buhaton.”1
Kasagaran, ang akong mga magtatambag ug ako magtulo ang luha samtang nagtan-aw sa dihang Siya nagpataliwala diha sa mahagiton kaayo nga mga sirkumstansiya human kami makabuhat sa among labing maayo ug wala nay dugang pang mabuhat. Kami sa pagkatinuod nagpabilin nga natingala.
Ako usab mas nakasabot na karon kon unsa ang Iyang gipasabot sa dihang Siya miingon, “Tan-awa, Ako modali sa akong buluhaton diha sa iyang angay nga panahon.”2 Balik-balik akong nagmaya samtang Siya naggiya ug nagpatuman sa pagpadali sa Iyang buhat—bisan atol niining pandemya sa tibuok kalibotan.
Mga pinangga nga kaigsoonan, ang kalig-on sa Simbahan anaa sa mga paningkamot ug sa nagkadako nga mga pagpamatuod sa mga miyembro niini. Ang mga pagpamatuod labing mapalambo diha sa panimalay. Atol niining milabay nga tuig, daghan kaninyo ang dako kaayo og kalamboan sa pagtuon sa ebanghelyo sa inyong mga panimalay. Magpasalamat ako kaninyo, ug ang inyong mga anak magpasalamat kaninyo.
Ang dako kaayo nga proyekto sa pagpaayo sa Templo sa Salt Lake nagpadayon. Gikan sa akong opisina aduna koy bantang kaayo nga lingkoranan aron sa pagtan-aw sa trabaho nga gipahigayon sa plasa sa templo.
Samtang ako nagtan-aw sa mga trabahante nga nagkalot sa mga gamot sa karaang mga kahoy, tubo, kutay sa kuryente, ug usa ka busloton nga puwente [fountain], nakahunahuna ko sa panginahanglan sa matag usa kanato sa pagkuha, uban sa tabang sa Manluluwas, sa karaan nga mga sagbot sa atong mga kinabuhi.
Ang ebanghelyo ni Jesukristo mao ang ebanghelyo sa paghinulsol.3 Tungod sa Pag-ula sa Manluluwas, ang Iyang ebanghelyo naghatag og usa ka pagdapit nga kanunayng mag-usab-usab, maglambo, ug mamahimong mas putli. Kini usa ka ebanghelyo sa paglaom, sa pagkaayo, ug sa pag-uswag. Mao nga, ang ebanghelyo usa ka mensahe sa hingpit nga kalipay! Ang atong mga espiritu magmaya sa ginagmayng kalamboan nga atong mabuhat.
Kabahin sa pagpundok sa Israel, ug usa ka importante kaayo nga bahin, mao ang sugo alang kanato isip usa ka katawhan nga mahimong takos ug andam sa pagtabang nga maandam ang kalibotan alang sa Ikaduhang Pag-anhi sa Ginoo.
Samtang kita maminaw sa mga mensahe nga mainampingong giandam sa atong mga lider ubos sa direksiyon sa Espiritu Santo, dapiton ko kamo sa pag-ampo nga makaila sa mga sagbot nga gikinahanglan ninyong tangtangon gikan sa inyong kinabuhi aron kamo mahimong mas takos.
Gihigugma ko kamo, akong mga kaigsoonan, ug mopamatuod nga ang atong Langitnong Amahan ug ang Iyang Pinalanggang Anak nasayod ug tagsa-tagsang nahigugma kaninyo. Sila andam sa pagtabang kaninyo sa matag abanting lakang nga inyong pagahimoon. Welcome sa kinatibuk-ang komperensiya ug sa pribilihiyo nga makadungog sa tingog sa Ginoo. Sa ngalan ni Jesukristo, amen.