Elder Vaiangina Sikahema

Kinatibuk-ang Awtoridad nga Seventy

Sukad sa panahon nga nagsugod nga makuha ni Vaiangina (Vai) Sikahema ang atensiyon sa mga tig-rekrut sa kolehiyo isip usa ka Arizona, USA, football star sa high school, nahimo na siyang inila sa publiko.

Nangharos siya sa football sa Brigham Young University, sa pakigsangka sa Cougars’ 1984 national championship team. Propesyonal siya nga nagdula alang sa daghang Nasudnon nga team sa Liga sa Football ug kaduha siyang natawag nga Pro Bowl sa wala pa mobalhin sa usa ka malampusong panarbaho isip tigsibya sa mga balita.

Apan ang “pagkamagdudula og football” o “tigsibya sa TV” dili maoy kinabuhi sa maong mahigalaon nga 58 anyos.

“Wala gayod ako magsalig sa pagkapropesyonal nga atleta o tigsibya isip ilhanan sa akong pagkatawo,” miingon si Elder Sikahema, kinsa gipaluyohan isip Kinatibuk-ang Awtoridad nga Seventy niadtong Abril 3, 2021. “Una magpaila ako isip anak sa Dios ug isip Santos sa Ulahing mga Adlaw.”

Usa usab siya ka bana, amahan, ug naghupot sa pagkapari—tanan mahangturon nga mga ilhanan.

Natawo niadtong Agosto 29, 1962, sa Nuku‘alofa, Tonga, ngadto nila ni Sione ug Ruby Sikahema, si Elder Sikahema gipadako sa usa ka panimalay nga naghatag og kahulogan sa pamilya ug hugot nga pagtuo. Ang iyang mga katigulangan maoy una sa Tonga nga nagpasakop sa Simbahan.

Nagtubo sa Mesa, Arizona, gihikling niya ang mga pagpangandam nga mahimong usa ka propesyonal nga boksidor sa dihang nadiskobrehan niya ang iyang mga talento sa football. Sa dihang gidawat niya ang pagka-eskolar nga modula sa BYU, wala siya magplano nga moserbisyo og full-time nga misyon.

“Apan gilibotan ako sa mga batan-ong lalaki kinsa labihan ka mapasaligon sa pagsunod sa ebanghelyo, ug gusto ko nga mas mahisama kanila,” miingon si Elder Sikahema.

Niadtong 1982 wala niya ipadayon ang pag-eskwela sa kolehiyo aron makaserbisyo sa South Dakota Rapid City Mission. Sa dihang mibalik sa BYU human sa iyang misyon, iyang nahimamat ang lumad nga taga-Hawaii nga si Keala Heder. Ang duha naminyo didto sa Templo sa Mesa Arizona niadtong 1984. Ang mga Sikahema mga ginikanan sa upat ka anak.

Sa wala pa mahimong Kinatibuk-ang Awtoridad, si Elder Sikahema nakaserbisyo isip presidente sa Young Men sa ward, bishop, rehiyonal nga direktor sa public affairs, magtatambag sa kapangulohan sa misyon, presidente sa stake, ug Area Seventy.