Paglaom diha kang Kristo
Kami nagtinguha sa pagtabang sa tanan kinsa mibati nga nag-inusara o mibati nga wala mahisakop. Tugoti ko nga mohisgot, ilabi na, niadtong wala pa maminyo sa pagkakaron.
Mga kaigsoonan, niining panahon sa Pasko sa Pagkabanhaw kita nakatutok sa mahimayaong Pagkabanhaw sa atong Ginoo ug Manluluwas, si Jesukristo. Kita naghinumdom sa Iyang mahigugmaong pagdapit nga “duol kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo.
“Isangon ninyo ang akong yugo diha kaninyo, ug pagtuon kamo gikan kanako; kay ako maagh[o]p ug mapaubsanon sa kasingkasing: ug makakaplag kamog pahulay alang sa inyong mga kalag.
“Sayon ang yugo nga akong isangon kaninyo, ug gaan ang ipapas-an ko kaninyo.”1
Ang pagdapit sa Manluluwas nga moduol ngadto Kaniya usa ka pagdapit sa tanan nga dili lamang moduol ngadto Kaniya kon dili magpasakop usab sa Iyang Simbahan.
Diha sa bersikulo nga gisundan niining mahigugmaong pagdapit, si Jesus nagtudlo kon unsaon sa paghimo niini pinaagi sa pagtinguha sa pagsunod Kaniya. Siya namahayag, “Walay nakaila sa Anak, gawas sa Amahan, ug walay nakaila sa Amahan, gawas sa Anak, ug kadtong mga tawo nga buot sa Anak nga makaila sa Amahan.”2
Si Jesus gusto nga kita masayod nga ang Dios usa ka mahigugmaong Langitnong Amahan.
Ang pagkahibalo nga kita gihigugma sa atong Langitnong Amahan makatabang nato nga makaila kon kinsa kita ug masayod nga kita nahisakop sa Iyang dakong mahangturon nga pamilya.
Ang Mayo Clinic bag-ohay lang mipahibalo: “Ang pagbati nga nahisakop importante kaayo. … Hapit tanang aspeto sa atong kinabuhi gihan-ay nga mahisakop sa usa ka butang.” Kini nga report nagdugang, “Kita dili makabulag sa kaimportante sa pagbati nga nahisakop gikan sa atong pisikal ug mental nga kahimsog”3—ug, ako modugang, sa atong espirituhanong kahimsog.
Nianang gabii sa wala pa ang Iyang pag-antos didto sa Getsemane ug kamatayon didto sa krus, ang Manluluwas nakigtigom sa Iyang mga disipulo alang sa Kataposang Panihapon. Siya miingon kanila, “Dinhi sa kalibotan aduna kamoy kagul-anan: apan sumalig kamo; gidaog ko na ang kalibotan.”4 Sa wala pa mosalop ang adlaw pagkaugma, si Jesukristo nag-antos ug “namatay [diha sa krus] alang sa atong mga sala.”5
Ako naghunahuna kon unsa kaha ang kaguol nga gibati sa matinud-anong mga babaye ug mga lalaki nga misunod Kaniya didto sa Jerusalem samtang ang adlaw misalop ug ang kangitngit ug kahadlok milukop kanila.6
Sama niining karaan nga mga disipulo hapit 2,000 ka tuig na ang milabay, daghan kaninyo ang mibati usab og kaguol sa matag karon ug unya. Nakasinati ko niini nga pag-inusara sukad sa kamatayon sa akong mahal nga asawa, si Barbara, kapin sa duha ka tuig ug tunga na ang milabay. Nasayod ko unsay bation nga gilibotan sa mga sakop sa pamilya, mga higala, ug kaubanan apan mahimong mobati pa gihapon og pag-inusara—tungod kay ang akong minahal sa kinabuhi wala na sa akong kiliran.
Ang COVID-19 nga pandemya nakapasamot niining pagbati sa kamingaw ug pag-inusara alang sa kadaghanan. Apan, bisan pa man sa mga hagit nga atong giatubang sa kinabuhi, sama nianang unang kabuntagon sa Pasko sa Pagkabanhaw, kita mahimong momata ngadto sa usa ka bag-ong kinabuhi diha kang Kristo, uban sa bag-o ug talagsaon nga mga posibilidad ug bag-ong mga kamatuoran samtang kita modangop sa Ginoo alang sa paglaom ug pagkahisakop.
Ako personal nga mibati sa kasakit niadtong wala mobati nga nahisakop. Samtang nagtan-aw ko og balita gikan sa tibuok kalibotan, akong nakita nga daghan ang daw nakasinati niining pag-inusara. Naghunahuna ko nga, alang sa kadaghanan, tungod kini kay sila tingali wala masayod nga sila gihigugma sa Langitnong Amahan ug kitang tanan nahisakop sa Iyang mahangturong pamilya. Ang pagtuo nga ang Dios nahigugma kanato ug nga kita Iyang mga anak naghatag og kahupayan ug kasiguroan.
Tungod kay kita espiritu nga mga anak sa Dios, ang tanan adunay balaang gigikanan, kinaiyahan, ug potensyal. Ang matag usa kanato “hinigugmang espiritu nga anak nga lalaki o babaye sa langitnong mga ginikanan.”7 Mao kini ang atong kailhanan [identity]! Mao kini kon si kinsa gayod kita!
Ang atong espirituhanong kailhanan mapalambo samtang atong masabtan ang atong daghang mortal nga mga kailhanan, lakip na sa etnikanhon, kultural, o nasyonal nga panulundon.
Kining pagbati sa espirituhanon ug kultural nga kailhanan, gugma, ug pagkahisakop makapadasig og paglaom ug paghigugma alang ni Jesukristo.
Ako namulong bahin sa paglaom diha kang Kristo dili agig panghinaot. Kon dili, namulong ko bahin sa paglaom nga gipaabot nga matuman. Ang ingon nga paglaom mahinungdanon sa pagbuntog sa kalisdanan, pagpasiugda og espirituhanong kalig-on ug kusog, ug pagkasayod nga kita gihigugma sa atong Amahan sa Kahangtoran ug nga kita Iyang mga anak, nga nahisakop sa Iyang pamilya.
Kon kita adunay paglaom diha kang Kristo, atong masayran nga samtang kita kinahanglang mohimo ug motuman sa sagrado nga mga pakigsaad, ang atong labing gitinguha ug gipangandoy mahimong matuman pinaagi Niya.
Ang Korum sa Napulog Duha ka mga Apostoles nakigtinambagay diha sa diwa sa pag-ampo ug uban sa tinguha nga makasabot kon unsaon pagtabang ang tanang mibati nga nag-inusara o mibati nga wala mahisakop. Kami nagtinguha sa pagtabang sa tanan kinsa mibati niini nga paagi. Tugoti ko nga mohisgot, ilabi na, niadtong wala pa maminyo sa pagkakaron.
Mga kaigsoonan, sobra sa katunga sa mga hamtong karon diha sa Simbahan mga nabalo, nadiborsyo, o wala pa maminyo. Ang uban naghunahuna mahitungod sa ilang mga oportunidad ug luna diha sa plano sa Dios ug diha sa Simbahan. Kinahanglan natong masabtan nga ang kinabuhing dayon dili lamang usa ka pangutana bahin sa kasamtangang kahimtang sa kaminyoon apan bahin kini sa pagkadisipulo ug pagka “mais[o]g diha sa pagpamatuod ni Jesus.”8 Ang paglaom sa tanang wala pa maminyo sama gihapon sa tanang miyembro sa gipahiuli nga Simbahan sa Ginoo—makaangkon sa grasya ni Kristo pinaagi sa “pagsunod sa mga balaod ug mga ordinansa sa Ebanghelyo.”9
Tugoti ko nga mosugyot nga adunay pipila ka importanting mga baroganan nga kinahanglan natong masabtan.
Una, ang mga kasulatan ug ang mga propeta sa ulahing mga adlaw nagpamatuod nga ang tanan kinsa matinud-anon sa pagtuman sa mga pakigsaad sa ebanghelyo adunay oportunidad alang sa kahimayaan. Si Presidente Russell M. Nelson mitudlo: “Diha sa kaugalingong paagi ug panahon sa Ginoo, walay mga panalangin nga ihikaw gikan sa Iyang matinud-anon nga mga Santos. Ang Ginoo mohukom ug moganti sa matag indibidwal sumala sa atong kinasingkasing nga mga tinguha maingon man usab sa atong mga binuhatan.”10
Ikaduha, ang tukmang panahon ug pamaagi diin ang mga panalangin sa kahimayaan ihatag wala pa ipadayag ang tanan, apan sigurado gayod kini.11 Si Presidente Dallin H. Oaks mipasabot nga ang pipila ka kahimtang “sa pagkamortal itakda diha-diha sa Mileny[o], nga mao ang panahon alang sa katumanan sa tanan nga wala makompleto diha sa dakong plano sa kalipay alang sa tanang takos nga mga anak sa atong Amahan.”12
Wala kana magpasabot nga ang matag panalangin dili ipadayon hangtod sa Milenyo; ang pipila nadawat na, ug ang uban padayon pa nga madawat hangtod nianang adlawa.13
Ikatulo, ang paghulat sa Ginoo nagpasabot og padayon nga pagkamasulundon ug espirituhanong pag-uswag paingon Kaniya. Ang paghulat sa Ginoo wala magpasabot nga naghulat lang nga walay gihimo. Kinahanglan nga dili kamo mobati nga anaa sa hulatanan nga lawak.
Ang paghulat sa Ginoo nagpasabot og paglihok. Akong nakat-onan sulod sa katuigan nga ang atong paglaom diha kang Kristo molambo kon moserbisyo kita sa uban. Ang moserbisyo sama sa pagserbisyo ni Jesus, sa natural nga paagi atong mapalambo ang atong paglaom diha Kaniya.
Ang personal nga paglambo nga mahimong maangkon sa usa ka tawo karon samtang naghulat sa Ginoo ug sa Iyang mga saad usa ka bililhon, sagrado nga elemento sa Iyang plano alang sa matag usa kanato. Ang mga kontribusyon nga mahimo sa usa ka tawo karon sa pagtabang sa pagtukod sa Simbahan dinhi sa yuta ug sa pagpundok sa Israel gikinahanglan kaayo. Ang estado sa kaminyoon walay kalabotan sa kapasidad sa usa ka tawo sa pagserbisyo. Ang Ginoo mopasidungog niadtong nagserbisyo ug naghulat Kaniya nga mapailubon ug matinud-anon.14
Ikaupat, ang Dios nagtanyag og kinabuhing dayon ngadto sa tanan Niya nga mga anak. Ang tanang modawat sa mabinationg gasa sa Manluluwas sa paghinulsol ug mosunod sa Iyang mga sugo makadawat og kinabuhing dayon, bisan kon dili nila maangkon ang tanang kahimtang niini ug mga kahingpitan dinhi sa pagkamortal. Kadtong maghinulsol makasinati sa kaandam sa Ginoo nga mopasaylo, sama sa Iyang gipaniguro: “Oo, ug ingon sa kanunay nga ang akong mga katawhan maghinulsol Ako mopasaylo kanila sa ilang mga kalapasan batok kanako.”15
Kon hunahunaon ang tanan, ang kapasidad, mga tinguha, ug mga oportunidad sa tawo nga may kalabotan sa kabubut-on ug pagpili, lakip na ang kasarang alang sa mahangturong mga panalangin, mga butang nga ang Ginoo lamang ang makahukom.
Ikalima, ang atong pagsalig niini nga mga kasiguroan konektado sa atong hugot nga pagtuo diha ni Jesukristo kansang grasya ang tanang butang kalabot sa pagkamortal gitakda sa tukmang paagi.16 Ang tanang gisaad nga mga panalangin mahimong posible pinaagi Kaniya kinsa, pinaagi sa Iyang Pag-ula, “nakatugkad sa tanan nga mga butang”17 ug “gida[o]g ang kalibotan.”18 Siya “milingkod sa tuo nga kamot sa Dios, aron sa pagpangayo gikan sa Amahan sa iyang mga kahigay[o]nan sa kalooy nga anaa kaniya diha sa mga katawhan … ; busa siya naglaban sa kaayohan sa mga katawhan.”19 Sa kataposan, “ang mga santos pagapun-on sa iyang himaya, ug modawat sa ilang kabilin”20 isip “isigka-manununod uban ni Kristo.”21
Ang among tinguha nga kining mga baroganan makatabang sa tanan nga molambo ang paglaom diha kang Kristo ug mobati nga nahisakop.
Ayaw kalimot nga kamo anak sa Dios, ang atong Amahan sa Kahangtoran, karon ug hangtod sa hangtod. Siya nahigugma kaninyo, ug ang Simbahan nagkinahanglan kaninyo. Oo, kami nagkinahanglan kaninyo! Kami nagkinahanglan sa inyong mga tingog, mga talento, mga kahanas, kamaayo, ug pagkamatarong.
Sulod sa daghang katuigan, naghisgot kita mahitungod sa “mga young single adult,” “mga single adult,” ug “mga hamtong.” Kana nga paghingalan mahimong makatabang sa pangdumalang administratiba usahay apan sa dili tinuyo makapausab sa atong pagtan-aw sa uban.
Aduna bay paagi aron malikayan kining tawhanong kalagmitan nga makapalayo kanato sa usag usa?
Si Presidente Nelson mihangyo nga atong tawgon ang atong kaugalingon isip mga miyembro sa Ang Simbahan ni Jesukristo sa mga Santos sa Ulahing mga Adlaw. Nagpasabot kana natong tanan, dili ba?
Ang ebanghelyo ni Jesukristo adunay gahom sa paghiusa kanato. Sa kataposan mas molabaw ang atong pagkamanagsama kay sa atong pagkamanaglahi. Isip mga sakop sa pamilya sa Dios, kita tinuoray gayod nga managsuon. Si Pablo namahayag, “Ug gibuhat [sa Dios] ang tanang kaliwat sa katawhan ug gipapuyo sila sa tibuok kalibotan.”22
Kaninyo mga presidente sa stake, mga bishop, ug mga lider sa mga korum ug mga sister, ako mohangyo kaninyo sa pagkonsiderar sa matag miyembro sa inyong stake, ward, korum, o organisasyon isip usa ka miyembro nga makatampo ug makaserbisyo diha sa mga calling ug makaapil sa daghang paagi.
Ang matag sakop sa atong mga korum, mga organisasyon, mga ward, ug mga stake adunay hinatag sa Dios nga mga gasa ug mga talento nga makatabang sa pagtukod sa Iyang gingharian karon.
Manawagan kita sa atong mga miyembro nga dili minyo sa pagserbisyo, pagdasig, ug pagtudlo. Isalikway ang karaang mga hunahuna ug mga ideya nga usahay sa wala tuyoa nakadugang sa ilang pagbati nga nag-inusara ug nga sila wala mahisakop o dili makaserbisyo.
Ako mohatag sa akong pagsaksi bahin niining kataposan sa semana nga Pasko sa Pagkabanhaw mahitungod sa atong Manluluwas, si Jesukristo, ug sa mahangturong paglaom nga Iyang gihatag kanako ug sa tanang mituo sa Iyang ngalan. Ug mohatag ko niining pagpamatuod sa mapaubsanong paagi sa Iyang sagradong ngalan, nga mao si Jesukristo, amen.