Mga Importanting Panghitabo gikan sa ika-191 nga Tinuig nga Kinatibuk-ang Komperensiya

Ang gitutokan sa kinatibuk-ang komperensiya, nga gipahigayon sa tapos sa semana nga Pasko sa Pagkabanhaw, mao ang Manluluwas nga si Jesukristo, paglig-on sa mga miyembro, ug ang tibuok kalibotan nga kinaiyahan sa Simbahan.

• Pahina 6: Sa iyang pangbukas nga pakigpulong, si Presidente Russell M. Nelson miingon, “Kita nagpundok isip usa ka dako nga tibuok kalibotang pamilya nga nagtinguha sa pagsimba sa atong Ginoo ug Manluluwas, nga si Jesukristo.” Iyang gipasabot og maayo nga ang “kalig-on sa Simbahan anaa sa mga paningkamot ug sa nagkadako nga mga pagpamatuod sa mga miyembro niini.” Sa tibuok nga komperensiya, ang mga paningkamot sa mga lider sa Simbahan sa paglig-on sa indibidwal nga mga miyembro tataw kaayo.

• Pahina 79: Atol sa sesyon sa priesthood, si Presidente Nelson mitudlo kon sa unsang paagi nga makahimo kita sa atong mga panimalay nga balaan nga mga dapit, “ang sentro sa pagkat-on sa ebanghelyo ug pagsunod sa ebanghelyo,” bisan human matapos ang pandemya.

• Pahina 101: Sa iyang mensahe sa Dominggo sa buntag, giklaro ni Presidente Nelson nga kini usa ka tibuok kalibotan nga simbahan nga ang ebanghelyo alang sa tanang katawhan: “Karong buntaga, nakadungog kita gikan sa mga lider sa Simbahan nga naggikan sa matag gipamuy-an nga kontinente sa kalibotan. Sa pagkatinuod, ang mga panalangin sa ebanghelyo alang kini sa matag kaliwat, pinulongan, ug katawhan. Ang Simbahan ni Jesukristo usa ka tibuok kalibotan nga simbahan. Si Jesukristo ang atong pangulo.”

• Pahina 127: Agi og dugang, ang paningkamot sa paglig-on sa mga miyembro gipakita diha sa pagpahibalo sa 20 ka bag-ong templo. “Gusto namong mas mapaduol ang balay sa Ginoo ngadto sa atong mga miyembro,” miingon si Presidente Nelson atol sa iyang panapos nga mga pakigpulong. Mao kini ang kinadaghanan nga templo nga gipahibalo sukad niadtong 1998, sa dihang si Presidente Gordon B. Hinckley mipahibalo sa 32 ka templo, nga nag-abli sa bag-ong kapanahonan sa pagpadaghan sa templo.

• Pahina 139: Alang sa dugang nga mga ehemplo kon sa unsang paagi nga ang Simbahan naningkamot sa paglig-on sa tanang anak sa Dios, tan-awa diha sa importanting mga panghitabo sa daghang makitawhanong proyekto nga nakompleto atol sa tuig 2020.