Ang Kahayag Mounong ngadto sa Kahayag
Samtang kita magpalig-on sa atong hugot nga pagtuo kang Kristo, makadawat kita og kahayag sa dako kaayo nga sukod hangtod nga kini mobungkag sa tanan nga kangitngit.
Minahal kong mga kaigsoonan, nalipay ako uban kaninyo niining bulahan nga Dominggo sa Pagkabanhaw sa pagpamalandong sa mahimayaong kahayag nga misubang sa yuta uban sa Pagkabanhaw sa atong Ginoo ug Manluluwas, nga si Jesukristo.
Atol sa Iyang mortal nga pangalagad, namahayag si Jesus, “Ako ang kahayag sa kalib[o]tan: siya nga magasunod kanako dili magalakaw sa kangitngit, apan magabaton siya sa kahayag nga magahatag og kinabuhi.”1 Ang Espiritu ni Kristo “anaa sa tanan nga mga butang [ug] naghatag og kinabuhi sa tanan nga mga butang.”2 Mobungkag kini sa kangitngit nga sa laing paagi moliyok kanato.
Mga tuig ang milabay, sa pagpangita og panimpalad, ang akong duha ka anak nga lalaki ug ako mikuyog sa pundok sa batan-ong mga lalaki ngadto sa Moaning Cavern [Nag-agulo nga Langob], maoy gingalan niini tungod kay kaniadto may tingog kini nga mag-agulo nga mogawas sa bukana niini. Ang langob usa ka hagip-ot gamay nga barog ang bukana nga sa ilawom may 180 ka pye (55 metros) nga paubos nga gilapdon nga lungag, ang nag-inusarang pinakalapad nga lungag nga langob sa California.
Adunay duha lamang ka paagi sa pagkanaog: ang luwas nga paliyok nga hagdanan o pagkapyot og pisi padulong sa salog sa langob; ang akong mga anak ug ako mipili nga mopaubos gamit ang pisi. Ang mas magulang nakong anak ang miuna, samtang ako ug ang mas manghod nakong anak nagpaulahi aron magdungan kami og paubos.
Human matudloi sa among mga tiggiya ug gipaniguro nga kami tarong nga nakakab-it ug nakaangkla sa lig-on nga pisi, mihinayhinay kami paubos hangtod nga nagbarog kami sa gamay nga ngilit ug nakaangkon og pagsalig, tungod kay mao kini ang kataposang dapit nga makaliso, ug kataposang dapit nga kami makakita og kahayag sa adlaw gikan sa bukana sa langob.
Ang among sunod nga hinayhinayng pagpaubos mipasungko kanamo ngadto sa usa ka taas ug lapad kaayo nga langob nga ang gidak-on pweding masulod ang Estatuwa sa Liberty. Nagbitay kami sa hinayng pagtuyok samtang ang among mga mata nahiuyon na sa ngitngit nga palibot. Samtang padayon ang among pagpaus-os, ang sanag sa dagitabnong mga suga misanag sa makatingala nga bongbong sa nagsidlak nga mga stalagmite ug stalactite [nanubo nga mga minerales sa langob].
Sa walay pasidaan, ang mga suga sa kalit hingpit nga napalong. Nga nagbitay sa dili matantiya nga giladmon, gilibotan kami sa hilabihang kangitngit nga dili gani namo makita ang among mga kamot sa among atubang nga naggunit sa mga pisi. Usa ka tingog diha dayon nanawag, “Pa, Pa, naa ka ba diha?”
“Nia ra ko, Anak, nia ra ko dinhi,” mitubag ko.
Ang wala dahomang pagkawala sa kahayag gituyo sa pagpakita nga kon walay elektrisidad, ang kangitngit sa langob dili mahulagway. Nagmalamposon kini; “gibati” namo ang kangitngit. Dihang ang suga misiga og balik, ang kangitngit diha dayon nawala, kay ang kangitngit sa kanunay mawala, bisan sa pinakagamay nga kahayag. Ang akong mga anak ug ako gibilinan og panumdoman mahitungod sa kangitngit nga wala pa namo sukad masinati, usa ka mas dako nga pagdayeg sa kahayag nga dili namo hikalimtan, ug sa kasiguroan nga kami wala mag-inusara sa kangitngit.
Ang among pagpaus-os niana nga langob sa pipila ka paagi mipahisama sa atong panaw latas sa mortalidad. Mibiya kita gikan sa mahimayaong kahayag sa langit ug mipaubos agi sa bilo sa kalimot ngadto sa ngitngit nga kalibotan. Ang atong Langitnong Amahan wala mobiya kanato sa kangitngit apan misaad kanato og kahayag sa atong panaw pinaagi sa Iyang Hinigugmang Anak, nga si Jesukristo.
Nasayod kita nga ang kahayag sa adlaw mahinungdanon sa tanang kinabuhi dinhi sa yuta. Ang katugbang sa atong espiritwal nga kinabuhi mao ang kahayag nga naggikan sa atong Manluluwas. Sa Iyang hingpit nga gugma, ang Dios mihatag sa Kahayag ni Kristo ngadto sa matag tawo “nga moanhi sa kalib[o]tan”3 nga sila “masay[o]d sa maayo gikan sa dautan”4 ug maaghat “sa paghimo og maayo sa kanunay.”5 Kana nga kahayag, nga mismong nagtug-an pinaagi sa unsay atong gitawag sa kanunay og atong konsensya, nanawag kanato sa paglihok ug pagkahimong mas maayo, aron mahimong pinakamaayo sa atong kaugalingon.
Samtang kita magpalig-on sa atong hugot nga pagtuo kang Kristo, makadawat kita og kahayag sa dako kaayo nga sukod hangtod nga kini mobungkag sa kangitngit nga posibling moliyok kanato. “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangt[o]d sa hingpit nga adlaw.”6
Ang Kahayag ni Kristo nag-andam kanato sa pagdawat sa makaalagad nga impluwensya sa Espiritu Santo, nga mao “ang makakabig nga gah[o]m sa Dios … sa kamatuoran sa Ebanghelyo.”7 Ang ikatulong sakop sa Dios nga Kapangulohan, ang Espiritu Santo “usa ka personahe sa Espiritu.”8 Ang kinadak-ang tinubdan sa kahayag nga ipaambit sa Langitnong Amahan kaninyo dinhi sa mortalidad maggikan sa Espiritu Santo, kansang impluwensya “mohatag og kahayag sa imong hunahuna, nga mopuno sa imong kalag uban sa hingpit nga kalipay.”9
Dinhi sa Ang Simbahan ni Jesukristo sa mga Santos sa Ulahing mga Adlaw, pinaagi sa gipahiuling awtoridad sa pagkapari, gibunyagan kamo pinaagi sa pagpaunlod alang sa kapasayloan sa mga sala. Dayon, ang mga kamot gipatong sa inyong mga ulo ug kining talagsaon, “dili mahulagway nga gasa”10 sa Espiritu Santo gitugyan diha kaninyo.
Human niini, kon ang inyong mga tinguha ug mga buhat nasentro sa dalan sa pakigsaad, ang Espiritu Santo, isip kahayag diha sulod kaninyo, mopadayag ug mopamatuod sa kamatuoran,11 mopahimangno sa peligro, mohupay12 ug molimpyo,13 ug mohatag og kalinaw14 sa inyong kalag.
Tungod kay ang “kahayag mounong ngadto sa kahayag,”15 ang padayon nga pagpakig-uban sa Espiritu Santo mogiya kaninyo sa paghimo og mga pagpili nga malagmit mopahimutang kaninyo sa kahayag; sa laing pagkasulti, ang gihimo nga mga pagpili nga walay impluwensya sa Espiritu Santo lagmit nga modala kaninyo ngadto sa mga landong sa anino ug kangitngit. Sama sa gitudlo ni Elder Robert D. Hales, “Kon adunay kahayag, ang kangitngit mawagtang ug siguradong mawala. … Kon ang espirituhanong kahayag sa Espiritu Santo anaa, ang kangitngit ni Satanas mawala.”16
Mosugyot ko nga, tingali og mao kini ang panahon sa pagpangutana sa inyong kaugalingon: Aduna ba ako niana nga “kahayag” sa akong kinabuhi? Kon wala, kanus-a ang kataposang higayon nga ako aduna niini?
Sama sa kahayag sa adlaw nga mihayag matag adlaw sa kalibotan sa pagbag-o ug pagsustinar sa kinabuhi, ikaw makapasiga sa kahayag nga anaa kanimo kon mopili ka nga mosunod Kaniya—ni Jesukristo.
Usa ka gamay nga kahayag sa adlaw ang igadugang sa matag higayon nga kamo magtinguha sa Dios pinaagi sa pag-ampo; magtuon sa mga kasulatan sa “pagpaminaw Kaniya”;17 molihok uban sa giya ug pagpadayag gikan sa atong buhing mga propeta; ug mosunod ug motuman sa mga sugo nga “magalakaw diha sa tanan nga mga ordinansa sa atong Ginoo.”18
Kamo mahimong modapit sa espirituhanong kahayag diha sa inyong kalag ug kalinaw sa inyong kinabuhi matag higayon nga kamo maghinulsol. Samtang kamo moambit sa sakramento matag semana aron modala sa ngalan sa Manluluwas diha kaninyo, aron kamo kanunay nga mohinumdom Kaniya ug motuman sa Iyang mga sugo, ang Iyang kahayag modan-ag diha kaninyo.
Adunay kahayag sa inyong kalag sa matag higayon nga kamo mopaambit sa ebanghelyo ug mohatag sa inyong pagpamatuod. Matag higayon nga moserbisyo kamo sa usag usa sama sa gibuhat sa Manluluwas, inyong mabatyagan ang Iyang kainit sa inyong kasingkasing. Ang kahayag sa Langitnong Amahan kanunay nga magpuyo sa sulod sa Iyang balaang templo ug sa tanan nga mopresentar sa ilang kaugalingon sa balay sa Ginoo. Ang Iyang kahayag nga anaa kaninyo molambo pinaagi sa inyong mga buhat sa kamabination, pagpailob, pagpasaylo, ug gugmang putli ug makita kini mismo diha sa inyong malipayong panagway. Sa laing bahin, maglakaw kita sa mga landong sa anino kon kita dali rang masuko o dili dayon makapasaylo. “Samtang padayon kamong nag-atubang sa kahayag sa adlaw, ang mga landong sa anino walay mahimo apan kini anaa ra gayod sa inyong luyo.”19
Samtang kamo magpakabuhi aron maangkon ang pakig-uban sa Espiritu Santo, sa tinuod inyong “[mapa]lambo ang inyong espirituhanong kapasidad sa pagdawat og pagpadayag.”20
Ang kinabuhi nagtanyag og mga hagit ug mga kapakyasan, ug tanan kita makaatubang gayod og pipila ka ngitngit nga mga adlaw ug kalisdanan. Latas niining tanan, kon kita “motugot nga ipatigbabaw ang Dios diha sa atong kinabuhi,”21 ang kahayag sa Espiritu Santo mopadayag nga adunay katuyoan ug kahulogan ang atong mga pagsulay, ug nga kini sa kataposan mousab kanato ngadto sa mas maayo, mas kompletong mga indibidwal uban sa mas hugot nga pagtuo ug mas hayag nga paglaom diha ni Kristo, nahibalo nga ang Dios nag-uban kanato sa tanang panahon. Sama sa gitambag ni Presidente Russel M. Nelson, “Ang nagkadugang nga kangitngit nga nag-uban sa kalisdanan nakapasanag sa kahayag ni Kristo.”22
Ang mga panahon sa atong kinabuhi posibling modala kanato ngadto sa mga dapit nga wala nato dahoma ug dili nato gusto. Kon ang sala midala kaninyo didto, iwaling ang kurtina sa kangitngit ug sugdi karon ang mapaubsanong paghangyo sa inyong Langitnong Amahan uban sa masulub-ong kasingkasing ug mahinulsolong espiritu ug maghinulsol. Maminaw Siya sa inyong tinuoray nga pag-ampo. Uban sa kaisog karon, “paduol [ngadto Kaniya] ug [Siya] mopaduol nganha kaninyo.”23 Wala kaninyo’y dili mamaayo sa makaayo nga gahom sa Pag-ula ni Jesukristo.
Naggikan ako sa matarong nga mga ginikanan ug matinud-anong mga kagikan kinsa misanong sa kahayag ni Jesukristo ug sa Iyang ebanghelyo, ug mipanalangin kini sa ilang kinabuhi ug sa mga henerasyon nga nagsunod uban sa espirituhanong paglahutay. Ang akong papa kanunayng maghisgot bahin sa iyang amahan, nga si Milo T Dyches, ug mipaambit kon sa unsang paagi ang iyang hugot nga pagtuo sa Dios usa ka kahayag ngadto kaniya adlaw ug gabii. Si Lolo usa ka forest ranger ug sa kasagaran mag-inusarang magbiyahe sa kabukiran, gisalig ang iyang kaugalingong kinabuhi sa walay pagduhaduha ngadto sa giya ug pag-amuma sa Dios.
Sa ulahing bahin sa tinglarag, si Lolo nag-inusara sa taas nga kabukiran. Ang tingtugnaw nagsugod na dihang gibutangan niya og kabay-anan ang usa sa iyang mga kabayo, nga si tigulang nga Prince, ug mipadagan ngadto sa usa ka bansohan aron susihon ug sukdon ang mga troso sa dili pa kini panggabson.
Sa pagkahapon, iyang nahuman ang iyang trabaho ug mikabayo og balik sa kabayo. Nianang higayona, ang temperatura misamot na kabugnaw, ug ang grabing pagbagyo og snow sa tingtugnaw mitabon sa bukid. Kay walay kahayag ni agianan nga makagiya kaniya, iyang gipaliko si Prince sa usa ka direksyon nga gituohan niyang modala kanila og balik sa ranger station.
Human magbiyahe og mga milya diha sa kangitngit, mihinay si Prince, dayon mihunong. Gisige sa pagpugos ni Lolo si Prince sa pag-abante, apan ang kabayo midumili. Uban sa makabuta nga snow nga naghaguros libot kanila, nakaamgo si Lolo nga nagkinahanglan siya og tabang sa Dios. Sama sa iyang gihimo sa tibuok niyang kinabuhi, sa mapaubsanong paagi siya “[mi]hangyo uban sa pagtuo, sa walay pagduhaduha.”24 Usa ka hinay, hinagawhaw nga tingog mitubag, “Milo, lugaki ang pagbira sa renda ni Prince.” Mituman si Lolo, ug sa dihang gilugakan niya ang pagbira sa mga renda, si Prince miliso ug hinayhinayng mipadulong sa lahi nga direksyon. Mga oras ang milabay, si Prince mihunong na usab ug miduko. Latas sa biyahi nga nagpangatagak ang snow, nakita ni Lolo nga luwas silang nakaabot sa ganghaan sa ranger station.
Pag-abot sa adlaw sa kabuntagon, gisubay og balik ni Lolo ang mga lakra sa tunob ni Prince diha sa snow. Miginhawa siya og labihan kalawom dihang iyang nakita ang dapit diin iyang gilugakan sa pagbira ang renda ni Prince: dapit kadto sa ngilit gayod sa pangpang sa bukid, diin usa na lang ka lakang paabante ang kabayo ug ang nagsakay madiretso na unta sa ilang kamatayon tungod sa gansangon hait nga mga bato nga ilang mahulgan sa ubos.
Base niana nga kasinatian ug sa daghan pa, si Lolo mitambag nga “Ang pinakamaayo ug pinakatalagsaon nga inyong ikauban mao ang inyong Amahan sa Langit.” Kon ang akong papa mohisgot sa sugilanon ni Lolo, makahinumdom ko nga siya mokutlo gikan sa mga kasulatan:
“Salig sa Ginoo sa bug-os mong kasingkasing. Ayaw gayod pagsalig sa imong kaalam.
“Sa tanan nimong mga dalan ilha siya, ug siya magamando sa imong mga alagianan.”25
Mopamatuod ko nga si Jesukristo mao ang walay kataposang kahayag nga “nagdan-ag sa kangitngit.”26 Walay kangitngit nga hangtod sa hangtod molabaw, mopalong, mobuntog, o mopildi niana nga kahayag. Ang atong Langitnong Amahan sa walay pagpugong mitanyag niana nga kahayag diha kaninyo. Kamo wala gayod mag-inusara. Siya maminaw ug motubag sa matag pag-ampo. Siya “nagtawag kaninyo gikan sa kangitngit ngadto sa iyang katingalahang kahayag.”27 Kon kamo mangutana, “Amahan, Amahan, Ikaw anaa ba diha?” Sa kanunay Siya motubag, “Nia ra ko, akong anak, ania ra ko dinhi.”
Ako mosaksi nga si Jesukristo mituman sa plano sa Langitnong Amahan isip atong Manluluwas ug atong Manunubos;28 Siya ang atong kahayag, atong kinabuhi, ug atong dalan. Ang Iyang kahayag walay pagkaawop;29 Ang iyang himaya walay paghunong; ang Iyang gugma alang kaninyo mahangturon—kagahapon, karon, ug hangtod sa hangtod. Sa ngalan ni Jesukristo, amen.