Elder Alfred Kyungu

Kinatibuk-ang Awtoridad nga Seventy

Niadtong 1991, si Alfred Kyungu 24 anyos nga estudyante sa University of Lubumbashi sa Democratic Republic of the Congo, nga nagpuyo sa iyang uyoan, nga si Polydor Ngoy. Usa ka adlaw ang iyang uyoan miingon kaniya mahitungod sa usa ka sabot nga magkita kauban sa pipila ka misyonaryo gikan sa Ang Simbahan ni Jesukristo sa mga Santos sa Ulahing mga Adlaw.

“Ayaw palabya kining maayo nga oportunidad,” giingnan siya sa iyang uyoan.

Sa wala madugay siya ug ang iyang uyoan kanunay nang nakigkita sa senior nga magtiayon nga misyonaryo gikan sa Utah. Sa sinugdanan, si Alfred nagduha-duha sa pag-apil sa usa ka bag-o, lahi nga relihiyon. Human sa unom ka bulan nga mga panaghisgot ug mga tubag sa daghang pangutana, hinoon, si Alfred ug ang iyang uyoan nabunyagan niadtong Septyembre 21, 1991.

Sa pipila ka paagi, ang pagpasakop sa Simbahan dili sayon nga transisyon. Daghan sa komunidad madudahon sa Simbahan ug naghunahuna kon ang mga Santos sa Ulahing mga Adlaw masiksikon ba sa espirituhanong mga butang o tinuod ba gayod kaha nga Kristiyano. Maayo na lang, kay ang mga miyembro sa ilang gamay nga branch mga mabination ug maabi-abihon. Si Elder Kyungu ug ang iyang uyoan nakadawat og kalig-on tungod kay “gitudloan sa mga baruganan nga gitudlo ni Jesukristo.”

Si Elder Kyungu naminyo ni Lucie Kabulo Malale niadtong 1998. Nasilyo sila didto sa Templo sa Johannesburg South Africa niadtong 2004. Mga ginikanan sila sa duha ka anak nga babaye ug usa ka lalaki.

Si Alfred Kyungu Kibamba natawo sa Kamina, Democratic Republic of the Congo, niadtong Oktubre 31, 1966, ngadto nila ni Domitien Kyungu Nkimba ug Celestine Ngoy Mbuyu.

Si Elder Kyungu nakadawat og bachelor‘s degree ug master’s degree sa social sciences ug international relations gikan sa University of Lubumbashi. Nagtrabaho siya sa daghang panggobyerno nga posisyon sa Democratic Republic of the Congo ug sa Simbahan isip coordinator sa mga seminary ug institute ug isip usa ka manager sa family history.

Usa ka Area Seventy sa panahon sa pagtawag kaniya, nakaserbisyo usab siya isip magtutudlo sa institute, magtutudlo sa Sunday School sa ward, magtatambag sa bishopric, high councilor, magtatambag sa kapangulohan sa stake, ug presidente sa Democratic Republic of the Congo Mbuji-mayi Mission sugod niadtong 2016 hangtod 2019.