Elder Patricio M. Giuffra
Kinatibuk-ang Awtoridad nga Seventy
Si Elder Patricio M. Giuffra kwatro anyos pa sa dihang namatay ang iyang papa sa kanser. Sa bata pa, nagdako siya nga nagpangutana sa Dios ug naghunahuna nganong ang kinabuhi wala gayoy kaangayan.
“Ang akong amahan usa ka maayo nga bana, amahan, ug tigsangkap,” si Elder Giuffra nahinumdom nga naghunahuna. “Nganong kinahanglan pa siyang mamatay?”
Ang mga tubag ug panabot miabot usa ka dekada human niadto sa dihang si Patricio ug ang iyang mama nakahimamat sa full-time nga mga misyonaryo ug midawat sa ebanghelyo.
Ang plano sa kaluwasan naghatag kaniya og paglaom tungod kay nakatabang kini nga iyang masabtan ang kamatayon sa iyang amahan. “Ang akong amahan miandam og paagi aron kami mopasakop sa Simbahan,” miingon siya.
Sukad sa panahon nga gibunyagan siya, ang ebanghelyo ni Jesukristo maoy nahimong angkla sa kinabuhi ni Elder Giuffra. “Ang Simbahan mao na ang akong kinabuhi sukad,” miingon siya. “Mibati ko nga sa kanunay nahisakop ako sa Simbahan.”
Usa ka espesyal nga gutlo nahitabo niadtong 1989 sa dihang si Elder Giuffra nasilyo sa iyang mga ginikanan ug sa patay nang mga igsoon didto sa Templo sa Ogden Utah. Human sa ordinansa, mihunghong ang iyang mama, “Mibati ako sa presensya sa inyong amahan.”
Si Patricio Mauricio Giuffra Vargas natawo sa Valparaíso, Chile, niadtong Abril 6, 1962, ngadto nila ni Lazaro Dante Giuffra Riffo ug Olga Rosa Vargas Canales. Nagdako siya sa Valparaíso, Chile, ug naminyo kang Maria Eugenia Gonzalez Olmos didto sa Templo sa Santiago Chile niadtong 1992. Sila adunay upat ka anak.
Si Elder Giuffra nakadawat og bachelor‘s degree sa marketing ug paghubad/interpretasyon sa Brigham Young University niadtong 1990 ug degree sa master of business administration sa BYU niadtong 1994.
Nagtrabaho siya isip purchasing manager sa Woodgrain Millwork (1994–96), sales manager ug operations manager sa Alvenius Chilena (1996–98), ug general manager sa Carbotech Chile (1998–99) ug Arcotex SA (2000 hangtod karon).
Si Elder Giuffra nakaserbisyo isip full-time nga misyonaryo sa Chile Osorno Mission, executive secretary sa stake, presidente sa Young Men sa stake, bishop, ug presidente sa stake. Sa wala pa siya matawag isip Kinatibuk-ang Awtoridad nga Seventy, nagserbisyo siya isip Area Seventy sa Habagatang Amerika.