Kamo Mahimo nga Gawasnon
Si Jesukristo mao ang kahayag nga kinahanglan natong ipakita bisan sa mangitngit nga mga panahon sa atong mortal nga kinabuhi.
Akong minahal nga kaigsoonan, mapasalamaton ko sa pribiliheyo nga mamulong kaninyo gikan sa Africa. Usa ka panalangin nga adunay teknolohiya karon ug gamiton kini sa labing epektibo nga paagi aron maabot kamo bisan asa pa kamo.
Niadtong Septyembre 2019, si Sister Mutombo ug ako, samtang nagserbisyo isip mga lider sa Misyon sa Maryland Baltimore, adunay kahigayunan sa pagbisita sa pipila ka makasaysayanong mga dapit sa Simbahan didto sa Palmyra, New York, samtang nagtambong og usa ka seminar sa pagpangulo sa misyon. Kami mitapos sa among pagbisita didto sa Sagradong Kakahoyan. Ang among tuyo sa pagbisita sa Sagrado nga Kakahoyan dili aron makabaton og espesyal nga langitnong kasinatian o usa ka panan-awon, apan kami mibati gayod sa presensya sa Dios niining sagrado nga dapit. Ang among mga kasingkasing napuno sa pasalamat alang ni Propeta Joseph Smith.
Sa among pagpauli, si Sister Mutombo nakamatikod nga ako adunay dakong pahiyom samtang nagdrayb, mao nga nangutana siya, “Unsa man ang hinungdan sa imong kahinam?”
Ako mitubag, “Akong minahal nga Nathalie, ang kamatuoran kanunay gayod nga modaog batok sa sayop, ug ang kangitngit dili magpadayon sa yuta tungod sa gipahiuli nga ebanghelyo ni Jesukristo.”
Ang Dios nga Amahan ug si Jesukristo mibisita sa batan-ong Joseph Smith aron sa pagdala sa kahayag sa unsay gitago, aron kita mahimong makadawat sa “kahibalo sa mga butang ingon nga sila mao karon, …ingon nga sila mao kaniadto, ug ingon nga sila mao sa [umaabot] ”(Doktrina ug mga Pakigsaad 93: 24).
Human sa kapin sa 200 ka tuig, daghan gihapon ang nangita sa mga kamatuoran nga gikinahanglan aron mahimong gawasnon sa pipila ka mga tradisyon ug sa mga bakak nga ang kaaway mipakatap sa tibuok kalibotan. Daghan ang “nabutaan pinaagi sa maliputon nga paglingla sa mga tawo” (Doktrina ug mga Pakigsaad 123: 12). Sa iyang Sulat ngadto sa mga Taga-Efeso, si Pablo mitudlo: “Pagmata na, hingatulgon[!], bangon gikan sa mga patay, ug hatagan ka ni [K]risto [og] kahayag” (Mga Taga-Efeso 5:14). Ang Manluluwas misaad nga Siya mao ang mahimong kahayag ngadto sa tanan nga maminaw sa Iyang mga pulong (tan-awa sa 2 Nephi 10:14).
Traynta’y singko ka tuig nang milabay, ang akong mga ginikanan usab nabutaan ug naningkamot pag-ayo sa pagpangita aron mahibalo sa kamatuoran ug nabalaka mahitungod kon asa moadto aron makakaplag niini. Ang akong mga ginikanan parehong natawo diha sa barangay, diin ang mga tradisyon nakagamot sa kinabuhi sa mga indibidwal ug mga pamilya. Silang duha mibiya sa ilang barangay dihang sila mga batan-on pa ug miabot sa siyudad, nangita og mas maayong kinabuhi.
Nagminyo sila ug nagsugod sa ilang pamilya sa labing mapaubsanon nga paagi. Daghan kaayo kami sa usa ka gamay nga balay—ang akong mga ginikanan, duha sa akong manghod nga babaye ug ako, ug usa ka ig-agaw nga nagpuyo uban kanamo sauna. Kanunay kong naghunahuna kon tinuod ba gayod kaming usa ka pamilya, tungod kay wala kami tugoti nga magkaon sa samang lamesa uban sa among mga ginikanan. Inig uli sa among papa gikan sa trabaho, sa pagsulod gayod niya sa balay, papahawaon kami ug pagawason. Ang among kinatulgan hilabihan ka mubo ra, kay dili kami makatulog tungod sa kakulang sa panag-uyon ug tiunay nga panaghigugmaay sa kaminyoon sa among ginikanan. Ang among panimalay dili lamang gamay, apan usa ka ngitngit nga dapit. Sa wala pa mahimamat ang mga misyonaryo, kami mitambong sa nagkalain-lain nga mga simbahan matag Dominggo. Tataw nga ang among ginikanan nangita og usa ka butang nga ang kalibotan dili makahatag.
Kini nagpadayon hangtod among nahimamat si Elder ug Sister Hutchings, ang unang senyor nga magtiayon nga misyonaryo nga gitawag nga moserbisyo sa Zaire (nailhan karon isip DR sa Congo o Congo-Kinshasa). Dihang nagsugod kami sa pakigkita niining talagsaon nga mga misyonaryo, kinsa sama sa mga anghel nga gikan sa Dios, akong namatikdan nga adunay butang nga nagsugod og kausab sa among pamilya. Human sa among bunyag, kami tinud-anay gayod nga nagsugod sa paglambo og bag-ong estilo sa kinabuhi tungod sa gipahiuli nga ebanghelyo. Ang mga pulong ni Kristo misugod sa pagpadako sa among mga kalag. Kini misugod sa pagdan-ag sa among salabotan ug nahimong maanindot ngari kanamo, tungod kay ang mga kamatuoran nga among nadawat nasabtan ug among nakita ang kahayag, ug kini nga kahayag nag-anam og labaw kahayag ug labaw pa kahayag matag adlaw.
Kini nga pagsabot sa ngano sa ebanghelyo nakatabang kanamo nga mahimong mas mahisama sa Manluluwas. Ang gidak-on sa among balay wala mausab; ni ang among sosyal nga kahimtang. Apan ako nakasaksi sa kausaban sa kasingkasing sa akong mga ginikanan samtang kami nag-ampo matag adlaw, buntag ug gabii. Kami nagtuon sa Basahon ni Mormon; kami nagpahigayon og family home evening; kami sa tinud-anay nahimong usa ka pamilya. Matag Dominggo kami mangmata og alas 6:00 sa buntag aron mangandam sa pag-adto sa simbahan, ug mobiyahe kami og pila ka oras aron sa pagtambong sa mga miting sa Simbahan matag semana nga walay pagreklamo. Usa kadto ka talagsaon nga kasinatian nga masaksihan. Kami, kinsa kaniadto naglakaw sa kangitngit, mipapahawa sa kangitngit gikan kanamo (tan-awa sa Doktrina ug mga Pakigsaad 50: 25) ug nakakita og “dako nga kahayag” (2 Nephi 19:2).
Nahinumdom ko usa ka adlaw sa dihang dili ko ganahan nga mobangon og sayo sa buntag alang sa among pag-ampo isip pamilya, nagbagulbol ko sa akong mga igsoong babaye, “Wala na lang gayod ta’y laing mahimo niini nga panimalay, mag-ampo, mag-ampo, mag-ampo ra gayod.” Ang akong papa nakadungog sa akong mga gisulti. Akong nahinumdoman ang iyang reaksyon samtang siya mahigugmaon apan kusganong mitudlo kanako, “Hangtod nga ikaw anaa niini nga balay, ikaw mag-ampo, mag-ampo, mag-ampo.”
Ang mga pulong sa akong amahan misanting sa akong mga dalunggan kada adlaw. Unsa kaha sa inyong hunahuna ang gibuhat ni Sister Mutombo ug nako sa among mga anak karon? Kami nag-ampo, nag-ampo, ug nag-ampo. Kini mao ang amog kabilin.
Ang tawo kinsa nahimugso nga buta ug giayo ni Jesukristo, human gipugos sa iyang mga silingan ug mga Pariseo, miingon:
“Ang usa ka tawo nga ginganlan og Jesus nga nagmasa og lapok ug iyang gihidhid sa akong mga mata, ug miingon kanako, Lakaw ngadto sa linaw sa Siloam, ug panghilam-os: ug busa miadto ako ug nanghilam-os, ug makakita na ako. …
“… Ang nasayran ko lamang mao nga … buta ako kaniadto, apan karon ako makakita na” (Juan 9:11, 25).
Kami usab mga buta ug karon makakita na. Ang gipahiuli nga ebanghelyo nakaimpluwensya sa among pamilya sukad niadtong panahona. Ang pagsabot sa ngano sa ebanghelyo mipanalangin sa tulo ka henerasyon sa akong pamilya ug magpadayon sa pagpanalangin sa daghang mga henerasyon nga moabot.
Si Jesukristo mao ang kahayag nga nagdan-ag sa kangitngit. Kadtong mosunod Kaniya “dili na gayod maglakaw diha sa kangitngit kon dili makabaton hinuon sa kahayag sa kinabuhi” (Juan 8:12).
Sulod sa hapit usa ka tuig, taliwala sa 2016 ug 2017, ang mga katawhan sa rehiyon sa Kasai nag-atubang og grabe nga trahedya. Usa kadto ka malisod kaayo nga panahon alang sa katawhan tungod sa panagbangi tali sa usa ka tradisyonal nga grupo sa mga manggugubat ug mga pwersa sa gobyerno. Ang pagpasipala mikatap gikan sa mga lungsod sa Kasai-Sentro sa Probinsya ngadto sa mas lapad nga rehiyon sa Kasai. Daghang mga tawo ang milayas gikan sa ilang mga panimalay alang sa kahilwasan ug mitago sa kalibonan. Wala sila’y pagkaon o tubig o wala gayoy bisan unsa, ug apil niadto ang pipila ka mga miyembro sa Ang Simbahan ni Jesukristo sa mga Santos sa Ulahing mga Adlaw sa Kananga nga dapit. Pipila ka mga miyembro sa Simbahan ang gipatay sa mga milisya.
Si Brother Honoré Mulumba sa Nganza Ward sa Kananga ug ang iyang pamilya mao ang pipila sa mga tawo nga nagpabiling nagtago sa ilang balay, wala masayod kon asa moadto tungod kay ang tanang kadalanan kanunay adunay gubot ug pinusilay. Usa ka adlaw ang pipila ka kasilinganan nga mga milisya nakabantay sa presensya ni Brother Mulumba ug sa iyang pamilya, tungod kay usa ka gabii sila migawas aron sa pagpangita og mga utanon diha sa tanaman sa pamilya aron makaon. Usa ka grupo sa mga milisya ang miabot sa ilang panimalay ug dayon mibira kanila pagawas ug mipapili kanila sa pagsunod sa naandang mga binuhatan sa milisya o pamatyon.
Si Brother Mulumba maisogon nga misulti kanila nga, “ako usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ang akong pamilya ug ako midawat kang Jesukristo ug adunay hugot nga pagtuo diha Kaniya. Kami magpabilin nga matinud-anon sa among mga pakigsaad ug modawat nga mamatay.”
Sila misulti kanila, “Tungod kay mipili kamo ni Jesukristo, ang inyong mga lawas pagakan-on sa mga iro,” ug sila misaad nga mobalik. Apan wala gayod sila mobalik, ug ang pamilya nagpabilin didto sulod sa duha ka bulan ug wala na gayod makakita kanila pag-usab. Si Brother Mulumba ug ang iyang pamilya nagpabiling lig-on sa ilang pagtuo. Ilang gihinumdoman ang ilang mga pakigsaad ug sila napanalipdan.
Si Jesukristo mao ang kahayag nga kinahanglan natong ipakita bisan sa mangitngit nga mga panahon sa atong mortal nga kinabuhi (tan-awa sa 3 Nephi 18:24). Kon kita mopili nga mosunod ni Kristo, kita mopili nga mausab. Ang usa ka lalaki o babaye nga nag-usab alang kang Kristo pagagiyahan ni Kristo, ug kita mangutana, sama sa gibuhat ni Pablo, “Ginoo, unsa man ang imong ipabuhat kanako?” (Mga Buhat 9:6). Kita “managsunod sa iyang mga tunob” (1 Pedro 2:21). Kita “magkinabuhi sama kang Jesukristo” (1 Juan 2:6). (Tan-awa sa Ezra Taft Benson, “Born of God,” Tambuli, Okt. 1989. 2, 6)
Ako mopamatuod Kaniya kinsa namatay, gilubong, ug mibangon pag-usab sa ikatulong adlaw ug mikayab ngadto sa langit aron nga kamo ug ako makadawat sa mga panalangin sa pagka-imortal ug kahimayaan. Siya “ang kahayag, … ang kinabuhi, ug ang kamatuoran” (Ether 4:12). Siya ang panagang ug tambal sa kalibog sa kalibotan. Siya mao ang sumbanan sa kahamili alang sa kahimayaan, gani si Jesukristo. Sa ngalan ni Jesukristo, amen.