Pagkat-on gikan sa Kinatibuk-ang Komperensya

Ang mga pagtulun-an sa buhing mga propeta ug ubang kinatibuk-an nga mga lider sa Simbahan naghatag og dinasig nga giya samtang maninguha kita sa pag-apil sa buhat sa Ginoo. Sa ikaduha ug ikaupat nga mga Domingo sa matag bulan, ang mga kapangulohan sa korum sa mga elder ug Relief Society mopili og usa ka mensahe sa komperensya nga hisgutan, base sa mga panginahanglan sa mga miyembro ug paggiya gikan sa Espiritu. Usahay, ang bishop o presidente sa stake mahimong mosugyot usab og mensahe. Sa kinatibuk-an, ang mga lider kinahanglang mohatag og gibug-aton sa mga mensahe nga gikan sa mga sakop sa Unang Kapangulohan ug sa Korum sa Napulog Duha ka mga Apostoles. Bisan pa man, ang bisan unsang mensahe gikan sa pinakabag-o nga komperensya mahimo nga hisgutan.

Ang mga lider ug mga magtutudlo kinahanglan nga mangita og mga paagi sa pag-awhag sa mga miyembro nga mobasa daan sa pinili nga mensahe sa dili pa ang miting.

Alang sa dugang nga impormasyon mahitungod sa mga miting sa korum sa mga elder ug sa Relief Society, tan-awa ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 8.2.1.2, 9.2.1.2, ChurchofJesusChrist.org.

Pagplano sa Pagtudlo

Ang mosunod nga mga pangutana makatabang sa mga magtutudlo samtang magplano sila sa paggamit og mensahe sa kinatibuk-ang komperensya nga itudlo.

Unsay gusto sa mamumulong nga atong masabtan? Unsa nga mga baruganan sa ebanghelyo ang iyang gitudlo? Sa unsang paagi kini nga mga baruganan magamit sa atong korum o Relief Society?
Unsa nga mga kasulatan ang gigamit sa mamumulong aron sa pagsuporta sa iyang mensahe? Aduna bay laing mga kasulatan nga atong mabasa nga makapalawom sa atong pagsabut? (Mahimong makita nimo ang uban diha sa mga endnote sa mensahe o diha sa Ang Giya Ngadto sa mga Kasulatan.)
Unsa nga mga pangutana ang akong mapangutana nga makatabang sa mga miyembro sa pagpamalandong sa mensahe? Unsa nga mga pangutana ang makatabang kanila nga makakita sa kalabutan sa mensahe diha sa ilang mga kinabuhi, sa ilang mga pamilya, ug sa buhat sa Ginoo?
Unsa ang akong mabuhat aron makadapit sa Espiritu diha sa atong miting? Unsa ang akong magamit aron mapalambo ang diskusyon, lakip ang mga istorya, mga pagkasusama, musika, o buhat sa arte? Unsa ang gigamit sa mamumulong?
Mihatag ba og bisan unsa nga mga pagdapit ang mamumulong? Sa unsang paagi ako makatabang sa mga miyembro nga magtinguha sa pagbuhat niadto nga mga pagdapit?

Mga Ideya para sa Kalihokan

Adunay daghang mga paagi sa pagtabang sa mga miyembro nga makat-on gikan sa mga mensahe sa kinatibuk-ang komperensya. Aniay pipila ka mga ehemplo; mahimong aduna kay ubang mga ideya nga mas mohaum sa inyong korum o Relief Society.

Panaghisgot diha sa mga grupo. Bahina ang mga miyembro ngadto sa gagmayng mga grupo, ug sanguni ang matag grupo og lain nga seksyon sa mensahe sa komperensya aron basahon ug hisgutan. Dayon hangyoa ang matag grupo sa pagpaambit og kamatuoran nga ilang nakat-unan. O mahimo kang magporma og mga grupo sa mga tawo nga nagtuon og laing mga seksyon ug tuguti sila sa pagpaambit sa usag usa kon unsay ilang nakat-unan.
Pagtubag sa mga pangutana. Dapita ang mga miyembro sa pagtubag og mga pangutana sama sa mosunod kabahin sa mensahe sa komperensya: Unsa nga mga kamatuoran sa ebanghelyo ang atong makit-an niini nga mensahe? Unsaon nato paggamit niini nga mga kamatuoran? Unsa nga mga pagdapit ug gisaad nga mga panalangin ang gihatag? Unsa ang gitudlo kanato niini nga mensahe mahitungod sa buhat nga gusto sa Dios nga atong buhaton?
Pagpaambit og mga kinutlo. Dapita ang mga miyembro sa pagpakigbahin og mga kinutlo gikan sa mensahe sa komperensya nga nakadasig kanila sa pagtuman sa ilang mga responsibilidad sa buhat sa kaluwasan. Awhaga sila sa pagkonsiderar kon unsaon nila sa pagpakigbahin niini nga mga kinutlo aron sa pagpanalangin sa usa ka tawo, lakip na sa mga hinigugma ug sa mga tawo nga ilang gialagaran.
Pagpaambit og leksyon nga maggamit og usa ka butang [object lesson]. Pagdapit daan og pipila ka mga miyembro sa pagdala og mga butang gikan sa balay nga ilang magamit sa pagtudlo bahin sa mensahe sa komperensya. Atol sa miting, pangutan-a ang mga miyembro sa pagpasabut kon unsay kalabutan niadto nga mga butang sa mensahe.
Pag-andam og leksyon nga itudlo sa panimalay. Hangyoa ang mga miyembro sa pagtrabaho nga magpares aron magplano og leksyon sa home evening base sa mensahe sa komperensya. Unsaon nato paghimo sa mensahe nga angay para sa atong mga pamilya? Unsaon kaha nato pagpaambit niini nga mensahe ngadto sa mga tawo nga atong gialagaran?
Pagpaambit og mga kasinatian. Basaha og dungan ang pipila ka mga pamahayag gikan sa mensahe sa komperensya. Hangyoa ang mga miyembro sa pagpakigbahin og mga ehemplo gikan sa mga kasulatan ug gikan sa ilang kaugalingong kinabuhi nga naghulagway o naglig-on sa doktrina nga gitudlo niini nga mga pamahayag.
Pagkat-on kabahin sa usa ka kasulatan. Dapita ang mga miyembro sa pagbasa og kasulatan nga gigamit sa mensahe sa komperensya. Hangyoa sila sa paghisgut kon sa unsang paagi nga ang mga pagtulun-an diha sa mensahe makatabang kanila nga masabtan ang kasulatan.
Pangita og tubag. Sayo pa lang, paghimo og pipila ka mga pangutana nga matubag gamit ang mensahe sa komperensya. Pagtutok sa mga pangutana nga makapahunahuna og maayo o makagamit sa mga baruganan sa ebanghelyo (tan-awa sa Pagtudlo Sumala sa Pamaagi sa Manluluwas, [2016], 31–32). Dayon tugoti ang mga miyembro sa pagpili og pangutana ug mangita og mga tubag diha sa mensahe. Dapita sila sa paghisgut sa ilang mga tubag sa gagmay nga mga grupo.
Pangita og hugpong sa mga pulong. Dapita ang mga miyembro sa pagpangita sa mensahe sa komperensya, nga mangita sa mga hugpong sa mga pulong nga makahuluganon kanila. Hangyoa sila sa pagpaambit sa mga hugpong sa mga pulong ug unsa ang ilang nakat-unan gikan niini. Sa unsang paagi kini nga mga pagtulun-an makatabang kanato sa paghimo sa buhat sa Ginoo?
Paghimo og usa ka butang. Dapita ang mga miyembro sa paghimo og poster o bookmark nga maglakip og mubo nga makapadasig nga pamahayag gikan sa mensahe sa komperensya. Hatagi sila og kahigayunan nga mopakigbahin kon unsa ang ilang gibuhat.

Alang sa dugang nga mga ideya sa pagtuon ug pagtudlo gikan sa mga mensahe sa kinatibuk-ang komperensya, tan-awa sa “Mga Ideya alang sa Pagkat-on ug Pagtudlo gikan sa Kinatibuk-ang Komperensya” nga makita ubos sa Kinatibuk-ang Komperensya diha sa Gospel Library.