Elder Alvin F. Meredith III

Kinatibuk-ang Awtoridad nga Seventy

Sa kataposang tuig ni Alvin F. Meredith sa high school sa Tennessee, USA, siya gipili isip maoy atleta niana nga tuig sa eskwelahan sa usa ka pundok sa mga atleta nga Kristiyanong mga estudyante.

Wala madugay human niadto, ang iyang coach mipahibalo kaniya nga ang mga nangulo sa estado sa grupo mipapha kaniya tungod kay wala nila ilha ang Ang Simbahan ni Jesukristo sa mga Santos sa Ulahing mga Adlaw isip usa ka Kristiyano nga tinuohan.

Ang iyang coach, “usa ka maayo kaayo nga Kristiyano nga tawo,” mihangyo sa organisasyon sa pagpadala og tawo ngadto sa eskwelahan aron makigkita sa batan-ong atleta. Ang representante sa organisasyon miadto sa eskwelahan ug mipasabot og 10 ka punto sa doktrina nga gibati niya nga maghatag og katarongan sa ilang desisyon nga paphaon ang atleta nga Santos sa Ulahing mga Adlaw. Dihang nakakita og Biblia sa bag sa maong tawo, si Elder Meredith mihangyo kon mahimo ba nga ribyuhon nilang duha ang pipila ka bersikulo niini.

“Gitan-aw namo ang matag usa niadtong 10 ka punto ug miadto sa Mga Cronicas ug sa Santiago ug sa basahon sa Pinadayag ug sa Mga Taga-Corinto,” miingon si Elder Meredith. “Nahagit ang akong hugot nga pagtuo, ug tungod sa kainit niana nga hagit, nalig-on kini ug wala na gayod mapaling sukad.”

Si Alvin Frazier “Trip” Meredith III natawo sa Chattanooga, Tennessee, USA, niadtong Hulyo 22, 1970, ngadto nila ni Alvin ug Mary Meredith. Nakigminyo siya ni Jennifer Denise Edgin niadtong 1998 didto sa Salt Lake Temple. Sila adunay unom ka anak.

Si Elder Meredith migradwar og bachelor’s degree sa psychology sa Brigham Young University niadtong 1994 ug nakaangkon sa iyang master of business administration nga degree gikan sa University of Chicago niadtong 2001. Nakatrabaho siya sa GE Capital, Boston Consulting Group, ug sa Asurion.

Sa batan-on pa, si Elder Meredith nakaserbisyo sa Utah Salt Lake City Mission. Sa panahon sa pagtawag kaniya isip Kinatibuk-ang Awtoridad nga Seventy, nagserbisyo siya isip presidente sa Salt Lake City South Mission sa Utah. Nakaserbisyo usab siya isip Area Seventy, presidente sa stake, magtatambag sa kapangulohan sa misyon, bishop, ug magtutudlo sa Sunday School.