Elder Sean Douglas

Kinatibuk-ang Awtoridad nga Seventy

Isip batan-ong misyonaryo nga nagserbisyo sa Chile Concepción Mission, si Sean Douglas nagsugod sa iyang pagserbisyo didto sa hilit nga nasod. Ang iyang “talagsaon nga unang kompanyon nga taga-Chile ug tigbansay makaistorya og Espanyol nga labihan ka paspas.” Human sa tulo ka bulan sa Habagatang nasod sa Amerika, si Elder Douglas naglisod gihapon sa Espanyol.

Ang pagkawala sa kadasig ug kamingaw nakapaduhaduha kaniya ug nakapaaghat kaniya sa pagluhod. “Wala akoy nahimo nga maayo,” nag-ampo siya. “Wala ako mobati nga nakaimpluwensya ni bisan kinsa.”

Ang iyang kasingkasing napuno sa nagdilaab nga pangutana gikan sa kahitas-an: “Nia ka ba dinhi alang Kanako, o nia ka dinhi alang kanimo?”

Niining gutloa iyang gipaniguro ngadto sa Dios nga kalimtan niya ang iyang kaugalingon ug padayon nga maningkamot. “Nianang gabhiona gayod nagdamgo ako og Espanyol,” miingon siya.

Pagkasunod adlaw ang tanan mas sayon na. “Mas maayo na ang akong pag-istorya. Mas nakasabot na ko og gamay,” miingon siya. “Ang misyon nakapadugang sa akong pagpamatuod bahin sa gahom sa pag-ampo ug nga kon ikaw moadto ug mobuhat sa unsay gimando sa Ginoo, Siya sa kanunay mohatag og paagi alang kanimo.”

Kana nga pilosopiya ang naggiya sa iyang tibuok kinabuhi.

Si Sean Douglas natawo niadtong Mayo 1, 1964, sa Siyudad sa Salt Lake, Utah, ngadto nila ni Barbara ug Leo Douglas. Gipadako sa komunidad sa silangang bahin sa Walog sa Salt Lake, naminyo siya ni Patricia Ann Dickson—iyang hinigugma sa pagka high school—didto sa Templo sa Salt Lake niadtong Hunyo 1985. Sila adunay upat ka anak.

Si Elder Douglas migradwar og accounting sa University of Utah ug nagtrabaho isip auditor sa wala pa mogahin og tulo ka dekada sa Huntsman Corporation, sa kataposan nagserbisyo isip executive vice president ug dako-dako nga opisyal sa panalapi [chief financial officer].

Ang iyang hugot nga pagtuo ug pagsalig sa Ginoo, nga nalig-on atol sa iyang pagkabatan-on ug sa pagmisyon, migiya kaniya atol sa pagbalhin og trabaho ngadto sa England, diin nagserbisyo siya isip usa ka batan-ong bishop, ug sa Houston, Texas, USA. Nakaserbisyo siya isip presidente sa Peru Lima South Mission sugod niadtong 2012 hangtod 2015. Si Elder Douglas nagserbisyo isip Area Seventy sa wala pa ang bag-o niya nga calling.