Unsa ang Atong Nakat-onan ug Dili Gayod Makalimtan
Kon inyong tan-awon ang inyong kinabuhi sa mainampoon nga paagi, nagtuo ko nga inyong makita ang daghang paagi diin ang Ginoo naggiya kaninyo latas niining panahon sa kalisdanan.
Minahal kong kaigsoonan, ako naghinam-hinam na niining virtual nga panagtigom uban kaninyo. Ang kataposang higayon nga kita mipahigayon og pagkapari nga sesyon sa kinatibuk-ang komperensiya nahitabo niadtong Abril 2019. Daghan ang nahitabo sa milabay nga duha ka tuig! Ang uban kaninyo nawad-an og mga minahal. Ang uban nawad-an og mga trabaho, panginabuhian, o kahimsog. Ang uban gihapon nawad-an og pagbati og kalinaw o paglaom alang sa umaabot. Ipadangat nako ang akong pagbati sa matag usa kaninyo nga nag-antos niini o sa uban pa nga nawala kaninyo. Kanunay ko nga nag-ampo nga ang Ginoo mohupay kaninyo. Kon inyong ipadayon nga ipatigbabaw ang Dios labaw sa tanan diha sa inyong kinabuhi, nasayod ko nga Siya malaomon kabahin sa inyong kaugmaon kay Siya sa kanunay ingon gayod niana sukad pa.
Taliwala sa mga nangawala kanato nga atong nasinati, aduna usab kitay mga butang nga atong nakaplagan. Ang pipila nakakaplag og mas lawom nga pagtuo diha sa atong Langitnong Amahan ug sa Iyang Anak, si Jesukristo. Daghan ang nakakaplag og bag-ong panglantaw sa kinabuhi—gani usa ka mahangturon nga panglantaw. Kamo tingali nakakaplag og mas lig-ong mga relasyon uban sa inyong mga minahal ug uban sa Ginoo. Ako nanghinaot nga kamo nakakaplag og pag-usbaw sa abilidad sa pagpaminaw Kaniya ug nakadawat og personal nga pagpadayag. Ang lisod nga mga pagsulay sa kanunay makahatag og mga kahigayonan sa paglambo nga dili unta moabot sa bisan unsang paagi.
Hunahunaa og balik ang milabayng duha ka tuig. Sa unsang paagi nga kamo milambo? Unsay inyong nakat-onan? Tingali sa sinugdanan mangandoy kamo nga makabalik sa 2019 ug magpabilin didto! Apan kon inyong tan-awon ang inyong kinabuhi sa mainampoon nga paagi, nagtuo ko nga inyong makita ang daghang paagi diin ang Ginoo naggiya kaninyo latas niining panahon sa kalisdanan, nagtabang kaninyo nga mahimong mas mapahinungoron, mas nakabig nga tawo—usa ka tinuod nga tawo sa Dios.
Ako nasayod nga ang Ginoo adunay mahinungdanon ug kahibulongan nga mga plano alang kanato—sa tinagsa-tagsa ug sa tiningob. Uban sa kalooy ug pailob, Siya miingon:
“Kamo gagmay nga mga bata, ug kamo wala pa gihapon makasab[o]t unsa ka dako ang mga panalangin sa Amahan nga … giandam alang kaninyo;
“Ug kamo dili makaant[o]s sa tanan nga mga butang karon; sa ingon niana, paglipay, kay Ako mogiya kaninyo.”1
Minahal kong kaigsoonan, ako mopamatuod nga Siya gayod, mao, sa pagkatinuod ang naggiya kanato, samtang kita magtinguha sa pagpaminaw Kaniya. Gusto Siya nga kita molambo ug makat-on, bisan pinaagi—tingali ilabi na pinaagi sa—kalisdanan.
Kita daghan og makat-onan pinaagi sa kalisdanan. Unsa ang inyong nakat-onan sa milabayng duha ka tuig nga gusto ninyo nga kanunayng mahinumdoman? Ang inyong mga tubag mahimong lahi para ninyo, apan tugoti ko nga mosugyot og upat ka leksyon nga ako nanghinaot nga nakat-onan natong tanan ug dili gayod mahikalimtan.
Leksyon 1: Ang Panimalay Mao ang Sentro sa Hugot nga Pagtuo ug Pagsimba
Kasagaran kon ang Ginoo mopasidaan kanato mahitungod sa mga kakuyaw sa ulahing mga adlaw, Siya motambag sa ingon: “Bar[o]g kamo sa balaan nga mga dapit, ug ayaw pagbalhin.”2 Kini nga “balaan nga mga dapit” sigurado nga naglakip sa mga templo sa Ginoo ug sa mga meetinghouse. Apan samtang ang atong abilidad nga magkapundok niining mga dapit gidid-an sa nagkalain-laing paagi, atong nakat-onan nga ang usa sa labing balaan nga mga dapit sa yuta mao ang panimalay—oo, gani ang inyong panimalay.
Kaigsoonan, naghupot kamo sa pagkapari sa Dios. “Ang katungod sa pagkapari dili mabulag gikan sa mga gah[o]m sa langit.”3 Kamo ug ang inyong pamilya nakadawat sa mga ordinansa sa pagkapari. Anaa “diha sa mga ordinansa [sa pagkapari], [nga] ang gah[o]m sa pagka-diosnon gipakita.”4 Kana nga gahom maanaa kaninyo ug sa inyong pamilya sa inyong kaugalingong panimalay samtang kamo motuman sa mga pakigsaad nga inyong gihimo.5
185 lang ka tuig ang milabay, niining adlawa, sa Abril 3, 1836, si Elijah mipahiuli sa mga yawe sa pagkapari nga nagtugot sa atong pamilya nga masilyohan hangtod sa kahangtoran. Mao kana kon nganong nindot kaayong pamation ang pagpahigayon sa sakramento sa inyong panimalay. Sa unsang paagi kini nakaapekto sa inyong mga sakop sa pamilya nga makita kamo—ilang amahan, apohan, bana, anak nga lalaki, o igsoong lalaki—nga mipahigayon niining balaan nga ordinansa? Unsa ang inyong buhaton aron mapabilin kana nga sagradong pagbati diha sa inyong pamilya?
Kamo mahimong mobati nga kamo sa gihapon aduna pay kinahanglang buhaton aron mahimo ang inyong panimalay nga usa ka tinuod nga santuwaryo sa pagtuo. Kon mao, palihog buhata kini! Kon kamo minyo, pakigtambag sa inyong asawa isip inyong kapareho nga kauban niining mahinungdanon nga buhat. Adunay pipila ka paningkamot nga mas importante kay sa niini. Tali karon ug sa panahon nga ang Ginoo moanhi pag-usab, kitang tanan nagkinahanglan nga ang atong mga panimalay mahimong mga dapit sa kalinaw ug seguridad.6
Ang mga kinaiya ug mga buhat nga makadapit sa Espiritu modugang sa kabalaan sa inyong panimalay. Ang sama usab ka sigurado mao ang kamatuoran nga ang kabalaan mawala kon adunay bisan unsang butang sa inyong pamatasan o kahimtang nga makapasilo sa Balaang Espiritu, kay niana “ang langit sa ilang mga kaugalingon mobiya.”7
Wala ba kamo mahibulong nganong gusto sa Ginoo nga atong himoon ang atong mga panimalay nga mao ang sentro sa pagkat-on ug pagsunod sa ebanghelyo? Dili lang kini aron sa pag-andam kanato, ug pagtabang kanato, sa paglingkawas sa pandemya. Ang kasamtangang mga restriksiyon sa pagpundok sa kadugayan matapos ra. Hinoon, ang inyong pasalig sa paghimo sa inyong panimalay nga nag-unang santuwaryo sa hugot nga pagtuo kinahanglang dili gayod matapos. Samtang ang hugot nga pagtuo ug ang pagkabalaan mokunhod niining napukan nga kalibotan, ang inyong panginahanglan alang sa balaan nga mga dapit mouswag. Ako moawhag kaninyo sa pagpadayon sa paghimo sa inyong panimalay nga usa ka tinuod nga balaan nga dapit “ug dili mabalhin”8 gikan niana nga mahinungdanon nga tumong.
Leksyon 2: Kita Nagkinahanglan sa Usag Usa
Ang Dios gusto nga kita magtambayayong ug motabang sa usag usa. Mao kana ang hinungdan nga Siya mipadala kanato sa yuta pinaagi sa mga pamilya ug miorganisar kanato diha sa mga ward ug mga stake. Mao kana ang hinungdan nga Siya mihangyo kanato sa pagserbisyo ug pagpangalagad sa usag usa. Mao kana ang hinungdan nga Siya mihangyo kanato nga magpuyo dinhi sa kalibotan apan dili iya sa kalibotan.9 Kita makatuman og daghan kaayo kon magkahiusa kay sa mag-iyahay kita.10 Ang plano sa Dios bahin sa kalipay makawang kon ang Iyang mga anak magpabilin nga magkalagyo sa usag usa.
Ang kasamtangang pandemya nahimong lahi nga kini nakaapekto sa tanan sa kalibotan sa samang higayon gayod. Samtang ang uban nag-antos og labaw pa kay sa uban, kitang tanan adunay mga hagit sa ubang paagi. Tungod niini, ang atong komon nga pagsulay adunay potensyal sa pagtabang sa paghiusa sa mga anak sa Dios nga wala pa sukad mahitabo. Busa, mangutana ako, kini bang gisaw-an nga pagsulay mas nakapasuod ba kaninyo ngadto sa inyong mga silingan—sa inyong kaigsoonan sa kasilinganan ug sa tibuok kalibotan?
Kabahin niini, ang duha ka mahinungdanong kasugoan makagiya kanato: una, sa paghigugma sa Dios ug, ikaduha, sa paghigugma sa atong silingan.11 Atong ipakita ang atong gugma pinaagi sa pagserbisyo.
Kon kamo adunay nailhang tawo kinsa nag-inusara, tabangi—bisan kon kamo mibati nga nag-inusara usab! Kamo wala kinahanglana nga adunay usa ka rason o usa ka mensahe o negosyo aron makahimo. Mosulti lang og kumusta ug mopakita sa inyong gugma. Ang teknolohiya makatabang kaninyo. Mapandemya man o dili, ang matag bililhong anak sa Dios nagkinahanglan nga masayod nga siya wala mag-inusara!
Leksyon 3: Ang Inyong Korum sa Pagkapari Nagpasabot og Labaw pa Kay sa Miting Lang
Atol sa pandemya, ang mga miting sa korum sa Dominggo gikanselar sulod sa mubong panahon. Pipila sa mga korum makamiting na karon sa virtual nga paagi. Bisan pa man, ang buhat nga gihatag sa Ginoo ngadto sa mga korum sa pagkapari wala gayod magpasabot nga kutob lang sa miting. Ang mga miting gamay lang na nga tipik sa unsay ipasabot sa korum ug unsa ang mahimo niini.
Akong kaigsoonan sa Aaronic nga Pagkapari ug mga korum sa mga elder, lugwayi ang inyong panglantaw kon nganong kita adunay mga korum. Unsa kaha nga paagi ang gusto sa Ginoo nga kamo mogamit sa inyong korum sa pagtuman sa Iyang buhat—karon? Tinguhaa ang pagpadayag gikan sa Ginoo. Ipaubos ang inyong kaugalingon! Pangayo! Paminaw! Kon kamo gitawag sa pagpangulo, makigtambag isip kapangulohan ug uban sa mga sakop sa korum. Bisan unsa pa ang inyong katungdanan sa pagkapari o calling, tugoti nga ipatigbabaw ang Dios labaw sa tanan diha sa inyong pasalig isip usa ka sakop sa inyong korum ug sa inyong pagserbisyo. Sinatia uban sa kalipay ang pagkamatarong nga inyong mapahinabo samtang kamo “matinguhaon nga moapil diha sa usa ka maayo nga katuyoan.”12 Ang mga korum anaa sa lahi nga posisyon aron mapaspasan ang pagpundok sa Israel sa duha ka habig sa tabil.
Leksyon 4: Mas Makadungog Kita ni Kristo Kon Kita Malinawon
Nagpuyo kita sa panahon nga gipanagna na sa dugayng panahon, nga “ang tanan nga mga butang magkaguliyang; ug sa pagkatinuod, ang mga kasingkasing sa mga tawo mopakyas kanila; kay ang kahadlok moab[o]t diha sa tanan nga mga katawhan.”13 Kana nahitabo sa wala pa ang pandemya, ug kini mahitabo inigka human. Ang kaguliyang sa kalibotan magpadayon sa pagsaka. Sukwahi niini, ang tingog sa Ginoo dili “usa ka tingog sa usa ka dako nga kaguliyang nga kasaba, apan … usa kini ka hagawhaw nga tingog nga hingpit sa kalumo, [sama sa] usa ka honghong, ug kini [mo]dulot bisan ngadto sa kinahiladman sa kalag.”14 Aron makadungog niining hagawhaw nga tingog, kamo kinahanglan usab gayod nga malinawon!15
Sulod sa usa ka panahon, ang pandemya mikanselar sa mga kalihokan nga sa normal nga paagi mopuno sa atong kinabuhi. Sa dili madugay kita makahimo na sa pagpili sa pagpuno na usab niana nga panahon uban sa kasaba ug kaguliyang sa kalibotan. O kita makagamit sa atong panahon sa pagpaminaw sa Ginoo nga naghonghong sa Iyang paggiya, paghupay, ug kalinaw. Ang hilom nga panahon usa ka sagradong panahon—panahon nga mopahiluna og personal nga pagpadayag ug motisok og kalinaw.
Disiplinaha ang inyong kaugalingon nga makabaton og panahon sa pag-inusara ug uban sa inyong mga minahal. Ablihi ang inyong kasingkasing ngadto sa Dios diha sa pag-ampo. Paggahin og panahon nga inyong isubsob ang inyong kaugalingon diha sa mga kasulatan ug mosimba diha sa templo.
Akong minahal nga kaigsoonan, adunay daghang butang nga gusto sa Ginoo nga atong makat-onan gikan sa atong mga kasinatian atol niining pandemya. Naglista lamang ako og upat. Ako modapit kaninyo sa paghimo og inyong kaugalingong lista, hunahunaa kini og maayo, ug ipaambit kini niadtong inyong gimahal.
Ang kaugmaon hayag alang sa mga tawo sa Dios nga nagtuman sa pakigsaad.16 Magkadaghan ang pagtawag sa Ginoo sa Iyang mga sulugoon kinsa takos nga naghupot sa pagpakari sa pagpanalangin, paghupay, ug pagpalig-on sa katawhan ug sa pagtabang sa pag-andam sa kalibotan ug sa mga tawo niini alang sa Iyang Ikaduhang Pag-anhi. Alang sa kaayohan sa matag usa kanato nga makakab-ot sa sagradong ordinasyon nga atong nadawat. Makahimo kita niini! Ako nagpamatuod, inubanan sa akong pagpahayag sa gugma alang sa matag usa kaninyo, akong minahal nga kaigsoonan, sa sagrado nga ngalan ni Jesukristo, amen.