Elder Michael A. Dunn

Kinatibuk-ang Awtoridad nga Seventy

Ang mga ginikanan ni Elder Michael A. Dunn nagdiborsyo sa gamay pa siya nga bata, apan samtang ang iyang mama mipadako kaniya, siya misilsil diha kaniya og lig-ong hugot nga pagtuo ug mga mithi. Human makatambong og usa ka pribadong Episcopal nga eskwelahan sa Siyudad sa Salt Lake, Utah, USA, mibalhin siya sa usa ka pampubliko nga high school, diin didto iyang nahimamat ang mga miyembro sa Ang Simbahan ni Jesukristo sa mga Santos sa Ulahing mga Adlaw.

Dihang ang iyang bag-o nga mga higala ug ang ilang mga ginikanan miabi-abi kaniya uban sa bukas nga mga kamot, si Michael nagtinguha nga makakat-on mahitungod sa Simbahan. Sa wala madugay nakahukom siya nga makigkita sa mga misyonaryo. Ang ilang mga gipangtudlo mahitungod sa Dios nga Kapangulohan ug sa Unang Panan-awon ni Joseph Smith “adunay dako kaayong impluwensya ngari kanako,” miingon siya.

Pinaagi sa pag-ampo nahibalo siya nga ang ebanghelyo tinuod ug nagpabunyag atol sa tuig sa iyang senior high school. Sukad niadto, si Elder Dunn “giamumahan sa daghan nga talagsaong mga lider.”

Siya miila usab sa pagkamaayo sa Langitnong Amahan ug sa Manluluwas sa tibuok niyang kinabuhi. “Usa ako ka tumutuo,” miingon si Elder Dunn. “Napanalanginan ako nga mahimong usa ka saksi ni Jesukristo ug mosangyaw sa Iyang kinabuhi, sa Iyang kaayo, sa Iyang gipahiuli nga ebanghelyo karon.”

Si Michael Austin Dunn natawo niadtong Marso 5, 1958, ngadto nila ni Patricia ug James R. Dunn sa Tucson, Arizona, USA. Nagdako siya sa Siyudad sa Salt Lake. Human makaserbisyo og full-time nga misyon sa Hawaii Honolulu Mission, naminyo siya kang Linda Virginia Poulson niadtong 1980 didto sa Templo sa Salt Lake. Sila adunay tulo ka anak.

Si Elder Dunn nakadawat og bachelor’s degree sa mass communication niadtong 1981 ug master’s degree sa communication niadtong 2008, ang duha gikan sa University of Utah. Siya ang kinatibuk-ang tigdumala [general manager] sa KUED (PBS Utah), presidente sa Dunn Communications Inc., ug bag-ohay lang, tigdumalang direktor sa BYUtv ug BYU Radio.

Si Elder Dunn, nga nagserbisyo isip Area Seventy sa panahon sa pagtawag kaniya, nakaserbisyo isip bishop, magtatambag sa bishopric, presidente sa stake, presidente sa Young Men sa ward, high councilor, ug presidente sa misyon sa South Africa Johannesburg Mission sugod niadtong 2014 hangtod 2017.