Ang Makitawhanong mga Paningkamot Magdala og Kahupayan

Ang Simbahan padayon sa mga paningkamot nga motabang niadtong nanginahanglan sa tibuok kalibotan ug sa paghatag og makitawhanong kahupayan atol sa mga panahon sa krisis.

Diha sa labing dako nga paningkamot alang sa makitawhanong kahupayan sa kasaysayan sa Simbahan, ang Latter-day Saint Charities (ang makitawhanong katambayayong sa Simbahan) nakatabang og daghang tawo atol sa COVID-19 nga pandemya, nga naghatag og mga pundo ug mga suplay aron itabang sa paglikay ug pagtambal sa sakit. Ang paningkamot nakahatag usab og mga kagamitan ug pagbansay alang sa mga propesyonal sa pag-atiman sa panglawas, lakip na ang giya kon unsaon sa pagtanyag og pisikal, mental ug emosyonal nga suporta.

Ang buhatan sa de lata nga mga produkto [cannery] sa Simbahan ug ang mga planta sa pagproseso og mga pagkaon mipahiangay aron matubag ang nagkadaghan nga mga panginahanglan, nanghimo og mga produkto ug mga butang nga magamit sigon sa gikinahanglan sa mga lider sa Simbahan, mga ahensya sa komunidad, mga feeding program sa eskwelahan, mga pundohanan og mga pagkaon, ug uban pang mga organisasyon nga nakig-alayon sa Simbahan, lakip na ang mga gobyerno, internasyonal nga mga organisasyon nga dili iya sa gobyerno, ug ubang makitawhanon nga mga pundok. Sa pagkakaron, ang Latter-day Saint Charities nakasuporta og 1,050 COVID-19 nga mga proyekto sa kahupayan sa 152 ka nasod.

Sukad sa miaging kinatibuk-ang komperensiya, ang Latter-day Saint Charities ug ang rehiyonal ug lokal nga mga lider sa Simbahan nakahimo sa:

Pag-organisar og mga boluntaryo sa Matinabangong mga Kamot [Helping Hands] ug mga paningkamot alang sa kahupayan human nga ang tulo ka kusog kaayong bagyo miigo sa U.S Gulf Coast gikan sa habagatang sidlakan sa Texas ngadto sa pinakaamihanang bahin sa Florida.
Pagpakigtambayayong sa mga kaabag ug pagpakig-alayon sa lokal nga mga lider sa Simbahan sa paghatag og kahupayan human sa mga bagyo nga miigo sa Pilipinas. Kwarenta ka meetinghouse sa Simbahan ang gigamit isip mga sentro nga kabakwitan.
Pagtabang sa mga biktima sa lapad kaayong sunog [wildfire] sa 23 ka stake sa California, Idaho, Oregon, ug sa Washington, USA.
Pagpakigtambayayong sa usa ka kaabag sa paghatag sa 180 ka tonelada nga pagkaon aron itabang sa mga tawo nga nanginahanglan didto sa Wyoming, Maryland, Michigan, Nebraska, South Carolina, Colorado, Massachusetts, ug sa North Carolina, USA.
Paghatag og $1 milyon ka dolyar ngadto sa Salvation Army aron isuporta sa pagpang-apud-apod og pagkaon ngadto sa kapin sa 150 ka dapit sa tibuok Estados Unidos.
Pagdonar og pagkaon ngadto sa 200 ka lokal nga pundohanan og mga pagkaon sa New York, USA.
Paghatod sa 37,500 ka libras nga mga sinina ug 171,168 ka libras nga pagkaon ngadto sa Honduras, nga nakigtambayayong sa mga lider sa gobyerno ug sa komunidad sa paghatag og tabang sa mga naluwas human sa duha ka kusog nga bagyo.
Pagtabang nga mapundohan ang mga programa nga makasangkap og 30 ka milyon ka kan-anan alang sa mga eskwelahan sa siyam ka nasod sa Africa.
Pagpasiugda og 200 ka proyekto sa pagdonar og dugo sa tibuok 14 ka estado sa North America Central Area sa Simbahan.
Pagdonar og kapin sa $200,000 US nga dolyar alang sa personal nga pangpanalipod nga isul-ob sa medikal nga mga propesyonal ug mga mask alang sa mga bata nga nag-eskwela sa Botswana. Onse ka lokal nga mga kongregasyon sa Simbahan ang nagtingob sa pagpanahi og 8,000 ka mask aron itabang sa maong paningkamot.
Pagpasalig og $20 ka milyon ka US nga dolyar nga ihatag agi og suporta sa tibuok kalibotan nga COVID-19 nga pagsanong sa United Nations International Children‘s Emergency Fund (UNICEF), nga makatabang sa paghatag og mga bakuna sa 196 ka nasod.
Paghatod og 790,400 ka libras nga pagkaon; 17,000 ka kahon nga tubig; mga hapin nga kahigdaan, ug ubang mga suplay ngadto sa mga nanginahanglan sa Texas ug Oklahoma human sa grabing unos sa tingtugnaw.