Sila Dili Mopatigbabaw; Kita Dili Mapukan
Kon kita motukod sa atong pundasyon diha kang Jesukristo, kita dili mapukan!
Ang atong minahal nga propeta, si Presidente Russell M. Nelson, miingon sa atong miaging kinatibuk-ang komperensya: “Atol niining lis[o]d nga mga panahon nga gipanagna ni Apostol Pablo, si Satanas wala na gani maningkamot sa pagtago sa iyang mga pag-ataki sa plano sa Dios. Daghang dautan nga mga ideya ang inila sa kalib[o]tan. Busa, ang bugtong paagi aron espirituhanong makasugakod mao ang pagkahimong determinado nga ipatigbabaw ang Dios labaw sa tanan diha sa atong mga kinabuhi, sa pagkat-on nga makadungog sa Iyang tingog, ug sa paggamit sa atong kusog aron motabang sa pagpundok sa Israel.”1
Samtang atong ikonsiderar ang imbitasyon sa propeta sa pagkat-on sa pagpaminaw sa tingog sa Dios, ang ato bang mga kasingkasing determinado o nagmatig-a? Atong hinumdoman ang tambag nga gihatag sa Jacob 6:6: “Oo, karon nga adlaw, kon kamo mamati sa iyang tingog, ayaw pagpatig-a sa inyong mga kasingkasing; kay ngano nga kamo magpakamatay?” Atong paninguhaon nga ipatigbabaw ang Dios labaw sa tanan sa atong kinabuhi.
Sa unsa nga paagi nga atong ipatigbabaw ang Dios labaw sa tanan diha sa atong mga kinabuhi ug dili ang kaaway? Sa Doktrina ug mga Pakigsaad 6:34 atong mabasa, “Busa, ayaw kahadlok, gagmay nga panon; pagbuhat og maayo; tug[o]ti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan, sila dili makabuntog [mopatigbabaw].” Usa kini ka importante nga saad. Bisan og ang yuta ug impyerno maghiusa batok kanato, sila dili mopatigbabaw kon kita mopili sa pagtugot sa Dios nga mopatigbabaw labaw sa tanan pinaagi sa pag-establisar sa atong mga kinabuhi diha sa Iyang lig-on nga sukaranan.
Nakigsulti ngadto sa Iyang mga tinun-an, si Jesukristo mitudlo sa usa ka maalamon nga tawo ug sa usa ka buangbuang nga tawo, nga narekord sa Mateo kapitulo 7 sa Bag-ong Tugon. Daghan kaninyo ang nakadungog sa kanta sa Primary “Ang Tawong Maalam ug ang Tawong Walay Kaalam [Buangbuang].”2 Kon migahin kamo og panahon sa pagtandi sa upat ka bersikulo sa kanta, makaplagan ninyo nga ang mga bersikulo 1 ug 2 susama kaayo sa mga bersikulo 3 ug 4. Ang maalamon nga tawo ug ang tawong walay kaalam nagtukod og balay. Gusto silang mohatag sa ilang pamilya sa usa ka luwas ug komportable nga panimalay. Nagtinguha sila nga magpuyo nga malipayon sa kahangtoran isip usa ka pamilya, sama kaninyo ug kanako. Ang sitwasyon sa palibot mao ra gihapon—“Mibundak ang ulan ug mibaha.” Gikanta nato kini makaunom ka higayon kon kita mokanta niana nga kanta. Ang bugtong kalainan mao nga ang maalamon nga tawo mitukod sa iyang balay ibabaw sa bato ug ang balay nagbarog gihapon, kay sa buangbuang nga tawo nga mitukod sa iyang balay ibabaw sa balas ug ang iyang balay naanod. Busa, kon hain ang atong pundasyon maoy importante, ug kini adunay mahinungdanong epekto sa sangpotanan sa kataposan ug sa kahangtoran.
Manghinaot ko ug mag-ampo nga kitang tanan makakaplag ug magpabilin sa sigurado nga pundasyon samtang atong tukoron ang atong umaabot nga kinabuhi. Kita gipahinumdoman diha sa Helaman 5:12: “Ug karon, akong mga anak, hinumdumi, hinumdumi nga kini diha sa lig-on nga sukaranan sa atong Manunubos, nga mao si Kristo, ang Anak sa Dios, nga kamo kinahanglan gayud motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gah[o]m ibabaw kaninyo sa pagbitad kaninyo ngadto sa bung-aw sa pagkauyamot ug walay katap[o]san nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan.”
Mao kana ang saad gikan sa Dios! Kon kita motukod sa atong pundasyon diha kang Jesukristo, kita dili mapukan! Samtang kita matinud-anong molahotay hangtod sa kataposan, ang Dios motabang nato sa pag-establisar sa atong mga kinabuhi diha sa Iyang bato, “ug ang mga ganghaan sa impyerno dili makabuntog batok [kanato]” (Doktrina ug mga Pakigsaad 10:69). Tingali dili kita makahimo sa pag-usab sa tanan sa unsay umaabot, apan kita makapili unsaon nga kita makapangandam sa unsay umaabot.
Ang pipila nato tingali maghunahuna, “Ang ebanghelyo maayo, mao nga kinahanglan nga himoon nato kini nga kabahin sa atong mga kinabuhi, tingali kausa sa usa ka semana.” Ang pag-adto sa simbahan makausa sa usa ka semana dili igo sa pagtukod diha ibabaw sa bato. Ang atong tibuok kinabuhi kinahanglang napuno sa ebanghelyo ni Jesukristo. Ang ebanghelyo dili kabahin sa atong kinabuhi, apan ang atong kinabuhi sa tinuod kabahin sa ebanghelyo ni Jesukristo. Hunahunaa kini. Dili ba kana tinuod? Ang atong mortal nga kinabuhi kabahin lamang sa tibuok plano sa kaluwasan ug kahimayaan.
Ang Dios mao ang atong Langitnong Amahan. Siya nahigugma kanatong tanan. Siya mas nakahibalo pag-ayo sa atong potensyal kay sa kita nakahibalo sa atong kaugalingon. Nasayod Siya dili lamang sa mga detalye sa atong mga kinabuhi. Ang Dios nakahibalo sa mga detalye sa mga detalye sa mga detalye sa atong mga kinabuhi.
Palihog sunda ang maalamong tambag sa atong buhi nga propeta si Presidente Nelson. Sumala sa narekord sa Doktrina ug mga Pakigsaad 21:5–6:
“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpail[o]b ug hugot nga pagtuo.
“Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gah[o]m sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan.”
Tungod niana nga rason, sila dili mopatigbabaw, ug kita dili mapukan!
Ako mopamatuod kaninyo nga si Kristo moabot pag-usab sa ikaduhang higayon sama sa Iyang gibuhat sa unang higayon, apan niining higayona pagaubanan kini sa dakong himaya ug kaharianon. Ako manghinaot ug mag-ampo nga ako andam sa pagdawat Kaniya, dinhi man nga habig sa tabil o sa pikas habig. Sa atong pagsaulog niining talagsaong panahon sa Pasko sa Pagkabanhaw, ako manghinaot, pinaagi sa Pag-ula ni Jesukristo ug sa gahom sa Iyang Pagkabanhaw (tan-awa sa Moroni 7:41), nga makahimo ako sa pagkayab ug mosugat sa akong Magbubuhat ug moingon, “Salamat.” Sa ngalan ni Jesukristo, amen.