Bag-ong mga Calling
Elder Paul V. Johnson
Kapangulohan sa Seventy
Usa sa bililhong mga leksyon nga nakat-onan ni Elder Paul V. Johnson gikan sa daghang katuigan nga pagtrabaho niya sa edukasyon sa Simbahan mao nga alang niadtong magatuman sa ilang mga pakigsaad, ang Ginoo motuman sa Iyang mga saad—bisan unsa pa man ang mga hagit sa kinabuhi.
“Bisan og nag-atubang kita og kawalay kasiguroan sa pihong mga aspeto sa kinabuhi, kita adunay mga saad nga sigurado,” miingon siya bag-o lang. “Dili kita makatugot nga ang walay kasiguroan nga mga umaabot mohatag kanato og pagduhaduha gikan sa siguradong mga saad sa Ginoo.”1
Karon, ang mga anak sa Dios nag-atubang og tibuok kalibotan nga pandemya, pagkabahinbahin sa katilingban, ug pagbaha sa mga mensahe sa social media. Apan samtang kita magsunod sa atong mga pakigsaad, miingon si Elder Johnson, ang Ginoo magtanyag kanato og giya, gahom, ug kahupayan.
Niadtong Abril 3, 2021, si Elder Johnson gipaluyohan isip sakop sa Kapangulohan sa Seventy, nga magsugod sa Agosto 1, 2021. Si Elder Johnson nagserbisyo isip ika-16 nga Commissioner sa Church Educational System sugod niadtong 2008 hangtod 2015, nagpadayon niana nga posisyon pagka-2019.
Si Paul Vere Johnson natawo niadtong Hunyo 24, 1954, sa Gainesville, Florida, USA, ngadro nila ni Vere ug Winefred Johnson. Human nagdako sa Logan, Utah, USA, miserbisyo siya sa Norway Oslo Mission. Human sa iyang misyon, naminyo siya ni Leslie Jill Washburn didto sa Templo sa Logan Utah niadtong 1976. Sila adunay 9 ka anak ug 40 ka apo.
Si Elder Johnson nakaangkon og bachelor‘s degree sa zoology/botany sa Brigham Young University niadtong 1978, usa ka master of education sa BYU niadtong 1982, ug usa ka doctorate sa pang-instruksyon nga mga teknolohiya sa Utah State University niadtong 1989.
Nagtudlo siya og seminary sulod sa 12 ka tuig sa Arizona ug Utah sa wala pa magtrabaho sa lain-laing mga pagpalambo sa kurikulom ug pang-administratiba nga mga posisyon alang sa Church Educational System sa Siyudad sa Salt Lake.
Si Elder Johnson gipaluyohan isip sakop sa Unang Korum sa Seventy niadtong Abril 2, 2005. Nakaserbisyo usab siya isip Area Seventy, magtatambag sa kapangulohan sa stake, high councilor sa stake, bishop, ug presidente sa Young Men sa ward.