Unsa ang Nabuhat sa Atong Manluluwas alang Kanato?
Gibuhat ni Jesukristo ang tanan nga mahinungdanon alang sa atong panaw sa mortalidad ngadto sa padulngan nga gilatid diha sa plano sa atong Langitnong Amahan.
Sa usa ka Sabado sa hapon nga miting sa usa ka komperensiya sa stake daghang tuig nang milabay, ako nakahimamat og babaye nga miingon nga gihangyo siya sa iyang mga higala sa pagbalik sa simbahan human sa katuigan nga dili na aktibo, apan wala siya makahunahuna og bisan unsa nga rason nga siya mobalik. Aron sa pagdasig kaniya, miingon ako, “Kon imong hunahunaon ang tanang mga butang nga nabuhat sa Manluluwas kanimo, daghan ka og mga rason nga mobalik aron sa pagsimba ug pagserbisyo Kaniya.” Nakurat ko sa dihang siya mitubag, “Unsay nabuhat Niya alang kanako?”
Unsa ang nabuhat ni Jesukirsto sa matag usa kanato? Nabuhat Niya ang tanan nga mahinungdanon alang sa atong panaw sa mortalidad ngadto sa padulngan nga gilatid diha sa plano sa atong Langitnong Amahan. Mamulong ako og upat sa labing importanting bahin niana nga plano. Sa matag usa niini, ang Iyang Bugtong Anak, si Jesukristo, mao ang sentro. Ang hinungdan niining tanan mao “ang gugma sa Dios, nga makatag sa tibuok kalib[o]tan diha sa mga kasingkasing sa mga anak sa mga katawhan; busa, mao kini ang labing madanihon sa tanan nga mga butang” (1 Nephi 11:22).
I.
Sa dili pa ang Pasko sa Pagkabanhaw, kini ang tukma nga panahon nga mamulong og una sa Pagkabanhaw ni Jesukristo. Ang Pagkabanhaw gikan sa mga patay mao ang makapaneguro pag-usab nga personal nga haligi sa atong pagtuo. Kini makadugang og kahulogan sa atong doktrina, kadasig sa atong kinaiya, ug paglaom sa atong umaabot.
Tungod kay nagtuo kita sa Biblia ug sa Basahon ni Mormon nga mga paghulagway sa literal nga Pagkabanhaw ni Jesukristo, kita usab modawat sa daghang mga pagtulun-an sa kasulatan nga ang susama nga pagkabanhaw moabot ngadto sa tanang mortal nga sukad nakapuyo niini nga yuta.1 Si Jesus mitudlo, “Kay Ako buhi man, mabuhi usab kamo” (Juan 14:19). Ug ang Iyang Apostol mitudlo nga “ang mga patay banhawon aron dili na gayod mamatay” ug “kining lawas nga mamatay masul-oban na sa pagkadili mamatay” (1 Mga Taga-Corinto 15:52, 54).
Apan ang Pagkabanhaw naghatag kanato og labaw pa niini nga kasiguroan sa pagka-imortal. Kini makapausab sa paagi nga kita motan-aw sa mortal nga kinabuhi.
Ang Pagkabanhaw naghatag kanato sa panglantaw ug sa kalig-on nga molahutay sa mortal nga mga hagit nga giatubang sa matag usa kanato ug niadtong atong gihigugma. Kini naghatag kanato og usa ka bag-ong paagi sa pagtan-aw sa pisikal, mental, o emosyonal nga mga kakulangan nga anaa kanato sa atong pagkahimugso o naangkon sa panahon sa mortal nga kinabuhi. Kini naghatag kanato og kalig-on sa paglahutay sa mga kasub-anan, mga kapakyasan, ug mga kasagmuyo. Tungod kay ang matag usa kanato adunay kasiguroan sa pagkabanhaw, kita nasayod nga kining mortal nga mga kakulangan ug mga oposisyon temporaryo lang.
Ang Pagkabanhaw naghatag usab kanato og usa ka gamhanan nga pagdasig sa pagsunod sa mga sugo sa Dios panahon sa atong mortal nga kinabuhi. Sa dihang kita mabanhaw gikan sa patay ug mopadayon sa atong gipanagna nga Katapusang Paghukom, gusto natong mahimong takos alang sa labing pinili nga mga panalangin nga gisaad sa nabanhaw nga mga binuhat.2
Agi og dugang, ang saad nga ang Pagkabanhaw maglakip sa oportunidad nga makauban ang atong mga sakop sa pamilya—bana, asawa, mga anak, mga ginikanan, ug kaliwatan—usa ka gamhanan nga pag-awhag sa pagtuman sa atong mga responsibilidad sa pamilya sa mortalidad. Kini usab makatabang kanato nga magpuyo nga maghiusa sa gugma dinhi niini nga kinabuhi, ug kini makahupay kanato sa kamatayon sa atong mga minahal. Kita nasayod nga kining mortal nga pagkabulag temporaryo lamang, ug kita magpaabot sa umaabot nga malipayon nga mga panagkita og balik ug mga pakig-uban. Ang Pagkabanhaw naghatag kanato og paglaom ug kalig-on nga magmapailubon samtang kita magpaabot. Kini usab nag-andam kanato nga adunay kaisog ug kaligdong sa pag-atubang sa kaugalingon natong kamatayon—bisan gani sa kamatayon nga matawag og wala sa tukma nga panahon.
Kining tanan nga mga epekto sa Pagkabanhaw kabahin sa unang tubag sa pangutana nga “Unsa ang nabuhat ni Jesukristo alang kanako?”
II.
Alang sa kadaghanan kanato, ang oportunidad nga mapasaylo sa atong mga sala mao ang dakong kahulogan sa Pag-ula ni Jesukristo. Sa pagsimba, kita matinahurong mokanta:
Ang atong Manluluwas ug Manunubos milahutay sa dili matukib nga pag-antus nga mahimong usa ka sakripisyo alang sa mga sala sa tanang mga tawo kinsa maghinulsol. Kining maulaon nga sakripisyo nagtanyag sa hilabihan ka maayo, ang putli nga kordero nga walay lama, alang sa hilabihan ka dautan, ang mga sala sa tibuok kalibutan. Kini miabli sa pultahan alang sa matag usa kanato nga malimpyohan sa atong personal nga mga sala aron kita madawat og balik ngadto sa presensya sa Dios, atong Amahan sa Kahangturan. Kining abli nga pultahan anaa alang sa tanang mga anak sa Dios. Sa pagsimba, kita moawit:
Ako nahibulong trono Iyang gib’yaan
Pagluwas sa kalag ko nga may kasal-anan,
Naghatag kanako’g gugma nga hilabihan.4
Ang talagsaon ug dili matugkad nga epekto sa Pag-ula ni Jesukristo gibase sa gugma sa Dios alang sa matag usa kanato. Kini nagpamatuod sa Iyang pahayag nga “ang bili sa mga kalag”––ang tanan––“mahinungdanon sa panan-aw sa Dios” (Doktrina ug mga Pakigsaad 18:10). Diha sa Biblia, si Jesukristo mipasabot niini pinaagi sa gugma sa Langitnong Amahan: “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag, kondili makabaton hinuon sa kinabuhing dayon” (Juan 3:16). Sa modernong pagpadayag ang atong Manunubos, si Jesukristo, mipahayag nga Siya “nahigugma sa kalib[o]tan nga siya mihatag sa iyang kaugalingon nga kinabuhi, nga kutob sa motuo mahimo nga mga anak sa Dios” (Doktrina ug mga Pakigsaad 34:3).
Nan, ikatingala ba, nga ang Basahon ni Mormon, “Lain nga Tugon ni Jesukristo,” mitapos sa mga pagtulun-an nga aron mahimong “hingpit” ug “pagasantoson diha ni Kristo,” kita kinahanglan nga “mohigugma sa Dios uban sa tibuok [nato] nga gah[o]m, hunahuna ug kusog”? (Moroni 10:32–33). Ang Iyang plano nga nadasig sa gugma kinahanglang dawaton uban sa gugma.
III.
Unsa pa ang nahimo sa atong Manluluwas, si Jesukristo, alang kanato? Pinaagi sa mga pagtulun-an sa Iyang mga propeta ug pinaagi sa Iyang personal nga pangalagad, si Jesus mitudlo kanato sa plano sa kaluwasan. Kini nga plano naglakip sa Paglalang, ang katuyoan sa kinabuhi, ang panginahanglan sa oposisyon, ug sa gasa sa kabubut-on. Mitudlo usab siya kanato sa mga sugo ug mga pakigsaad nga kinahanglan natong tumanon ug mga ordinansa nga kinahanglan natong masinati aron sa pagdala kanato og balik ngadto sa atong langitnong mga ginikanan.
Sa Biblia, mabasa nato ang Iyang panudlo, “Ako mao ang kahayag sa kalibotan. Ang mosunod kanako dili gayod maglakaw diha sa kangitngit kondili makabaton hinuon sa kahayag sa kinabuhi” (Juan 8:12). Ug sa modernong pagpadayag, atong mabasa, “Tan-awa, ako mao si Jesukristo, … usa ka kahayag nga dili matago sa kangitngit” (Doktrina ug mga Pakigsaad 14:9). Kon kita mosunod sa Iyang mga pagtulun-an, Siya modan-ag sa atong agianan niining kinabuhia ug nagsiguro sa atong padulngan sa sunod.
Tungod kay Siya nahigugma kanato, Siya mihagit kanato sa pagpunting ngadto Kaniya imbis sa mga butang niining mortal nga kalibotan. Sa Iyang talagsaong wali sa pan nga naghatag sa kinabuhi, si Jesus mitudlo nga kinahanglang dili kita usa niadtong kinsa labing nadani sa mga butang sa kalibotan—mga butang nga makapatunhay sa kinabuhi dinhi sa yuta apan dili makapalambo og kinabuhing dayon.5 Samtang si Jesus balik-balik nga midapit kanato nga, “Sunod kanako.”6
IV.
Sa katapusan, ang Basahon ni Mormon nagtudlo nga isip kabahin sa Iyang Pag-ula si Jesukristo “[m]ag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan” (Alma 7:11).
Nganong ang atong Manluluwas nag-antus man niining mga mortal nga mga kalisod “sa matag matang”? Si Alma mipasabot, “Ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masay[o]d sumala sa unod unsaon pagtabang [nagpasabot nga mohatag og kahupayan o abag ngadto] sa iyang mga katawhan sumala sa ilang mga kahuyang” (Alma 7:12).
Ang atong Manluluwas mibati ug nasayod sa atong mga tentasyon, atong mga panlimbasog, sa atong mga kasakit, ug sa atong mga pag-antus, kay Siya andam nga misinati niining tanan isip kabahin sa Iyang Pag-ula. Ang ubang mga kasulatan nagpamatuod niini. Ang Bag-ong Tugon namahayag, “Ug tungod kay nag-antos man siya ug gitintal, makatabang usab siya kanila nga gitintal” (Mga Hebreo 2:18). Si Isaias mitudlo, “Ayaw kahadlok; kay mag-uban ako kanimo: … lig-onon ug tabangan ko ikaw” (Isaias 41:10). Ang tanang nag-antos sa bisan unsa nga matang sa mortal nga kahuyang kinahanglang mahinumdom nga ang atong Manluluwas nakasinati usab niining matang sa sakit, ug pinaagi sa Iyang Pag-ula, Siya nagtanyag sa matag usa kanato sa kalig-on aron mapas-an kini.
Si Propeta Joseph Smith mipamubo niining tanan diha sa atong ikatulo nga artikulo sa hugot nga pagtuo: “Kami nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo.”
“Unsa ang nabuhat ni Jesukristo alang kanako?” kadto nga sister nangutana. Ubos sa plano sa atong Langitnong Amahan, Siya “milalang sa mga langit ug yuta” (Doktrina ug mga Pakigsaad 14:9) aron nga ang matag usa kanato makabaton og mortal nga kasinatian nga gikinahanglan sa pagkaplag sa atong balaang kapalaran. Isip kabahin sa plano sa Amahan, ang Pagkabanhaw ni Jesukristo mibuntog sa kamatayon aron sa pagsiguro sa imortalidad sa matag usa kanato. Ang maulaong sakripisyo ni Jesukristo mihatag sa matag usa kanato sa oportunidad sa paghinulsol sa atong mga sala ug mobalik nga putli ngadto sa atong langitnong panimalay. Ang Iyang mga sugo ug mga pakigsaad nagpakita kanato sa agianan, ug ang Iyang pagkapari naghatag sa katungod sa pagpahigayon sa mga ordinansa nga gikinahanglan aron makab-ot kana nga padulngan. Ug ang atong Manluluwas andam nga misinati sa tanang mortal nga kasakit ug mga kahuyang nga Siya masayod kon unsaon pagpalig-on kanato diha sa atong mga kasakit.
Si Jesukristo mibuhat niining tanan tungod kay Siya nahigugma sa tanang mga anak sa Dios. Ang gugma mao ang hinungdan niining tanan, ug kini mao gikan pa sa sinugdanan. Ang Dios misulti kanato sa modernong pagpadayag nga “siya ang naglalang sa … lalaki ug babaye, sumala sa iyang kaugalingong panagway …; ug naghatag ngadto kanila og mga sugo nga sila maghigugma ug mag-alagad kaniya” (Doktrina ug mga Pakigsaad 20:18–19).
Ako mopamatuod niining tanan ug nag-ampo nga kitang tanan mahinumdom unsay nahimo sa atong Manluluwas alang sa matag usa kanato ug nga kita mohigugma ug moalagad Kaniya, sa ngalan ni Jesukristo, amen.