Elder S. Mark Palmer

Kapangulohan sa Seventy

Si Elder S. Mark Palmer hangtod sa hangtod nga mapasalamaton sa kalipay ug paglaom nga iyang nakaplagan diha sa pagserbisyo ug sa mga ordinansa sa templo. Usa ka calling nga moserbisyo kada semana sa Templo sa Dallas Texas uban sa iyang asawa, si Jacqueline, atol sa usa sa pinaka-busy nga mga panahon sa ilang kinabuhi nakatabang ni Elder Palmer sa paghan-ay sa iyang mga prayoridad. Ang pagserbisyo sa templo nagtudlo kaniya sa pagsakripisyo, pagplano, ug pagbalanse ug nagtabang kaniya sa paghinumdom sa iyang mga pakigsaad ug mamahimong usa ka mas maayo nga bana ug amahan. Ang pagserbisyo sa templo nagpahinumdom kaniya mahitungod sa mahangturon nga kinaiyahan sa pamilya ug sa umaabot nga malipayong panagkita sa mitaliwan nang mga minahal sa kinabuhi, lakip na sa usa ka igsoon nga babaye nga namatay nga usa ka tuig pa ang pangidaron.

Ang pagserbisyo sa templo nakatabang usab ni Elder Palmer nga maandam sa espirituhanong paagi alang sa umaabot nga mga calling sa pagkapari, lakip na isip usa ka sakop sa Kapangulohan sa Seventy. Si Elder Palmer, nga gipaluyohan niadtong Abril 3, 2021, magsugod sa bag-o niyang mga responsibilidad karong Agosto 1, 2021.

Si Stanley Mark Palmer natawo niadtong Pebrero 11, 1956, sa Te Puke, Bay of Plenty, New Zealand, ngadto nila ni Kenneth ug Jill Palmer. Ang iyang pamilya mipasakop sa Simbahan sa bata pa siya.

Human makaserbisyo og full-time nga misyon sa New Zealand Wellington Mission, nakaangkon siya og degree nga bachelor of commerce sa University of Auckland niadtong 1979 ug usa ka master of business administration sa Brigham Young University niadtong 1982. Samtang nagpuyo sa Provo, Utah, USA, nakahimamat siya og usa ka nauli na nga misyonaryo nga ginganlan og Jacqueline Wood. Naminyo sila niadtong 1981 didto sa Templo sa Salt Lake. Ang mga Palmer adunay 6 ka anak ug 16 ka apo.

Si Elder Palmer presidente sa SMP Ventures, usa ka kompanya sa real estate development nga iyang napundar sa Austin, Texas, USA. Nakaserbisyo siya isip bishop, presidente sa stake, presidente sa Washington Spokane Mission (2009–12), temporaryo nga presidente sa Australia Sydney South Mission (2014), ug Area Seventy.

Gipaluyohan siya isip Kinatibuk-ang Awtoridad nga Seventy niadtong Abril 2, 2016, ug kasamtangan nga nagserbisyo isip presidente sa Africa South Area.