Lawak sa Balay Abotanan

Ni Elder Gerrit W. Gong

Sa Korum sa Napulog Duha ka mga Apostoles

Minahal nga kaigsoonan, bisan namatay na siya 20 ka tuig ang milabay, adunay mga higayon nga mingawon ko sa akong amahan. Ang Pasko sa Pagkabanhaw nagsaad nga makita nako siya og balik.

Samtang nag-eskwela ko sa graduate school didto sa England, mibisita ang akong amahan. Ang iyang kasingkasing sa pagka-amahan nasayod nga gimingaw ko sa panimalay.

Ang akong amahan ganahan og panimpalad [adventure] gawas sa pagkaon. Bisan sa France, nga nailhan sa lamian nga pagkaon niini, moingon siya, “Mangaon kita og pagkaon sa Intsik.” Usa ka patriyarka nga dugayng nagserbisyo sa Simbahan, ang akong amahan espirituhanon ug manggiloloy-on kaayo. Usa ka gabii, samtang ang sakyanan nga pang-emerhensiya uban sa kusog nga pagsirena paspas nga nagdagan sa Paris, siya miingon, “Gerrit, kana nga mga hilak [wangwang] mao ang mga samad sa siyudad.”

Niana nga pagbiyahe, gibati nako ang laing mga hilak ug mga samad. Usa ka batan-ong babaye naninda og ice cream gikan sa gamayng kariton. Ang iyang mga apa [cone] gamay ra nga usa ra ka scoop sa ice cream ang masulod. Sa pipila ka rason, ang usa ka dakong lalaki mikompronta sa batan-ong babaye. Nagsiyagit ug nanukmod, gitumba niya ang kariton sa batan-ong babaye, ang mga apa sa ice cream nayabo. Wala koy mahimo samtang gitunob-tunoban niya ang mga apa sa iyang botas. Makita pa gihapon nako ang batan-ong babaye nga nakaluhod sa karsada, misulay sa pagsalbar sa mga piraso sa nakupog niyang mga apa, ang mga luha sa kasubo midagayday sa iyang nawong. Ang iyang panagway naghasol kanako, usa ka pahinumdom sa dili mabination, walay pakabana, dili pagsinabtanay nga sagad usab natong ipahamtang sa usag usa.

Sa laing kahaponon, duol sa Paris, ang akong amahan ug ako mibisita sa usa ka nindot nga katedral sa Chartres. Si Malcolm Miller,¹ usa ka eksperto sa kalibotan bahin sa katedral, mipasabot sa tulo ka hugpong sa stained-glass nga mga bintana sa Chartres. Miingon siya nga kini adunay sugilanon.

Ang unang mga bintana nagpakita nila ni Adan ug ni Eva nga mibiya sa Tanaman sa Eden.

Ang ikaduha nag-asoy sa sambingay bahin sa maayong Samarianhon.

Ang ikatulo naghulagway sa Ikaduhang Pag-anhi sa Ginoo.

Kon hiusahon, kining stained-glass nga mga bintana mahimong maghulagway sa atong mahangturong panaw. Nagdapit kini kanato sa pag-abi-abi sa tanan nga adunay lawak sa Iyang balay abotanan.²

Sama ni Adan ug ni Eva, mianhi kita sa kalibotan nga puno sa mga sampinit ug mga sagbot.³

Sa atong abogon nga mga dalan paingon sa Jericho, kita gidagmalan, gisamaran, ug gibiyaan diha sa kasakit.⁴

Bisan kon kinahanglan kita nga magtinabangay sa usag usa, kasagaran motipas kita sa pikas bahin sa dalan, tungod sa bisan unsa nga rason.

Hinoon, uban sa kalooy, ang Maayong Samarianhon mohunong ug mohunad sa atong mga samad gamit ang bino ug lana. Mga simbolo sa sakramento ug sa ubang mga ordinansa, ang bino ug lana mopunting kanato ngadto sa espirituhanong pagkaayo diha ni Jesukristo.⁵ Ang Maayong Samarianhon nagpasakay kanato sa Iyang kaugalingong asno o, sa pipila ka asoy sa stained-glass, nagpas-an kanato sa Iyang mga abaga. Siya nagdala kanato sa balay nga abotanan, nga mahimong magrepresentar sa Iyang Simbahan. Sa Balay Abotanan, ang Maayong Samarianhon nag-ingon, “Atimana siya; … inigbalik nako dinhi, bayran ko ikaw sa imong magasto.”⁶ Ang Maayong Samarianhon, usa ka simbolo sa atong Manluluwas, nagsaad nga mobalik, niining higayona diha sa kaharianon ug himaya.

Niining panahon sa Pasko sa Pagkabanhaw, si Jesukristo nagdapit kanato nga mahimong sama Niya, usa ka maayong Samarianhon, sa paghimo sa Iyang Balay Abotanan (Iyang Simbahan) nga usa ka dangpanan alang sa tanan gikan sa mga kasakit ug mga unos sa kinabuhi.⁷ Nangandam kita sa Iyang gisaad nga Ikaduhang Pag-anhi kon sa matag adlaw maghimo kita ngadto sa “usa sa labing ubos niini”⁸ sama sa atong himoon ngadto Kaniya. “Ang usa sa labing ubos niini” mao ang matag usa nato.

Sa atong pag-adto uban sa Maayong Samarianhon ngadto sa Balay Abotanan, kita makakat-on og lima ka butang mahitungod ni Jesukristo ug sa atong kaugalingon.

Una, moadto kita sa Balay Abotanan kon unsa kita, uban sa mga sayop ug pagkadili hingpit nga anaa kanatong tanan. Apan ang matag usa kanato adunay butang nga kinahanglang itampo. Ang atong panaw paingon sa Dios kasagaran makaplagan nga manag-uban. Kita nahisakop isip usa ka nahiusa nga komunidad—sa pag-atubang man sa mga pandemya, mga bagyo, mga sunog sa kalasangan, mga huwaw, o hilom nga pagsagubang sa inadlaw-adlaw nga mga panginahanglan. Makadawat kita og inspirasyon kon kita magtinambagay, maminaw ngadto sa matag tawo, lakip na sa matag sister, ug ngadto sa Espiritu.

Kon ang atong kasingkasing mausab ug makadawat kita sa Iyang imahe sa atong panagway,⁹ kita makakita Niya ug sa atong kaugalingon diha sa Simbahan. Diha Niya, kita makakaplag og katin-awan, dili kagubot. Diha Niya, atong makaplagan ang katuyoan sa paghimo og maayo, hinungdan nga magmahimong maayo, ug naglambo nga kapasidad nga mahimong mas maayo. Diha Niya, atong madiskobrehan ang makanunayon nga hugot nga pagtuo, makapalingkawas nga pagkadili hakog, adunay pagpakabana nga kausaban, ug pagsalig sa Dios. Diha sa Iyang Balay Abotanan, atong makaplagan ug mapalambo ang atong personal nga relasyon ngadto sa Dios, ang atong Amahan, ug ni Jesukristo.

Siya misalig nato sa pagtabang nga himoon ang Balay Abotanan nga lugar nga gikinahanglan Niya nga kini mamahimo. Samtang kita motanyag sa atong mga talento ug labing maayo nga mga paningkamot, ang Iyang espirituhanong mga gasa molig-on ug mopanalangin usab.¹⁰

Usa ka interpreter sa pinulongan nga Kinatsila miingon nako, “Elder Gong, pinaagi sa Espiritu kahibalo ko unsa ang imong isulti aron akong hubaron,” kining matinud-anong brother miingon, “pinaagi sa gasa sa paghubad sa pinulongan.”

Ang mga gasa sa hugot nga pagtuo ug kasiguroan moabot, makita sa lahi nga paagi ug diha sa managlahing mga sitwasyon. Usa ka minahal nga sister nakadawat og espirituhanong kahupayan sa dihang ang iyang bana namatay tungod sa COVID-19. Siya miingon, “Nasayod ko nga ang akong minahal nga bana ug ako mag-uban pag-usab.” Sa lahi nga sitwasyon sa COVID, ang laing minahal nga sister miingon, “Mibati ko nga kinahanglan kong mangaliyupo sa Ginoo ug sa mga doktor nga hatagan ang akong bana og bisan gamay lang nga panahon.”

Ikaduha, Siya mihangyo nato nga himoon ang Iyang Balay Abotanan nga dapit sa grasya ug luna, diin ang matag usa makapundok, nga adunay luna ang tanan. Isip mga disipulo ni Jesukristo, ang tanan managsama, nga walay ikaduhang klase nga mga grupo.

Ang tanan giabi-abi sa pagtambong sa mga panagtigom alang sa sakramento, sa ubang mga miting sa Dominggo, ug sosyal nga mga kalihokan.¹¹ Kita mosimba nga may balaang pagtahod sa atong Manluluwas, mahunahunaon ug mokonsiderar sa usag usa. Kita motan-aw ug moila sa matag tawo. Kita mopahiyom, motupad niadtong nag-inusara, makig-ilaila, lakip na sa bag-ong mga kinabig, bag-ong mibalik og simba nga kaigsoonan, mga batan-ong babaye ug mga batan-ong lalaki, matag minahal nga bata sa Primary.

Maghunahuna sa atong kaugalingon nga anaa sa ilang dapit, kita moabi-abi sa mga higala, mga bisita, mga bag-ong mibalhin, mga indibidwal nga nagkapuliki sa pag-atiman sa daghan kaayong buluhaton. Kita magbangutan, maglipay, ug maanaa alang sa usag usa. Kon kita mapakyas sa pagkab-ot sa atong mga gimithi ug madalidalion, wala masayod, mahukmanon, o adunay gipihigan, mangayo kita og pasaylo sa usag usa ug mohimo og mas maayo.

Usa ka pamilya sa Africa nga nagpuyo na karon sa Estados Unidos miingon, “Gikan sa unang adlaw, ang mga miyembro sa Simbahan mahigalaon ug maabiabihon. Ang tanan mipabati kanamo nga komportable. Walay mipakaubos kanamo.” Ang amahan miingon, “Ang Balaang Biblia nagtudlo nga ang mga bunga sa ebanghelyo nagagikan sa mga gamot sa ebanghelyo.” “Ug ang mga misyonaryo,” ang amahan ug ang inahan miingon, “gusto namo nga ang among anak nga lalaki ug babaye magtubo sama nianang mga misyonaryo.” Mga kaigsoonan, hinaot nga ang matag usa kanato mainitong moabi-abi sa tanan ngadto sa Iyang Balay Abotanan.

Ikatulo, sa Iyang Balay Abotanan atong makat-onan nga ang pagkahingpit anaa kang Jesukristo, dili sa pagkahingpit nga gipakita sa kalibotan. Dili tinuod ug dili praktikal, ang “insta-perfect” sa kalibotan nga gi-filter nga pagkahingpit mopabati kanato nga dili igo, gikontrolar sa mga swipe, mga like, o mga double tap. Sa laing bahin, ang atong Manluluwas, nga si Jesukristo, nasayod sa tanang butang mahitungod kanato nga dili nato gustong masayran sa uban, ug Siya nahigugma gihapon kanato. Ang Iyang ebanghelyo mao ang ebanghelyo alang sa ikaduha ug ikatulo nga kahigayonan, nga nahimong posible pinaagi sa Iyang maulaong sakripisyo.¹² Siya nagdapit sa matag usa kanato nga mahimong maayong Samarianhon, minosan ang pagkamahukmanon ug mas mapasayloon sa atong kaugalingon ug sa usag usa, gani mas maningkamot kita og maayo sa pagsunod sa Iyang mga sugo.

Atong gitabangan ang atong kaugalingon kon kita magtinabangay sa usag usa. Usa ka pamilya nga akong nailhan nagpuyo duol sa karsada nga daghang moagi nga sakyanan. Ang mga nagbiyahe sagad mohunong aron mangayo og tabang. Usa ka sayo sa buntag ang pamilya nakadungog og kusog nga toktok sa ilang pultahan. Gikapoy ug nabalaka kon kinsa kadto nga alas 2:00 sa kadlawon pa man, naghunahuna sila nga bisan kini lang, adunay laing tawo nga makatabang. Samtang nagpadayon ang pagpanoktok, nadungog nila, “Sunog—adunay sunog sa luyo sa inyong balay!” Ang mga maayong Samarianhon magtinabangay.

Ikaupat, sa Iyang Balay Abotanan, kita nahimong kabahin sa usa ka komunidad sa ebanghelyo nga nakasentro ni Jesukristo, nakaangkla sa gipahiuli nga kamatuoran, buhi nga mga propeta ug mga apostoles, ug sa laing tugon ni Jesukristo—ang Basahon ni Mormon. Siya modala kanato ngadto sa Iyang Balay Abotanan ug ngadto usab sa Iyang balay—ang balaang templo. Ang balay sa Ginoo mao ang usa ka dapit diin, sama sa samaran nga tawo diha sa dalan paingon sa Jericho, ang Maayong Samarianhon makalimpyo ug makasul-ob og sapot kanato, makaandam kanato nga makabalik ngadto sa presensya sa Dios, ug makahiusa kanato sa mahangturong paagi diha sa pamilya sa Dios. Ang Iyang mga templo abli alang sa tanan kinsa nagsunod sa Iyang ebanghelyo uban sa hugot nga pagtuo ug pagkamasulundon.

Ang kalipay nga bation sulod sa templo naglakip sa pagkahiusa sa ebanghelyo taliwala sa managlahing mga kabilin, mga kultura, mga pinulongan, ug mga henerasyon. Sa groundbreaking sa Templo sa Taylorsville Utah, ang 17 anyos nga si Max Harker mipaambit og usa ka panulundon sa hugot nga pagtuo sa pamilya nga nagsugod unom ka henerasyon na ang milabay pinaagi sa iyang kalolo-lolohan nga si Joseph Harker ug sa iyang asawa, si Susannah Sneath. Sa gipahiuli nga ebanghelyo ni Jesukristo, matag usa kanato mahimong usa ka lig-ong sumpay sa mga henerasyon sa atong pamilya.

Ang kataposan, ikalima, maglipay kita nga ang Dios nahigugma sa Iyang mga anak sa atong managlahi nga mga kagikan ug mga kahimtang, sa matag nasod, kaliwatan, ug pinulongan, nga adunay lawak alang sa tanan diha sa Iyang Balay Abotanan.

Sulod sa miaging 40 ka tuig, ang mga miyembro sa Simbahan nagkadaghan na sa tanang bahin sa kalibotan. Sukad niadtong 1998, mas daghang miyembro ang nagpuyo sa gawas kay sa sulod sa Estados Unidos ug Canada. Sa 2025, gipaabot nato nga ingon ka daghan ang mga miyembro sa Simbahan nga nagpuyo sa Latin America sama sa Estados Unidos ug Canada. Ang pagpundok sa matinud-anong kaliwatan ni Amahang Lehi usa ka katumanan sa panagna. Ang matinud-anong mga Santos, lakip na ang mga dapit nga gipuy-an sa mga pioneer, nagpabiling usa ka tinubdan sa debosyon ug serbisyo alang sa tibuok kalibotan nga Simbahan.

Usab, ang kadaghanan sa hamtong nga mga miyembro sa Simbahan karon wala maminyo, nabalo, o diborsyado. Usa kini ka mahinungdanong kausaban. Naglakip kini og sobra sa katunga sa atong mga sister sa Relief Society ug sobra sa katunga sa atong hamtong nga mga brother nga naghupot sa pagkapari. Kining demograpikanhong sumbanan mao ang nahitabo sa tibuok kalibotan nga Simbahan sukad niadtong 1992 ug sa Simbahan sa Estados Unidos ug Canada sukad niadtong 2019.

Ang atong kahimtang sa atubangan sa Ginoo ug sa Iyang Simbahan dili usa ka butang nga may kalabotan sa kahimtang sa kaminyoon apan mahitungod kini sa atong pagkamatinud-anon ug pagkamaisugon nga mga disipulo ni Jesukristo.¹³ Ang mga hamtong gusto nga tan-awon isip mga hamtong ug mahimong responsable ug makatampo isip mga hamtong. Ang mga disipulo ni Jesukristo nagagikan sa tanang dapit, diha sa tanang porma, gidak-on, kolor, ug edad, ang matag usa adunay mga talento, matarong nga mga tinguha, ug halapad nga mga kapasidad sa pagpanalangin ug pagserbisyo. Nagtinguha kita sa matag adlaw nga mosunod ni Jesukristo uban sa hugot nga pagtuo ngadto sa paghinulsol¹⁴ ug malungtarong kalipay.

Atol niining kinabuhia, kita usahay maghulat sa Ginoo. Kita mahimong wala pa maabot sa dapit nga atong gilaoman ug gipangandoy sa umaabot. Usa ka mapahinungoron nga sister miingon, “Ang matinud-anong paghulat sa Ginoo alang sa Iyang mga panalangin usa ka balaang paagi sa pagpuyo. Dili kini angayng tan-awon nga kinalooy, pagpataas, o paghukom apan pinaagi sa sagradong pagtahod.”¹⁵ Sa pagkakaron, nagpakabuhi kita, nga wala maghulat nga magsugod ang kinabuhi.

Si Isaias misaad, “Kadtong nagahulat sa Ginoo magabag-o sa ilang kusog; sila manlupad pinaagi sa mga pako ingon sa mga agila; sila manalagan, ug dili makapuyan; sila manlakaw, ug dili mangaluya.”¹⁶

Ang atong Maayong Samarianhon nagsaad nga mobalik. Ang mga milagro mahitabo kon kita mag-atimanay sa usag usa sama sa Iyang buhaton. Kon kita moduol uban sa masulub-on nga mga kasingkasing ug mahinulsulon nga mga espiritu,¹⁷ makakaplag kita og tingog diha ni Jesukristo ug gakson diha sa Iyang masinabtunon nga mga bukton sa kaluwasan.¹⁸ Ang sagrado nga mga ordinansa nagtanyag og pakigsaad nga mahisakop ug “ang gah[o]m sa pagkadiosnon”¹⁹ sa pagbalaan sa gitinguha ug gibuhat. Pinaagi sa Iyang mahigugmaon nga kalooy ug pagkamainantoson, ang Iyang Simbahan mahimong atong Balay Abotanan.

Samtang maghimo kita og lawak sa Iyang Balay Abotanan, moabi-abi sa tanan, ang atong Maayong Samarianhon makaayo kanato diha sa atong abogon nga mga dalan sa kinabuhi. Uban sa hingpit nga gugma, ang atong Amahan ug ang Iyang Anak, si Jesukristo, nagsaad og “kalinaw niini nga kalib[o]tan, ug kinabuhi nga dayon diha sa kalib[o]tan nga umaab[o]t”²⁰—“nga hain ako anaa usab kamo.”²¹ Ako mapasalamaton kaayo nga mosaksi ug mopamatuod sa sagrado ug balaan nga ngalan ni Jesukristo, amen.