Mahimong Kalipay ang Atong Kaguol
Modapit ako sa tanan kinsa mibati og kasubo, sa tanan nga naglibog kon unsay mahitabo human kita mamatay, sa pagpahimutang sa inyong hugot nga pagtuo diha kang Kristo.
Daghang tuig nang milabay, samtang nagtambong og mga miting sa Siyudad sa Salt Lake, gitimbaya ako sa atong pinalanggang propeta, si Russel M. Nelson. Sa iyang kasagaran mainiton ug personal nga paagi, nangutana siya, “Mark, kumusta ang imong mama?”
Giingnan nako siya nga gikauban nako siya sayo nianang semanaha sa iyang balay sa New Zealand ug nagkatigulang na siya apan puno sa hugot nga pagtuo ug inspirasyon ngadto sa tanan nga nakaila kaniya.
Dayon miingon siya, “Palihog ipaabot ngadto niya ang akong gugma” … ug ingna siya nga nanghinaot ko nga makakita kaniya pag-usab.”
Nakalitan ko ug nangutana, “Duna ka bay giplano nga biyahe ngadto sa New Zealand?”
Sa sinserong panghunahuna mitubag siya, “Ah wala, makita unya nako siya sa sunod nga kinabuhi.”
Dili tiaw-tiaw ang iyang tubag. Usa kadto ka hingpit nga natural nga pagpahayag sa kamatuoran. Nianang pribado, wala dahoma nga gutlo, akong nadungog ug gibati ang lunsayng pagpamatuod gikan sa buhing propeta nga ang kinabuhi magpadayon human sa kamatayon.
Niining katapusang semana nga komperensiya madungog ninyo ang buhing mga apostoles ug mga propeta nga mopamatuod sa Pagkabanhaw ni Jesukristo. “Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa katulong adlaw[;] … ang ubang mga butang nga may kalabutan sa atong relihiyon sumpay lamang [niini nga kamatuoran].”1 Mosaad ko nga kon kamo maminaw uban sa tinuod nga katuyoan, ang Espiritu mokumpirma diha sa inyong hunahuna ug sa inyong kasingkasing sa kamatuoran niini nga mga pagpamatuod.2
Ang karaang mga Apostol ni Jesus nausab sa hangtod dihang Siya mipakita kanila human sa Iyang pagkamatay. Napulo kanila nakakita mismo nga Siya nabanhaw. Si Tomas, nga sa una wala didto, mipahayag, “Gawas kon makakita ko … , dili gayud ako motuo.”3 Sa wala madugay si Jesus mipahimangno ni Tomas, “Ayaw na nianang pagkadili matinuohon, hinonoa magmatinuohon ka.”4 Dayon ang Ginoo mitudlo sa mahinungdanong tahas sa hugot nga pagtuo: “Dalaygon kadtong wala managpakakita, ngani nanagpanoo.”5
Ang nabanhaw nga Ginoo misugo sa Iyang mga Apostoles sa pagpamatuod mahitungod Kaniya. Sama sa atong buhi nga mga Apostoles karon, gibiyaan nila ang kalibutanong mga trabahoon ug migahin sa nahibilin sa ilang kinabuhi nga walay lipud-lipod sa pagpahayag nga ang Dios mibanhaw niini nga Jesus. Ang ilang puno sa gahom nga mga pagpamatuod misangpot sa liboan nga midawat sa pagdapit nga mabunyagan.6
Ang mahimayaong mensahe mahitungod sa buntag sa Pagkabanhaw maoy mahinungdanon sa tibuok Kristiyanidad. Si Jesukristo mibangon gikan sa pagkamatay, ug tungod niini, kita usab mabuhi pag-usab human kita mamatay. Kini nga kahibalo naghatag og kahulogan ug katuyoan sa atong kinabuhi. Kon kita magpadayon uban sa hugot nga pagtuo, kita mausab hangtod sa hangtod, sama sa mga Apostoles sa karaan. Kita, sama nila, makalahutay sa bisan unsang mga kalisod uban sa hugot nga pagtuo kang Jesukristo. Kini nga hugot nga pagtuo maghatag usab og paglaom sa higayon nga “mahimong kalipay ang atong kaguol.”7
Ang akong kaugalingon nga hugot nga pagtuo adunay mga sinugdanan human sa kasubo.
Ang akong mga ginikanan tigpamuhi og mga karnero sa New Zealand.8 Nalingaw sila sa ilang kinabuhi. Sa bag-o pa silang naminyo, gipanalanginan sila og tulo ka anak nga babaye. Ang kinamanghoran niini ginganlan og Ann. Usa ka adlaw samtang naglingawlingaw sila sa usa ka linaw, ang 17 ka bulan nga si Ann nawala dihang naglakaw-lakaw. Human sa mga minutos nga walay kahimoang pagpangita, nakit-an siyang patay na diha sa tubig.
Kining masulub-ong hitabo nagmugna og dili matukib nga kasubo. Si Papa misulat paglabay sa katuigan nga ang hudyaka nawala sa ilang kinabuhi sa hangtod. Misangpot usab kini sa pagtinguha og mga tubag sa pinakaimportanting mga pangutana sa kinabuhi: Unsay mahitabo sa among pinalangga kaayong si Ann? Makita ba namo siya pag-usab? Sa unsang paagi ang among pamilya magmalipayon pag-usab?
Pipila ka tuig human niini nga trahedya, duha ka batan-ong misyonaryo gikan sa Ang Simbahan ni Jesukristo sa mga Santos sa Ulahing mga Adlaw miadto sa among umahan. Nagsugod sila sa pagtudlo sa mga kamatuoran nga makita sa Basahon ni Mormon ug sa Biblia. Kini nga mga kamatuoran naglakip sa kasiguroan nga si Ann karon nagpuyo sa kalibotan sa espiritu. Tungod sa Pagkabanhaw ni Jesukristo, siya usab mabanhaw. Ilang gitudlo nga ang Simbahan ni Jesukristo sa makausa gipahiuli sa yuta nga adunay buhing propeta ug dose ka Apostol. Ug gitudlo nila ang lahi ug talagsaong doktrina nga ang mga pamilya mabugkos sa kahangtoran pinaagi sa mao gihapon nga awtoridad sa pagkapari nga gihatag ni Jesukristo ngadto sa Iyang pangunang Apostol, nga si Pedro.9
Diha dayon namatikdan ni Mama ang kamatuoran ug nakadawat og pagsaksi sa Espiritu. Si Papa, hinoon, nakigbisog pa hangtod sa sunod nga tuig tali sa pagduhaduha ug sa espiritwal nga mga pag-aghat. Usab, nagpanuko siya sa pag-usab sa naandan niyang pagpakabuhi. Usa ka buntag human sa gabii nga dili makatulog, samtang naglakaw-lakaw sa salog, miadto siya ni Mama ug miingon, “Magpabunyag ko karon o kon di man gani dili na lang.”
Giingnan ni mama ang mga misyonaryo unsay nahitabo, ug diha dayon ilang namatikdan ang kidlap sa hugot nga pagtuo diha sa akong amahan nga karon pweding mosiga o mapalong.
Niana gayod nga buntag ang among pamilya mibiyahe ngadto sa kinadul-an nga baybayon. Wala masayud unsay nanghitabo, kaming mga anak nag-picnic sa balas sa baybayon samtang si Elder Boyd Green ug Gary Sheffield midala sa among mga ginikanan ngadto sa dagat ug mibunyag kanila. Diha sa dugang lihok sa hugot nga pagtuo, si Papa sa pribadong paagi misaad ngadto sa Ginoo nga bisan unsay mahitabo, siya magmatinud-anon sa tibuok niyang kinabuhi ngadto sa mga saad nga iyang gihimo.
Usa ka tuig ang milabay ang templo sa Hamilton, New Zealand gipahinungod. Sa wala madugay human niana ang among pamilya, uban sa usa ka tawo nga nagrepresentar kang Ann, miluhod libot sa altar nianang sagrado nga balay sa Ginoo. Didto, pinaagi sa awtoridad sa pagkapari, kami nahiusa isip usa ka mahangturon nga pamilya nianang usa ka yano ug matahom nga ordinansa. Nagdala kini og talagsaong kalinaw ug kalipay.
Daghang tuig human niadto giingnan ko ni Papa nga kon dili pa tungod sa sakit nga pagkamatay ni Ann, dili gayod siya ingon niana ka mapaubsanon nga modawat sa gipahiuli nga ebanghelyo. Hinoon ang Espiritu sa Ginoo misilsil og paglaom nga unsay gitudlo sa mga misyonaryo tinuod. Ang hugot nga pagtuo sa akong mga ginikanan padayon nga mitubo hangtod nga midilaab diha nilang duha ang kalayo sa pagpamatuod nga hilom ug mapaubsanong naggiya sa ilang matag desisyon sa kinabuhi.
Kanunay akong mapasalamaton sa ehemplo sa akong mga ginikanan alang sa umaabot nga mga henerasyon. Lisod ang pagsukod sa gidaghanon sa kinabuhi nga nausab sa hangtod tungod sa ilang mga buhat sa hugot nga pagtuo agig tubag sa hilabihan nga kasubo.
Modapit ako sa tanan nga mibati og kasubo, sa tanan nga nagkigbisog sa pagduhaduha, sa tanan nga naglibog kon unsay mahitabo human kita mamatay, sa pagpahimutang sa inyong hugot nga pagtuo diha kang Kristo. Mosaad ko nga kon kamo magtinguha nga motuo, dayon molihok inubanan sa hugot nga pagtuo ug mosunod sa mga pag-aghat sa Espiritu, makakaplag kamo og kalipay niining kinabuhia ug sa kalibotan nga moabot.
Mahinamon kaayo ako nga nagpaabot sa adlaw nga akong mahimamat ang akong igsoong si Ann. Mahinamon ako nga nagpaabot sa malipayong panagpundok uban sa akong amahan, kinsa namatay kapin na sa 30 ka tuig ang milabay. Mopamatuod ako sa kalipay nga makaplagan pinaagi sa pagpakabuhi uban sa hugot nga pagtuo, magatuo bisan wala makakita, apan nahibalo pinaagi sa gahom sa Espiritu Santo nga si Jesukristo buhi. Uban sa akong tibuok kasingkasing ug kalag, ako mopili sa pagsunod ni Jesukristo ug sa Iyang gipahiuli nga ebanghelyo. Kini mipanalangin sa matag aspeto sa akong kinabuhi. Nasayod ako nga si Jesus mao ang Kristo, ang Anak sa Dios, atong Manluluwas ug atong Manunubos. Sa ngalan ni Jesukristo, amen.