Ang Dios Nahigugma sa Iyang mga Anak
Gusto nakong mopaambit og tulo ka piho nga mga paagi nga ang atong Langitnong Amahan mopakita sa Iyang gugma alang kanato, Iyang mga anak.
Mga kaigsoonan, nagmaya ako uban kaninyo sa ebanghelyo ni Kristo. Nagdala ako sa gugma sa lig-on nga mga miyembro sa Pilipinas ug mosulti, alang kanila, Mabuhay!
Niining buntag sa Pasko sa Pagkabanhaw, magpamatuod ko sa buhi nga Kristo, nga Siya mibangon gikan sa patay ug nga ang Iyang gugma alang kanato ug alang sa atong Amahan sa Langit putli ug mahangturon. Karon, gusto nakong tutokan ang gugma sa Langitnong Amahan ug ni Jesukristo alang sa tanan, nga gipakita pinaagi sa Pag-ula ni Jesukristo. “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak” (Juan 3:16).
Sa dihang si propeta Nephi gipangutana sa usa ka anghel mahitungod sa iyang kahibalo sa Dios, si Nephi yano nga mitubag, “Ako nasayod nga siya nahigugma sa iyang mga anak” (tan-awa sa 1 Nephi 11:16–17).
Usa ka bersikulo sa Basahon ni Mormon: Lain nga Tugon ni Jesukristo kusganong mihulagway sa hingpit nga gugma sa Manluluwas: “Ug ang kalibutan, tungod sa ilang kadautan, mohukom kaniya nga usa ka butang nga walay bili; … sila mohampak kaniya, … sila mobunal kaniya, … sila moluwa kaniya, ug siya mag-antus niini, tungod sa iyang mahigugmaon nga pagbati ug sa iyang pagkamainantuson ngadto sa mga katawhan” (1 Nephi 19:9). Ang malukpanong gugma sa Manluluwas mao ang nagdasig nga pwersa luyo sa tanan Niyang ginabuhat. Nasayod kita nga mao kini ang samang gugma sa atong Amahan sa Langit alang kanato, tungod kay ang Manluluwas mapaubsanong mitudlo nga Siya ug ang Amahan “usa ra” (tan-awa sa Juan 10:30; 17:20–23).
Nan, unsaon nato sa pagbalos ug pagpakita sa atong pasalamat alang sa Ilang malukpanong gugma? Ang Manluluwas mitudlo kanato niining yano, naglakip sa tanan nga pagdapit: “Kon nahigugma kamo kanako, tumana ninyo ang akong mga sugo” (Juan 14:15).
Si Presidente Dallin H. Oaks mitudlo, “Ang malukpanon ug hingpit nga gugma sa Dios gipakita diha sa tanang mga panalangin sa Iyang plano sa ebanghelyo, lakip na sa kamatuoran nga ang Iyang labing bililhon nga mga panalangin gitipigan alang niadtong kinsa motuman sa Iyang mga sugo.”1
Gusto nakong mopaambit og tulo ka piho nga mga paagi nga ang atong Langitnong Amahan mopakita sa Iyang gugma alang kanato, Iyang mga anak.
Una, ang mga Relasyon sa Dios ug sa Pamilya Nagpakita sa Iyang Gugma
Ang atong labing bililhon nga mga relasyon mao ang ngadto sa Amahan ug sa Anak ug sa atong kaugalingong mga pamilya tungod kay ang atong mga relasyon ngadto kanila mahangturon. Ang mahinungdanong plano sa kalipay mao ang maanindot nga pagpakita sa gugma sa Dios alang kanato. Kay ang mga mata nakatutok diha sa plano sa Dios, andam kita nga mopili sa pagtangtang sa dili maayong mga parte sulod kanato nga nagsuporta og hakog nga mga tinguha ug ilisan kini og mga pundasyon nga makapalambo og mahangturon nga mga relasyon. Sa usa ka pagsabot, matawag kini og “espirituhanon nga pagkabkab.” Sa paghimo sa atong espirituhanon nga pagkabkab, kinahanglan gayod nga una kitang mangita sa Dios ug mosangpit Kaniya (tan-awa sa Jeremias 29:12–13).
Ang pagpangita Kaniya ug pagsangpit Kaniya mosugod sa proseso ug mohatag og luna sa pag-ugmad ug paglig-on sa atong mahangturon nga mga relasyon. Mopalapad kini sa atong espirituhanong panglantaw ug motabang kanato nga tutokan ang pag-usab sa unsay atong makontrolar kay sa mga kahadlok nga dili nato makontrolar. Ang pagtuon sa kinabuhi ug sa pagpangalagad sa atong Manluluwas, si Jesukristo, makatabang kanato sa pagtan-aw niining ubang mga kabalaka gamit ang mahangturong panglantaw.
Ang makalinga nga mga butang usahay makapugong kanato sa pagsinati sa gugma sa Dios diha sa atong mga relasyon ug mga kalihokan sa pamilya. Usa ka inahan, mibati nga ang elektronik nga mga himan nakadaot na sa relasyon sa iyang pamilya, nakakita og solusyon. Diha sa kan-anan ug sa ubang mga panahon sa pamilya, mosulti lang siya og, “Hiposa ang mga celphone; mag-atubangay ta og istorya.” Miingon siya nga mao kini ang bag-ong normal sa ilang pamilya ug nga nakapalig-on kini sa ilang relasyon isip pamilya kon tinud-anay silang mag-istoryahanay. Malingaw na sila karon sa de-kalidad nga mga diskusyon sa Dali, Sunod Kanako isip pamilya.
Ikaduha, Siya Mipakita sa Iyang Gugma ngadto sa Iyang mga Anak pinaagi sa Pagtawag og mga Propeta
Ang atong kalibotan karon napuno sa “gubat sa mga pulong ug kagubot sa mga opinyon” (Joseph Smith—Kasaysayan 1:10). Si Pablo mipahinumdom kanato nga “dunay nagkalainlaing [tingog] dinhi sa kalibotan” (1 Mga Taga-Corinto 14:10). Hain sa tanang tingog ang klaro ug makahuluganong mopatigbabaw sa kagubot? Kini ang tingog sa mga propeta, mga manalagna, ug mga tigpadayag sa Dios.
Klaro nakong nahinumdoman, human maoperahan niadtong 2018 ug sa pagbalik nako og trabaho, didto ko sa parkinganan sa punoang buhatan sa Simbahan. Sa kalit lang, nadunggan nako ang tingog ni Presidente Russell M. Nelson nga nagtawag, “Taniela, Taniela.” Midagan ko padulong niya, ug nangumusta siya kanako.
Miingon ko, “Naulian na ko, Presidente Nelson.”
Iyaha ko nga gitambagan ug gigakos. Tinud-anay nakong nabati ang personal nga pagpangalagad sa propeta ngadto sa “usa.”
Si Presidente Nelson nakabiyahe ngadto sa daghang kanasoran sa kalibotan. Sa akong hunahuna, wala lang siya mangalagad sa liboan, apan nangalagad siya liboan ka “usa.” Sa pagbuhat niini, iyang gipaambit ang gugma sa Dios alang tanan Niyang mga anak.
Bag-o lang, ang mga pulong ni Presidente Nelson nahimong tinubdan sa kalig-on ug kadasig sa mga tawo sa Pilipinas. Sama sa tanang nasod sa kalibotan, panahon sa 2020 ang Pilipinas grabeng naapektohan sa COVID-19 nga pandemya, ingon man sa pagbuto og bulkan, mga linog, kusog nga mga bagyo, ug makadaot nga mga baha.
Apan sama sa gilis sa kahayag nga milusot sa mga dag-om sa kahadlok, kamingaw, ug kawalay paglaom miabot ang mga pulong sa propeta. Naglakip kini sa panawagan alang sa tibuok kalibotan nga pagpuasa ug pag-ampo ug tambag nga mopadayon bisan sa pandemya. Midapit siya kanato sa paghimo sa atong mga panimalay nga personal nga mga santuwaryo sa hugot nga pagtuo. Nanawagan siya sa mga Santos sa Ulahing mga Adlaw bisan asa sa pagrespeto sa tanang anak sa Dios ug sa pagpatigbabaw sa Dios labaw sa tanan sa atong kinabuhi.2
Sama ka makadasig mao ang bag-ong video sa pagpamatuod ni Presidente Nelson mahitungod sa gahom sa pasalamat ug ang iyang panapos nga pag-ampo, nga milanog sa tibuok Pilipinas.3 Sa probinsiya sa Leyte, ang video gipasalida atol sa usa ka interfaith nga kalihokan, ug gihisgotan usab kini isip parte sa wali sa usa ka pari. Ang Pilipinas, uban sa tibuok kalibotan, napanalanginan pag-ayo nga mobati sa gugma sa Dios pinaagi sa mga pulong sa Iyang pinili nga propeta.
Ikatulo, ang Pagpanton Mahimong usa ka Pagpakita sa Gugma sa Dios alang sa Iyang mga Anak
Usahay ang Dios mopakita sa Iyang gugma pinaagi sa pagpanton kanato. Usa kini ka paagi sa pagpahinumdom kanato nga Siya nahigugma kanato ug nga Siya nakaila kanato. Ang Iyang gisaad nga panalangin sa kalinaw bukas ngadto sa tanan kinsa maisugong naglakaw sa dalan sa pakigsaad ug andam nga modawat og pagkoriher.
Kon nakaamgo kita sa pagpanton ug andam nga modawat, mahimo kining espirituhanon nga pag-opera. Kinsa ba ang ganahan nga maoperahan? Apan alang niadtong nagkinahanglan niini ug andam nga modawat niini, makaluwas kini og kinabuhi. Ang Ginoo mopanton niadtong Iyang gihigugma. Ang mga kasulatan nagsulti kanato niini (tan-awa sa Mga Hebreo 12:5–11; Helaman 12:3; Doktrina ug mga Pakigsaad 1:27; 95:1). Kana nga pagpanton, o espirituhanong pag-opera, magdala sa gikinahanglang kausaban sa atong kinabuhi. Makaamgo kita, mga kaigsoonan, nga kini molunsay ug moputli sa atong kinahiladman.
Si Joseph Smith, ang Propeta sa Pagpahiuli, gipanton. Human mawad-an si Joseph sa 116 ka pahina nga manuskrito sa Basahon ni Mormon, ang Ginoo mikoriher ug mipakita og gugma pinaagi sa pag-ingon: “Ikaw wala unta mahadlok sa tawo labaw pa kay sa Dios. … Ikaw unta nagmatinud-anon. … Tan-awa, ikaw si Joseph, ug ikaw napili. … Hinumdomi, ang Ginoo maloloy-on; busa, paghinulsol” (Doktrina ug mga Pakigsaad 3:7–10).
Niadtong 2016, samtang nagserbisyo og misyon sa Little Rock, Arkansas, akong gihangyo si Brother Cava sa paghatod og package ngadto sa akong magulang nga babaye, kinsa nagpuyo sa usa ka isla sa Fiji. Ang iyang tubag wala gayod nako damha. “Presidente Wakolo,” miagulo siya, “namatay ug gilubong ang imong igsoong babaye 10 na ka adlaw ang milabay.” Nalooy ko sa akong kaugalingon ug nalain pa gani nga ang akong pamilya wala gayod mopahibalo nako.
Sunod adlaw, samtang ang akong asawa nagtudlo og mga misyonaryo, kini nga hunahuna mituhop sa akong kalag: “Taniela, kining tanan nga kasinatian alang sa imong kaayohan ug paglambo. Nagtudlo ug nagpaambit ka sa imong pagpamatuod mahitungod sa Pag-ula ni Jesukristo; karon pagpakabuhi subay niini.” Gipahinumdoman ko nga “Bulahan ang tawo nga badlongon sa Dios! Busa [dili nato] ikasakit kon badlongon … niya” (Job 5:17). Espirituhanon kadto nga pag-opera alang kanako, ug ang resulta diha-diha dayon.
Samtang namalandong ko sa kasinatian, gitawag ko nga mohatag sa akong panapos nga mga hunahuna sa diskusyon. Lakip sa uban pa, akong gipaambit ang mga leksyon nga bag-o lang gitudlo kanako: usa, bag-o lang ko nga gipanton sa Espiritu Santo ug giganahan ko niini tungod kay ako ra usa ang nakadungog niini; ikaduha, tungod sa sakripisyo ug pagtubos sa Manluluwas, dili na ko motawag sa akong mga hagit isip mga pagsulay ug kalisdanan apan isip akong mga kasinatian sa pagkat-on; ug ikatulo, tungod sa Iyang hingpit ug walay sala nga kinabuhi dili na ko motawag sa akong mga kakulangan ug pagkulang sa abilidad isip mga kahuyang apan isip akong mga oportunidad sa paglambo. Kini nga kasinatian mitabang kanako nga masayod nga ang Dios mopanton kanato tungod kay Siya nahigugma kanato.
Ako motapos. Ang atong Mahangturong Amahan ug ang Iyang anak, si Jesukristo, mipakita sa Ilang gugma pinaagi sa paghimong posible kanato nga makaangkon og mahangturong mga relasyon uban Kanila ug sa atong mga sakop sa pamilya, pinaagi sa pagtawag og mga propeta sa bag-ong panahon aron sa pagtudlo ug pagpangalagad kanato, ug pinaagi sa pagpanton kanato aron sa pagtabang kanato nga makat-on ug molambo. “Salamat sa Dios sa dili katupngan nga gasa sa Iyang balaan nga Anak,”4 ang atong nabanhaw nga Ginoo, gani ang buhi nga Kristo. Sa ngalan ni Jesukristo, amen.