Amy A. Wright

Ikaduhang Magtatambag sa Kinatibuk-ang Kapangulohan sa Primary

Lima ka tuig na ang milabay, si Sister Amy A. Wright nahiling nga adunay stage 4 nga kanser sa tagoangkan [ovarian cancer]. Ang bugtong paagi nga gihimo sa iyang pamilya nga makalahutay sa iyang mahulgaon nga mga pagtambal, miingon siya, mao ang pagtutok sa Manluluwas nga si Jesukristo.

“Sa dihang ang tanan nakatutok lang kanako, ang kalibotan nahimo nga labihan ka makapasubo,” nahinumdom siya. “Apan sa dihang ang akong pagtutok nabalhin ngadto sa uban, dihang naningkamot ko nga makaserbisyo sa uban ug misubay sa dalan nga gilaktan ni Kristo, adunay kahayag ug kalipay, bisan atol sa labihan nga kasakit ug pag-antos.”

Si Sister Wright mihulagway sa iyang pakigbugno sa kanser isip usa ka “paghashas ug makalunsay nga kasinatian”—usa ka kasinatian nga “gihan--ay sa talagsaong paagi” sa pagtabang kaniya nga makaila sa Manluluwas sa usa ka personal kaayo nga paagi. Nagtudlo usab kini kaniya nga ang dugang nga kalig-on moabot pinaagi sa pagpaningkamot sa pagkat-on ug pagsabot sa managlahing mga hagit sa uban.

“Kitang tanan nagserbisyo sa lain-laing bahin sa ubasan sa Ginoo sa lain-laing mga panahon sa atong kinabuhi. Apan mao gihapon kini nga ubasan uban sa mao gihapon nga Agalon,“ miingon siya.

“Ang atong paglaom mao usab gihapon, nga mao ang kinabuhing dayon ug kahimayaan. Mao kana ang atong gitinguha alang niining tanan nga bililhong gagmay nga mga bata, nga ang Manluluwas mamahimo nga bahin sa ilang panaw, ug sila mopauli ngadto Kaniya.”

Si Amy Eileen Anderson Wright natawo niadtong Enero 6, 1972, sa Siyudad sa Salt Lake, Utah, USA, ngadto ni Robert ug Joy Anderson. Naminyo siya ngadto ni James McConkie Wright niadtong 1994 sa Salt Lake Templo. Sila adunay tulo ka anak.

Si Sister Wright migradwar og bachelor‘s degree sa human rights development and family studies sa University of Utah niadtong 1998. Nagtrabaho siya isip usa ka tigtudlo sa pagbasa [reading tutor] ug tigdumala sa opisina ug usa ka boluntaryo sa Parent Teacher Association. Bag-o lang miabag siya sa pagpamaligya ug pag-advertise og mga gamit sa pang-dental nga opisina.

Si Sister Wright nakaserbisyo sa kinatibuk-ang konseho nga magtambag sa Young Women sukad niadtong 2018. Ang nangaging mga calling naglakip sa pagka presidente sa Primary sa stake ug ward, magtatambag sa kapangulohan sa Primary sa ward, magtutudlo sa Doktrina sa Ebanghelyo, ug lider sa Cub Scout.