“Tan-awa! Ako Mao ang usa ka Dios sa mga Milagro”
Ang mga milagro, mga timailhan, ug mga katingalahan makita nga daghan kaayo taliwala sa mga sumusunod ni Jesukristo karon, diha sa inyong mga kinabuhi ug sa akoa.
Minahal kong kaigsoonan, pagkadako nga kahigayonan nga mobarog sa atubangan ninyo karon. Nahiusa uban niadtong kinsa mipakigpulong na niini nga komperensiya, ako mopamatuod nga si Jesukristo buhi. Siya naggiya sa Iyang Simbahan; Siya namulong ngadto sa Iyang propeta, si Presidente Russell M. Nelson, ug Siya nahigugma sa tanan nga anak sa Langitnong Amahan.
Niini nga Dominggo sa Pasko sa Pagkabanhaw atong gisaulog ang Pagkabanhaw ni Jesukristo, ang atong Manluluwas ug Manunubos,1 ang Dios nga Gamhanan, ang Prinsipe sa Pakigdait.2 Ang Iyang Pag-ula, nga gitapos sa Iyang Pagkabanhaw human sa tulo ka adlaw diha sa usa ka hinulaman nga lubnganan, nagpabilin nga mao ang labing dakong milagro sa kasaysayan sa katawhan. “Kay tan-awa,” Siya mipahayag, “Ako mao ang Dios; ug Ako mao ang Dios sa mga milagro.”3
“Nahunong ba ang mga milagro tungod sa pagkayab ni Kristo ngadto sa langit, ug milingkod sa tuo nga kamot sa Dios?”4 ang propeta nga si Mormon nangutana diha sa Basahon ni Mormon. Siya mitubag, “Wala; ni ang mga anghel mihunong sa pagpangalagad ngadto sa mga katawhan.”5
Pagkahuman sa Paglansang sa Krus, usa ka anghel sa Ginoo ang nagpakita ni Maria ug sa pipila ka kababayen-an kinsa miadto sa lubnganan aron dihogan ang lawas ni Jesus. Ang anghel miingon:
“Ngano nga ang buhi anha man ninyo pangitaa diha sa mga patay?”6
“Wala na Siya dinhi: kay Siya nabanhaw.”7
Ang propeta sa Basahon ni Mormon nga si Abinadi mipahayag niana nga milagro:
“Kon si Kristo wala pa mobangon gikan sa mga patay, … wala unta ang pagkabanhaw.
“Apan adunay usa ka pagkabanhaw, busa ang lubnganan walay kada[o]gan, ug ang kahapdos sa kamatayon gituhop diha kang Kristo.”8
Ang milagrosong mga buhat ni Jesukristo nakapahimo sa mga nahaunang disipulo nga motuaw: “Kinsa ba kining tawhana! gipahunong niya ang hangin ug ang mga balod, ug mihunong sila.”9
Samtang ang nahaunang mga Apostoles misunod ni Jesukristo ug nakadungog Kaniya nga nagtudlo sa ebanghelyo, sila nakasaksi og daghang mga milagro. Sila nakakita nga “ang mga buta nakakita, ang mga bakol nakalakaw, ang mga sanlahon nangaayo, ang mga bungol nakadungog, ang mga minatay nangabanhaw, ug ang Maayong Balita gisangyaw ngadto sa mga kabos.”10
Ang mga milagro, mga timailhan, ug mga katingalahan makita nga daghan kaayo taliwala sa mga sumusunod ni Jesukristo karon, diha sa inyong mga kinabuhi ug sa akoa. Ang mga milagro mao ang balaanong mga buhat, mga pagpakita, ug mga pagpahayag sa walay kinutobang gahom sa Dios ug ang pagpamatuod nga Siya “sama sa kagahapon, karon, ug sa kahangt[o]ran.”11 Si Jesukristo, kinsa milalang sa kadagatan, makapakalma niini; Siya kinsa mihatag og panan-aw sa buta makatabang kanato nga motutok sa espirituhanong mga butang; Siya kinsa miayo sa mga sanlahon motarong sa atong mga kahuyang; Siya kinsa miayo sa tawo nga dili makalakaw makatawag kanatong tanan sa pagbarog pinaagi sa pag-ingon og “Dali, sunod kanako.”12
Daghan kaninyo ang nakasaksi og mga milagro, sobra pa sa inyong mahunahunaan. Kini tingali mora og gamay ra kon itandi sa pagbanhaw ni Jesus sa mga minatay. Apan ang gidak-on niini dili mao ang nakapahimo niini nga milagro, ang nakapahimo niini nga milagroso tungod kay naggikan kini sa Dios. Ang uban misugyot nga ang mga milagro mga sulagma lamang o naswertehan lang gayod. Apan ang propeta nga si Nephi misaway niadtong kinsa “mipaubos sa gah[o]m ug sa mga milagro sa Dios, ug nagwali ngadto sa ilang mga kaugalingon sa ilang kaugalingon nga kaalam ug sa ilang kaugalingon nga kinaadman, nga sila unta makaangkon og mga bahandi.”13
Ang mga milagro nahitabo tungod sa balaanong gahom pinaagi Kaniya kinsa “gamhanan sa pagluwas.”14 Ang mga milagro mga sumpay sa mahangtoron nga plano sa Dios; ang mga milagro importante nga hinabang gikan sa langit paingon sa yuta.
Sa miaging tinglarag si Sister Rasband ug ako nagbiyahe padulong sa Goshen, Utah, alang sa usa ka tibuok kalibotan nga Face to Face nga kalihokan nga gisibya sa sobra 600,000 nga katawhan sa 16 ka lain-lain nga pinulongan.15 Ang programa motutok sa mga panghitabo sa Pagpahiuli sa ebanghelyo ni Jesukristo, nga adunay mga pangutana nga gihatag sa mga young adult gikan sa tibuok kalibotan. Si Sister Rasband og ako personal nga mirebyo sa mga pangutana; kini naghatag kanamo og kahigayonan sa pagpamatuod kabahin ni Joseph Smith isip usa ka propeta sa Dios, ang gahom sa pagpadayag diha sa atong kinabuhi, ang nagpadayon nga Pagpahiuli sa ebanghelyo ni Jesukristo, ug ang mga kamatuoran ug mga sugo nga among gibahandi. Daghan sa mga naminaw karon kabahin niana nga milagrosong panghitabo.
Sa una ang sibya magagikan unta sa Sagradong Kakahoyan sa layo nga bahin sa New York, diin, sama sa gipamatuod ni Joseph Smith: “Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!”16 Kana, mga kaigsoonan, usa ka milagro.
Ang tibuok kalibotan nga pandemya nakapugos kanamo sa pagbalhin sa sibya ngadto sa Goshen, Utah, diin ang Simbahan ni Jesukristo sa mga Santos sa Ulahing mga Adlaw mimugna og usab, alang sa paghimo og pelikula, sa usa ka bahin sa karaang Jerusalem. Si Sister Rasband ug ako anaa sa pipila ka kilometro gikan sa Goshen niana nga Dominggo sa dihang nakita namo ang baga nga aso nga naggikan sa direksyon sa among adtoan. Ang mga wildfire nagdilaab na sa dapit, ug nabalaka kami nga ang sibya basin og maapektohan. Tinuod man, 20 minutos sa wala pa mag-alas 6:00, ang oras sa among sibya, ang kuryente sa tibuok complex napalong. Walay kuryente! Walay sibya. Adunay usa ka generator nga gituohan sa uban nga tawo nga pwede namo nga magamit, apan walay kaseguradohan nga kini makahatag og igo nga kuryente aron magamit ang anaa nga mga ekipo.
Kaming tanan diha sa programa, apil ang mga tigsaysay, mga musikero, ug mga technician—bisan gani ang 20 ka mga young adult nga akong kaugalingong mga paryente—andam na kaayo alang sa unsay mahitabo. Mipalayo ko gikan kanila nga naghilak ug nalibog ug nangamuyo sa Ginoo alang sa usa ka milagro. “Langitnong Amahan,” nag-ampo ko, “panagsa ra ko nga mangayo og milagro, apan karon nangayo ko og usa ka milagro. Kini nga miting kinahanglan nga mahitabo alang sa tanan nga mga young adult sa tibuok kalibotan. Nagkinahanglan kami og kuryente aron makapadayon kon kabubut-on Nimo.”
Pito ka minutos lapas sa alas 6:00, sama kapaspas sa pagkapalong sa kuryente, mibalik kini. Ang tanan nagsugod sa pag-andar, gikan sa musika ug mga mikropono ngadto sa mga video ug tanan nga mga ekipo alang sa transmisyon. Dali namo nga nasugdan ang sibya. Nakasinati kami og milagro.
Samtang si Sister Rasband ug ako naa na sa sakyanan nagbiyahe padulong og pauli nianang gabhiona, si Presidente ug Sister Nelson mi-text kanamo niini nga mensahe: “Ron, gusto namo nga mahibaloan ninyo nga sa dihang nadunggan namo nga napalong ang kuryente, nag-ampo kami alang sa usa ka milagro.”
Sa usa ka kasulatan sa ulahi nga adlaw kini nakasulat, “Kay Ako, ang Ginoo, nagpahimutang sa akong kamot sa pagpalihok sa mga gah[o]m sa langit; kamo dili makakita niini karon, apan sa dili madugay kamo makakita niini, ug masay[o]d nga Ako mao, ug nga Ako moab[o]t ug mohari uban sa akong mga katawhan.”17
Mao gayod kana ang nahitabo. Ang Ginoo nagpahimutang sa Iyang kamot, ug nibalik ang kuryente.
Ang mga milagro nabuhat tungod sa gahom sa hugot nga pagtuo, sama sa gamhanan kaayo nga gitudlo ni Presidente Nelson sa miagi nga sesyon. Ang propeta nga si Moroni miawhag sa katawhan, “Kay kon wala ang hugot nga pagtuo taliwala sa mga katawhan ang Dios dili makahimo og milagro taliwala kanila; busa, siya wala mopakita sa iyang kaugalingon hangt[o]d human sa pagsulay sa ilang hugot nga pagtuo.”
Siya mipadayon:
“Tan-awa, kini tungod sa hugot nga pagtuo ni Alma ug ni Amulek nga nakahimo sa bilanggoan nga malumpag ngadto sa yuta.
“Tan-awa, kini tungod sa hugot nga pagtuo ni Nephi ug ni Lehi nga nakahimo og kausaban diha sa mga Lamanite, nga sila nabunyagan uban sa kalayo ug uban sa Espiritu Santo.
“Tan-awa, kini tungod sa hugot nga pagtuo ni Ammon ug sa iyang mga kaigsoonan nga nakahimo sa mga kahibulongan nga milagro taliwala sa mga Lamanite. …
“Ug ni sa bisan unsa nga panahon adunay nakahimo og mga milagro hangt[o]d human sa ilang hugot nga pagtuo; busa sila mituo una diha sa Anak sa Dios.”18
Makapuno ko niana nga han-ay sa mga kasulatan, “Ang hugot nga pagtuo sa madasigon nga tigpasundayag nga mga young adult, propesyonal nga mga tigsibya, mga lider ug mga miyembro sa Simbahan, usa ka Apostol, ug sa usa ka propeta sa Dios nga nangita og dako kaayo nga milagro maoy nakapabalik sa kuryente sa usa ka layo nga set sa pelikula diha sa Goshen, Utah.”
Ang mga milagro mahimong moabot isip mga tubag sa pag-ampo. Dili kini kanunay mao kon unsay atong gipangayo o atong gilaoman, apan kon mosalig kita sa Ginoo, Siya maanaa didto, ug Siya dili masayop. Ipahiangay Niya ang milagro sa higayon nga gikinahanglan nato kini.
Ang Ginoo mohimo og mga milagro aron pahinumdoman kita sa Iyang gahom, sa Iyang gugma alang kanato, sa Iyang impluwensya sa atong mortal nga kasinatian, ug sa Iyang kagustohan nga motudlo kabahin niana nga maoy labing bililhon. “Siya nga adunay hugot nga pagtuo kanako mamaayo,” Siya miingon ngadto sa mga Santos niadtong 1831, ug ang saad nagpadayon karon, “ug wala ikatakda ngadto sa kamatayon, paga-ayohon.”19 Adunay mga balaod nga gitakda sa kalangitan, ug kita kanunay nga ubos niini.
Adunay mga higayon nga kita naglaom alang sa usa ka milagro nga mamaayo ang usa ka minahal sa kinabuhi, nga balihon ang usa ka dili makiangayon nga binuhatan, o humokon ang kasingkasing sa usa ka masuk-anon o nahisalaag nga kalag. Kon ikonsiderar ang mga butang sa mortal nga panglantaw, gusto kita nga ang Ginoo manginlabot, nga moayo sa unsay naguba. Pinaagi sa hugot nga pagtuo, ang milagro moabot, bisan dili gayod sa atong gusto nga higayon o sa pamaagi nga maoy atong gitinguha. Nagpasabot ba kana nga dili igo ang atong pagtuo o dili kita angayan sa Iyang pagpanginlabot? Dili. Kita gipangga sa Ginoo. Gihatag Niya ang Iyang kinabuhi alang kanato, ug ang Iyang Pag-ula nagpadayon sa pagpalingkawas kanato gikan sa mga palas-onon ug sala samtang kita maghinulsol ug mopaduol ngadto Kaniya.
Ang Ginoo nagpahinumdom kanato, “Ang akong mga laraw dili sama sa inyong mga laraw.”20 Siya mitanyag, “Duol kamo kanako, kamong tanan nga gikap[o]yan ug gibug-atan sa inyong gipas-an ug papahulayon ko kamo”21—pahulay gikan sa kabalaka, pagkadismaya, kahadlok, pagkamasinupakon, kabalaka alang sa mga minahal sa kinabuhi, alang sa nawala o naguba nga mga pangandoy. Ang kalinaw taliwala sa kalibog o kaguol usa ka milagro. Hinumdomi ang mga pulong sa Ginoo: “Wala ba Ako magsulti og kalinaw nganha sa imong hunahuna mahitungod niini nga butang? Unsa ka labaw nga kamatuoran ang imong maangkon kay sa gikan sa Dios?”22 Ang milagro mao nga si Jesukristo, ang Halangdon nga Jehova, ang Anak sa Dios nga Labing Halangdon, mitubag uban sa kalinaw.
Sama nga Siya nagpakita ni Maria diha sa tanaman, nagtawag kaniya sa iyang ngalan, Siya nagtawag kanato sa pagpakita sa atong hugot nga pagtuo. Si Maria nangita aron sa pagserbisyo Kaniya ug pag-atiman Kaniya. Ang Iyang Pagkabanhaw dili mao ang unsay iyang gilaoman, apan kini sumala sa mahinungdanon nga laraw sa kalipay.
“Kanaog sa krus,”23 ang pundok sa mga dili tumutuo mibiay-biay Kaniya didto sa Kalbaryo. Makahimo unta Siya didto og usa ka milagro. Apan nakahibalo Siya sa kataposan gikan sa sinugdanan, ug Siya nagtinguha nga magmatinud-anon sa plano sa Iyang Amahan. Kana nga ehemplo kinahanglan nga dili mawala diha kanato.
Ngari kanato sa higayon sa atong mga pagsulay Siya miingon, “Hunahunaa ang mga samad nga milapos sa akong kilid, ug usab ang mga marka sa mga lansang sa akong mga kamot ug tiil; pagmatinud-anon, paghupot sa akong mga sugo, ug kamo makapanunod sa gingharian sa langit.”24 Kana, kaigsoonan, mao ang milagro nga gisaad kanatong tanan.
Niining Dominggo sa Pasko sa Pagkabanhaw, samtang atong saulogon ang milagro sa Pagkabanhaw sa atong Ginoo, isip Apostol ni Jesukristo ako mapaubsanong mag-ampo nga inyong mabati ang gahom sa Manunubos sa inyong kinabuhi, nga ang inyong mga pangamuyo ngadto sa atong Langitnong Amahan tubagon uban sa gugma ug pasalig nga gipakita ni Jesukristo sa tibuok Niya nga pangalagad. Ako nag-ampo nga kamo unta magbarog nga lig-on ug matinud-anon diha sa tanan nga umaabot. Ug ako manalangin kaninyo nga ang mga milagro kanunay nga mahitabo diha kaninyo sama sa among nasinati sa Goshen—kon kini pagbuot sa Ginoo. Pangitaa kini nga mga panalangin nga gipadala gikan sa langit diha sa inyong kinabuhi samtang kamo “[mangita] niini nga Jesus diin ang mga propeta ug mga apostoles misulat, nga ang grasya sa Dios nga Amahan, ug usab ni Ginoong Jesukristo, ug sa Espiritu Santo, nga nagpamatuod kanila, mag-uban kaninyo sa kahangt[o]ran.”25 Sa ngalan ni Jesukristo, amen.