Mopanalangin pinaagi sa Iyang Ngalan
Ang katuyoan sa atong pagkadawat sa pagkapari mao ang pagtugot nga kita makapanalangin sa katawhan sa Ginoo, maghimo niini diha sa Iyang ngalan.
Minahal kong kaigsoonan, mga kaubanang sulugoon diha sa pagkapari sa Dios, akong dungog nga makapamulong kaninyo karong gabhiona. Anaa kaninyo ang akong kinadak-ang pagrespeto ug pasalamat. Kon ako mamulong kaninyo ug makadungog sa inyong dako nga pagtuo, ako nagatuo nga anaa ang padayong paglambo sa gahom sa pagkapari sa kalibotan, uban sa padayong nagkalig-on nga mga korum ug labaw pa sa matinud-anong mga naghupot sa pagkapari.
Sa akong pipila ka gutlo nga ikauban kamo karong gabhiona, ako mamulong sa pipila kaninyo kinsa gustong mahimo nga mas epektibo sa inyong personal nga panerbisyo sa pagkapari. Nahibalo kamo sa inyong buluhaton nga kamo kinahanglang mopalambo sa inyong balaan nga tawag sa pagserbisyo.1 Apan tingali maghunahuna kamo unsay buot ipasabot niana nga pagpalambo sa inyong calling alang kaninyo.
Akong sugdan gikan sa pinakabag-ong mga deacon kay sila ang pinakalagmit nga mobati og kawalay kasiguroan mahitungod sa unsay ipasabot sa pagpalambo sa ilang pagserbisyo sa pagkapari. Ang bag-ong na-orden nga mga elder tingali gusto usab nga maminaw. Ug ang bishop nga anaa sa iyang unang mga semana sa pagserbisyo tingali interesado usab.
Alang kanako makatabang ang paghinumdom sa akong mga panahon sa pagka-deacon. Unta adunay tawo nga nakasulti kanako kaniadto sa unsay akong isugyot karon. Makatabang unta kini sa tanang mga buluhaton sa pagkapari nga miabot kanako sukad niadto—bisan sa mga butang nga akong nadawat sa kasamtangan nga panahon.
Ako na-orden nga deacon sa usa ka branch nga gamay kaayo nga ako lamang ang deacon ug ang akong igsoong si Ted mao lamang ang teacher. Kami lamang ang pamilya sa branch. Ang tibuok branch mag-abot sa among balay. Ang lider sa pagkapari alang sa akong igsoong lalaki ug kanako usa ka bag-ong kinabig kinsa bag-o lang usab nakadawat sa iyang pagkapari. Nagtuo ko kaniadto nga ang katungdanan lamang nako sa pagkapari mao ang pagpasa sa sakramento sa kaugalingon nakong kan-anan.
Dihang ang akong pamilya mibalhin sa Utah, anaa ako sa dakong ward nga adunay daghang deacon. Sa akong una nga miting sa sakramento didto, akong gipanid-an ang mga deacon—nga ingon og sa akong tan-aw, daw usa ka hut-ong sa mga sundalo—nga naglihok nga mainampingon samtang nagpasa sila sa sakramento sama sa usa ka binansay nga pundok.
Nahadlok kaayo ako nga sa pagkasunod nga Dominggo miadto ko og sayo sa gambalay sa ward nga ako rang usa nga walay makakita kanako. Nahinumdom ko nga kadto ang Yalecrest Ward sa Siyudad sa Salt Lake, ug aduna kini usa ka estatuwa diha sa mga nataran. Miadto ko luyo sa estatuwa ug nag-ampo og maayo alang sa tabang aron mahibalo unsaon nga dili masayop samtang ako na ang magpasa sa sakramento. Kadto nga pag-ampo natubag.
Apan karon nahibalo na ko nga adunay mas maayong paagi sa pag-ampo ug sa paghunahuna samtang maningkamot kita nga molambo sa atong pagpanerbisyo sa pagkapari. Miabot kini pinaagi sa akong panabot nganong ang mga indibidwal gihatagan sa pagkapari. Ang tuyo sa atong pagkadawat sa pagkapari mao ang pagtugot nga kita makapanalangin sa katawhan sa Ginoo, maghimo niini diha sa Iyang ngalan.2
Mga tuig ang milabay human sa akong pagka-deacon diha pa nako nahibaloan kon unsa gayod ang buot ipasabot niana. Sama pananglit, isip high priest, gi-assign ako nga mobisita og miting sa sakramento sa usa ka care center. Gihangyo ako nga mopasa sa sakramento. Imbis maghunahuna mahitungod sa proseso o kamainampingon sa akong pagpasa sa sakramento, gitan-aw nako ang mga nawong sa matag tigulang nga tawo. Akong nakita ang daghan kanila nga nagbakho. Usa ka babaye ang mibira sa akong bukton, mihangad, ug misulti og kusog, “Ah, salamat, salamat.”
Ang Ginoo mipanalangin sa akong serbisyo nga gihatag pinaagi sa Iyang ngalan. Nianang adlawa akong giampo nga ang ingon niadto nga milagro moabot imbis mag-ampo alang sa unsaon nga mahimo nako og tarong ang akong bahin. Nag-ampo ako nga ang mga tawo mobati sa gugma sa Ginoo pinaagi sa mahigugmaong pagserbisyo. Akong nahibaloan nga mao kini ang importanting paagi sa pagserbisyo ug pagpanalangin sa uban diha sa Iyang ngalan.
Nakadungog ako og bag-o lang nga kasinatian nga nagpahinumdom kanako sa ingon niana nga gugma. Dihang ang tanan nga miting sa Simbahan gihunong tungod sa COVID-19 nga pandemya, usa ka tigpangalagad nga brother midawat og buluhaton gikan sa iyang presidente sa korum sa mga elder sa pagpanalangin ug pagpangalagad sa sakramento ngadto sa usa ka sister nga iyang gialagaran. Dihang gitawagan niya ang sister aron motanyag nga dad-an og sakramento, nagpanuko ang sister sa pag-uyon, dili siya gusto nga mogawas sa balay ang brother sa delikado kaayong panahon ug sa pagtuo nga ang mga butang mobalik ra dayon sa normal.
Dihang miabot ang brother sa iyang balay nianang Dominggo sa buntag, si sister dunay hangyo. Mahimo ba silang moadto sa tapad nga balay ug magsakramento usab sa iyang 87 anyos nga silingan? Uban sa pagtugot sa bishop, miuyon siya.
Sulod sa daghan kaayong semana, ug uban sa mainampingon kaayong sosyal nga pagdistansya ug sa ubang luwas nga pamaagi, kadto nga gamayng pundok sa mga Santos magpundok matag Dominggo alang sa yano nga serbisyo sa sakramento. Mga pipila lamang ka gipirapiraso nga pan ug kopa sa tubig—apan daghang luha ang miagas tungod sa kamaayo sa usa mapinanggaon nga Dios.
Wala madugay, ang tigpangalagad nga brother, ang iyang pamilya, ug ang sister nga iyang gialagaran nakasimba na og balik sa simbahan. Apan ang 87 anyos nga biyuda, tungod sa daghang pagdili, pabilin ra gihapon sa balay. Ang tigpangalagad nga brother—nahinumdom nga ang iyang buluhaton adto ra sa iyang silingan ug dili niining gulang na nga sister—apan sa gihapon hangtod karon hilom nga moadto sa iyang balay matag Dominggo, magdala og mga kasulatan ug gamay nga piraso sa pan, aron ikaalagad ang sakramento sa Panihapon sa Ginoo.
Ang iyang panerbisyo sa pagkapari, sama sa akoa niadtong adlawa sa care center, gihatag tungod sa gugma. Gani, ang tigpangalagad nga brother bag-o lang nangutana sa iyang bishop kon aduna pa bay uban sa ward nga iyang maatiman. Ang iyang tinguha nga makapalambo sa iyang panerbisyo sa pagkapari milambo samtang siya nagserbisyo pinaagi sa ngalan sa Ginoo ug sa paagi nga Siya lamang ang nahibalo. Wala ko kahibalo kon ang tigpangalagad nga brother nag-ampo ba, sama sa akong gihimo, alang niadtong iyang giserbisyohan aron mahibalo sa gugma sa Ginoo, apan tungod kay ang iyang pagserbisyo gihimo pinaagi sa ngalan sa Ginoo, ang resulta parehas ra gihapon.
Ang susama ka talagsaon nga resulta nahitabo dihang nag-ampo ako alang niini sa wala pa ako mohatag sa panalangin sa pagkapari ngadto sa tawo nga may sakit o nanginahanglan. Nahitabo kini kausa sa ospital dihang ang walay pailob nga mga doktor mipugos kanako—labaw pa kay sa mipugos kanako—mimando kanako—sa pagdali og pagpapahawa kanako aron mahimo nila ang ilang buluhaton, kay sa mohatag kanako og oportunidad nga makahatag og panalangin sa pagkapari. Nagpabilin ako, ug mihatag sa panalangin. Ug kadtong gamay nga bata nga akong gipanalanginan nianang adlawa, kinsa gituohan sa mga doktor nga mamatay, nabuhi. Nagpasalamat ako niini nga panahon nga niadtong adlawa, wala nako tugoti ang akong mga pagbati nga maoy mopatigbabaw apan mibati nga ang Ginoo gusto nga ang maong bata nga babaye makadawat og panalangin. Ug nahibalo ako unsa kadto nga panalangin: Gipanalanginan nako siya aron mamaayo. Ug siya naayo.
Nahitabo kini sa daghang higayon sa akong paghatag og panalangin ngadto sa tawo nga ingon og duol na sa kamatayon, uban sa mga sakop sa pamilya nga naglibot sa higdaanan, nga nanghinaot og usa ka panalangin sa pagkaayo. Bisan kon duna lamang akoy usa ka gutlo, mag-ampo ako kanunay aron mahibalo unsa nga panalangin ang gihunahuna sa Ginoo nga akong ihatag pinaagi sa Iyang ngalan. Ug mangutana ako aron mahibalo unsay Iyang gusto nga ipanalangin niana nga tawo ug dili ang akoa o unsay gusto sa mga tawo nga anaa sa duol. Ang akong kasinatian mao nga bisan og ang panalangin dili maoy gitinguha sa uban alang sa ilang kaugalingon o sa ilang mga minahal, ang Espiritu motandog sa mga kasingkasing aron masinati ang pagdawat ug ang kahupayan kay sa kasagmuyo.
Ang susamang inspirasyon moabot kon ang mga patriyarka magpuasa ug mag-ampo alang sa giya sa paghatag og panalangin nga giandam sa Ginoo alang sa usa ka tawo. Usab, nakadungog ako og mga panalangin nga gihatag nga nakapatingala kanako ug usab nakapatingala sa tawo nga nagdawat sa panalangin. Tin-aw kaayo, ang panalangin naggikan sa Ginoo—ang mga pasidaan diha niini ingon man ang mga saad nga gipaambit pinaagi sa Iyang ngalan. Ang pag-ampo ug pagpuasa sa patriyarka gigantihan sa Ginoo.
Isip usa ka bishop, nakakat-on ako samtang nagpahigayon og mga interbyu alang sa katakos sa pag-ampo nga ang Ginoo mopabatyag kanako unsay Iyang gusto sa maong tawo, sa paghimo nga dili masalipdan sa akong kaugalingong paghukom ang bisan unsang inspirasyon nga Iyang ihatag. Lisod kana kon ang Ginoo, pinaagi sa gugma, gustong mopanalangin og usa ka tawo dala ang pagkorihir. Nagkinahanglan og paningkamot ang pag-ila unsay gusto sa Ginoo gikan sa unsay imong gusto ug unsay gusto sa ubang tawo.
Mituo ako nga kita makapalambo sa atong panerbisyo sa pagkapari sa tibuok natong kinabuhi ug tingali lapas pa. Mag-agad kini sa atong kakugi sa pagpaningkamot nga mahibalo sa kabubut-on sa Ginoo ug sa atong mga paningkamot nga madungog ang Iyang tingog aron kita mas mahibalo unsay Iyang gusto sa tawo nga atong giserbisyohan alang Kaniya. Kana nga pagpalambo moabot pinaagi sa ginagmayng mga lakang. Tingali hinayhinay ang pag-abot niini, apan moabot kini. Ang Ginoo misaad niini ngari kanato:
“Kay kinsa kadto nga matinud-anon ngadto sa pagbaton niining duha ka mga pagkapari [nga akong] gipamulong, ug sa pagpalambo sa ilang balaan nga tawag, pagabalaanon pinaagi sa Espiritu ngadto sa pagbag-o sa ilang mga lawas.
“Sila mahimo nga anak nga mga lalaki ni Moises ug ni Aaron ug ang binhi ni Abraham, ug sa simbahan ug gingharian, ug ang pinili sa Dios.
“Ug usab silang tanan kinsa modawat niini nga pagkapari modawat kanako, miingon ang Ginoo.”3
Maoy akong pagsaksi nga ang mga yawe sa pagkapari gipahiuli ngadto ni Propeta Joseph Smith. Ang mga sulugoon sa Ginoo mipakita gikan sa langit aron ipahiuli ang pagkapari alang sa talagsaong mga hitabo nga gipang-ablihan ug anaa sa atong atubangan. Ang Israel pagapundukon. Ang katawhan sa Ginoo pagaandamon alang sa Iyang mahimayaon nga Ikaduhang Pag-anhi. Ang Pagpahiuli magpadayon. Ang Ginoo mopadayag pa og daghan sa Iyang kabubut-on ngadto sa Iyang mga propeta ug ngadto sa Iyang mga sulugoon.
Tingali kamo mobati nga gamay ikompara sa dagkong mga pagpadayag kon unsay pagabuhaton sa Ginoo. Kon inyo kining buhaton, dapiton ko kamo nga mangutana sa mainampoong paagi kon unsay pagtan-aw sa Ginoo kaninyo. Siya sa personal nakaila kaninyo, Iyang gitugyan ang pagkapari diha kaninyo, ug ang inyong pagtubag ug pagpalambo sa pagkapari importante Kaniya kay Siya nahigugma kaninyo ug Siya misalig kaninyo sa pagpanalangin sa mga tawo nga Iyang gihigugma pinaagi sa Iyang ngalan.
Ako manalangin kaninyo karon nga kamo makahimo sa pagbati sa Iyang gugma ug sa Iyang pagsalig, sa ngalan ni Jesukristo, amen.