Stap Prijim Gospel blong Pis
Yumi gat tabu responsabiliti blong serem paoa mo pis blong Jisas Kraes wetem evriwan we bae i lisin.
Ol dia brata mo sista blong mi. !Welkam long jeneral konfrens! Mi bin stap wet from dei ia wetem bigfala tingting. Be mi prea from olgeta evri dei. Mi bin prea tu se, konfrens ia, bae i wan taem blong wanwan long yufala i kam niu long saed blong spirit.
Stat long las konfrens i kam, ol had samting long wol oli stap gohed nomo. Wol sik ia i stap spolem laef blong yumi yet. Mo naoia, wol i stap fesem wan faet we i stap mekem plante milian man, woman mo pikinini oli trabol bigwan.
Ol profet oli bin luk finis taem blong yumi tedei, se bae i gat ol wo, mo ol toktok from wo, se taem bae ful wol ia bae i muvmuv.1 Olsem ol man we oli folem Jisas Kraes, mifala i askem strong long ol lida blong ol nesen blong faenem ol stret samting blong stretem, long pis, wanem we oli no glad long hem. Mifala i singaot i go long ol pipol long evri ples blong prea from olgeta ia we oli stap long nid, blong mekem wanem oli save mekem blong helpem olgeta we oli gat hadtaem, mo blong lukaotem help blong Lod blong endem ol bigfala raorao ia.
Ol brata mo sista. Gospel ia blong Jisas Kraes, man i nidim moa tedei bitim bifo. Raorao, i agensem evri samting we Sevya i bin stanap from mo tijim. Mi lavem Lod Jisas Kraes, mo testifae se gospel blong Hem, hem i wan ansa ia nomo we bae i tekem pis i kam. Gospel blong Hem i wan gospel blong pis.2
Gospel blong Hem, i wan ansa ia nomo taem we, plante long wol ia, fraet i kilim olgeta.3 Hemia i poenemaot gud hamas instraksen blong Lod long ol disaepol blong Hem i impoten tumas blong “mas go long evri ples long wol, mo talemaot gud nius blong [Hem] long olgeta man.”4 Yumi gat tabu responsabiliti blong serem paoa mo pis blong Jisas Kraes wetem evriwan we bae i lisin, mo bae i letem God i stap win insaed long laef blong olgeta.
Evri man mo woman we i bin mekem ol kavenan wetem God, i bin promesem blong kea long ol narawan, mo givim seves long olgeta we oli stap long nid. Yumi save soem bilif long God mo oltaem rere blong ansa long evriwan we i askem abaot “hop we i stap insaed long [yumi].”5 Wanwan long yumi i gat wan rol blong plei insaed long wok blong pulum Isrel i kam tugeta.
Tedei, mi talem bakegen se, i tru, se Lod i askem evri yang man we i klin inaf mo i save mekem, blong hem i mas rere from mo givim seves long wan misin. Long ol Lata-dei Sent yang man, misinari seves i wan prishud responsabiliti. Yufala, ol yang man, Lod i bin holemtaet yufala from taem tedei, taem we promes blong kam tugeta blong Isrel ia i stap tekem ples. Taem yu stap givim seves long ol misin, !yu plei wan impoten rol long wanem i stap hapen tedei we i neva hapen bifo!
Long yufala, ol yang sista we i save mekem, wan misin i wan strong janis, be, i no wan mas. Mifala i lavem ol sista misinari mo welkamem olgeta wetem ful hat. !Kontribusen blong yufala long wok ia, i bigwan! Yufala i prea blong save sapos Lod i wantem yu blong givim seves long wan misin o no, mo bae Tabu Spirit bae i ansarem yu insaed long hat mo maen blong yu.
Ol dia yang fren. Wanwan long yufala i impoten long Lod. Hem i bin holemtaet yufala i stap biaen kasem naoia blong yufala i help blong mekem Isrel i kam tugeta. Desisen blong yu, blong givim seves long wan misin, blong prijim gospel o wan seves misin, bae i blesem yu mo plante narawan. Mifala i welkamem tu ol senia kapol blong givim seves taem we situesen blong olgeta i givim janis from. Hadwok blong yufala, i no gat narawan i save mekem.
Evri misinari i stap tijim mo testifae abaot Sevya. Tudak long saed blong spirit, insaed long wol ia, i mekem se man i nidim laet blong Jisas Kraes moa bitim bifo. Evriwan i nidim blong gat wan janis blong save abaot gospel blong Jisas Kraes we i bin kambak. Evri man mo woman i nidim blong save weaples hem i save faenem hop mo pis we i “[bitim] evri save blong man.”6
Mi prea se bae konfrens ia i wan taem blong pis mo lafet long saed blong spirit, long yufala. Bae yu lukaotem mo kasem revelesen we i blong yuwan long taem blong ol sesen ia, mi prea olsem, long tabu nem blong Jisas Kraes, amen.