Blong Hilim Wol Ia
Ol kil mo ol samting we oli defren, oli save stretem mo oli save kam oraet taem yumi ona long God, Papa blong yumi evriwan, mo Jisas Kraes, Pikinini blong Hem.
Ol brata mo sista. Long glori taem blong Ista ia, yumi gat blesing blong mitim mo kasem kaonsel mo daereksen we i kam long ol wokman blong God.
Tabu toktok mo tijing we i kam long Papa long Heven i helpem yumi blong gotru long laef long ol denja taem ia. Olsem profesi i talem: “ol faea, mo hariken, ol wo mo ol toktok from wo, mo graon i seksek long ol defren ples, mo eni kaen blong rabis fasin,1 bigfala sik,2 taem blong kaekae i sot, mo ol nara rabis sik3 bae oli prapa spolem ol famli, ol komuniti, mo iven ol nesen.
I gat wan nara sik we i stap swip raon long wol: ol atak long fridom blong relijin blong yu mo blong mi. Bigfala filing ia, i wantem se bae oli mas karemaot fulwan relijin mo fet long God aot long pablik ples, skul, komuniti standet, mo pablik toktok. Olgeta we oli agensem fridom blong relijin, oli wantem putum ol rul blong man i no talemaot wanem hem i biliv long hat blong hem. Oli iven tokbaot nogud mo jikim ol tradisen blong ol fet.
Kaen fasin ia i putum pipol long saed, i daonem prinsipol blong yuwan, stret fasin, respek, spirit, mo pis long gud tingting.
?Wanem hem i fridom blong relijin?
Hem i fridom blong stap wosip, long evri wei blong wosip: fridom blong kam tugeta, fridom blong toktok, fridom blong tekem aksen folem bilif blong yu, mo fridom blong ol narawan blong oli mekem semmak. Fridom blong relijin i letem wanwan long yumi blong i disaed, blong yumiwan, wanem yumi stap biliv long hem, mo hao yumi laef folem mo tekem aksen folem bilif blong yumi, mo wanem God i wantem luk yumi mekem.
Ol hadwok blong katemaot ol fridom blong relijin olsem, i no niu. Truaot long histri, ol pipol we oli gat bilif oli bin safa bigwan long han blong ol nara man. Ol memba blong Jos Ia blong Jisas Kraes blong Ol Lata-dei Sent, oli no defren long hemia.
Stat long stat, plante we oli bin stap lukaotem God, oli wantem kam long Jos ia from ol tijing blong tabu doktrin blong hem, we i tekem fet long Jisas Kraes mo Atonmen blong Hem, fasin blong sakem sin, plan blong stap hapi, mo Seken Kaming blong Lod blong yumi.
Fasin blong agens, blong mekem nogud man, mo vaelens, oli spolem fas lata dei profet, Josef Smit mo olgeta we oli stap biaen long hem.
Long medel blong ol trabol long 1842, Josef i bin pablisim 13 stamba pos blong Jos ia we i stap gro, mo wan i go olsem: “Mifala i talemaot we mifala i gat raet blong wosipim Hae God long wei we tingting blong mifala i wantem, mo mifala i letem evri man blong gat sem raet ia; letem olgeta blong wosip long fasin we oli wantem, long weaples we oli wantem, o wanem we oli wantem.”4
Toktok blong Hem i tekem yu insaed, i mekem yu fri, mo gat respek. Hemia stamba blong fridom blong relijin.
Profet Josef Smit tu i bin talem:
“Mi mi talem klia long fored blong Heven se mi mi rere blong ded blong difendem ol raet blong wan Presbiterian, wan Baptis, o wan gud man blong eni nara fet; from se, semfala prinsipol we bae i wokbaot long ol raet blong Ol Sent, bae i wokbaot antap long ol raet blong Ol Roman Katolik, o eni nara fet we i no popula, o i no strong tumas blong difendem olgetawan.
“Hem i wan lav blong fridom we i givim insperesen long sol blong mi—fridom long raet mo relijin blong ful man kaen.”5
Be stil, ol fas memba blong Jos oli bin atakem olgeta, mo ronemaot olgeta longlongwe, aot long Niu Yok i go long Ohaeo, kasem Misuri, taem we gavna i putum wan oda se bae oli tritim ol memba blong Jos olsem ol enemi mo oli mas karemaot laef blong olgeta, o oli mas ronemaot olgeta long stet.”6 Ol Sent oli ronwe i go long Ilinoa, be trabol ia i gogohed. Wan grup blong ol rabis man oli kilimded Profet Josef, from oli ting se sapos oli kilimded hem, bae i prapa spolem Jos mo seraotem ol man blong hem. Be ol fetful oli stanap strong. Man we i kam afta long Josef, i bin lidim plante taosen long wan wokbaot blong 1300 mael i go Wes long wanem yumi save tedei olsem Stet blong Yuta.7 Ol bubu blong mi oli pat blong ol fas paeonia pipol ia.
Long ol taem blong bigfala agens ia, Jos ia blong Lod i bin gro sloslo i kasem 17 milian memba, 8 mo ova haf i stap laef aotsaed long Yunaeted Stet.
Long Epril 2020, Jos blong yumi i selebretem namba 200 aniveseri blong Restoresen blong gospel wetem wan ofisol toktok i go long wol, we Fas Presidensi mo Kworom blong Olgeta Twelef Aposol i bin rere long hem. I stat i talem: “Mifala i talem tabu toktok ia, se God i lavem ol pikinini blong Hem long evri nesen blong wol.”9
Presiden Russell M. Nelson we yumi lavem i talem i go moa:
“Mifala i biliv long fridom, mo fasin blong tritim evri pikinini blong God i semmak.
“Yumi evriwan, i ol brata mo sista, wanwan i wan pikinini blong wan Papa long Heven we i lavem yumi. Pikinini blong Hem, Lod Jisas Kraes, i stap invaetem evriwan blong go long Hem, ‘blak, waet, prisena mo friman, ol man mo ol woman’ (2 Nifae 26:33).”10
Wetem mi, lukluk long fofala wei we sosaeti mo wanwan man mo woman i tekem samting aot long fridom blong relijin.
Faswan. Fridom blong relijin i givim ona long fas mo seken hae komanmen we i putum God long medel blong laef blong yumi. Yumi ridim long Matiu se:
“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.”11
“Mo narawan we i kolosap i semmak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”12
Nomata oli stap long wan japel, wan haos blong prea, wan moske, o wan salsal, ol disaepol blong Kraes mo evriwan oli sem kaen man blong biliv, oli save talemaot strong hat mo tingting blong olgeta long God taem oli stap wosipim Hem mo oli wantem blong givim seves long ol pikinini blong Hem.
Jisas Kraes i stret eksampol blong kaen lav mo seves ia. Long taem blong seves blong Hem, Jisas i kea long olgeta we oli pua,13 i hilim ol sikman,14 mo olgeta we oli blaen.15 Hem i fidim ol man we oli hanggri,16 i openem ol han blong Hem long ol smol pikinini,17 mo Hem i fogivim olgeta we oli mekem i rong long Hem, mo tu, olgeta we oli hangem Hem long kros.18
Skripja i talem se Jisas “i go mo mekem ol gudfala wok.”19 I semmak long yumi.
Seken. Fridom blong relijin i pusum man blong i talemaot ol bilif, hop mo pis.
Olsem wan jos, mifala i joen wetem ol nara relijin blong protektem ol pipol blong eni fet mo tingting, mo raet blong olgeta blong talemaot wanem we oli biliv strong long hem. Hemia i no minim se mifala i akseptem ol bilif blong olgeta, mo semmak long olgeta, be yumi gat fulap samting i semmak bitim wetem olgeta we oli wantem sarem maot blong mifala.
I no longtaem i pas, mi ripresentem Jos long Yia G2- Interfaith Forom long Itali. Oli leftemap tingting blong mi, taem mi mit wetem ol lida blong ol gavman mo fet raon long wol. Mi luksave se ol kil mo ol samting we oli defren, oli save stretem mo oli save kam oraet taem yumi ona long God, Papa blong yumi evriwan, mo Jisas Kraes, Pikinini blong Hem. Hae Man blong Hilim evri man, i Lod mo Sevya blong yumi, Jisas Kraes.
Mi gat wan intresting taem, taem mi bin wantem endem toktok blong mi. Olgeta seven spika fastaem long mi, oli no klosem toktok folem tradisen blong bilif blong olgeta, o long nem blong God. Taem mi bin stap toktok, mi tingting long miwan: “?Bae mi talem tangkyu nomo, mo sidaon, o bae mi endem long nem blong Jisas Kraes?” Mi tingbaot huia mi, mo mi bin save se bae Lod i wantem mi talemaot nem blong Hem blong endem toktok blong mi. Mekem se mi mekem. Taem mi luk i gobak, i bin wan janis blong mi talemaot bilif blong mi, mo mi bin gat fridom blong relijin ia blong talemaot witnes blong mi abaot tabu nem blong Hem.
Nambatri. Relijin i givim insperesen long ol pipol blong helpem ol narafala man.
Taem we relijin i kasem fridom blong gro bigwan, olgeta we oli stap biliv, long evri ples, oli stap mekem ol simpol aksen blong seves. Toktok blong bifo blong Ol Man Jiu, “tikkun olam,” i minim “blong riperem o hilim wol ia,” i stap kamaot tedei long ol hadwok blong plante pipol. Mifala i patna wetem ol Katolik jareti, we oli save olsem Caritas Internationalis, Islamik Rilif, mo ol oganaesesen blong Ol Man Jiu, Ol Hindu, Ol Budis, Ol Sikh, mo ol Kristin Man, olsem Salvation Army mo National Christian Foundation. Tugeta, yumi helpem ol milian man long nid, mo i no longtaem i pas, yumi bin helpem ol rifuji wetem ol tenet, ol bag blong slip, mo kaekae,20 mo mifala i givim ol stik meresin, mo stik blong sik polio,21 mo KOVID.22 Lis ia blong ol samting we oli mekem i longwan, be i semmak long ol nid.
I no gat kwestin; ol pipol blong ol fet, we oli wok tugeta, i save mekem bigfala wok. Long semtaem, seves we oli givim long wanwan, oli no tokbaot plante, be i jenisim laef long kwaet fasin.
Mi tingting long eksampol long Buk blong Luk, taem Jisas Kraes i helpem wido blong Nen. Jisas, wetem sam man we oli biaen long Hem, oli kam fas long wokbaot blong wan fenerol blong wan boe we i wan boe nomo blong wan wido. Sapos wido i no gat hem, bae hem i fesem nogud laef long filing, spirit mo vatu. Jisas, i luk fes blong hem we i krae bigwan, i talem: “Yu no krae.”23 Afta, Hem i tajem bed we i tekem bodi, mo ol man oli stop wokbaot.
Nao Hem i talem: “!Mi mi talem long yu, yu girap!”
“Nao dedman ya i girap, i sidaon, mo i stat toktok. Nao Jisas i tekem boe ya, i givim i gobak long mama blong hem.”24
Blong mekem man i laef bakegen long ded, i wan merikel, be evri aksen we i kaen mo wari blong wan we i gat hadtaem i kavenan rod ia we wanwan long yumi i save mekem gud, from yumi save se God i stap wetem yumi.”25
Mo nambafo. Fridom blong relijin i stap wok olsem wan paoa we i joenem man mo i wok strong blong stretem ol valiu mo klin tingting.
Insaed long Niu Testeman, yumi rid abaot plante we oli tanem baksaed long Jisas Kraes, we oli tok agensem doktrin blong Hem: “!Man! !Tok ya i strong tumas! ?Hu i save harem tok olsem?”26
Singaot ia, yumi harem yet tedei long olgeta we oli wantem blong sakemaot relijin aot long ol toktok mo paoa. Sapos relijin i no stap blong help blong sepem fasin blong man, mo i skelem ol taem we i had, ?huia bae i mekem? ?Huia bae i tijim ones fasin, tangkyu fasin, fogivnes, mo fasin blong wet longtaem? ?Huia bae i soem bigfala open han, lav mo sore, mo fasin we i kaen long olgeta we oli fogetem mo purumbut long olgeta? ?Huia bae i akseptem olgeta we oli defren be oli gat raet long samting from se yumi evriwan i ol pikinini blong God? ?Huia bae i openem han blong olgeta long olgeta long nid mo no lukaot blong oli kasem samting? ?Huia bae i gat respek long pis mo fasin blong obei long ol loa we oli hae moa bitim ol fasin blong tedei? ?Huia bae i ansa long singaot blong Sevya: “Go mo mekem i semmak?”27
!Yumi, bae yumi mekem! Yes, ol brata mo sista. Bae yumi mekem.
Mi stap invaetem yu blong sapotem wok blong fridom blong relijin. Hem i wei blong soemaot prinsipol blong fridom blong mekem joes, we God i bin givim.
Fridom blong relijin i givim balens long ol tingting we oli kompit agensem olgeta. Gud samting we relijin i mekem, i help, mo ol evri dei aksen blong lav we relijin i givim insperesen from, oli dabdabol taem yumi stap protektem fridom blong talemaot mo tekem aksen long ol strong bilif.
Presiden Russell M. Nelson i profet blong Lod we i stap laef. Mi testifae se Jisas Kraes i stap lidim Jos ia mo i gaedem Jos ia. Hem i pemaot ol sin blong yumi, Hem i hang long kros, mo i laef bakegen long nambatri dei.28 From Hem, yumi save laef bakegen blong evri taem we i no save finis, mo olgeta we oli wantem, oli save stap bakegen wetem Papa we i stap long Heven. Trutok ia, mi talemaot long ful wol. Mi mi talem tangkyu from fridom we mi gat blong mekem hemia. Long nem blong Jisas Kraes, amen.