Misinari Seves I Blesem Laef blong Mi blong Oltaem
Mi prea se yufala ol yang man mo yang woman, mo papa mo mama blong yufala bae yufala i luk mo bae yufala i save olsem wanem misinari seves bae i blesem laef blong yufala blong oltaem.
Tangkyu, Presiden Nelson, blong serem bakegen toktok ia abaot misinari seves.
Ol brata mo sista. Sam yia i pas taem mi stap toktok long jeneral konfrens, lef saed ae blong mi i bin kasem wan sik blong ae, we i gohed mowas kasem tedei, mi nomo lukluk gud wetem wan saed ae ia.
Taem mi stap fesem jalenj ia, mi stap glad moa long ol narafala wei blong lukluk, olsem blong luksave samting. Taem mi luk i gobak long laef blong mi, mi kam blong luksave ol eksperiens we oli mekem sam jenis we i moa impoten. Wan long ol eksperiens ia, i olsem wanem misinari seves blong mi, olsem wan yang man long Inglan, i blesem laef blong mi mo i stretem fiuja blong mi long saed blong spirit.
Mi luklukbak long olsem wanem jalenj blong ekonomi long taem ia i joenem Bigfala Harem Nogud long ol yia 1930 we i lidim famli blong mi oli fesem wan had laef. Papa blong mi, long taem ia i spendem moa taem blong sevem laef blong kampani blong hem blong salem trak mo sapotem wan famli, mekem se papa mo mama oli no bin atendem jos blong wan taem.
Nomata we mifala i no bin atendem jos seves olsem wan famli, hemia i no stopem mi blong stap atendem samsamtaem wetem ol fren blong mi.
Long taem ia, blong go long wan misin, i stap oltaem long maen blong mi, be mi no tokbaot samting ia wetem papa mo mama blong mi.
Taem mi atendem kolej, sam fren mo mi mifala i disaed blong go long misin. Mi go luk bisop, mi fulumap misinari aplikesen long taem we papa mo mama tufala i aot long taon. Taem tufala i kambak, mi sapraesem tufala wetem nius ia se oli singaotem mi blong givim misinari seves long Inglan. Mi glad we tufala i harem gud mo sapotem mi long desisen ia, mo ol gudfala fren we oli helpem mi blong mi jusum blong givim seves ia.
Misinari seves blong mi i mekem mi rere blong kam wan gudfala hasban mo papa mo blong gat sakses long bisnis. I mekem mi rere tu blong givim ful laef blong mi long seves blong Lod mo Jos blong Hem.
Long Epril 1985 jeneral konfrens, oli givim wok ia long mi blong mi toktok long prishud sesen. Mi givim toktok blong mi i go long ol yang man. Mi bin toktok abaot blong mekem rere blong givim seves olsem wan misinari. Mi bin talem se, “Long evri trening we mi kasem long ol wok blong mi long Jos, i no gat wan i bin moa impoten long mi bitim hemia mi bin kasem olsem wan elda blong naentin yia we i stap sevem wan fultaem misin.”1
Lod i save yu. Taem yu stap mekem misin blong yu, bae yu kasem ol eksperiens we bae i helpem yu blong kam blong save Hem gud moa. Bae yu gro long saed blong spirit taem yu stap givim seves long Hem. Long nem blong Hem, bae oli sendem yu blong mekem ol wok blong givim seves long ol narawan. Bae Hem i givim ol eksperiens long wetem ol toktok blong Tabu Spirit. Lod bae i givim raet long yu blong tij long nem blong Hem. Yu save soem long Hem se Hem i save trastem yu mo i save dipen long yu.
Long las faef manis, Elda Jeffrey R. Holland mo Elda Quentin L. Cook, we oli bin ol misinari tu we oli mekem seves blong olgeta long Inglan, oli bin joenem mi, mo mifala i bin visit wetem ol memba mo ol misinari long naesfala ples ia. Taem mifala i stap longwe, mi luklukbak long eksperiens blong mi olsem wan yangfala misinari. Mi testifae se misin blong mi i ples we mi kam blong save se Papa blong mi long Heven mo Sevya blong mi, Jisas Kraes, Tufala i save mo lavem mi.
Mi bin gat blesing blong gat tu misin presiden, Selvoy J. Boyer mo Stayner Richards, wetem ol gudfala kompanion blong olgeta Gladys Boyer mo Jane Richards. Lukluk i gobak, mi luksave se tufala i trastem mi mo lavem mi. Tufala i tijim mi long gospel. Tufala i givim plante wok long mi. Tufala i givim plante wok mo ol responsabiliti long saed blong lidasip we i olsem ol jalenj blong helpem mi i gro mo i mekem mi rere long wan laef blong givim seves.
Mi bin gat janis tu blong kasem kol we i kam long Presiden Spencer W. Kimball blong prisaed ova long Kanada Toronto Misin wetem dia waef blong mi, Barbara, mo fofala pikinini blong mifala. Presiden Kimball i singaotem mifala blong givim seves long Epril 1974, sot taem afta hem i givim misinari mesej blong hem we taetol blong hem i “Taem Wol Ia Bae I Jenisim Laef.”2 Long mesej blong hem ia, Presiden Kimball, i eksplenem visen blong hem, blong olsem wanem gospel ia bae oli tekem i go long evri ples long wol. Hem i singaotem moa misinari raon long wol. Hem i rimaenem mifala long wanem we Lod i wantem “Se evri man i … leftemap voes blong woning long ol man we oli stap long wol.”3 Presiden Kimball i tijim abaot oli wantem ol yang man blong givim seves long wan misin i kam wan topik blong storian long hem long ol hom raon long wol. Wanem oli wantem i no jenis. Mi glad tumas se Presiden Nelson i talem bakegen wanem Lod i wantem long moning ia.
Kolosap 10 yia i pas taem Presiden Thomas S. Monson i bin anaonsem blong katemdaon yia blong ol yang man mo yang woman.4 Long lukluk blong mi, wan fas risen blong jenis ia i blong givim moa janis long ol yut blong yumi blong jenisim laef blong olgeta taem oli stap givim seves long wan misin.
Olsem wan Aposol blong Lod Jisas Kraes, mi stap nao singaotem yufala ol yang man, mo ol yang woman ia we oli wantem blong givim seves long wan misin, blong stat naoia blong toktok wetem ol papa mo mama abaot blong go long wan misin. Mi stap invaetem yufala blong tokbaot tu wetem ol fren blong yufala abaot givim seves long wan misin, mo sapos wan long ol fren blong yufala i no sua abaot givim wan seves, leftemap tingting blong olgeta blong toktok wetem bisop blong olgeta.
Mekem komitmen long yufala mo long Papa blong yu long Heven se bae yu givim seves long wan misin mo we long taem naoia bae yu traehad blong kipim hat, han, mo ol maen blong yufala i stap klin inaf. Mi stap invaetem yufala blong kasen wan strong testemoni abaot gospel we i kambak we i blong Jisas Kraes.
Papa mo mama blong ol naesfala yut ia, yufala i gat wan impoten rol long mekem rere ol yut ia. Stat tedei blong tokbaot misinari seves wetem ol pikinini ia. Mifala i save se famli i wan moa impoten paoa blong helpem ol yang man mo yang woman blong yumi oli rere.
Sapos yu stap yet long yia we yu save givim seves long wan misin, be yu no bin givim seves ia yet from wol sik ia o ol nara risen, mi stap invaetem yu blong givim seves naoia. Toktok long bisop blong yu, mo rere blong givim seves i go long Lod.
Mi stap leftemap tingting blong yufala ol bisop blong helpem ol yang man mo yang woman, olgeta we yia blong olgeta i blong go long wan misin, blong oli rere blong givim seves, mo mi stap leftemap tingting blong ol bisop blong faenem olgeta we yia blong olgeta i naf be oli no go yet long misin. Invaetem evri yang man blong kam wan misinari, mo ol yang woman tu we oli gat strong tingting ia blong givim seves.
Long ol misinari we oli stap givim seves naoia, mifala i talem tangkyu. Misin blong yufala i tekem ples taem wol sik i stap raon. Olsem risal blong hemia, misin eksperiens blong yufala i no semmak long misin eksperiens blong mi o ol eksperiens blong ol misinari we oli bin givim seves bifo yia 2020. Mi save hemia i no bin isi. Be nomata long ol hadtaem ia, Lod i bin gat wan wok blong yu blong mekem, mo yu bin mekem gud tumas. Olsem eksampol, yu bin yusum teknoloji long niufala wei blong faenem olgeta we oli rere blong lanem abaot gospel we i Kambak blong Jisas Kraes. Taem yu givim seves wetem strong tingting mo wetem evri samting we yu save mekem, mi save se Lod i glad long hadwok blong yu. Mi save se seves blong yu bae i blesem laef blong yu.
Taem bae yu rilis long misin blong yu, tingbaot se yu no bin rilis from aktiviti insaed long Jos. Bildimap yu antap long ol gudfala samting we yu lanem long misin blong yu, gohed blong mekem testemoni blong yu i strong, wok had, prea, mo stap obei long Lod. Stap tru long ol kavenan we yu bin mekem. Gohed blong blesem mo givim seves long ol narawan.
Mi prea se yufala ol yang man mo yang woman, mo papa mo mama blong yufala bae yufala i luk mo bae yufala i save olsem wanem misinari seves bae i blesem laef blong yufala blong oltaem. Bae yufala i save insaed long maen blong yufala mo filim long hat blong yufala paoa ia blong invitesen ia we Lod i bin givim long ol bigfala misinari ia we oli ol boe blong Mosaea. Hem i talem, “Go … mo stanemap toktok blong mi; yet, yufala i mas save wet longtaem long fasin blong gotru long hadtaem wetem longfala tingting mo ol strong taem, blong yufala i save soem ol gudfala eksampol … tru long mi, mo bae mi mekem yufala i kam wan tul long ol han blong mi, blong mekem se mi save sevem plante sol.”5
Bae God i blesem ol yut blong Jos blong gat strong tingting blong rere mo givim seves long Hem, i prea blong mi wetem tingting i stap daon, we mi givim long moning ia long tabu nem blong Lod Jisas Kraes, amen.