“Elda Denelson Silva,” Liahona, Mei 2022.
Elda Denelson Silva
Jeneral Atoriti Seventi
Trip ia blong 6,400 kilometa blong go mo kambak, stat long Luanda, Angola i go kasem Sao Paolo, Brasil, i givim Elda Denelson Silva mo waef blong hem, Regina, taem blong save luklukgud long wan kwaet toktok blong Spirit. Afta we hem i givim seves olsem wan misin presiden, Elda Silva i filim se hem mo waef blong hem oli no nidim blong pem wan haos.
Bae oli salem haos blong tufala bifo oli aot long misin. Oli bin plan blong pem wan niu hom taem oli kambak be tufala i filim Spirit i talem long tufala blong wet. “Ol haos long Brasil, oli no wan propeti we yu save putumaot blong salem, mo afta, bae i kwik blong man i pem,” Elda Silva i talem. “I save tekem plante dei mo manis, mo yia.”
Sista Silva, i talem se oli bin lukluk nomo se Papa long Heven i stap lidim rod blong tufala bifo long misin, mo bae i lidim tufala bakegen afta long misin. “Mitufala i disaed tugeta blong wet smol taem,” hem i talem. Oli jusum blong rentem wan haos.
Semmak olsem blong salem haos long Brasil, ansa i no kam afta sam dei, o manis, o iven wan yia. Ansa i kam moa long tu yia afta, taem we Elda Silva i kasem wan koling blong givim seves olsem wan Jeneral Atoriti Seventi.
“Yumi mas gat kaen maen ia, se, sapos Hem i askem yumi blong mekem wan samting, ansa blong yumi i, yes, oltaem,” Elda Silva i talem. “Sapos ansa i no, yes, oltaem, hemia i lego spes blong wan ‘no’, o ‘ating’.” Be, long saed blong Sevya, hem i eksplenem, “i no gat spes blong ‘no’ o ‘ating’ long Getsemane.”
Denelson Urbano da Silva i bon i kam long wol ia long 4 Julae 1965, long Resife, Brasil; papa mo mama blong hem i Domingos Urbano da Silva mo Maria José de Almeida Silva. Hem i groap long Resife mo i bin sil long Regina Maria de Carvalho Silva long Sao Paolo Brasil Tempol, long Mei 1987. Kapol ia i gat tu pikinini.
Hem i gat wan bajela digri blong bisnis administresen (data) Hem i bin wok long travel indastri blong 30 yia.
Stat long 2016 kasem 2019, Elda Silva i bin stap olsem wan misin presiden wetem waef blong hem long Angola Luanda Misin. Hem i bin givim seves tu olsem wan Eria Seventi, stek presiden, bisop, hae kaonsela, mo fultaem misinari long Brasil Kuritiba Misin.