Ol Sista Oli Kam Strong Moa mo Stap Givim Seves

Long sosol media mo fes tu fes, Rilif Sosaeti Jeneral Presidensi i bin gohed long wok blong olgeta blong mekem ol famli oli kam strong moa, mo mekem wanwan man mo woman i kam strong moa, mo oli givim seves long ol pikinini blong God raon long wol.

Long Maj 2022, Presiden Jean B. Bingham i bin toktok abaot namba 180 aniveseri blong stat blong Rilif Sosaeti. Tedei, hem i talem se i gat seven mo haf milian sista we oli stap helpem olgeta we oli safa, help blong sevem ol sol, mo stap mekem ol semfala stamba tingting blong Rilif Sosaeti we hem i stanemap long 1842.

Presiden Bingham mo Sista Sharon Eubank, Fas Kaonsela insaed long Rilif Sosaeti Jeneral Presidensi mo presiden blong Ol Lata-dei Sent Jareti, i visitim plante kantri long Medel Is. Long Kero, Ijip, Presiden Bingham i talem se hem i sapraes long tru lav we Ol Sent oli gat long wanwan long olgeta. Presiden Bingham mo Sista Eubank oli bin visitim tu wan rifuji kamp long Kedistan, ples we Jos i bin help blong bildim ol haos.

Sista Reyna I. Aburto, Seken Kaonsela, i visitim Spen wetem Sista Michelle D. Craig, Fas Kaonsela long Yang Woman Jeneral Presidensi. “Pis blong God i stap gogohed mo i katem evri samting we i nogud long wol ia,” Sista Aburto i talem long wan divosen blong ol pikinini mo ol yut.

Tru long sosol media, Rilif Sosaeti Jeneral Presidensi i bin putum ol mesej abaot fasin blong givim helti kaekae long ol pikinini, gud laef, mo helt, mo i kodinetem ol wok blong Jos Welfea mo Indipenden Laef seves blong tekem mesej i go long ol papa mo mama abaot ol gud saed blong fasin blong wasem han, klin wota blong drink, ol helti joes blong kaekae, fasin blong givim titi long pikinini, stik meresin, klin hom, mo ol visit long klinik.

Presidensi i leftemap tu tingting blong ol sista blong oli serem ol filing blong olgeta abaot wanem i pusum olgeta blong tekpat moa long Rilif Sosaeti, mo abaot wei blong mekem Rilif Sosaeti i akseptem moa pipol mo i givim moa sapot.