J. Anette Dennis

Fas Kaonsela long Rilif Sosaeti Jeneral Presidensi

Afta we hem i spendem taem olsem wan pikinini long ol defren ples raon long Yunaeted Stet, Sista Jeannie Anette Dennis i bin ting se ol drim blong hem oli kamtru taem famli blong hem i muv i go long Kotenwud Haet, Yuta.

“Mi ting se evriwan long Yuta i wan memba blong Jos, mo bae i wan gudgudfala ples blong stap ia,” hem i talem.

Long ol fas dei blong hem long Yia 9, hem i glad se oli invaetem hem long wan pati. Be wan gel we i kam wan bes fren blong hem, i bin givim woning long hem se ol pipol long pati ia, bae oli yusum ol drag.

“Mi lanem kwiktaem se wol i stap long evri ples,” hem i talem. Testemoni blong hem, mo wan hom i wan senta blong gospel, i bin kipim hem i strong truaot long sekendri skul.

Hem i bon i kam long wol ia long Provo, Yuta, long Jun 1960, mo Jeannie Anette Herrin i fas pikinini blong Curtis Lamar mo Patricia Joanne Herrin. Tufala i gat seven pikinini. Wok blong papa blong hem i bin tekem famli i go long Misisipi, Tenesi, Aeowa, Nebraska, mo Yuta.

Hem i bin stadi long saed blong praemeri edukesen long Brigham Yang Yunivesiti mo i mekem maena blong hem long Spanis lanwis. Long taem blong wan trip blong klas i go long Meksiko, hem i bin mitim Jorge Dennis, mo tufala i stat blong raetraet long tufala.

Taem we boe ia i muv i go long Sol Lek Siti wan yia afta we hem i stap long Inglis lanwis, tufala i stat blong deit. Sam manis afta, tufala i promes blong mared. Tufala i bin mared long Sol Lek Tempol long namba 4 Septemba 1980. Tufala i gat fo pikinini mo naen apupikinini. Oli stap laef long Baontiful, Yuta.

Sista Dennis, we oli sastenem long namba 2 Epril, bae i stat blong givim seves olsem Fas Kaonsela insaed long Rilif Sosaeti Jeneral Presidensi long namba 1 Ogis. Hem i stap givim seves long Praemeri jeneral advaes kaonsel mo hem i givim seves wetem hasban blong hem long Devis Kaonti komunikesen kaonsel.

Stat long 2013 i go kasem 2016, hem i bin givim seves wetem hasban blong hem taem we hem i bin prisaed ova long Ekuado Gayakil Wes Misin. Hem i bin givim seves tu olsem wan asisten long metron blong Gayakil Ekuado Tempol, stek Rilif Sosaeti sekretari, wod Praemeri Presiden, wod Rilif Sosaeti mo Yang Woman presidensi kaonsela, Rilif Sosaeti tija, mo tempol odinens wokman.